「邊一個發明了月經？」
相信好多人都曾經問過呢個問題。同「邊一個發明了返工？」有異曲同工之妙，令人心裡都帶點不情願，甚至個潛台詞係：「我又未打算生仔，好地地做咩要有月經？」
話雖如此，月經可以話係女士們嘅「魔鬼教練」，多謝月經，鍛練我哋嘅個人意志力及耐力，咁先可以塑造到更堅強、硬朗嘅自己！今日(5月28日)係世界月經衛生日，好𢯊女子唔怕尷尬，將嚟M心中嘅OS 講出嚟啦！
妳今日嚟咗M未？
細細個嗰陣講起嚟M怕醜到紅都面晒，人大咗明白月事唔再唔見得光，嚟M只係生理常態，可以係閒話家常嘅話題。無論同姐妹們行街、食飯，都可以不避嫌咁大講月經血淚事！
第一次聽到月經杯時，其實我是拒絕的！
首先，我想像唔到點將隻杯塞入去…… 其二，自⼰係心急求快嘅⼈，好驚更換嗰陣搞到滿⼿⾎，很「呢hea」﹗很血腥！很混亂！但係為咗環保著想，點都會想試一下，不過 …… 到而家仲未衝破心理關口，仲用緊M巾！我懶但我支持環保，來！來！來！大家試試看。
M痛慘過生仔！
「嗚呀！我唔生啦！」對好多人嚟講，M痛就好似預演生仔嘅劇痛時刻，頭一兩日只可以攤喺床上，郁一郁都會驚動到大姨媽發射紅色導彈！好多女仔痛到以為⾃己會失⾎過多有⽣命危險，如果生仔有十級痛，嚴重經痛都不相伯仲，生仔都係一世人幾次，但經痛係每個月都要面對！
月經唔好食生冷嘢？
由細到大阿媽成日話嚟M唔好食生冷嘢，但有時理性啲諗一諗，日本人夠成日食魚生刺身壽司，啲鬼妹都成日食沙津啦，咁佢哋月經咪痛過我哋十倍？有無人可以話我知？
大姨媽：向戶外活動Say No～
就算妳幾有個性，應該都唔及大姨媽咁有性格！佢最鍾意趁妳去camping、行山、游水、甚至旅行嘅時候殺你一個措手不及！搞到妳臨時咩mood都冇晒！媽呀，公平咩？
我話唔漏就唔漏！
嚟M嗰幾日個樣點都攰啲，一定要用衣著扎托返起個士氣，白色系衫褲就最顯精神嘅！下半身一於做好安全措施，放心啦，唔會漏嘅（我諗）！用念力同自己講：「唔會漏嘅！」
月事不失霸氣
細個嚟M嗰陣去廁所好驚俾人發現袋裡有M巾，硬係會用個靚袋仔袋住先至敢再拎去廁所，姐我而家經歷咗咁多次月事，仲怕咩呀？今年時裝界流行透明袋，即使透出成袋M巾又如何？就咁拎住塊M巾揈揈吓都得！輕鬆～
我大聲唔代表我嚟M
脾氣呢家嘢查實就無分季節嘅，再加上燥底必有因，一定係有啲踩到自己底線嘅人或事出現先會燥！我脾氣唔好唔代表我嚟M，嚟M亦唔代表我會發脾氣！完～