公眾人物或多或少都有點「偶像包袱」，無論私底下有幾不修邊幅，在鎂光燈下或社交媒體上都要規行矩步，以靚樣示人。不過身為平凡人嘅你同我，日常生活唔會時時刻刻有鏡頭影住，其實又邊使加咁多限制俾自己？就如本地藝術團體START FROM ZERO (下稱SFZ) 的其中一位happy worker — Miki，就一直活得無包袱，而且勇於跳出comfort zone。邊個話女仔唔啱做木工呢啲粗重工夫？偏偏佢就做得好自在。究竟係咩驅使佢願意日日都帶住成身汗味喺木屑堆中工作？我諗真係愛呀！
足球女將搵工轉工無限輪迴
單看外表就知道Miki是個好動型女生，原來以往她曾經加入過港隊青年軍，是一名足球女將，不過後來因為傷患頻頻，斷過四次(!!)前十字韌帶之後，終於不得不終止運動員生涯。離開了熟悉的運動圈子，大專畢業後她就跳入了搵工轉工搵工轉工的無限輪迴之中。Miki︰「由細到大做過好多份工：酒吧侍應、售貨員、物理治療助理、店舖經理、Marketing Director、游水教練……最高紀錄嗰排一次過打四份工。」唔趁年輕試多幾份，點知自己真正鍾意啲咩？
「後來去咗欖球總會做文職工作，日日返9至6，返咗一排我覺得自己唔可以咁樣，過啲太規律嘅生活簡直係磨滅意志。而且當時freelance幫手做marketing工作嘅一個衛衣品牌要結業，無咗呢份工之後我其實有啲lost。因為我覺得一個人搵快樂嘅方法來自成功感，如果你搵到有興趣嘅工作，而人哋又對你做嘅事表示認同，甚至同你講好多鼓勵說話，你會好振奮，更加會keep住個passion去做好件事。不過嗰陣嘅我未遇到好理想嘅工作，所以打算去working holiday，睇下會唔會搵到啲更適合自己嘅機會。」
來自紐西蘭的溫暖感覺
一直抱著隨遇而安的心態，Miki到埗紐西蘭後才慢慢開始尋找工作機會。「嗰時成日會出街周圍行，見到好多當地人屋企車房入面都有張木工枱，佢地會幫自己屋企整嘢，例如起個簷蓬嚟晾衫，或者或者砌個木架嚟種植物。見到呢啲手作令我諗起我好細個嘅時候已經好鍾意研究啲枱枱櫈櫈點整法，見到都會摸吓。就算我以前做相機公司，我都好鍾意拆開啲相機再砌返佢，好enjoy做啲砌砌嵌嵌嘅工作。所以嗰陣去紐西蘭South Island backpacking旅行嘅時候，我就參觀咗一間木工廠，一入到去已經覺得『嘩，好x型！』，自己好似完全fit in呢個地方咁。諗落其實做木工真係好適合我唔鍾意坐office，鍾意周圍走嘅性格。」後來Miki就嘗試於當地尋找木工的工作，打算由學徒做起。不過受制於外國人的身份，一直沒有回音。果然要將興趣變成職業，還是需要一點運氣。
雖然找不到理想工作，不過當人在異鄉，生計還是個必需要解決的問題。於是Miki就重新擔任熟悉的崗位—游泳教練。Miki：「去working holiday第一樣想學英文，第二樣想學人哋文化，而唔係去農場做苦工，所以好好彩有間私人學校請咗我去教小朋友游水。嗰度環境好靚，對住個火山，係個無乜中國人，可以好好練英文嘅地方。每日除咗同小朋友溝通，每次上堂前都要同其他同事開會，佢哋會問好多我嘅意見，令我覺得好被重視。而且無諗過做左一兩個月之後，老闆話我pick up工作好快，啲家長同小朋友都好鍾意我，所以簽咗兩年working visa畀我。到後來我決定要走，好多家長仲送酒、耳環、糖、自製曲奇、蛋糕俾我，我完全冇expect過，但有種好溫暖嘅感覺。」
做木工只會緊張唔夠時間多過想hea
筆者相信，這個世界是有吸引力法則的，當你對某件事念念不忘，全個宇宙都會幫你達成願望。剛回到香港的Miki在街上偶然碰見了中學師兄，亦即是SFZ的其中一位主理人Katol，沒想到這就是她成為木匠的契機。Miki：「嗰次見到Katol，我話好想上佢studio參觀吓，開頭我諗住義務性質去睇下有咩做，順便學下嘢，後來佢哋有興趣請我做part time，我心諗『梗係好！』之後就開始喺嗰度返工。」
即使本身性格好動，但遇上需要大量體力勞動的工作，Miki不諱言最初都有點吃力。「入行第一個project係幫一間時裝店做裝修，頭十日好辛苦，雖然係冬天但都做到身水身汗，學到好多新嘢，但完全唔知時間過得咁快。喺呢度做嘢就係你會緊張唔夠時間多過想hea。以前做過好多份工都係諗住『唉﹗幾時放工呀﹗』，但呢份工就係『嘩咁快又夠鐘嘅！』」做到自己想做的職業固然幸運，遇上合拍的同事就更加係bonus。「唔知點解我哋每次做outing job都會落雨，有次試過喺黑色暴雨之下我哋要幫一個美容品牌喺海港城出面做set up，連續三日都留喺嗰度，做到通頂就一齊睇日出，一齊食麥樂雞，嗰份一齊拼博、流汗、分享嘅感覺好好，呢樣係我做第二份工搵唔到嘅快感。」
有人說去完working holiday的人，習慣了外國悠閒自在的生活，回到香港容易感到迷失，也較難重新適感急促的生活節奏。不過對Miki而言，在紐西蘭曾經試過每星期要返足七日工來賺取生活費的日子，令她發現原來自己都幾捱得。她更用電鑽來形容自己現時的工作態度，她說：「我覺得自己就好似一個衝擊批咁，雖然有時會因為失敗而唔開心，但我唔會俾自己停，好似身體入面有個摩打帶我不斷向前，不斷試唔同嘅嘢，雖然工作有時會辛苦，但我好鍾意挑戰自己嘅極限﹗」
去美之買工人褲著殘咗都唔肉痛
現時Miki在SFZ已經工作了一年半，對於鬥木的工序亦愈來愈熟練，有時難免要處理較重覆又沉悶的環節，Miki又會怎樣應對？「如果做啲唔危險嘅工作例如索色、磨木嘅時候我都會聽歌，多數會聽觸執毛、The Whitest Boy Alive、Toe呢啲比較輕快啲嘅歌，個人會有拼勁啲﹗不過呢排就鍾意聽王菲，一路唱住『夢中人～』咁做嘢好好feel！」
做得多粗重工夫，衫褲鞋襪自然也容易磨損，所以Miki平時亦不會花費太多在工衣上。Miki：「我成日喺Carousell買衫，因為返工著黎著去都係嗰幾件，最緊要舒服同實用，著殘咗都唔肉痛。雖然熱嘅時候都會著短褲，但一定會著長襪，因為好多木碎飛嚟飛去會容易𠝹親。另外，我都會去美之買工人褲，因為studio每逢1號同15號會有uniform day，全team人一齊著工人褲，唔著要罰一百蚊㗎！」咁有team spirit，難怪可以令大家對studio更有歸屬感。
以前做慣「slasher」嘅Miki，其實又點會安於只係做一份工呢？所以現時她除了是一名木匠，還在國際學校中擔任體育老師。Miki：「我都幾鍾意教小朋友，因為佢哋唔會扮嘢，好多天馬行空嘅諗法，甚至有時可以啟發到我添！」談到未來計劃，這位熱愛木工的女生依然希望循這方面發展：「嚟緊希望提議吓學校可以俾我教埋木工班，另外自己亦計劃同朋友夾租studio，嘗試整啲木製傢俱，應該會幾好玩。」雖然Miki話自己年紀唔細，不過當一個人搵到真正有興趣嘅事，並成功將之化為事業，無論而家係咩年紀都一樣值得開心。
好𢯊女子︰
黃美琪 Miki Wong (木匠 )
Facebook / Miki Mei Ki Wong
Instagram / kiaoramia