我認識 Asha Cuthbert(徐㴓喬)，因為她是模特兒、拍過幸福傷風素、百老滙等廣告，個性爽直唔扭擰，跟她合作往往愉快。你認識Asha，因為她早於十年前已開始拍片放上YouTube，透過發表獨到意見而紅爆網絡，比起現今一眾KOL、網紅行前好多。他認識Asha，也許是基於2015年一段回應王晶在電視節目《網絡挑機》所發表的言論，令這位16歲已開始在網上發聲的少女受到各方注目，成為大家眼中敢言的烈女……
無論你我他是怎樣認識Asha，或許大家對她最深刻的印象，是「識講流利廣東話嘅鬼妹仔」。父親是英國人，母親則是菲律賓人，沒半點華人血統的Asha曾在訪問中提到︰「我在香港長大，但因為外表關係從來沒被當成百分百香港人，但心底裏我當自己是百分百的香港人。」兩年前，Asha決心離開她最愛的香港，與當時的伴侶移居英國。結果一年多過去，愛情斷了線，今年回來香港，銳意對事業與愛情均狠狠豁出去，試過才知什麼適合自己，總好過試也不試便放棄，衝啊﹗
香港，我回來了﹗
過去廿年，香港曾經歷多次移民潮，1997年香港主權移交中國前，香港爆發了一輪持續約五年多的移民潮。廿年後，多項研究顯示部分香港人再因政治、社會及生活的不景氣而決意移民。根據加拿大聯邦移民部數據顯示，單單是去年(2017年)便有1,558名香港人移民到加拿大。那邊廂人心惶惶爭相離港，這邊廂移居英國兩年的Asha卻選擇回流香港再做「港女」。對於呢個問題，我真心想知，所以訪問擘頭第一句便直接問︰「妳做乜返嚟啊？」。
Asha︰「兩年前突然好想離開，於是決定放棄香港所有嘢，我好決絕咁樣同香港講再見，跟住就同當時嘅女朋友、帶埋啲貓一齊移民去英國啦﹗但係晌最終愛情都堅持唔住喇﹗分咗手，跟住我就決定返香港繼續做嘢﹗其實我都鍾意英國嘅生活，過去嗰年幾做過好多office job，做過production studio、model公司、甚至Dog walker，即係放狗，應該係咁多份工最開心嘅一份工，仲做過電影『咖哩啡』，臨離開英國嗰陣終於有班friend，但諗真未係時候長住。父母去咗菲律賓定居，我就自己返香港﹗認真諗，之前喺香港我對工作仲有好多保留，無好好咁豁出去做呢行，今次返嚟要積極進取，好彩返咗香港兩個月就開始拍戲，其實唔做modelling都可以試好多其他嘢，如果今次返嚟香港都發展得唔係咁好，我可以返英國繼續做office job都無所謂。」
迫自己減肥，no way﹗
單看外表，兩年前後的Asha沒有多大變化，是少了幾分baby face，工作態度專業如昔，都係等佢自己講吓有咩分別。Asha︰「我個樣係無咩分別，不過最近D friend話我變咗好多，唔知係咪分手嘅打擊太大，哈哈﹗咁多年嚟，我將好多唔開心嘅嘢抑壓住，成段關係有好多嘢都係由我一個承擔。估唔到囉，拍拖八年做乜都係諗住嗰個人。點諗到話無就無﹗雖然分咗手，不過而家都仲有傾計，因為啲D貓仲喺佢度。我諗我最大轉變係，而家會諗我自己鍾意咩呢？以前做乜都擺嗰個人先，連睇NETFLIX睇咩，以前會覺得佢鍾意我就鍾意，而家會諗『嘩﹗好多Option囉﹗』可以自己揀喎﹗嗰種感覺好奇怪，而家係真正做返自己，咁樣係健康D，乜都重頭嚟過﹗而家諗自己先……」
老老實實，多年來睇Asha拍嘅片，早已被佢具批評性嘅見解洗腦，以為Asha就係一個無論思維或行為都非常獨立嘅女子，原來過去嘅佢係活在伴侶影子下，謝謝坦白。Asha︰「而家人大咗，會諗返以往有咩問題，之前簽modelling公司四年，嗰段時間好似咩都無諗，個人無以前咁creative，因為嗰陣工作都幾密，每日都係返工、被人化妝、擺pose、放工、食飯，第二日再嚟過。完全無心諗嘢，係最dry嘅時間。初初去英國嗰時我有迫自己日日拍片，拍完自己睇返，真係過唔到自己嗰關，所以最後都private咗啲片，唔想為拍而拍。有啲人可以迫自己唧啲creativity出嚟，但係我唔得囉﹗
仲有，以前做modelling要食藥減肥， 搞到個人有啲癲囉，我明明唔鍾意做呢行咁control自己嘅外表，所以就諗我做咩要咁做呢？無論點瘦法都唔會瘦到佢哋要嗰個程度，我記得有次有個casting係佢(客戶)接受到我上身但接受唔到下身，咁好難減喎淨係減下身，永遠都唔會perfect。我之前都試過有個casting我就咁走咗，因為前面仲有三、四個又後生過我又瘦過我，約咗friend喎﹗走﹗ 因為已經同19歲入行到而家26歲，Kind of Fuxk that! 之前咪會因為咁而搞到自己好唔開心囉，我唔會再跳入個火圈﹗」
賣廣告？要過到自己嗰關
KOL (Key Opinion Leader) 是數位時代衍生的一種新興職業，隨著like數飆升、followers爆增，這群具號召力的網絡紅人開始取代媒體、藝人、名人，成為帶動潮流的意見領袖，無論你是否認同他們的公信力，這群人已經是當今商界行銷的要角。在KOL 氾濫的年代，香港KOL 多的是，相比起這群後起之秀，十年前已開始拍片放上YouTube抒發己見的Asha可說是元祖級KOL。以Asha在YouTuber界的資力，這次回流香港即使專心做KOL搵食都夠，問Asha是否會利用這優勢，她竟斷然拒絕造假，就算賣廣告都要過到自己嗰關，絕不欺騙讀者咁話﹗
Asha︰「可能有人會覺得我係烈女咩都敢講，事實上我又唔嗰種乜人都鬧嘅人﹗有無meaning好重要，例如曾經有啲學生叫我講政治嘢『Asha，好需要你把聲﹗』但係面對我唔了解嘅嘢我就唔會亂咁comment，有信心先講。如果你有睇我Instagram ，會發現其實我無乜講beauty嘢，因為就算佢哋 (美容品牌)有搵我我好多時都係say no，睇我嘅觀眾都知我本身個格係點，如果我突然亂咁講呢樣嘢好保濕啊blah blah blah，觀眾實會話『Asha好明顯賣廣告啦﹗』
之前有個大牌子搵我，我都嚇親，即刻問佢無搵錯，哈哈﹗好彩對方俾自由度我，我試用之後會少少笑吓個牌子又笑埋自己，因為我唔可能乜都唔做就猛話perfect，啲人都唔會鍾意睇啦，仲負面﹗所以如果有啲真係廣告，我會喺個post講『廣告嚟㗎』，我唔鍾意講到好似唔係廣告但係明明廣告嚟囉﹗我會想最honest、最誠實去show嗰樣嘢出嚟，如果唔係過唔到自己嗰關﹗我由十五、六歲開始拍片放上網，開頭已經被高登起晒底所以無咩好驚，有啲YouTuber話佢哋會block嗰啲唔好嘅comments，我就唔會喇，通常會串返佢哋佢哋就唔會出聲。我無咩驚，最驚過唔到自己嗰關﹗無論我之後簽咩公司，我諗佢哋都要預咗我係咁嘅人，可能個risk就係唔知Asha會講咩，言論自由好重要，呢樣嘢我係唔會妥協﹗我就係咁㗎喇﹗」
我最憎……
成日覺得，想從一篇文章或幾個問題去了解一個人，實屬難事。不過最近發現，只要知道當時人憎啲咩，會比較容易了解佢係一個點樣嘅人。身邊很多「品味L」朋友認為電影《Call Me By Your Name》(《以你的名字呼喚我》)的導演Luca Guadagnino，將同志故事拍得非常唯美，處處散發出浪漫的味道。我無睇過，不予置評，點知同Asha講起，原來呢套係佢本年度最憎電影，說時咬牙切齒，話自己一路睇一路鬧，獲提名奧斯卡最佳電影又如何？囊括多國電影獎又如何？多人讚好唔代表係好，你啱﹗
Asha︰「叫我諗hate list易過鍾意個lists好多﹗十年前開始拍YouTube 片，嗰陣16歲都係以講唔鍾意咩為主題，同埋特別係喺香港，拍啲負面嘢總係比較多人鍾意睇。如果你拍一段片係講你好唔鍾意嗰樣嘢，跟住你會發現好多comments會話『你講出我心聲﹗』所以責任會比較大。我啊﹗憎嘅嘢都幾多，我有一日好忟，跟住有個friend就同我講話『你嚟M之嘛 ﹗』我一聽到就憎﹗ 好忟啊﹗點解我嬲又關period事？ 我純粹忟咋﹗除此之外，我而家in a relationship (有拍拖)，因為佢係trans (跨性別)，要點樣令我自己身邊嘅人尊重返佢係一個trans好有難度﹗佢出生係女仔但而家identify as(識別為)男仔，都有啲朋友會話『but he doesn’t have a penis! 』你係我個best friend，要令你明白要尊重人哋個decision囉﹗
仲有啊﹗你都知我最憎化妝﹗通常都係用遮瑕膏遮少少，可能某一日遮少咗就會有人話『Asha你好攰啊？好殘啊 ﹗』咁我本身就係咁啦﹗個個話《Call Me By Your Name》好睇，唔通一定好睇咩？我一路睇一路鬧，演員之間無乜chemistry(化學作用)都算，有啲朋友就維護『兩個男人嘅戲係咁㗎啦﹗』，有好多LGBT(女同性戀者) 嘅戲都無俾到呢種感覺我。睇完，兩個幾鐘我睇咗D咩？﹗『I didn’t like it! 』好似Oscar都有提名﹗好彩我都搵到一個friend同我有共嗚，好多位係拉長for artistic feel刻意製造氣氛，呢個topic要真係聽到兩個主角內心講咩，咁我估睇書會好睇啲﹗《Moonlight》(《月亮喜歡藍》) 就好睇喇﹗好喇﹗其實我都知自己好主觀，不過我就係咁㗎喇﹗今次返嚟由零開始，睇吓做得幾耐就幾耐，我唔想set時間再俾壓力自己，以我嘅性格又會走㗎喇﹗豁出去啦﹗」
好𢯊女子︰
Asha Cuthbert徐㴓喬 (Artist/ Model/ YouTuber )
Facebook / itsashaetc
Instagram / ashaetc
Youtube / ashaetc
#Asha #十大最憎
1）食物︰ 內臟 (好核突)
2 ）飲品︰ 過甜嘅飲品
3 ）歌曲︰〈Chun Li〉by Nicki Minaj
4 ）電影/電視劇︰《Call Me By Your Name》
5） 書/雜誌︰《A Cursed Child》by JK Rowling
6 ）地方/店舖︰ 週末嘅銅鑼灣
7 ）網站︰Facebook
8 ）顏色︰黃、紫色
9 ）講嘅一句說話 ︰「你嚟M之嘛﹗」
10 ）其他人點叫你︰ 我冇乜花名😭
#Asha #十大最愛
1）食物︰ 薯仔（任何類型🥔🍟）
2 ）飲品︰ Coffee
3 ）歌曲︰Dua Lipa的歌
4 ）電影/電視劇︰《A Quiet Place》
5） 書/雜誌︰《Every Day》by David Levithan
6 ）地方/店舖︰男朋友間屋
7 ）網站︰《IMDB》
8 ）顏色︰ 軍綠、深藍色
9 ）講嘅一句說話 ︰「 Sorry我嚟唔到啊﹗改期好冇？」
10 ）其他人點叫你︰ 你係咪拍片個個？