唔扮嘢做自己﹗
「我人生得高，個樣令你羨慕！」呢啲歌詞已經脫晒節，今時今日，最值得自豪嘅當然係忠於自己嘅生活態度！作為一個好𢯊女子，無論對住朋友、男友、屋企人都保持一貫率直、豪爽、不拘小節的一面，夠true才是態度！
不拘小節唔代表不修邊幅，個性率直的女生係不拘小節得嚟又帶點小執著，執著做自己喜歡的事、過自己享受的生活……如果你都係夠true的率直女，應該會對以下十種生活態度有共鳴，有共鳴自然會暗爽。率直女之間當然還有更多共通點，一次邊講得晒，講住十樣精髓先啦﹗
總有張凳放滿衫！
屋企總有一張凳唔係用嚟坐，而係唔知由幾時開始變成滿佈衫褲嘅「擺設品」。每次拎衫都要有特別技巧，絕對係力量與平衡力的考驗，父母可能當呢堆係垃圾，但率直女hea擺得來都會擺得有格調，襯得起型格家居。
享受廁所私空間！
好多人認為廁所是私隱度最高、令自己最放鬆的空間，所以除咗日常梳洗，最正莫過於坐喺廁所板打吓機、捽吓腳趾、講吓電話……邊個話廁所係臭嘅？呢個時候率直女同閏蜜傾得㷫起，盡情大聲笑大聲叫，播放環迴立體聲！
戴帽救披頭散髮！
一帽遮三醜，就算前一晚無沖涼、無洗頭，又或者賴床遲起身唔夠時間梳洗，只需要一頂有型有款嘅帽子，就可以救返你整日嘅造型，你話我髮型唔企理咩，唔係啊，邊有披頭散髮？
不經不覺腿張開!
細個阿媽成日話：「女仔人家要合埋腳坐!」真係諗唔明點解要咁坐？雙腳緊合是否會顯瘦？據說是為了預防走光，但是率直女最愛穿褲子！難怪每次一坐低就會情不自禁合唔埋隻腳坐，俾自己雙腿放鬆吓！
徒手食嘢最好味!
我知，用餐具進食較為衛生，不過有啲食物真係應該用手食，滋味先會加倍，例如雞翼，用手撕開啲肉，大大啖咬再點香口嘅泰式辣醬，正～
鞋內隱藏的秘襪！
日日打開衣櫃搵對完整嘅襪，真係海底撈月般困難！鴛鴦襪又如何，著咗鞋就唔係好覺。另一方面，當你鍾情一對襪，自然會成日著住佢，著得多自然易穿窿 (oh my god!)，唔捨得扔咩？著咗鞋咪唔覺有窿囉！係嘅，波鞋可以著鴛鴦色、牛仔褲會著破洞款，對襪都試吓啦！
啤一啤條氣順晒!
汽水都唔夠「gur」！「老闆! 俾枝藍妹～」唔一定喺大排檔先可以飲藍妹、隊青島，請讓啤酒融入你家中。唔洗掩口，大聲「gur」，條氣立即順晒！
梳化電話不動產！
假日最唔想出街同人迫，最鍾意瞓到自然醒，賴床賴到肚餓先爬起身，簡單填飽肚就再攤喺梳化hea，咁就過一日！
被竇下機迷餘溫！
無論上班或假日，被窩下的餘溫總是那麼吸引！特別是當你拎埋部遊戲機匿入被竇慢慢打，真係唔打爆都唔願落床！
睇波梗係𡁻零食﹗
無論係「曼狗」定「車狗」，睇波都要食嘢！女仔睇波仲有特權，就係盡情獎勵自己食零食，入波食薯片，失波咪食花生囉！