香港人最鍾意去東京﹗無人反對，right?
對好多人嚟講 (包括我)，東京同個「厭」字永遠扯唔上關係，因為無論去幾多次，都總有未去過嘅地方，即使反覆去同一區，可以食、買、玩嘅嘢永遠層出不窮﹗
就係因為大家都咁諗，所以暑期旺季一開始，又有千千萬萬香港人湧咗去東京喇﹗去東京係好開心，不過嗰種人山人海、華語多過日語嘅壓迫感，會令人有種明明放緊假都仲係透唔到氣嘅感覺。特別係當你為咗方便而選擇住喺新宿，有時真係會好想咆哮一嘢︰「俾我靜吓得唔得？﹗」
溫馨提示，其實新宿仲有個地方 (暫時)未被攻陷，說的是去年年尾開業的「TSUTAYA BOOK APARTMENT」。點解咁肯定？因為好友昨晚先至去hea完，難得開業數月仲keep到環境舒適清靜。筆者早前初次幫襯感覺實在良好，最啱唔愛夜蒲、唔行驚安の殿堂、只想靜靜哋睇吓書、plan吓行程，但又識自律嘅優質旅客。
PLAY · WORK · BREAK
俾你hea足24小時的書店
還記得2015年在東京池袋開業的BOOK AND BED TOKYO嗎？自此以「睡在書店裡」為概念的背包客旅館開始流行起來。可能我未至於喜愛閱讀到想與書同眠嘅地步，加上朋友話置身書海之中其實唔係真係咁好瞓，所以我未到過BOOK AND BED一遊。好彩我最愛的蔦屋書店 (TSUTAYA BOOKSTORE) 近年好活躍，唔止積極打入台灣市場，又打造蔦屋家電，去年年尾更加喺繁華嘅新宿開設新型態讀書休憩空間「TSUTAYA BOOK APARTMENT」。
點解我咁推介TSUTAYA BOOK APARTMENT？因為方便囉﹗當然係指如果你住新宿，又或者搭凌晨機去東京，未夠鐘check in，想喺新宿搵個地方休息或 refresh 一下。TSUTAYA BOOK APARTMENT喺正新宿最旺嗰條街，由JR新宿駅(東口)徒歩行兩分就到，如果喺地下鐵新宿3丁目駅(A5出口)出，行1分鐘就到﹗24小時營業、年中無休嘅 TSUTAYA BOOK APARTMENT佔4至6樓，全館提供Wi-Fi上網，館內有儲物櫃、更提供電腦、影印機等設備，館內藏書供入館者隨意閱讀 (當然好歡迎你買)。至於2至3樓的Book Lounge 則是屬STARBUCKS所有。特別留意，6/F是女性專用樓層。不過去邊層都好，總之要記住保持安靜及愛護公物，唔好影衰自己、映衰香港人﹗
TSUTAYA BOOK APARTMENT位於新宿ミニムビル，即是由JR新宿駅東口步行向伊勢丹嗰條街，2至3樓的Book Lounge分別營業至晚上11時及零晨2時。
4/F FRONT・COWORKING SPACE
想進入TSUTAYA BOOK APARTMENT，必先到4/F登記及付款。在櫃台附近擺放的書籍與文具也對外販售，推門進入Coworking space，可用作開會或共同辦公室，擺放了桌椅、電腦，亦提供插座可充電，也適合一個人在這裡閱讀、上網。
5/F COMMUNITY AREA
男、女性共用的樓層，上回到東京旅行，某夜晚飯後行完驚安便走到這裡消磨了兩小時，狂睇最新雜誌之餘，亦不停翻閱旅遊書及飲食指南，好好規劃餘下的行程。進入此層需脫鞋換上拖鞋，除了可安坐基本的桌椅，大家也可坐在地毯或豆袋梳化上，擺一個最hea的姿勢好好放空。此層亦提供儲物櫃及自行沖調的簡單飲品。
6/F WOMEN-ONLY SPACE
六樓是女性專用樓層，基本功能與5樓相約，不過多了化妝室供女性使用，俾多100日圓(每小時)都抵﹗
TSUTAYA BOOK APARTMENT
地址︰東京都新宿区新宿3-26-14 〒160-0022
新宿ミニムビル (Shinjuku-Minimu-Building) 4-6/F
電話︰03-5315-4077
營業時間︰24小時營業，年中無休
入場費用：每小時500日圓 (女性専用樓層、浴室需另加收費，詳情請向店員查詢。