樣靚身材正，自然多人留意，偏偏有些得天獨厚的女生不希望大家只在意她的外表，正如Renci Yeung (楊偲泳)，最想大家留意她的演技，因為「女神」的正職是演員。兩年多前的一首〈矛盾一生〉紅歌又紅人，歌者JW直達小天后寶座之際，MV女主角Renci亦令我們留下深刻印象。
自此Renci開始擠身「文青女神」之列，當大家發現她除了是演員，更是香港排球乙組聯賽球隊匯青的球員，便將焦點放在球衣下的美好身段，又多了個「排球女神」的稱號。Renci坦言dislike︰「勁唔鍾意呢個名，點可以將排球同女神放埋一齊﹗」通常大家睇得起一個人先叫佢「女神」啫﹗Renci︰「都係嘅，不過真係唔鍾意人叫我『排球女神』，sorry，我份人好直接﹗」咁又唔洗sorry，直接咪好囉，做訪問唔洗兜圈。
#反公主病 #唔會扭擰
很多行內人不喜歡戶外拍攝，因為天氣會影響進度，而且服飾也很易弄髒。這天Renci應筆者要求，到她常去到海旁進行拍攝，攝影師叫Renci隨意做平日來到海旁真的會做的事，結果「女神」二話不說跨出欄杆「睡」在石級上。我問她不怕髒嗎？她瀟灑地拋出一句︰「唔怕，件衫好平﹗」言談間Renci道出她最怕與姿整的人相處，我都係喎，咁啱嘅﹗Renci︰「除咗排球，我都好鍾意篤波 (桌球) ，細個嗰陣會同哥哥開住YouTube睇人篤波，佢又會教我篤波，以前成日去旺角波樓，連波樓大叔都認得我﹗可能因為成日埋男人堆，加上都幾多男性朋友，就連我身邊唯獨是嗰幾個閨密女性全部都好似男人咁，佢哋係唔會扭擰嘅，我諗我都好難同公主病人做朋友。好怕有啲人好姿整人，我鍾意整污糟啲鞋，(唔錫住都算點解要整污糟？) 有啲鞋要污糟先靚，例如CONVERSE啊、adidas STAN SMITH嗰啲，白雪雪邊靚？」
#極端性格 #矛盾一生
Renci︰「幾乎每次訪問都會問我對『女神』稱號有咩睇法，我都唔明『文青女神』呢個名點嚟，最唔鍾意人哋叫我『排球女神』，點可以將排球同女神放埋一齊﹗可以係『排球女將』、『排球女人』、『排球得得B』都得﹗不過都聽過啲做media嘅朋友話，標題加咗『女神』、『男神』就會多好多人click入去睇，為咗引起大家興趣無辦法啦﹗我唔介意人哋叫我『女神』，只係我本身性格好極端，同『女神』個名唔係好夾。我係一個零同一百嘅人，我係無雙表姐同時係程大嫂，我同女仔一齊打排球，又會同男仔一齊打桌球。我好鍾意食麥樂雞，有時都鍾意煮嘢食俾我在乎嘅人。我係一個好樂觀嘅人，同時係一個好悲觀嘅人。我喺人前好慢熱，但係私底下對住自己好在乎嘅人，我可以毫無保留咁表達我嘅愛。我鍾意運動，又鍾意影相。我有時鍾意一大班人出嚟玩，但亦都鍾意一個人食飯、一個人搭叮叮，一個人睇戲。你會成日喺蕃茄麵見到我嘅蹤影，因為我最鍾意飲茶走或者可樂。」〈矛盾一生〉當中有兩句很洗腦「矛盾只因深愛著，你知嗎？」有理由相信，Renci生活中的矛盾主要是基於她的極端個性，不過個性極端又如何？好動又好靜，能文也能武，即是份人無乜所謂、唔執著啦，幾時都話有酒窩的女生唔止特別sweet，仲特別易相處。
#寫字學會 #終生演員
若有留意Renci 的社交平台，應該會發現她愛不定期上載手寫歌詞的相片，並附加hashtag「#寫字學會」，是公諸同好還是另有內情？原來Renci愛透過寫字來抒發及記錄情感。雖然對小事可以不拘小節，但對寫歌詞這回事，Renci可是很執著，寫得唔靚一定要寫過﹗跟對待演員的身份一樣，絕對認真，希望能做好呢份預咗打一世的工。Renci︰「由細到大我都好憎做幕前，中學做話劇嗰陣亦唔想喺好多人面前表演，試過讀書嗰陣做model搵錢，初出來工作時擔任網上雜誌編輯，嗰陣都係為打工而出鏡。直到經理人Tim Lui (Rubberband主音6號的太太) 話佢老公有個MV想搵我拍，嗰陣一拍完個MV就好似撻著咗團火咁，突然搵到一樣嘢唔係為打工而做，好開心！我覺得自己好好彩，入行第一個就係跟廖啟智老師上演戲班。最初壓力較大、因為佢講嘢比較深，記得講咩都仲要消化。之後我又有跟秋生同埋Olivia (甄詠蓓)嘅神戲劇場學習，由basic開始再學。朋友問我有無set target打算留喺呢行幾耐，嗯…… 演技上永遠有不足，演員對我嚟講係一生嘅職業，我好想成為一個可以代表香港嘅香港演員。」目標明確，加油Renci！
#楊偲泳 #十大最愛
1）食物︰麥樂雞
2 ）飲品︰可樂
3 ）歌曲︰方大同的歌
4 ）電影/電視劇︰《家有囍事》
5） 書/雜誌︰《Whatever you think think the opposite》
6 ）地方/店舖︰挪威
7 ）網站︰沒有啊﹗
8 ）顏色︰藍色
9 ）講嘅一句說話 ︰「百花釀鵝掌，多謝各位﹗」
10 ）其他人點叫你︰華安
好𢯊女子︰
Renci Yeung 楊偲泳(演員)
Facebook / Renci Yeung
Instagram / renciysw