如你覺得眼前的Patrizia (下稱阿Pat) 好生面口，筆者絕不感意外，但我相信你很有可能看過她的文字或靚相。數年前辭去雜誌記者的工作後，阿Pat投身空中服務員行業，銳意用實際行動放眼看世界，在機艙看盡人性善惡的同時，將所見所聞所思所想化成幽默綴核的文字，從字裡行間告訴大家「空姐迷思」的真相，幾年間成功累積數以萬計的忠實讀者，成為支持者眾的網誌作家。
無數報導指出，大多女仔想做空姐的原因不外乎︰起薪點較高、形象高貴討好、可免費環遊世界、嫁三高男（身材高、收入高、學歷高）機會較大、甚至因制服帶來的虛榮感等等。上述想法很守舊嗎？當我以為係，偏偏身邊友人話我知原來好多人仲係咁諗。是時侯醒醒，任何職業都不會只有美好風光的那一面，機艙內服務殷勤形象高貴的空姐，明明私底下最愛捽腳趾、食米線，hea爆煲劇……你啱，未必個個空姐係咁，起碼阿Pat係。
離地 · 我是空姐
Pat︰「啲人成日覺得空中服務員全部都係好靚啊、好斯文、好優雅，只限機艙內見到嘅畫面，其實我唔洗飛嘅時候，我最鍾意留喺屋企，完全唔化妝、瘋狂煲劇、捽吓腳趾，同埋同自己隻狗玩！」追開阿Pat網誌的讀者應該會發現，雖然她一方面力數多年來在機艙看到的人性醜惡事例，但性格樂觀爽直的她也擅長在「屎坑」中發挖一點甜，說到萬念俱灰之處又會透過幽默言詞發放正能量，這一點，我很欣賞。
Pat︰「做呢行係辛苦，不過就算幾灰、遇到啲客幾××，放工就係放工，但係有時放星期一至五，有咩工可以咁放先？好多同事一講起機上遇到嘅不快事就會嬲好耐，好彩我好快唔記得！我諗我比較熱愛自由，所以鍾意呢份工，同埋好似已經過咗好想走嗰個關口，通常啲人話頭兩三年係第一個關口嘛！我仲有好多想去未去嘅地方，下一站應該會去土耳其，我哋坐其他airline都會有優惠，但只可以坐economy同埋有機會上唔到。老實講，做咗幾年好多嘢我都已經習慣晒，最希望啲客唔好噁，試過兩次都係去Dubai航班有啲老人家飲完酒想噁又想暈，咁我哋都識基本First aid，又試過有次Sydney航班有人羊癇症發作反晒眼咁，都幾緊張㗎，不過touch wood無試過有乘客喺我班機過身。
嗯，以前啲人成日話做空中服務員可以狂走水貨，賺到癲咁，邊係吖，而家無人買賣名牌，賺得好少又辛苦，除咗HERMES可能仲有價。以我所知仲有同事『走錶』囉，同埋絲襪，加錢可以著足三日，包你有味，哈哈！我唔知係唔係仲有好多空姐視機師為獵物，咁聽講機師係有二、三十萬一個月，人工係幾吸引，不過要培訓好耐先升到captain，升得嚟都四十歲，我唔得啊，我鍾意嫩口，叔叔唔啱我！」
貼地 · 米線大使
既然咁睇得開，點解要開個fanpage將空姐血淚史放上網？是不吐不快，還是想將旅行的所見所聞公諸同好而已？Pat︰「平時我最鍾意影相、寫嘢、湊狗。大約三年前，朋友見我咁鍾意寫嘢就提議我不如開個page，除咗可以透過自己個網發洩不滿，亦可以同大家分享吓旅遊資訊。有時遇到特別××嘅事就會寫得特別快，可能幾個字就寫完，用手機好快打好一篇，但我有個怪癖就係唔可以俾人望住我打字！萬一轉行咁個網點？ 哈哈！到時可以再大爆特爆！」
問Pat最近忙什麼，佢話︰「都係忙整理之前寫嘅文章、忙決定下個長旅行嘅目的地，同埋忙執吓狗屎咁樣啦！」執狗屎有幾忙啊？「你唔明㗎喇，當你唔洗返工，留喺屋企只會攤喺度煲NETFLIX，你會發現執狗屎係件好忙嘅事。你見我今日妝都唔化就知平日唔洗返工嘅我係幾咁casual！不過呢，雖然去過好多地方、食咗好多來自世界各地嘅美食，但係我最鍾意都係喺香港食魚腐米線，最好就係少辣多芽菜！」
訪問當日，相約Pat在她家附近取景，因為想捕捉她最carefree的時刻，Pat點名一定要影/食她家附近的「飯堂」– 祥發雲南米線。下午三點幾先食lunch會唔會好肚餓？Pat︰「唔洗返工梗係瞓到自然醒，通常瞓醒就落嚟食碗米線 (不過今日想食豬扒飯)，我諗我可以做米線大使，上次有朋友嚟我推介佢食呢度嘅招牌手打魚腐，佢食到猛咁嘩嘩聲叫。人手製作真係好正，配飯或米線都好正！而家好多地方都只有集團式經營嘅粉麵店，好彩呢度仲有祥發！」阿Pat個樣同把聲都好斯文，所以偶爾聽到佢好順口咁爆出一兩粒俗語(定係粗口？)，嗰吓對比係會幾震撼。Pat︰「返工梗係唔會講粗口，平時一時時啦，又唔係特登講，助語詞啫！正如我諗我大部分時間都係不拘小節，但某啲位又好似有強迫症咁，即係我好鍾意將啲嘢砌到『Tup Tup冚』咁，例如logo向曬同一方向就覺得身心舒暢！好無聊啊呵？」
#Patrizia #十大最愛
1）食物︰腩肉紫菜小鍋紅薯粉
2 ）飲品︰珍珠鮮奶綠
3 ）歌曲︰ 王傑的歌
4 ）電影/電視劇︰《Altered Carbon》
5） 書/雜誌︰《東京喰種》
6 ）地方/店舖︰有草地和藍天的地方
7 ）網站︰NETFLIX
8 ）顏色︰灰色
9 ）講嘅一句說話 ︰「dafaq」
10 ）其他人點叫你︰Pat仔
好𢯊女子︰
Patrizia Ng 吳幗慧 (空中服務員/網誌作家)
Facebook / Ng Kwok Wai
Instagram / patriziaaaaa