HAHAHAFLORIST花 · 館不只是花店

「Ha」-「Ha」-「Ha」……「How to pronounce？」
站在HAHAHAFLORIST花 · 館前的外籍人仕在寒暄，反覆讀了數遍且愈讀愈高興，不是取笑，而是因為覺得有趣而開懷大笑。無錯，係讀「哈」-「哈」-「哈」，店主Becky六年前創立這個品牌的時候，就是希望藉著她創作的花藝為大家帶來歡樂，令人哈哈大笑。
位於中環的前中區警署建築群「大館」，經過活化工程後陸續開幕，成為全港市民及遊客們的打卡熱點。館內唯一一間花店 — HAHAHAFLORIST花 · 館亦終於在九月初面世。

別說我多心，總認為做過記者的人特別不甘平凡，往往喜歡設法將滿腦子的怪念頭付諸實行，店主Becky就是這種愛挑戰的行動派。當她還是個文化及飲食記者的時候，便開始將工作上見識到的林林總總化成日後創業的點子。自從2013年8月創立品牌、2014年4月成為全職花藝師、到2016年4月進駐金鐘廊開設首間實體店，再到今年被大館邀請，打造這法定古蹟內唯一的花店，一切皆沿自一顆勇於嘗試的心。走進HAHAHAFLORIST花 · 館，除了可以買花，還可以賞花、嘆花茶、影靚相，聽說這裡還是花藝學堂、展覽場地、音樂會場……總之絕對不只是花店咁簡單﹗

鬧市中的歇腳點

老實說，HAHAHAFLORIST花 · 館的地方並不算大，但因為樓底比較高，看上去還是很有空間感，可塑性甚高。Becky︰「大館係一個好有文化氣息而且好特別嘅地方，城市中難得有一個可以俾人停留嘅地方，特別係中環，大館偏偏可以令人停落嚟。一直認為賞花係要配合心情，好多時因生活太急忙，根本無時間好好去欣賞花。但係大家可以喺花 · 館坐低飲杯花茶，再靜靜賞吓花。呢度唔止係一間零售花店，仲有好多可能性，係我一直以來想做到嘅嘢﹗花嘅可能性好多，我打算定期同不同品牌合作，甚至舉行迷你演唱會、書展、畫展，透過不同的花花主題去配合。呢個地方有好多嘢可以發生，特別係節日會有好多活動。例如為咗迎接中秋節，今年9月15日起就會有個好大個燈籠，係月球燈籠同埋兔仔燈籠，入到花 · 館就好似入咗森林賞月咁，到時仲會有和菓子供應，配合返我哋啲花茶﹗就係因為有太多可能性，所以我唔會俾自己停落嚟，反而有更多動力去創作，唔止埋首做一束花、一個花球咁簡單。」

勇於創新毋忘初心

新店延續Lab concept店以家為主題的概念，皆因Becky認為HAHAHAFLORIST就是從家出發，由屋企開始建立的品牌。Becky︰「由於地方有限，但呢度係一個集零售、教學、展覽等功能於一店嘅地方，所以店內嘅木地台就以屋企地台為設計藍本，一方面係木地台，同時可以升高變成工作檯。店中間會不定期展出我創作嘅art piece，嚟到大館嘅第—件展品名為《初心》，作品設計成一個大型心臟，希望從事花藝六年嘅自己，唔好忘記當初的本心。就算中途有過動搖甚至離心，但最終就係憑住愛花嘅初心堅持落去，成就今日嘅自己。」除了考慮到功能性，Becky亦明白實力派都需要偶像外表︰「新店都有好多影相位，除咗店中央的art piece，店內花花亦會經常更換，為咗配合新推出的冷、熱花茶，店外增設了一部滿佈招牌花花圖案嘅仿自動販賣機，係啊，假㗎，哈哈﹗不過可以打開門匿入去影相，係好受歡迎嘅打卡位嚟㗎﹗我最想帶阿女嚟，俾佢喺花 · 館入面周圍玩，雖然佢好似乜都唔知一舊飯咁，但係佢都好鍾意花花，帶佢返工應該會好開心﹗」果然，HAHAHAFLORIST花 · 館不只是花店。