身邊很多朋友都已經將NETFLIX當作睡前或週末必備節目，煲完劇唔夠喉？有時還要找些立立雜雜的節目來看一看才肯收手，最好就係短短哋半個鐘左右的輕鬆小品，不用太花精神。如果要滿足以上條件，《Terrace House》（雙層公寓）這齣真人show似乎是不錯的選擇。等了一陣子， 《Terrace House : Opening New Doors》(「雙層公寓：敞開愛的大門」）下半部終於來了，睇開嘅劇迷固然興奮，未睇過都不妨留意吓，套劇咁hit，唔睇無話題！
原本由日本富士電視台製作的《Terrace House》，自2015年開始與NETFLIX合作，至今已經在串流平台上播放至第三季。製作團隊強調不設劇本，如實記錄3男3女參加者在豪華大宅內外的生活。既然住喺同一屋簷下，一定唔少得戀愛浪漫嘅情節，但節目好睇的地方又點止咁簡單？
基本上，《Terrace House》是可以用「養眼」來形容。先要一讚製作團隊挑選參加者時心思與眼光。靚仔靚女固然有，但樣子平凡而好看的亦大有人在。因為日本人對於衣著的執著程度，相信是亞洲人之冠，雖然不至於人人都是styling高手，但精通整頭化妝襯衫的亦為數不少，這大大提升了節目的可觀性。當然，總有幾位特別「標青」的參加者每次出場都特別「吸睛」，拍完節目後事業發展就更上一層樓，其中的表表者就如現今日本模特兒界的新寵兒Lauren Tsai。
在芸芸參加者之中，無論是本身已稍有名氣的模特兒/ KOL和歌手，或是素人如舞蹈員、醫科學生、髮型師、運動員、健身教練、廚師與設計師，人人都帶著目標而來，然後各自為自己的理想而努力，各成員之間又會互相打氣支持。老實講係有啲肉麻嘅，但又真係好青春，好熱血呀喂！
比起香港觀眾較常接觸的真人show，《Terrace House》的確是比較溫和的。沒有激烈地勾心鬥角的情節，不用投票踼走任何成員，所有人喜歡住多久就多久，一位決定要離開就有另一位新成員補上。大家亦不用對著鏡頭訴說感受，一切也是自然而然地發生。
節目亦用上大量充滿空間感的wide shots，除了亦表現出大宅的美輪美奐，亦呈現了城市的美感。而大宅的選址亦是最多觀眾留意的地方，就如最新一季便取景於輕井澤森林之中。拍攝之時正值秋冬，一片紅葉景象既壯觀又浪漫；初雪來臨時，賞雪、堆雪人就成了眾人飯後的娛樂活動，甚至相約在假日時一起滑雪、浸溫泉，表現出一片輕鬆溫暖的互動氣氛，的確有讓人想起日劇《四重奏》，亦令身處香港但冇得飛嘅大家非常羨慕。所以話，一套有靚人有靚景而且咁夢幻嘅真人show，其實你當佢係連續劇，甚至旅遊節目睇都一樣冇問題，重點係好多人睇完都會FF自己身處其中，諗起都開心！