照道理，因為家姐蔣雅文，大家才開始認識妹妹蔣雅詩。傳媒常以「活在姊姊陰影下」來形容蔣雅詩，有沒有想過，只係因為大家未認真了解此女子，你以為永遠係家姐幫細妹？偏偏蔣雅文曾在訪問中表示︰「我的個性比較內向像被框框著，但妹妹卻是可以瓦解這個框框的人。」家姐活得開心全靠這個妹。
事實上，兩姊妹唔止唔似樣，個性氣質也迴異、就連衣著品味亦南轅北轍，卻是一凹一凸，相輔相承。我也是認識雅文在先，雅詩在後。同後者相處過後，好難唔覺得「呢條女好正」，唔係單睇外表那種「正」，而是其豪邁爽朗的個性實在得人鍾意。認真睇，其實Ziya都係靚女一名，只係麻甩爽直個性及型格造型與時下典型「女神」有點差異。佢話「紫微斗數話我係男人靈魂女人身體！」又形容得幾正。
男友就係鍾意我癲癲得得！
數年前裸辭移居台灣，繼成立古著網店Aphasia_後，去年與姊姊合力打造心地日常二號店。今年回港追夢，為著成為專業配音員而努力之際，還交了個男友，結束「網上招親」的日子。蔣雅詩成日話自己性格似男人，咁「男人」的另一半又是怎樣的男人？
Ziya︰「大約一年前曾經試過爛面，醫生話因為壓力太大導致荷爾蒙失調，家姐話一定係因為我無男朋友啦，當時諗落又好似好有道理喎﹗哈哈﹗而家拍咗拖好似多咗個屋企人咁，多咗個人同我分享，對我嚟講好大變化。我諗我都算係一個不拘小節嘅人，豪邁爽朗型咁啦，大多數時候我都無咩所謂，紫微斗數都話我係男人靈魂女人身體！我對住男友都係咁樣，唔會戴面具扮小鳥依人，佢就係鍾意我癲癲得得﹗不過對於生活空間我就有少少所謂，可能因為好驚污糟、所以呢方面就幾多要求。早前同男友去台灣，佢肥咗廿磅，我就瘦咗十磅，應該係因為我成日食剩好多嘢要佢幫我食晒啦﹗咪以為我成個男人咁就以為我唔識煮食，只要有食譜我就識整，我嘅撚手小菜係炆肉，即係愈炆愈入味嗰種，好正㗎﹗」
如果無得打機睇漫畫會死
訪問當日，相約Ziya在一家她常去的超級市場等，她早到了所以發一個短訊給我「我到了，喺超市門外睇漫畫，see you﹗」我心想，有無咁鍾意睇漫畫啊？訪問途中，Ziya三番四次遊說我和攝影師們下載「傳說對決」，我問她「你有無咁鍾意打機啊？」率直的Ziya一秒即回︰「如果無得打機、無得睇漫畫，我會死﹗」咁講無得輸啦！Ziya︰「有無玩傳說對決？作為一個成年人，如果你無玩，喺呢個世界好難生存。好好玩，真心，快啲拎部電話嚟download﹗唔洗驚，我一開始玩嗰時都好渣，我會取笑你、鬧到你叻，記住唔好在意別人目光，最緊要自己開心。不過而家少咗玩傳說對決，多數玩PS4嘅Monster Hunter，我同男友都好鍾意打機，鍾意到屋企有兩部PS4 連線打 ，哈哈﹗唔明點解啲人話打機唔健康又嘥時間，其實打機可以令人團結，令身心健康，唔會嘥時間㗎，去大便嗰陣先玩幾舖咪得囉﹗我由小學開始就好鍾意打機同埋睇漫畫，佢哋同我嘅關係密切到好似親人咁！如果打機、漫畫要揀一樣，呢個問題同要人揀跟老竇定老母一樣，好殘酷……點揀都唔公平！所以我選擇唔答！」
覺得自己著咩好睇就著乜
「我自小嘅夢想就係成為配音員，配音員呢個行業好窄，而且都係行師徒制，今年剛回港嘅時候跟隨一位覺得我有潛質嘅資深配音員學習，最近跟咗另一位姓周嘅老師學習新嘅配音技巧，另外都簽咗經理人公司，工作方面頗為充實。古著網店Aphasia_仍然會繼續，本身我都鍾意fashion，因為開設網店 ，反而令我吸收更多唔同地方嘅時裝資訊。可能因為我本身比較男仔頭、又有啲粗魯，所以平時著嘅衫、入嘅貨都係偏向中性風，我覺得著太女人嘅衫成日要就住就住，出街出得唔自在。簡單啲講，我鍾意咩就著咩啦，唔會盲目跟住潮流走，潮流對我嚟講只係用作參考，最緊要覺得自己著咩好睇就著乜！」
曾幾何時， 蔣雅詩話「因為姐姐太漂亮，小時候也會自卑」今時今日妹妹長大了，唔止識主動追尋夢想，說話直接唔兜圈，更懂得自我提示「記住唔好在意別人目光，最緊要自己開心。」有樣有智慧，家姐因佢而自豪就真。
#蔣雅詩 #十大最愛
1）食物︰CP 蜜糖雞翼
2 ）飲品︰水蜜桃口味嘅水
3 ）歌曲︰〈娛樂人生〉陳蕾
4 ）電影/電視劇︰《百萬日元的女人們》
5） 書/雜誌︰《CLUEL》
6 ）地方/店舖︰屋企（最近打Monster Hunter打到唔捨得出街）
7 ）網站︰DM5 （睇漫畫）
8 ）顏色︰藍色
9 ）講嘅一句說話 ︰「一陣食咩」」（keep住24小時不停問）
10 ）其他人點叫你︰蔣雅詩
好𢯊女子︰
Ziya Chiang 蔣雅詩 (Aphasia_網店店長/實習配音員)
Facebook / 蔣雅詩
Instagram / ZiyaChiang
Weibo/ ZiyaChiang蔣雅詩