睇見條題，有無少少驚？
老老實實，筆者我眼見「曱甴」二字已感不安，但今回介紹嘅好𢯊女子Gladys Li (李靖筠) 卻可以視「強」如無物，呢條題稱得上係為佢而設。
認識Gladys，是從音樂組合 geez 開始？廣告或歌曲MV女主角？ 還是從電視、電影中的角色開始？自演出機會愈來愈多，「90後短髮女神」、「新文青女神」、「小清新女神」等稱呼此起彼落，又係「女神」悶唔悶啲啊？慶幸一頭短髮令Gladys 從茫茫「神」海中突圍而出。同Gladys做訪問就好似同朋友傾閒偈咁舒服自在，說到有趣之處，佢仲會愈講愈興奮、興奮到忘記其實佢同我唔算好熟。我想講，現實中嘅Gladys點止女神咁簡單，佢直情係女英雄。
想揼骨就揼骨，想做乜就做乜
不知由何時開始，大家會自然地將短髮女生與「男仔頭」扯上關係，其實何謂「男仔頭」？「男仔頭」是好是壞呢？我只知道樣貌與髮型匹配的短髮女生往往有種特別的魅力，外表帥氣不在話下，如果像Gladys般個性爽直、不拘小節，那種靚得瀟灑更是可遇不可求。
Gladys︰「其實我覺得大家當咗『文青』係一種stereotype，本身呢個係一個中性嘅形容詞，但係慢慢大家將『文青』呢樣嘢用嚟形容一啲好鍾意去café 、好鍾意影相，或者嗰啲喜歡簡約style嘅人就係『文青』，可能因為咁，所以我俾人嘅感覺都好『文青』。記得有朋友同我講，話朋友 A 知道朋友B識咗我，佢就同朋友 B講『你識Gladys㗎？咁咪成日都要約佢去coffee shop囉！』但係其實我唔係好鍾意去coffee shop，因為我個人好隨意，即係都幾求其。我最鍾意就係食茶餐廳飲凍奶茶少甜，都好鍾意飲咖啡，但其實無乜要求，普通咖啡機沖嗰啲我都OK。
如果你問我覺唔覺得自己好男仔頭？我諗係又唔係囉！可能因為我爸爸好想生仔，所以生咗我之後就當我仔咁養，例如會教我踢波，或者身邊圍繞住我嘅朋友以男性居多，所以我會比較爽直啲。不過我份人好心急，唔等得，十五分鐘可以出門口！好細個嘅時候會有包袱，包袱到一個點係唔可以一個人食飯，好似全店人望住自己『死啦俾人發現我係孤獨精添』，而家大咗就唔會咁諗，加上而家一個人住，反而好享受一個人行街、睇戲、做運動，想揼骨就揼骨，想做乜就做乜！我住得近電影中心，有時會睇完一套戲食個飯再睇一套戲，最高紀錄係一日睇三套，後來發現咁樣消費太貴喇！哈哈！」
生活可以隨意，工作必需高要求
儘管Gladys常強調自己有OCD (强迫症)，如不喜歡別人碰她的衣櫃(衫就算亂都要分類)、廁所不可以出現頭髮等等，但對談間那句出現了N次的「無所謂」、「是但啦」，卻印證了她對生活上的瑣事蠻不在意，然而每當談到工作、演戲這回事，Gladys即時變回認真mode。
Gladys︰「最近放假比較得閒，剛剛拍完一齣叫《大師兄》嘅電影，呢次係我第二次拍電影，我好鍾意呢個角色，因為以前成日都係做啲文青、唔係好出聲嘅角色，但係《大師兄》入面嘅角色好似我自己，故事講述我生於一個好重男輕女嘅屋企，爸爸錫細佬唔錫我，而我係一個比較男仔頭嘅女仔，好鍾意車，但屋企要我學音樂，甄子丹飾演嘅班主任就要教好我哋呢班問題學生。今次係比較大型嘅製作，加上有得打，好開心。未拍戲之前有學過演戲，但當時唔係好明，覺得好空泛，自從演出經驗多咗，慢慢感受到咩係演戲，開始有信心，愈演愈舒服。以前真係會企喺度唔知做咩好，而家自然好多。
無論係唱歌、拍廣告、電視、電影咁，全部都係表演，表演當中我最鍾意都係演戲。好多時大家睇電視都唔會太專心，可能會食飯、傾偈，但係一齣只有兩小時左右嘅電影，往往可以令你坐定定細心欣賞，感染力好唔同。我唔係唔鍾意唱歌，不過喺香港做音樂有太多制肘，如果無大公司喺背後backup更加困難，無錯，創作嘅時候可以自己決定好多嘢，只可惜喺硬件上好多嘢唔配合，所以我暫時都係會以拍戲為重。入行至今差不多四年，唔可以話好順利，但未至於好困難。我本身讀商科畢業，入行時好多人會出於善意咁問我諗住玩幾耐，我好唔鍾意，點解要覺得係玩一陣？如果我set定退路就唔會做得好，我唔會咁易放棄！」說到這裡，Gladys一副義無反顧豁出去的樣子，此時此刻嘅佢好有男子氣慨，又幾有型。
踩曱甴，唧黑頭，好治癒
「唔好意思，一講起工作我個樣就好認真、好似好嚴肅咁！」Gladys笑著說。無問題，認真對待認真事，正常不過。突然之間，她說︰「偷偷哋同你哋分享吓我有少少怪癖……」呢一刻輪到我目無表情，原來她最愛睇唧黑頭video、仲好享受將曱甴踩到粉身碎骨嘅樂趣……都幾重口味。
Gladys︰「有啲朋友應該知，我好鍾意睇唧黑頭片，所有會爆裂嘅東西都會我覺得『嘩！正啊！』真係好爽！同大家分享吓，有一個YouTube channel叫做Dr. Sandra Lee，佢係一個皮膚科醫生，會好認真咁幫大家解決唔同類型嘅皮膚問題，即係可能係黑頭啦、毒瘤啦，總之係會好似意粉咁噴出嚟嗰啲，每晚瞓唔著我就會睇，我電話裡面有個Playlist，係我精選咗最好睇嗰啲，哈哈！我諗同好多靚女都會匿埋喺屋企撩鼻屎一樣，人之常情啫！哈哈！啊！我仲有一個怪癖 ，就係非常之鍾意踩曱甴！我好鍾意聽到佢哋身體爆裂嘅聲音，所以呢，如果嗰日你同我去深水埗、旺角食飯，而嗰日我無著我最鍾意嘅鞋，我係唔介意幫你清晒前面所有嘅路。嘻嘻！當佢哋爆開我就會覺得幾開心，因為佢哋實在係唔值得喺呢個世上生存！」最尾嗰句勁有共嗚，世界和平靠你喇！曱甴殲滅者！
#Gladys #十大最愛
1）食物︰Chicken wings
2 ）飲品︰凍奶茶少甜
3 ）歌曲︰〈Doctor Pepper hahaha〉(一聽就幾開心)
4 ）電影/電視劇︰《Closer》
5） 書/雜誌︰村上春樹所有作品 (太宰治都唔錯)
6 ）地方/店舖︰星座冰室
7 ）網站︰NETFLIX
8 ）顏色︰黃色
9 ）講嘅一句說話 ︰「是但」
10 ）其他人點叫你︰g
好𢯊女子︰
Gladys Li 李靖筠 (演員/歌手)
Facebook / 李靖筠 gladys li
Instagram / gladys.li
Text / Phoebe Chan · Photo/ Marie Anson · Assistant / Joe · Make up / Coey Wong · Hair / Sam Pan @ Muse Hair