雖然入秋已經一段時間，但係最確實感受到「秋天來了！」嗰一下，應該係每日做完skincare routine後，總係覺得用緊嘅護膚品不給力嗰個時刻。秋去冬來，濕度猶如恆指般大上大落，若無兩手準備，隨時殺肌膚一個措手不及。理性嘅好𢯊女子往往唔會選擇豪換整套skincare，為免荷包大出血，不妨試試在daily skincare routine加入美容油作最後防禦，增強整體滋潤效果之餘，又可以提升肌膚光澤度，上妝更貼服，何樂而不為？
近年美容油已成為美容界新寵，以前人人怕油怕膩、家陣個個無油不歡，原因無他，秋冬肌膚汗腺與皮脂分泌減慢，容易造成肌膚緊繃和乾燥缺水。油分正正能鎖住水分，令皮膚可以keep住透嫩水潤。重點係，揀油都有學問，切忌選擇具人工合成香精的產品，亦應留意當中成分有否凡士林、礦物油等物質，以免造成毛孔堵塞。今季美容油趨勢仍主打天然植物美容油，不過偏向加入有紓緩之效的多種複方精油，例如玫瑰、洋甘菊等成分，滋潤肌膚同時紓緩身心。以下推介八款美容油，當中有招牌貨或新登場，睇吓有無啱心水啦
GUERLAIN Orchidee Imperiale The Imperial Oil $2,680/30ml/a (左)
L’OCCITANE Immortelle Divine Youth Oil $950/30ml/b (右)
GUERLAIN嘅御庭蘭花一向係品牌最高端系列，連帶呢枝新出嘅御庭蘭花極緻全效精華油都索價二千幾，但貴得嚟有道理。珍貴的蘭花成分加上天然精油，標榜可以平衡肌膚脂質屏障，同時令膠原蛋白增生增強支撐肌膚的纖維從而令肌膚彈性及防護力提升，同時散發蘭花清香。雖然質地望落水咁稀，但滋潤效果一流。筆者試過喺濕度得三十度嘅時候上妝前使用此精華油，妝容可以last到一日不特止，連鼻翼位也沒有浮粉。一個字：強！
LOCCITANE於年中推出嘅升級版蠟菊極致再生精華油，沿用舊版法國科西嘉島天然蠟菊成分，配方比以前多10% 蠟菊精華油，聲稱多兩倍抗氧化力量。主打蠟菊成分一定有蠟菊味，少許濃烈但不刺鼻，本人其實幾鍾意，但未必個個都能夠接受。質地輕盈，推開後油感較薄，容易滲透，滋潤效果可以持續半日。朝早上妝時滴一兩滴在粉底液中，妝感會變得貼服持久，不妨一試！
KOSE Sekkisei MYV Concentrate Oil $750/40ml/c
Philosophy when hope is not enough Omega 3-6-9 Replenishing Oil $440/25ml/d
GROWN ALCHEMIST Anti-Oxidant+ Facial Oil $510/25ml/e
MTM Custom-Blended Relieving Oil $660/19ml/f
(左至右)
雪肌精MYV Concentrate Oil含高濃度薏仁油，再配搭葡萄籽油、橄欖油、夏威夷果油等潤膚油成分，賣點是能夠打造豐潤柔軟且富彈性的光亮肌膚。質地有少許厚身，但仍富水感，相當易推，廷伸度高，係八者中最高。推開有淡淡薏仁味，塗上即有顯著滋潤感；用後膚質明顯提升，亮澤度不俗，不同類型肌膚都合用。
Philosophy這款精華油含天然複合精華，有效滋養及修護乾燥肌膚，聲稱可以做到即時鎮靜紓緩，改善過敏徵狀。精油氣味芳香，淡黃色油狀質感非常輕盈，一推即吸，但天氣非常乾燥時使用略嫌不夠力，比較適合混合乳面霜使用。另外亦可當指甲修護油使用，塗在指甲邊緣免生倒剌。價錢亦算平易近人，粗用都唔肉痛！
澳洲天然有機護膚品牌GROWN ALCHEMIST向來低調，但其出品其實相當多選擇。呢枝高效抗氧化臉部精華油，含沙棘果油及玫瑰果油成分，主打保濕抗皺及紓緩發炎功效。質地係八者中最厚身，吸收度亦相對較慢；但滋潤度較高，可以維持長時間油潤感，比較適合乾肌使用。再者，上面後亳無刺激感，敏感肌可放心使用。
MTM新推出的Custom-Blended Relieving Oil，主打對抗空氣中污染物，成分加入萃取自甘蔗嘅角鯊烷，加上高效抗氧物富勒烯，聲稱可以急救乾燥肌膚，並鎖住養分，預防水分流失，令肌膚回復水油平衡狀態。透明水油質地，推開質地水潤得嚟而不油腻；親膚性十足，用後肌膚光澤度及滋潤度明顯提高。值得一提，產品完全無任何氣味，同蒸餾水一樣咁清純。對於唔好香味嘅女生嚟講，係一大加分位。
GLAMGLOW STARPOTION Liquid Charcoal Clarifying Oil $480/30ml/g (左)
THREE Aiming Facial Oil Essence $1,125/28ml/h(右)
剛推出一陣子的GLAMGLOW神奇透淨煥顏油，除咗係品牌首枝美容油外，亦係坊間第一枝黑色美容油，gimmick 十足！加入活性椰子炭和日本白備長炭、高比例油酸、蘆薈等成分，標榜可以一炮過做到淨化、滋養、抗禦三重功效，更可加速護膚品的吸收。望上去質地係八枝之中最稀，但感覺卻最油潤；無香味，滲透度普通且較難推開，需要按摩一段時間才能完全吸收，當面部按摩油使用或者比較恰當。
話我偏心都要講，筆者一向對THREE情有獨鐘，皆因其產品向來有陣清香精油味，而且成分天然，保養效果又不俗，尤其係皇牌卸妝油，係不少豬妹回購之選。品牌最近新推的極致活顏全效精華油同樣無令人失望，加入洋甘草根萃取同和藥蜀葵根萃取精華，聲稱可迅速滋潤肌膚並補足角質的保護層。其質地輕透，夾雜住一絲茴香香氣，親膚性高，滲透力亦不俗，按幾下便被肌膚吸收，用後皮膚具光澤感。重點係可以一油二用，既可做修護精華油，又可以做導入精華油，點用都得，得咗！
a/ GUERLAIN_尖沙咀廣東道11號世界商業中心VITA 1001室 3579 4931
b/ L’OCCITANE_中環ifc Mall 1090號舖 2234 7198
c/ KOSE_銅鑼灣時代廣場地庫 2樓B228號舖2506 3000
d/ Philosophy_沙田連城廣場20a舖 2565 8333
e/ GROWN ALCHEMIST_九龍塘又一城UG-40號舖 3105 0885
f/ MTM_中環畢打街1號中建大廈205號舖2921 2791
g/ GLAMGLO_尖沙咀海港城海運大廈 FACESSS 2157 1153
h/ THREE_銅鑼灣SOGO百貨B1/F 2833 2478
TEXT / IT · PHOTOGRAPHER / MARIE ANSON