與女性友人談到「麻甩moments」，大家異口同聲想起去露營嗰幾日真係麻甩到世界盡頭！即使一面倒認同造型的重要性，總是會努力地襯衫、展示靚gear，然而面對大自然的挑戰，幾貪靚嘅人都要認輸。無得沖涼、無靚廁所俾你踎、無冷氣、無靚床 …… 真的，若然你係姿整王或者有「公主病」，應該難忍野外活動的衝擊！今回訪問四位愛露營愛到衝出香港，去過台灣、日本、美國等地露營嘅好𢯊女子，同大家分享露營的麻甩moments，大家不妨偷偷師，下次去旅行可以考慮體驗一下異地camping樂！
好𢯊露營女子1
CC Yeung ＠文員
一身日系時尚打扮的CC正職是朝九晚五典型OL，童年時在香港去過一次露營後令她留下心理陰影，多年來堅持對camping說不。但兩年多前的露營新體驗，令camping之火極速燃起，加上outdoor style的大行其道，以及無窮無盡的露營用品購物慾，令CC重新愛上camping。去年分別參與日本戶外雜誌《GO OUT》在東京及沖繩舉行的大型露營活動，兩次日本露營體驗令CC露上癮，懶理麻甩moments盡現，最緊要及時行樂﹗
G︰好𢯊(GoodDig)
C︰CCYeung
G︰第一次露營體驗？
C︰小學嗰陣，媽咪帶埋我同細佬，同佢啲friends一齊去camp。嗰陣覺得環境好污糟，我又怕昆蟲，個廁所又勁臭，我寧願唔飲水都唔想去廁所，去過一次已經唔想再去﹗
G︰點解會鍾意露營？
C︰兩年幾前，男朋友開始鍾意咗露營，佢一直有叫我去但我唔肯，後來有個女仔common friend都有去，同佢傾開發現其實女仔去露營都可以enjoy，跟住就本住「再試一次心態」放膽試，嗰次係去赤徑，風景都幾靚。男友開始迷上搜購優質露營裝備之後就影響埋我，我同佢都覺得outdoor style又靚又實用，我諗我係由鍾意outdoor style開始鍾意露營，去露營心態係relax，但一定係造型行先﹗喺香港無咩好做，放假一係去café、一係睇戲，去camping係一個幾好嘅拍拖節目。
G︰點解去外地露營？
C︰自從開始返露營生活，最誇張試過一個月去三次，喺香港去得多咗，自然想試吓喺外地露營。日本人啲camp gear又多又靚，嗰陣有留意日本戶外雜誌《GO OUT》每隔半年都會搞一次富士山下露營，睇相已經覺得好吸引，所以就自己組團訂機票出發！
G︰外地露營有幾正？
C︰GO OUT JAMBOREE係由日本戶外雜誌《GO OUT》主辦嘅大型露營活動，唔止有樂隊表演、不同風味嘅美食車、各式戶外活動，最重要係有集多個戶外品牌於一地嘅Brand Avenue，好記得入營第二日大家乖乖排隊準備衝去shopping，係真係衝！我唔知點解要跑，但係見大家跑得咁high 就跟住跑咗先﹗可能因為好多日本戶外品牌都會有檔位「散貨」, 勁多筍嘢！仲會不停補貨，好多又靚又實用嘅gear會以超抵價發售，所以行成日都唔會厭﹗另一方面，去camp嘅人大多會好用心咁去裝飾自己嘅帳篷，淨係睇大家啲tent都好似睇展覽咁! 我都專登搵人繡左支旗仔為個營扮靚﹗另一個喺日本camping嘅抵讚位係廁所好乾淨，雖然都係流動廁所，但三日都無見過有塞，無臭味 ， keep住有廁紙，廁所又唔會有人踏到黑哂，仲會有啲係小朋友或女士優先，好細心！不過日本營地係無垃圾桶呢樣嘢, 每個人要自己分類好垃圾扔去大會垃圾收集站！所以我唔會帶太多食物去煮，營內有好多美食車，唔洗驚會餓親。
G︰最難克服啲乜嘢？
C︰去廁所囉﹗ 喺香港camping一定要同大自然做friend，頂硬上都要去，最多飲少啲水，去完廁所啲紙巾會用個密實袋仔袋住哂。頭先講咗，日本啲廁所還好，不過舊年去GO OUT camp時專登買咗條工人褲襯好哂造型，但係到咗夜晚加咗好多件外套後, 去廁所就好「呢hea」，又要顧頭燈又要顧啲衫，所以我決定以後盡量唔著工人褲去camp。
G︰好𢯊露營小貼士？
C︰唔係話咩特別心得，不過都有少少嘢可以分享。
- 如果真係無得沖涼，會早晚用Lactacyd濕紙巾清潔。
- 帶定洗髮spray ，唔洗頭我一定帶帽，怕痕怕臭要用。
- 會用落妝濕紙巾 & BB濕紙巾代替卸妝水及洗面用品。
- 進行戶外活動梗係要搽防曬，為咗影相靚都要化少少妝。
- 如果係冬天去露營，可用暖貼貼腳板。
- 睡墊唔可以貪平，試過淘寶買平睡墊，夜晚轉身嘈到想打死隔離條仔。
- 日本品牌的露營用品有樣有質素，比較穩陣。
- 帶定防水鞋及雨褸，以防落起雨上「呢咁hea」。
- 透過Hashtag搜尋露營資訊，如 #camping #露營。
參與GO OUT JAMBOREE隨處可見富士山靚景，除非天氣唔好。
想在寒冷的天氣下喝杯熱咖啡也非難事，除了美食車也有手沖咖啡車。
每年都會出現的巨型GO OUT 字佈景(不同顏色、圖案)，去年是10周年所以多了個10字。
CHUMS 的攤檔舉行有獎掟飛碟遊戲，好好玩啊！
參觀其他營友的「示範單位 」也是很好的節目。
好𢯊露營女子2
麻利亞＠903DJ
商業電台叱咤903 DJ麻利亞 (Maria Tang) ，除了星期一至五與Do 姐( 鄭裕玲)及余迪偉一同主持節目《口水多過浪花》，更於週日主持新時代身心靈節目《Mali Mali Home》。認識麻利的聽眾應該知道她熱愛捐窿捐罅發掘新事物，近年迷上露營的她更多次在節目中分享camping樂。奇怪的是，常坦言自己有點潔癖的麻利是如何刻服露營的「麻甩位」？即看麻利講麻甩露營史。
G︰好𢯊 (GoodDig)
M︰Maria Tang
G︰第一次露營體驗？
M︰細個只去過宿營，人生第一次露營係2013年嗰陣，公司同某機構合作搞咗個 「低碳三十」活動，完成連串task後夜晚上飛鵝山紮營，當時乜裝備都無，雖然有得沖涼但凍冰冰感覺唔好，仲要四個人一個營，大家又唔熟，成晚無瞓扮瞓覺。無耐之後參與一個汽車品牌嘅car camping event，當時諗如果齋做MC就走咪好浪費？於是即興搵朋友一齊露營，我同朋友都無gear，只係用品牌提供嘅帳篷，而且有好多嘢都唔識，例如唔知道日落前後好大霧氣，如果唔關帳篷就會令入面啲嘢濕晒，夜晚去廁所就知道頭燈嘅重要性。好彩有堆「pro人」教路，令我哋一晚之間吸收咗好多露營知識。我哋「唔pro」但好多花臣嘢，例如旗仔、燈仔都大派用場。
G︰點解會鍾意露營？
M︰我認我係幾姿整，甚至有啲潔癖，但係當你enjoy去露營嘅樂趣就唔會理咁多。其實我係愛上喺外地露營，我唔愛喺香港露營㗎，因為真係頂唔順香港太潮濕嘅天氣同埋太污糟嘅廁所。當你去過日本露營，好難唔鍾意！
G︰點解去外地露營？
M︰第一次去日本露營，係因為日本戶外雜誌《GO OUT》國際中文版嘅編輯問我有無興趣去半年一次嘅大型露營活動GO OUT JAMBOREE，當時心諗喺香港都玩過喇，不如試吓去日本露營啦﹗之後都同過不同朋友去GO OUT JAMBOREE，同埋有一次係應品牌邀請去咗美國參與Bonnaroo 音樂節，順便試下喺美國camping。
G︰外地露營有幾正？
M︰第一次去日本雜誌《GO OUT》搞嘅富士山下露營大約係兩年前，因為當時係國際中文版嘅編輯同我哋去，可以特別安排有得沖涼，所以未算太辛苦。GO OUT JAMBOREE最吸引嘅地方係乜都靚，風景好靚，賣嘅嘢靚、食嘅嘢靚、玩嘅嘢靚，加上大部分帳篷都有悉心裝飾，連住嘅營都靚，大家又著得靚，好多靚嘢睇！
前年去美國參加Bonnaroo 音樂節順便露營，嗰度分豪華區同平民區，平民區嘅外國人走來走去周圍痾尿，好臭﹗豪華區係瞓帳篷，亦有貨櫃沖涼，但係原來外國人唔興露營沖涼，大家好似野人咁，哈哈﹗嗰陣日日都有40度高溫，日日不停流汗、不停飲嘢，帳篷好似蒸籠咁！因為未試過，感覺都幾得意，不過老老實實美國人露營嘅環保及衛生意識比較低，所以唔係好啱我。去外地露營係幾好嘅體驗，我遲吓會參加南美團，去玻利維亞、秘魯camping，幻想吓拖個睡袋喺沙灘瞓，抬頭望就睇到星星，周圍會有動物行過，諗起都開心！
G︰最難克服啲乜嘢？
M︰去廁所﹗喺香港呢個問題暫時好難解決。至於去到外地，例如日本，只要你肯排，啲廁所都
算乾淨。另一個要克服嘅問題就係M到(經期來臨)囉﹗記得第二次去GO OUT camp就瀨嘢，第一晚去到日本仲喺市區時嚟M，因為每次都會M痛到郁唔到，係好大嘅恐懼，驚排唔到廁所、驚污糟、驚痛、驚凍，即時好頹，仲要四月出名成日落雨，我越洋問塔羅牌應唔應該去，結果塔羅叫我克服恐懼，我即時買定M巾、藥物、保暖用品，第二日照上山。嗰幾日係動作慢啲，同埋要花多啲時間排廁所，無得沖涼，只能夠匿喺帳篷清潔，結果又無乜嘢，三日兩夜出奇地無痛，可能因為吸飽陽光又瞓草地，同大自然接觸好舒服，加上準備充足又有食定止痛藥。去到野外真係要好carefree，無得洗完手先摸塊面，朝早起身每個人拉開帳篷都係蓬頭垢面咁爬出去刷牙洗面，大家當睇唔到大家，係潛規則，無人會望你個樣有幾衰，哈哈！以前我都以為自己未必承受到露營，除咗以上問題，以前就算聽到鼻鼾聲我都唔得，不過而家慣咗喇！反而好享受大家輕輕鬆鬆無包袱咁傾偈。
G︰好𢯊露營小貼士？
M︰大家可以留意返︰
- 相信太陽光底下嘅自己點都靚過燈光唔好嘅地方。
- 日本好多一日份量嘅洗頭、洗面、護膚用品，適合帶去露營用。
- 如M到唔好慌張，只要有計劃地去廁所、定時換衛生巾又或者食定止痛藥就OK。
- 如果無得沖涼，唔好埋去營火，因為柴火堆好臭。
- 長頭髮就要鬢辮，因為鬢辮令吸味範圍最細。
- 唔好搞睫毛膏、眼影及眼線等眼妝，搽少少胭脂及防曬好喇！
- 唔好太care外表，朝早起身拉開帳篷個個都係咁爬出去梳洗，潛規則嚟嘅！
- 通常睇天氣著衫，最好著層層疊疊style，方便加減造型亦可有更多變化。
- 入門女生可以留意以下店舖及品牌：MOTHER、Patagonia、THE NORTH FACE、“urban exploration”、The Overlander、Protrek 及HAGLOFS。
日本人真係好有心機為自己個營扮靚。
只要天氣好，就算夜晚都可以望到富士山。
一齊去美國參加Bonnaroo 音樂節嘅營友。
攝氏40度高溫下露營只可能著背心短褲。
日間大家都會坐喺舞台附近嘅草地上聽歌傾偈。
好𢯊露營女子3
Cherry Chan @獨立雜誌《今日大吉》出版人
曾任生活潮流記者多年的Cherry，於2015年時旅居台灣，在當地學習陶瓷、編織，跟朋友登山、露營， 不定期為網上雜誌撰寫旅遊專欄，與大家分享在地生活。後來在募資平台嘖嘖成功集資，至少可以負擔三期印刷費用，成功出版獨立雜誌《今日大吉》，以香港女生的視野分享在台灣的露營體驗及心得。今年Cherry回流香港擔任報刊編輯，暫時過著港、台兩邊飛的生活，用實際行動告訴大家生活方式的無限可能性。
G︰好𢯊 (GoodDig)
C︰ Cherry Chan
G︰第一次露營體驗？
C︰小學嘅時候已經係小女童軍，到咗十五歲中三嗰陣，阿媽叫我參加香港航空青年團，露營係訓練嘅一種，所以第一次露營唔係自發性㗎﹗嗰陣唔會用自己嘅營，係用組織派嘅營，八個人一個A字型好似屋仔嘅大營，可以同一班朋友一齊就覺得好玩。
G︰點解會鍾意露營？
C︰細個成日跟組織露營已經有基本好感，不過到自己同朋友去露營就係近幾年嘅事。2011年我仲係做雜誌記者嗰陣，有一次諗緊點同另一半慶祝生日，諗諗吓「不如去露營啦﹗」其實都要多謝淘寶，因為人大個咗會想搞靚個營，好多deco嘢買，嗰陣淘寶啱啱流行，有淘寶就可以用比較平嘅價錢買靚gear，當然質素未必好好。嗰陣上網淘咗個粉紅色帳篷，我哋去西貢灣仔，雖然7月好熱但係都好開心。可能喺香港真係無咩做，拍拖節目來來去去都係嗰啲，去party都去到爛，就會想搵啲新嘢做，去camping就係好選擇啦﹗當你買咗第一個營就唔會由得佢放喺度，會繼續買gear，其實轉捩點係任職戶外雜誌《GO OUT》國際中文版記者，因工作需要接觸好多同露營有關嘅人、事、物，接觸得多愈來愈鍾意，而且大家都知道係trend，因為貪靚所以都鍾意outdoor style。
G︰點解去外地露營？
C︰除咗香港，我仲去過幾次日本露營，不過講到最多一定係台灣啦！未移民去台灣前因工作關
係差不多兩個月去一次台灣露營，當初《GO OUT》派我去台灣做稿，因此認識咗一班好叻搞露營嘅台灣人，跟住愈識愈多熱愛露營嘅人，於是就成日約埋一齊去露營喇！
G︰外地露營有幾正？
C︰就算未有GO OUT camp之前，日本一直有FUJI ROCK等大型音樂主題戶外活動加露營，但語言不通係爭啲！台灣介乎香港同日本之間，雖然未有日本人咁pro，但係台灣人都好有心機研究product及deco，而且台灣嘅付費camp site都有幾千個，而家多咗啲高級露營，如果真係唔慣露營都可以返民宿住。再者，台灣有好多出租嘅露營場地不但有提供熱水洗澡，甚至付設小賣所及燒烤套餐，開車或搭的士都好容易去到。不過呢，台灣人搞活動就無日本人咁乾淨，佢哋會認為付費係應該有人負責清潔，唔應該自己帶走垃圾。
G︰最難克服啲乜嘢？
C︰好多女仔都驚大自然環境中嘅昆蟲，我細細個已經唔想做呢一類人，所以我從來唔驚蛇蟲鼠蟻。又通常有部份人會驚鬼，聽講有幾個營地特別出名猛鬼，不過我唔係好驚。啊！要克服交通問題囉。雖然通常有朋友會接埋我，但如果我自己去就會揀近啲既營地，雖然喺台灣搭的士都好方便！有啲女人會好驚M到，對我嚟講就無乜問題，但其實好正常，好似當你流鼻涕要擤，用紙巾包好收埋咁之嘛。
G︰好𢯊女子小貼士？
C︰哈哈，唔知算唔算tips……
- 想買露營gear 或者outdoor衫，入們級可以分三類去揀適合自己嘅gear，穩陣派應該去The Overlander、Re:echo、新經緯、THE NORTH FACE或者COLUMBIA。網上海歸派可以留意fb︰PlayHard Outdoor 及fb︰Go goal goat outdoor。潮人派就去MOTHER-Outdoor Lifestyle及者Teva啦！
- 唔好似我以前咁傻仔，睇見個營靚就話買，其實要諗重唔重，即係外表同實用性都重要。
- 相約朋友一齊去露營，砌多啲setting可以影多幾張相post上社交平台。
- 如有需要可以用洗頭噴霧、濕紙巾或紙巾清潔，不過記住其實好唔環保。
- 大部分台灣7-11都有得賣旅行裝用品，想幾時去camping都得。
- 台灣有好多付費露營場，按營計如四個人share約二百蚊一晚，仲平過住air bnb。
新北市坪林，台灣有很多付費的露營場地，提供熱水洗澡及小賣所等。
去年生日遇到7女1男香港人組團去台灣水漾露營，三日兩夜無沖涼，其實香港麻甩女生有很多。
有幸在網上結識很多熱愛露營的台灣人，這次特別來到南投的水漾森林。
輕量化的露營產品也可以很有個性，順便練得一手廚藝。
這是位於台南由學校改建而成的露營場地，如今因法律問題暫停了。
好𢯊露營女子4
But Waiting @ SWIMATES創辦人
自小精於泳術的But Waiting (阿畢) ，兩年多前與友人組成女子成人泳團SWIMATES (女游團)，除了開班教女生游水，更像一個游泳平台，注重與團友們的交流。去年，阿畢辭去生活潮流記者的工作，專心搞好SWIMATES。阿畢不謹享受在水中暢遊，更熱衷於走向森林，與友人共享露營樂。
G︰好𢯊 (GoodDig)
B︰ But Waiting
G︰第一次露營體驗？
B︰其實我細細個嗰陣，大約幼稚園時，屋企人已經成日去露營，最多係去大帽山，有時會同埋其他親戚一齊，大約十幾個人。以前啲營好重，因為老竇揸車所以都方便。聽阿媽講我哋試過七月十四照去露營，哈哈！但係自從我哋呢班細路愈來愈大，就無再約埋一大班親戚一齊去露營。2012 年，隔咗十幾年之後，我第一次同朋友相約去海下灣初露營，嗰陣咩gear都無，拎住個袋仔就去，我同一個以前相識嘅男同事同一個營，無乜尷尬，只係覺得好凍，又著唔夠衫，話晒第一次唔同屋企人去露營，可惜嗰次準備真係唔夠。
G︰點解會鍾意露營？
B︰因為好玩囉！雖然唔係每次露營體驗都咁好，例如2012年第一次同朋友去海下灣露營，當時個廁所真係好污糟，見到有屎蟲，不過好急啊！點都要去，閉氣就算。直至2015年，同朋友相約去草民音樂營，大家開始喺淘寶淘gear，買吓買吓愈來愈多裝備，之後成個2015年都去過好幾次露營，其中一次係事隔十幾年後再次親戚總動員露營，同屋企人、親戚仲有我隻狗一齊去南山露營，三姊妹瞓一個四人營 ，講真，平時同屋企人唔多講嘢，難得有機會咁樣共處都好！只要唔介意無得沖涼，去露營只係食同hea，一大班人圍埋傾吓偈食吓嘢，真係幾開心，感覺好free，無人會在意你係唔係「烏where」，去得都唔介意俾朋友見到真面目啦！
G︰點解去外地露營？
B︰呢幾年間喺香港去咗十幾次露營，成日聽人講去外地露營好開心， 不過基於安全理由，我又唔會一、兩個人去外地露營，夾啱一班人一齊飛更難﹗一直都有聽講日本戶外雜誌《GO OUT》搞嘅GO OUT camp好好玩，咁啱舊年《GO OUT》十周年第一次喺沖繩搞camp，而香港團體Inda又組織旅行團參與，有人arrange方便好多，結果我就同朋友一齊報名。
G︰外地露營有幾正？
B︰我喺香港露營嘅次數比較多，外地嚟講暫時只係去過沖繩咋！
喺日本露營最好之處係廁所好乾淨，女仔去會好放心。而且環境大好多、設施好。唔知點解總係覺得外地陽光都好啲，瞓得又好，好似草都軟啲！可能因為係有主辦單位搞嘅露營，有歌聽、有嘢食、有嘢玩，仲有得shopping，露營嚟講節目已經好豐富。雖然聽去過東京GO OUT camp嘅人講沖繩呢次小型好多，不過都已經好好玩，唯一美中不足係如果營地可以見到海會更好！
G︰最難克服啲乜嘢？
B︰以前最驚露營時M到，而家有月經杯就唔怕，真㗎﹗有咗月經杯唔止嚟M可以照去游水，去
camp都唔驚﹗女仔最驚都係廁所乾唔乾淨，不過去得露營最好預咗豁出去。同埋會唔想唔化妝見人囉，所以點都會化少少，例如畫眼線、眉、胭脂。同埋……夜晚總會覺得有少少少不安感覺，試過有次聽到營外有野豬叫聲，唯有扮鎮定繼續瞓覺。
G︰好𢯊女子小貼士？
B︰小小分享︰
- 如果驚出汗可以帶定爽身粉，唔會黐立立又香香哋。
- 唔想以真面目示人？留到睡前最後一刻先落妝。
- 一個營瞓迫啲會暖啲，當然如果好唔熟就無需要。
- 聽講喺營外灑硫黃粉可防止蛇入侵。
- 唔洗頭只洗前額留海，第一日唔戴帽，第二日先戴帽。
- 進行戶外活動時必需搽防曬。
- 嚟M時可以改用月經杯，用慣係一定唔會倒瀉。
小時候去露營，阿畢(左)同爸爸及家姐合照，備註︰爸爸有著褲。
2015年親戚總動員去露營，阿畢隻狗仔八哥豬豬都有去。
第一次去沖繩露營，落完一場雨後天氣keep住好。
大會有安排音樂表演，雖然唔係著名歌手，不過大自然配合音樂點都係夾。
Catch ＆ throw 拋飛碟環節，各人在飛碟寫上祝福再拋出去交換。
Text / Phoebe Chan・Photo / 受訪者提供