到底一個人可以同時做幾多樣嘢？身兼多職的Leanne Ho (何思諺) 從不甘於匿埋喺屋企做靚媽，她既是演員、主持(幕前)，同時擅長拍片、剪片(幕後)，亦是一位經理人、助手、攝影師、活動策劃者、市集主理人等等。Leanne話︰「基本上我好似係萬能咁，只要係我喜愛嘅工作，我都要牽涉到。」係才華洋溢定係攞苦嚟辛？「最近忙緊好多嘢，一日廿四小時係唔會夠我用㗎﹗唯有……頂硬上﹗」最後那三隻字說得鏗鏘有力、充滿男子氣慨。一直以來，我認識的Leanne就是這樣tough的女子，口裡說著忙忙忙，實際上唔辛苦、無挑戰性嘅工作佢唔願做。佢成日話自己佬味濃，其實就算唔睇外表，單睇工作態度這一點都feel到﹗
#偷衫賊
問Leanne認為自己是不是一個不拘小節的人，原本她死撐「唔算﹗我做嘢好注重細節㗎﹗」當我力數她的口頭禪是「無所謂」、「唔緊要」、「是但啦」的時候，她便笑著說︰「諗真啲，咁我都算係個不拘小節嘅人，應該係話，做人方面我係好不拘小節，但工作方面我就好注重細節喇﹗你知唔知啊？當我問老公我有無咩麻甩嘢嗰陣，佢即刻話『吓﹗你有好多﹗』哈哈﹗
佢話我成日偷著佢啲底衫同埋襪，好多明明係佢嘅襪，好大隻，我都會拎嚟著，因為我覺得呢樣嘢好casual囉，我同佢share同一個衣櫃，啲襪自然會擺埋一齊，而我通常視乎襯得靚唔靚揀襪，多過對襪啱唔啱我著，但係其實如果對襪真係唔啱我著我都唔會理， 係會凸咗嚿嘢出嚟，唔緊要啦塞返入去咪得囉，都無人睇到，得我自己知之嘛﹗ 可能喺好多女仔心目中 ，女仔應該著返女裝襪，但係對我嚟講『襪之嘛﹗』有乜所謂啫﹗ 可能因為我真係一個幾男人同埋幾麻甩，重要係一個佬味幾重嘅人，又唔係話男人婆，總之係一個好率性嘅女仔囉﹗老公都成日笑我講嘢把聲好沉，話我把聲好佬，有時見到啲BB好得意我會忍唔住扮吓得意聲，跟住我老公就會叫我唔好咁啦，我個仔杜杜仲會嬲住話『媽媽你平時唔係咁﹗』哈哈﹗」
#飛唔停
Leanne喜歡笑，而且每次提起老公都笑得很甜。Leanne「我好鍾意今日呢一身造型，有少少佬味好襯我，係我老公最鍾意最愛我嘅造型，哈哈﹗佢成日買衫俾我，呢一身造型由頭到腳都係佢喺日本買俾我，佢好鍾意買衫俾我，哈哈﹗試過有次我無乜點化裝，當時頭髮再短啲，而我係著成咁，去食嘢嗰陣俾人問『先生幾多位？』好誇張啊呵？但事實真係咁誇張﹗」說到一身帥氣牛仔造型來自日本，其實Leanne也很喜歡旅遊，應該說，在公在私，旅遊對她來說都有非凡的意義。
Leanne︰「我同老公因為工作需要經常要出trip，所以杜杜以前成日認為『搭飛機』等如『返工』，哈哈﹗好多人問我點解唔再做押花，我唔係唔想做而係做唔到，自從隻手唔舒服，個人精神又攰，身體發出警號，唯有被迫暫停押花。之後去過台灣學園藝治療，透過種花、種草過程幫吓老人家或智障兒童。事實上，除咗主力搞市集，我最主要係做關於旅遊嘅工作，之前我同老公一齊幫ViuTV拍咗個叫《婚姻五重奏》嘅節目，喺伊朗嘅旅程真係令人好難忘。跟住我哋兩公婆去咗美國睇NBA， 講起旅行就開心，仲有，好期待六月歐洲之旅﹗我而家跟緊kolor學bass，老公叫我揀一首自己鍾意嘅歌好好練習，但我都而家都未可以自己玩到一首歌，哈哈﹗」
# Leanne #十大最愛
1）食物︰牛油果
2 ）飲品︰暖水
3 ）歌曲︰ 〈你快樂嗎〉
4 ）電影/電視劇︰《The End of the F***ing World》
5） 書/雜誌︰《活著》余華
6 ）地方/店舖︰期待六月歐洲之旅其中一個地方「布達佩斯」
7 ）網站︰YouTube (杜氏夫妻TOM&LEANNE)
8 ）顏色︰藍色
9 ）講嘅一句說話 ︰「咩事啊?」
10 ）其他人點叫你︰Leanne / 喂 / 何惠
好𢯊女子︰
Leanne Ho 何思諺 (身兼多職，包括幕前幕後)
Facebook / 何思諺 leanne ho
Instagram / leanneho
Weibo / 何思諺
想請問「Leanne · 佬味濃」入面首日文歌叫咩名，謝謝