多女人嘅地方一定多是非，仲要五個都係偶像派，本地女子組合Super Girls自出道一刻就註定是非纏身。不知你對哪位成員最有印象？未接觸Super Girls之前，單看她們參加宣傳活動的報道，總會很好奇為什麼個樣得得意意嗰個成日唔出聲 (最初邊咁快記得名吖)，唔通把聲好衰？到後來因工作關係真正與Super Girls接觸，才發現現實與想像真係有一段嘅距離，真實的Yanny (陳穎欣) 把聲甜㗎喎，癲癲哋㗎喎！事隔數年，再次相約Yanny做訪問，當我以為好多人同我一樣已經睇得出Yanny唔係大家stereotype嗰種「小玉女」，她卻淡淡然說︰「咁多年以來大家仲係以為我好斯文或者係黑面神，其實我慢熱啫！」
外界對我印象好一致，黑口黑面嗰個！
問Yanny最近忙什麼，她說早前為劇集《仇老爺爺》拍的戲份已經完成，現正籌備Super girls的新歌。出道八年，雖未至於紅透半邊天，但相比起很多本地樂壇女子組合，Super girls條命都算唔錯，起碼各成員也工作不絕，而且形象愈來愈鮮明。儘管Yanny話好多人只記得佢成日黑口黑面，但係可以繼續唱歌、拍戲，做自己喜歡的事，人哋點諗有咩所謂。Yanny︰「出道幾年，除咗身材無乜點變，哈哈！其實我都變得主動咗少少㗎喇！我係有少少偶像包袱，但一直唔認同Super Girls係咩女神組合，我哋都係做返自己啫！外界對我印象好一致㗎，話我係黑口黑面嗰個、成日東南西北面！五個人五把口，當人哋問一條問題，大家好難一齊答，我自己可能比較遲鈍，加上一時諗唔到講咩，所以往往等到最後先講，我少出聲因為我慢熱啫，正如我唔笑唔代表我無禮貌！好多人覺得我串，其實我內心好澎湃，只係因為未熟我需要適應一下，喺熟悉嘅人面前我可以好瘋狂。其實所有人都話我嘅性格唔適合入娛樂圈，但係我好想拍戲，所以想排除萬難去做自己想做嘅嘢！」
最驚精緻糕點，食肉先至係人生享受！
Yanny︰「乜我個樣唔似鍾意打機咩？我好鍾意玩傳說對決㗎﹗仲有樣嘢唔知你估唔估到，我好為食㗎，特別係食肉，只有食先至係人生享受﹗有時半夜肚餓我會起身煎牛扒、炸雞翼或者炸西多，食飽先瞓得返﹗不過而家開始新陳代謝好似慢咗啲啲，以前未試過超過102磅，最近一次磅係105磅，嗚嗚 …… 搞到打歌服唔啱，條褲扣唔埋，經理人仲安慰我話條褲縮水。
我好鍾意方大同，但佢食齋，呢一點令我覺得同佢距離好遠。可能因為我個樣女仔，啲人成日以為我好鍾意high tea，食精緻小糕點，其實最怕﹗我諗我唔鍾意得個樣嘅嘢食當中，唯一鍾意精緻嘅食物就係日本料理。我最鍾意食豆腐火腩枝竹飯，佬飯好食﹗仲有鍾意打邊爐、燒嘢食，全部都好好味，正啊﹗」望住Yanny講起食肉嗰個興奮樣，我無懷疑過佢吹水，只係質疑點解咁樣食法都keep到咁窈窕，脂肪去哪兒？
#陳穎欣 #十大最愛
1）食物︰北海道海膽
2 ）飲品︰熱茶（多飲黑茶或紅茶，綠茶太寒涼）
3 ）歌曲︰〈每當變幻時〉
4 ）電影/電視劇︰《wonder》
5） 書/雜誌︰《微笑吧，在痛苦的地方開花》
6 ）地方/店舖︰家
7 ）網站︰facebook.com
8 ）顏色︰白色
9 ）講嘅一句說話 ︰「有咩好食？」
10 ）其他人點叫你︰欣欣
好𢯊女子︰
Yanny @Super Girls (陳穎欣 )
Facebook / Yanny Chan
Instagram / yannyyc
Weibo/ Super Girls Yanny 陳穎欣