這些年來，Afa Lee (李思汝) 以不同身份遊走於不同媒體之間，模特兒、主持人、插畫師 …… 先後為陳奕迅、方大同、魏如萱等歌手的MV繪畫插畫，也辦過不同形式的作品展。然而，自認不安於份的她並不甘於只做平面創作，早前便特地到台灣學習人偶創作，向多媒體創作人之路進發。多年前拍了一個日式布甸廣告，自此被網友封為「翻版陳法拉」。個性爽直自主的Afa從不甘於做「翻版乜乜物」，今日佢要話俾大家知，佢係梁朝偉×鄭中基混合體！
要相信好𢯊自己
明明外表溫文儒雅，看似說話陰聲細氣、慢條斯理，不知是否因為腦筋轉數太快，現實中的Afa講嘢又急又快，快到一個地步係好想叫佢講慢啲，但是當時人句句充滿正能量，令人唔想截停佢。每次做訪問，都很希望受訪者認真用心地咀嚼問題再細意回答，不是純粹一問一答至話題終結，慶幸今天我又遇上優質受訪者，用心作答的同時更大讚好𢯊改了個好名，謝謝Afa。
Afa︰「好𢯊，Good Dig，個名幾好噃！好多時名唔需要太複雜，上海有個Gallery就咁叫Gallery，而佢真係一個藝術館，簡單又易記！好𢯊，令人諗起女仔可以𢯊起心肝或者𢯊起責任做好多嘢，而且可以靠自己dig、去挖深所有嘢，好好看世界，加上好𢯊讀音同『好的』，非常好記又易上口！而家好多傳媒都係跟住大眾步伐，例如有一排啲人鍾意韓國嘢，傳媒就一窩蜂去報道韓國嘢，傳媒應該有前瞻性、有自己想法，行喺前面介紹好嘢俾大家、帶大家開眼界、發現更多可能性。我覺得身為女性都應該有自己想法，識得擁戴自己認同嘅想法，唔係一味跟住主流。就好似『文青』呢個term，因為呢幾年講『文青』總有收視，所以好多傳媒乜都加『文青』，係好短視嘅做法！其實『文青』呢兩個字已經污糟晒，我認識嘅一啲台灣作家更話呢個字對真正嘅『文青』係侮辱。真正嘅『文青』唔係講外表而係內涵，成身紋身都可以係『文青』。香港最大問題就係大眾鍾意跟人口味，如果每個女仔都相信自己就好喇！」
雙魚白羊女人仔
Afa︰「一般人都覺得我似係比較斯文嘅女仔，但係其實識落咗之後通常會覺得我好低能、好嘈、同埋會成日大笑。真正嘅我都算係不拘小節同埋比較率性，總之唔會成日好驚keep唔住靚樣咁啦！不過無論係斯文嗰一面定係低能嗰一面，兩面都係真實嘅我。 曾經有一個朋友咁樣形容我，佢話未識我嘅時候仲以為我係梁朝偉咁憂鬱，但係識落咗之後先知來我係鄭中基！ 鄭中基？我心諗咁即係我好幽默啦！但係佢話唔係，你係滑稽！幽默同滑稽係有分別㗎！我想講嘅係，無論梁朝偉定係鄭中基都係我嚟㗎，可能話因為我係雙魚白羊座啦！
我諗用不拘小節同埋爽朗嚟形容自己都幾貼切，聽到好笑嘅嘢我會擘大個口大笑，唔會時時刻刻保持儀態萬千，不過如工作需要，要我流露優雅一面都可以嘅！雖然我不拘小節亦算獨立，更加有自己想要追求嘅目標或理想，但那並唔代表我好似男人咁強悍，有時我都會好『騰雞』，『女人仔』呢個詞有著需要被保護的隱藏含義，所以用『女人仔』嚟形容我都OK也算正確啊㗎！」無論梁朝偉定係鄭中基，其實兩個都幾吸引喎！筆者眼中的Afa不是典型美女，而係嗰種靚得嚟有點知性美及神秘感，就如她的作品一樣，欣賞嘅人會覺得好靚、但亦有人會認為古怪。任何人、事、物亦可能有其矛盾之處，就看你如何詮釋而已。
不安於份創作人
與Afa對談，會發現她很了解自己，亦清楚自己想要追求的目標與理想，不如直接問︰「你覺得你了唔了解自己？」Afa直言︰「都算了解啊！我知道自己不甘於只做平面創作，所以前排放低香港嘅工作，去台灣學習製作球體關節人形（Ball-jointed doll）。早前去咗台灣完成為期三個月嘅關節人偶課程，整一個十四關節人偶已經好唔簡單，佢哋矜貴在全人手製作，連眼珠都要慢慢做，老師教咗技術之後，由你自己再掌控點整，如眼嘅形狀都要慢慢拿捏。
雙魚白羊座本身好無耐性，但我整呢樣就好有耐性，可能因為似meditation，以前學禪修都係咁。返到香港之後一直有好多雜務要處理，仲有拍攝工作同埋參與品牌活動等，對於一返嚟就有工作，呢一點我係好感恩嘅！最近終於可以再專注喺自己嘅創作上，呢排我正跟一位外國藝術家朋友合作畫一本書，佢寫、我畫，希望可以加快完成，盡快同大家見面！」工作以外，Afa自言沒什麼特別興趣，最愛留在家hea，或跟朋友到小酒巴喝酒。Afa︰「平日無咁忙嗰陣最鍾意約成班夜鬼出嚟吹吓水、飲吓啤酒，有時坐通頂都唔願走。做人簡簡單單已經可以好開心，係咪先？」Yes，madam！
#Afa #十大最愛
1）食物︰水果軟糖
2 ）飲品︰防彈咖啡
3 ）歌曲︰〈Reminiscence〉Olafur Arnalds
4 ）電影/電視劇︰波蘭電影大師安德烈華意達的《殘影》（Afterimage)
5） 書/雜誌︰《孤獨六講》蔣勳
6 ）地方/店舖︰自己的家（我是宅女）
7 ）網站︰M Plus 云閲讀
8 ）顏色︰米白色
9 ）講嘅一句說話 ︰「好！」（下定決心時）
10 ）其他人點叫你︰阿花
好𢯊女子︰
Afa Lee 李思汝 (多媒體創作人)
Facebook / Afa Annfa
Instagram / afa_leeishere