Adele Leung 梁雅懿 「女人求婚唔得咩?我要爭取自己嘅幸福」

黃偉文將時裝人黎堅惠稱為「書寫時裝的前輩」,在他看來,她是香港最後一代時裝作者。1996年黎堅惠開始擔任《amoeba》主編,創造出香港第一本真正的潮流刊物。人人都說那時《amoeba》風格鮮明,展現出百分百的黎堅惠風格。那時筆者只是個初接觸流行文化的學生妹,對我嚟講《amoeba》行得好前,甚至係潮到跟唔上。呢本潮書嘅誕生確實影響好多人,包括一個遠在加拿大嘅香港女生 — Adele Leung (梁雅懿)。因為《amoeba》,佢毅然離開加拿大的舒適圈,隻身回港踏上傳媒及時裝之路,一行便是廿多年。

從雜誌編輯到free lance造型師,offline到online年代,在時尚圈進進出出仍堅持至今,無非因為一顆愛時裝的心。認識這位前輩「行家」多年卻未有機會正式合作,如果你和我一樣也有追蹤她的Instagram,看著那些充滿愛和正能量的帖子,或許也有這樣的疑問︰「邊有人諗嘢咁正面㗎?」、「有無咁sweet啊?」早前看到她向男友求婚的帖子令我印象深刻之極。緣份來了,朋友終於將我和Adele扯上關係,我心想︰「如此敢作敢為又敢愛敢恨的女子,仲唔係好𢯊人辦?不如就訪問佢啦﹗」如是者,你看到這篇訪談文章。

FHC_1390.png

愛時裝
無論點艱難都會搵到出路

喜歡看時裝雜誌,或是從事傳媒、時裝、廣告行業的人,應該會看過、聽過Adele Leung這個名字,因為她的文字、造型照遍佈多本雜誌,由她負責形象設計的廣告項目更是多不勝數。縱橫時尚圈廿多年,Adele仍是行內最灸手可熱的造型師之一,除了因為那把燃燒多年仍未熄滅的時裝之火,最重要是從不輕言放棄的她一直與時並進。Adele︰「廿幾年前喺加拿大大學畢業,有一日一個朋友介紹我去一間時裝店工作,就開展咗我所謂嘅時裝行業工作,如是者工作咗三年,對於工作、加拿大呢個地方,開始覺得有啲悶。嗰陣喺唐人街搵到一本好舊嘅
《amoeba》變形蟲雜誌,成個人嗰個感動係表達唔到,當時只覺得我想返嚟香港做呢本書,太正喇﹗我要follow my heart, 於是我就膽粗粗send咗封email俾當時總編黎堅惠,我話我想同佢一齊做呢本書,佢當時無覆我,但我決心返香港, 結果等咗一個月左右佢終於叫我面試,最後請咗我。以前我中文好差,真係揸住本中英對照字典慢慢查、慢慢寫,但係因為我太想做好呢份工,所以無論咩嘅困難我都可以面對。」

在《amoeba》工作三年之後,Adele輾轉加入不同的雜誌工作,直至多年之後的某一天,發現身體真係頂唔到,心靈亦好攰,於是辭去全職編輯的工作,轉為從事有機耕種,雖然期間也有為明星藝人負責styling工作,但基本上大部分時間都是耕田渡日。以為耕田埋下全身而退的伏線,Adele從此便會脫離辛勞的時裝行業?非也。五年過去,Adele又回到全職時裝編輯的崗位,只是後來也決定解除束縛退下來成為free lance stylist。來回地獄又折返,問Adele不怕身體撐不住嗎?佢話只要偶爾跳出來俾自己抖氣便沒有問題,網絡年代令時尚圈生態驟變,唯有堅持不放棄才能繼續做好呢份自己最愛嘅工。Adele︰「如果我真係好想做一樣嘢,無論咩困難我都可以面對。Social media嘅轉變對我有好大影響,以前我無感受到咁大打擊係因為一直有做雜誌,有公司backup一直有糧出。當我一跳出嚟自己做free lance嘅時候, 就真係feel到個impact。唔放棄囉﹗最初出嚟嗰陣真係幾驚訝,原來啲價錢可以收到咁低, 又原來有啲客人真係睇價錢而唔顧質素,我只可以講唔放棄, 唔放棄我嘅責任感, 唔放棄我嘅專業。我相信一定會有人係搵緊佢哋需要嘅質素, 我唔想因為市道而去降低我嘅standard。呢個行業對我嚟講係我嘅根,我嘅心,所以無論點艱難都好 ,我一定會搵到出路。」

求婚吧
女人應該爭取自己嘅幸福

這次訪問Adele,源於早前一個關於她向男友求婚的ig post。其實去年已看過某傳媒訪問Adele及其男友的短片,當時的題目是【姐弟戀 十年距離 男人話:女友成熟有着數】。即係咁,對我嚟講姊弟戀並唔係咩新鮮事,但女人主動向男人求婚,仲要好開心咁講出嚟就真係比較少見,所以今次就請來Adele講講點解可以愛得如此坦蕩蕩。相約Adele做訪問,早已預料其髮型師將在場。其後Adele也明言訪問之日希望Tavin出現,不只因為他是她的御用髮型師,「如果訪問內容包括我向佢求婚,咁佢好應該在場,重點係佢已經成為我生活嘅一部分,我嘅生活、工作都同佢息息相關,即使受訪者係我,如果個訪問係要呈現我嘅生活,咁Tavin一定要在場。」明白﹗Tavin在場理所當然,咁點解要影Adele煮嘢食呢?又唔係拍飲食節目。「做呢行工作時間唔穩定,但係就算幾忙都好,99% 我都會返屋企煮飯,真㗎﹗就算九點、十點先放工,我都堅持返屋企煮,除咗因為我飲食上有好多requirements,更重要係煮飯、食飯嘅過程我同男友會交流、有傾偈、所以我超鍾意同佢打邊爐,可以慢慢食慢慢傾,有時傾無聊嘢有時好深入,就算幾忙我都唔願意犧牲同佢食飯嘅時間,因為實在係非常之正。

Adele︰「舊年個訪問出街之後外界都幾大反應,不過當個記者approach我話想訪問我關於姊弟戀嗰陣,我即時反應係『 吓?乜姊弟戀係一件事嚟咩?』對我嚟講,你鍾意佢咪鍾意佢囉, 理得佢咩年紀,同埋我唔覺得我老過佢囉﹗我身邊99.9%嘅人都支持,我無諗過仲有人會反對或者有偏見。如果真係俾一個咁嘅所謂框架去框住你鍾意邊個唔鍾意邊個,或者拍唔拍拖,其實係一個好大嘅監獄。首先要對自己誠實,我好鍾意呢個人,好多時都好想表達我對佢有鍾意。其實以前從來無諗過求婚呢樣嘢,但我知道我想同佢結婚,我亦唔介意係幾時、咩方法、形式。直至今年佢生日,我想幫佢搞個surprise party,買party用品時見到個寫住marry me嘅氣球,先至會忍唔住向佢求婚。最初我都覺得係應該佢求婚㗎,但係後來我發覺我要爭取自己嘅幸福,應該每一步都唔放棄。如果我個心係有呢個感動係想同佢求婚,女仔都可以負呢個責任‧。唔一定要分男仔做啲乜女仔做啲乜,拍拖係一種雙方合作關係,雙方有同等責任。」

FHC_1341.png

做自己
要先行出一步去接受世界

同Adele傾偈,你會覺得自己好似被困喺一個陽光和煦的無菌空間,而且四周有源源不絕嘅正能量撲向自己,因為出自佢把口嘅說話實在太positive。唔止咁,望望她的instagram帳戶,總會出現「 #NoTimeToWaste 」、「#Selflovediary」、「#ExpressionIsEverything」、「#LiveTruth」等充滿正能量的hashtags,真係咁豁達?Adele話最緊要愛得坦蕩蕩,做自己唔需要理其他人講咩,但係網絡世界遍地毒舌,真係可以置之不理?Adele有嘢講︰「自從八、九年前開始一路觀察、一路玩Social media,對我嚟講係一件好無意義嘅事,我嘅生活、人生,只想做真實嘅嘢﹗我個人根本就係咁, 所以我由開始玩social media開始一直都係講真嘅嘢 ,真㗎﹗」

「喺Social media世界咩都可以發生,因為咩都可以製做出嚟,我講嘅嘢係真實、我做嘅嘢係真實,喺鏡頭面前嘅我都係真實,我嘅意思係鏡頭背後同埋前面嘅我唔應該有太大差別,所以我喺Social media 一路post一啲所謂好私人嘅嘢,我只係想做返我自己。大家唔好誤會,其實做自己 唔會係一個完全唔理呢個世界或者唔理人嘅狀態,二十年前或者我會講我唔care你哋點樣我只想做自己, 但係呢種係高傲、 係一份傲氣,只會令你被世界杯葛。 到而家大個,我深深感覺到做自己係要去接受呢個世界先﹗其實放得自己上網預咗俾人鬧,或者因為自己算係一個敢言嘅人,所以以前喺公司平台成日被人鬧,嗰陣終於知道咩係haters、咩係cyber bullying,第一次會好hurt,心諗點解啲人可以咁講嘢,你又唔識我﹗其後開始明白就唔再嬲。最感動係曾經有個hater係我寫咩都鬧,一直鬧直至有一次題目講離婚,我講自己嘅經歷,分享返係人都會經歷好多人生難題,之後呢個hater竟然留言話『我無咁唔鍾意你 』,之後仲friend咗。好彩我無放棄我嘅haters,先至可以將僵硬狀態溶化。其實所有憎恨就算幾細微,任何人都會feel hurt,所以我認為人與人之間關係嘅和諧極之重要。」

訪問當日講咗好多嘢、飲咗好多水,今日寫稿打咗好多字,打到手都軟,但係反覆聽返Adele嘅說話,似乎真係袋到嘢落袋。我唔係一個輕易讚人嘅人,不過真係要讚下呢位好𢯊女子,地球上好需要多啲好似佢咁充滿正能量嘅人,大家先至可以將生活壓力轉化成動力,好好生活。

FHC_1253.png

好𢯊女子︰
Adele Leung 梁雅懿 (Stylist)
Facebook / Adele Leung
Instagram / adeleleung
Website / www.adeleleung.hk
YouTube / 愛黛兒老師 Ms.Adele


TEXT / PHOEBE CHAN · PHOTO / MARIE ANSON · ASSISTANT / JOE · HAIR / TAVIN LIU

發表迴響