由著名日本戶外潮流雜誌《GO OUT》所舉辦嘅日本最大露營活動 GO OUT JAMBOREE（又稱GO OUT CAMP），就算你未去過都可能會略有所聞：
「去富士山下露營呀嘛！」
「好似話天氣凍到得零度，香蕉放一晚都變黑色！」
「撞正雨季喎，落住雨露營又泥地又無得沖涼，呢咁hea咪搞我！」
「你以為富士山咁容易見到？天氣唔好，去足三日都見唔到啊！」
以上對話我聽過亦感受過，因為今年4月，筆者就係喺「春の嵐」（即春季風暴）的天氣預報下參與一年兩度的露營界盛事－GO OUT JAMBOREE (又稱GO OUT CAMP)，唯有做足遮風擋雨裝備，帶住「落雨又有乜好怕」的心情出發。結果點？三日二夜露營生活唔止有三份二時間落雨，其中一晚甚至可以用狂風暴雨來形容，然而落雨有落雨玩法，最後都係happy ending﹗
2018年秋季GO OUT CAMP將於今年9月28至30日喺日本静岡県富士山下舉行，身處香港嘅我哋唔止可以托日本朋友透過官網預訂入場劵，更可透過GO OUT JAMBOREE官方授權香港單位 InDa House Media Lab 訂票，嚟緊呢個星期 (2018年9月7-16日)，亦有參加者招募活動，快啲睇吓過來人雨中作樂心聲，把握最後機會﹗
裝備先決！
御寒防雨之對策
今年春季的GO OUT JAMBOREE於4月13-15日舉行，同樣選址靜岡縣富士宮市朝霧高原，是日本最大型起露營活動，參與人數直迫七、八千人，場面熱鬧。不過，不幸地三日當中有兩日下著雨，其中一晚更是狂風暴雨。在惡劣天氣之下，除了是意志的試煉，還是身上裝備的測試。
唔使講都知日本人對造型非常講究，尤其戶外造型更是用得上「專業級」來形容，又靚又實用的裝備能令你在於雨中瀟灑自如地行走，更加是個性、品味的反映！正所謂輸人唔輸陣，香港人更加唔可以失禮，一於研究下造型先！
就算你有件防水跣水外套，都未必能抵擋持續大雨，一件由頭包到腳的雨衣就是去camp最需要的，配以靚色及圖案的時尚雨衣能令你如漆黑中的螢火蟲般耀眼，可將你的銀包、水樽、戰利品等置於雨衣內收藏得宜。大雨往往伴隨著無定向的狂風，為免要長期按住個頭，狀甚狼狽，因此一頂見得人的防水帽是何其重要！除此之外，就是保護雙腳的防水鞋，雨後草地往往泥濘遍地，應穿上專業防水鞋如duck boots、rain boots，個人建議可考慮長身水靴，以防污泥濺到褲上。此外，不妨多帶一對涼鞋讓雙腳可抖抖氣。溫馨提示，4月份朝霧高原夜晚溫度直迫零度，記住帶多件保暖衫褲啦！無帶？場內買又得，又有藉口買衫啦！
雨衣成為今次露營祭的「指定衣著」, 就算成地泥漿，小朋友都玩得不亦樂乎，連狗仔都打扮得靚靚一同享受大自然。
優質帳篷可保命！
把營地變成示範單位
面對變幻莫測的天氣，一個能為你遮風擋雨的帳篷和天幕尤其重要！無論是四月或是九月底，很多時GO OUT JAMBOREE也遇上雨天，因此必需選擇一個防風防水兼有保暖作用的帳篷，能抵抗零度氣溫的睡袋及厚身的充氣睡墊，睡得舒適先有精神玩㗎嘛！筆者不是專業露營友，要買齊全套裝備實在唔划算，幸好日本有不少租營網，由帳篷、天幕、睡墊、營燈、摺檯及椅等等都可租借，並直接寄到閣下酒店，十分方便。不過對於露營經驗不算多的筆者來說，要紮一個紮紮實實的營真係一大個黑人問號，幸好有資深的營友幫忙。
由於天氣寒冷，個人認為務必攜帶或租借焚火台，選擇較大及紮實的款式以防被大風吹倒，柴枝可在詢問處購買，500日圓一紮，大概能燒一小時，一班朋友圍爐談心特別好feel！落雨？使乜驚呀？以今次為例，筆者及友人於日本租營網https://campdays.jp/租了「Standard Set」，組合包括 SNOW PEAK帳篷、天幕及四張摺椅，COLEMAN的摺檯、GENTOS露營燈及帳篷吊燈，租四日三夜(預留1日運輸時間) ，合共
32,390 円 (約$2,268)，個人認為價錢算是合理。而日本人對露營的認真程度實在值得敬佩，觀看他們有如「示範單位」般的營地絕對能放入節目表，不如來個靚營巡禮，偷師下次起個靚營開心吓都好！
冒住雨都要食玩買！
雨中作樂之盛況
首次參與GO OUT JAMBOREE的筆者堅持一嘗戶外煮食的滋味，食材可於往營地中途的大型超市購買，建議製作簡易快捷的shabu shabu，不過缺點是要在寒冷天氣下洗碗。如果唔想麻煩，可只煲熱水、湯飲用或完全不煮食，一日三餐在食檔解決，第一晚可參與前夜祭BBQ，一班人一齊燒烤十分熱鬧！注意主辦單位會提供燒烤爐和炭，食物則要自備。
營地的FOODPARK STAGE有十多間食檔於第二天起開始營業，由拉麵、吉列豚肉飯、關東煮、薄餅、熱狗、咖啡等一應俱全，平均消費約1000~1500円，盡情食完又玩，玩完又食！首推車仔檔拉麵，一塊炭燒豚肉令人回味！麵檔更是長期大排長龍，店主煮到無停手，坐於車仔檔迫迫地食麵，似足日本傳統食台咁有本土風味。另外，車旁有現做薄餅，師傅把剛拉好pizza放入煤炭爐內，齋睇已經風味十足。而最令人印象深刻的小食檔則是一間毫不起眼、使用朝霧高原的牛乳及蛋製作蛋糕的小店，其中一款蛋糕卷外貌普通，卻令人一試難忘，鬆軟的蛋糕充滿香口的蛋味，包著凍冰、口感有點像雪糕的奶油，入口即溶，盛惠300日圓 ，簡直無！得！輸！ 下次見到記住不要錯過！
晚上來碗熱騰騰的拉麵和濃度甚高的朱古力，為疲憊的心身注入能量。
作為熱愛shopping的香港人，緊記第二天早點起身，預備十點一開檔就衝去買筍嘢！點解咁講？接近一百檔、長達一公里以上的購物街必定令你行完又行，行極都唔厭。當中不乏熟悉的時裝及戶外用品品牌，如JOURNAL STANDARD、GO SLOW CARAVAN、AIGLE、KIU、BURTON、CHUMS和FILSON等，和一些vintage及手作品牌攤檔，大部分品牌貨品低至三折至半價發售，其中以DANNER最為受歡迎，Mountain boots價錢由約59,000日圓減至20,000日圓，唔買真係對唔住自己，對boots有幾「掗拃」都唔理喇！如果想執平嘢，不妨最後一日遲啲走，店員隨時拿出「大割引」紙牌，價錢平到你唔信！朋友更因心儀之物沾了泥漿，最終以差不多一折價錢入手，原來落雨都唔係咁差啫！另外不少攤檔都有合家歡的小遊戲及手作仔，點會怕悶親？
除了以shopping形式感受日本文化，參與場內活動及睇show一樣叫人大呼過癮！除了有為小朋友專設的玩樂區，亦有坐熱氣球、騎馬、瑜珈、室內攀石、射擊和「Catch & Throw」掟飛碟等活動，鬥大聲、鬥快卷睡袋和拗手瓜等不同類型的比賽都適合一家大細玩，雖然部分因天雨關係而取消（哭），但都算多姿多采。另外場內亦有多個大小舞台，今年的line-up有清新派的Miyuu、Every Little Things主音持田香織和男子樂隊SPECIAL OTHERS和MONGOL800等，還有多位DJ打碟，令現場氣氛升溫，想睇show就要mark實schedule去喇。主要的節目多集中於第二晚，但筆者就因為天氣太惡劣而留在營火旁，遠遠地聽到歌唱聲和歡呼聲就知即使橫風橫雨都無阻人們的玩樂心情！（我都係靜靜地享受暴風雨好了﹗）
袋實！GO OUT CAMP入門實用資料
1) 厠所都有分級別，靚厠方便辦大事
未見識過營地厠所前未免有點擔心，以前去camping最怕去流動厠所，有朋友寧願行埋一邊草地搞掂就算，但是GO OUT CAMP的如厠體驗良好，姿整女都唔怕﹗場內大致上分三種厠所，第一種是最常見耶種又迫又黑的流動厠所（使用時最好戴頭燈射住，以免差錯腳），不過每間都附有一支清新劑，基本上沒異味，又沒有成地紙巾，合格啦！不過如果你想辦大事，可考慮女性及兒童專用的流動厠所及於ROUND FUJI旁的公厠（FOODPARK附近），廁格比較寛敞之餘，有燈有厠紙，加上是電動馬桶，猶如沙漠中的綠洲；缺點是格數少，通常要排隊，想舒服啲就要等啦！
2)想沖涼就要快手
去得露營就預咗唔可以舒服地沖涼洗頭，不過想沖涼都有計，入到場就要快手於詢問處取票，乘搭分不同時段往返營地至附近「富嶽溫泉・花之湯」的接駁巴士，聽聞名額好快便爆滿，筆者搶不到票，乖乖享受露營的「樂趣」啦﹗
3)正確掉垃圾排第一位
日本人對垃圾分類的著緊程度相信不用多說，詢問處可購買特製的垃圾分類袋（每個100円），把廚餘、可燃燒垃圾、膠樽（必須洗淨，招紙及樽蓋為可燃垃圾）、鐵罐和玻璃樽要分開掉置，出營前拿到垃圾收集處分類擺放。不過到大自然玩樂，還是少製造垃圾吧﹗
4)如何購票
想露營的朋友可選擇兩日一夜或三日兩夜的入場劵，自駕遊可選擇泊停車場（期間可出入營地）或泊於營地內（期間不可離開），分別為13,500 日圓/人，後者為17,000日圓/人，同行營友為10,000日圓/人。由於地區較偏遠，東京市中心駕車前往約2小時，如乘公共交通工具，可於富士急線的河口湖站下車，再轉乘開往富士宮的公共汽車，下車後步行約二十分鐘。不過此路線相當轉折，建議自駕遊較佳，若不想過夜，只想搵一日去行下、shopping亦可選擇day pass。最「唔使煩」方案是由香港代理代為購票，輕鬆享受露營樂啦！
想了解更多，不妨瀏覽GO OUT JAMBOREE 2018官方專頁www.gooutcamp.jp，率先睇吓Area Map，感受下組織與編排有幾咁精采﹗身處香港嘅我哋唔止可以托日本朋友透過官網預訂入場劵，更可透過官方授權香港單位 InDa House Media Lab 專頁或其網上平台http://eshop.stay.com.hk/ 訂票外，嚟緊呢個星期 (2018年9月7-16日)，InDa House Media Lab將舉辦GO OUT CAMP參加者招募活動，除了有日本《GO OUT》雜誌展覽攤檔外，重會有外國及本地outdoor品牌展出及發售最新戶外露營行山用品等等。
「日本GO OUT CAMP參加者招募」
日期：2018年9月7-16日
時間：13:00 – 21:00
地點：大角咀利得街11號利奧坊Square Mile 1/F全層（奧運站B出口步行約5分鐘）