每次同插畫家謝曬皮傾偈或做訪問，無論話題係正經或無聊，總會愈傾愈遠、傾到天昏地暗、手舞足蹈，直至傾到攰，對話終結時真係會有種謝曬皮嘅感覺。
從2012年尾開始，Jasmine Tse（真名自己問佢啦﹗）便與謝曬皮三個字扯上關係，Jasmine賦予謝曬皮生命，同時謝曬皮亦影響著Jasmine嘅生活。曾幾何時，大家熱烈討論謝曬皮漫畫靚唔靚，多餘啦，審美眼光呢啲嘢邊有劃一標準，相信好多人同我一樣，buy就係buy謝曬皮個性獨特、講嘢綴核、而且夠晒寫實。
或者就如她所言「謝曬皮唔止係一個人，佢係一種spirit」，除咗透過生活化題材引起大眾共鳴，謝曬皮亦出名不平則鳴，早前遇上乘客於港鐵車廂中吸煙，她即時向職員投訴，然而投訴無門只好藉著謝曬皮把口公諸於世，結果再添「地鐵判官」新朵。Jasmine話︰「我太鍾意自己，唔想同人分享呢個咁有趣嘅我﹗ 」有幾有趣？難得佢接受訪問時又幾坦白，仲好樂意分享人生不同階段擔當唔同角色時嘅感受，不如就從呢篇訪問開始了解吓呢位奇女子。
謝曬皮係 …… 插畫家
「最想同黎明合作﹗」
傳統港式漫畫著重官能刺激，畫面以打打殺殺為主，多年來一直重男輕女。隨著社交網站興起，女性漫畫家亦火速冒起，少女風可愛風乜風都有，爭相透過生活化題材引起大眾共鳴。當中有位拋個名出來已經嚇得吓人，邊有女會叫自己做「謝曬皮」？佢就係夠膽，結果憑著非典型畫風及綴核到肉的故事成功殺出一條血路。Jasmine話︰「又問呢啲？」我答︰「咁你都做咗6年插畫師，訪問好難隻字不提插畫生涯吓嘛？」佢爆出一句︰「要了解真正嘅我要睇offline嗰個我！」OK，就由謝小姐自己講吓。
Jasmine︰「好多人話我畫嘅嘢好貼近生活，所以容易好有共鳴，係嘅，多謝大家﹗但係我一直都好想講，online未必可以睇到全部我，你要真正了解我就要睇埋offline嗰個我囉， 例如睇我寫嘅書啦、我平時發表嘅嘢啦。因為online觀眾群好aggressive ，所以講嘢要好小心，但唔做online又唔得，插畫家好多時要用喺online搵嘅錢去做啲offline嘅嘢。搵食艱難啊﹗曾經接過一個job啦，因為涉及某啲政治因素，個廣告一出街就俾人狂話啦，好驚唔驚真係，係我 XX無睇新聞，犯咗啲咁嘅低級錯誤，明明應該政治敏感度高啲，結果要即時刪咗佢啦，罰錢算喇，以後小心啲。好彩我啲讀者好好，佢哋通常x完就算。」
講起廣告，這幾年以來，謝曬皮接過嘅廣告多到難以數清，重點係咩類型都有，證明可塑性真係好高。Jasmine︰「我而家係隱疾代言人嚟㗎，腳癬又搵我、HIV又搵我、個啲濕疹啊總之咩都搵我㗎喎﹗哈哈，似乎謝曬皮呢個角色好似sell咩都無傷大雅咁囉﹗」同過咁多品牌、名人合作過，咁你最想同邊個合作？Jasmine冷靜地說︰「黎明囉﹗真係鐘意黎明 ﹗如果黎明搵我幫佢做下動畫啊 、MV啊咁都好啊﹗」真係估佢唔到。
謝曬皮係…… 謝曬皮
「一路都無醜化自己喎﹗」
對於謝曬皮三個字，Jasmine強調︰「佢咪即係我囉，我咪即係佢囉﹗」或許因為始終不是傳統漫畫的美女畫風，謝曬皮不是眼大鼻高嘴細細，也沒有九頭身比例，擺明唔係世人眼中的典型靚女，有些人甚至刻薄到以「醜漫」來形容謝曬皮，既然Jasmine就是謝曬皮，有無嬲先？
Jasmine︰「無喎﹗ 一路都無醜化自己喎﹗都唔醜﹗何來醜化？ 哈哈﹗我真係唔明啲人成日問我『喂﹗你啲醜漫好醜﹗』你想我點答你？ 我都唔覺得醜，所以唔可以叫做醜化﹗我諗係真實囉﹗大家唔化妝都係嗰啲樣囉，化妝咪bling bling眼，唔化妝咪咁嘅樣囉﹗我依家覺得個啲足球小將好醜喎，即係嗰啲九頭身比例，我都想訪問佢『喂﹗你啲醜漫好醜﹗你醜唔醜啊？』哈哈，話我醜漫。
謝曬皮唔止係一個人，佢仲係一種spirit嚟㗎嘛﹗我哋互相做嗰啲嘢都會影響到大家，即係譬如我接咗啲唔好嘅job，雖然character係佢，但係都會影響我嘅日常生活㗎嘛 ﹗我同佢係唔會分開㗎嘛 ，咁所以要好小心﹗ 」謝曬皮咁大膽，會唔會有日去到盡出一本真人加漫畫寫真？「出版社個總編成日叫我出寫真集㗎﹗講笑咋，哈哈，我唔想佢執啊﹗Anyways，我覺得性係一件美好嘅事，但凡事有界線囉﹗即係女性主義要解放身體，都無理由當眾做愛㗎？有分寸囉，適當嘅時候做適當嘅嘢囉﹗」
謝曬皮係 …… 留學生
「唔同鬼仔拍拖去嚟做乜？」
兩年多前， 當謝曬皮做謝曬皮做到去樽頸位，佢決定離開香港，遠赴倫敦進修。「而家睇英國返嚟之後出嗰本書，再睇返去之前嗰本書，無論畫風、心態、深度都差好遠囉﹗我諗去外國留學係影響一生嘅決定﹗」好多人會懷念做學生嘅日子，今次重返校園有咩得著先？
Jasmine︰「得唔得到自己想要嘅嘢啊？ok啊﹗依家都想返去㗎，即係嗰邊好似每日都好多嘢發生咁，又好多嘢睇，啲人好有趣啦，同埋我個人又好鬼妹仔性格，所以嗰邊都係啱我多啲，哈哈﹗」有無同外國人拍拖呢？老老實實。「梗係有啦！That’s the whole point! 唔係去嚟做乜？唔同鬼仔拍拖即係枉過，我諗如果去到冇嘅話。要了解嗰個地方文化一定要同當地人拍拖囉，會學得好快，直情係特飛猛進﹗」咁外國男友睇到你啲畫會唔會覺得好搞笑？定係佢未必代入到？「好少講插畫喎，佢都唔係好care。」即係佢唔關心你事業、學業，只係垂涎你嘅美色？「係啊！一定係垂涎我美色，哈哈﹗100％啦﹗講起就好懷念英國嘅天氣，好多人都唔鍾意嗰邊嘅天氣，但係我好鍾意，當我喺香港feel到陣陣秋涼，或者微微雨咁，就會諗起倫敦，嗰邊係咁樣，我好鍾意啊﹗」
謝曬皮係……老師
「如果我係學生都會鍾意咁嘅老師﹗」
眨吓眼，呢位留學生已經返港兩年，過著佢認為好hea但又好忙的日子﹗今年開始Jasmine開始在香港浸會大學任教，上學期教Basic illustration，今個學期則是教Experimental illustration。有冇諗過自己會成為一個老師？「有啊﹗好細個嗰陣我想做幼稚園老師，但係依家冇可能，因此我好憎細路，哈哈﹗」 又是因為機緣巧合四個字，令Jasmine走上教師之路，原來佢好enjoy、勁滿意、可以話係十分鍾意呢份工﹗
Jasmine︰「因為我天資聰敏啦 ，又好能言善道啦，又年輕貌美啦﹗所以都深受學生歡迎囉，so far都 可以話係桃李滿門囉依家 ﹗呢個都係一個比較free spirit嘅學院，
成個課程都係我自己諗嘅，好彩大部分學生都好鍾意我，其實好明顯嘅﹗ 如果俾我係學生，都會鍾意自己囉﹗」你啲作品成日有粗口，怕唔怕教壞學生先？Jasmine︰
「我覺得好奇怪 ﹗啲人以為我會周街講粗口，喺屋企又講粗口、對阿媽又講粗口
……點解會咁樣諗？ 講粗口睇場合、 睇心情㗎嘛﹗咁無理由上堂講㗎﹗不過佢哋講我唔介意喎﹗ 可能佢哋覺得我都會講粗口，所以佢哋有時都會講，其實就無乜rule嘅﹗最緊要唔好當佢地係細路仔囉，當佢係大人，咁樣相處會幾好。我好鍾意教書啊，係教學嘅滿足感，同埋教佢哋我自己都學到嘢囉，因為年輕人腦袋轉數好快，會有好多啲得意嘢，我覺得教學相長係啱喎」
謝曬皮係……情人
「成日話要嫁個有錢人，咁你點解唔做嗰個有錢人呢？」
今年謝曬皮於年中推出新漫畫《找一個如淘寶賣家秒回你的男人》，當時的宣傳文案是「尋覓大半生，傳出過六萬五千三百六十一個短訊， 終於有一天覺吾了! 幻海奇情式短篇漫畫……夾雜中女狂想與生活哲學。」睇完都唔太明講咩，相信需細閱全書才能了解謝小姐想搵一個點樣嘅男人。既然想知，不如直接問︰「請問Jasmine嘅擇偶條件係？」
「擇偶條件呢﹗我諗最好係同我相反囉﹗我唔係唔鍾意自己，只係我發覺當我同一啲同自己好似嘅人一齊會有好多衝突﹗因為我太過鍾意自己啦﹗哈哈﹗你明唔明啊？ 同埋我覺得自己一個好啲， 因為我太有趣啦， 我有時唔鍾意同其他人一齊，鍾意獨處，因為我唔想同人哋分享呢個咁有趣嘅自己﹗ 啲人成日話要嫁個有錢人，咁你點解唔做嗰個有錢人呢？又或者希望搵一個強壯嘅男朋友 ，咁樣佢乜都可以幫到我，
咁你點解唔做強壯嗰個呢 ？好多女人好似本末倒置囉，大家要釐清呢啲事實，
其實好多嘢都唔係想像中咁難、做落好易㗎啫 ﹗」講到咁獨立，其實你怕唔怕孤獨？「我好多時都係自己一個，我唔怕悶㗎，我諗我從來未試悶囉，我唔知悶係點樣㗎呢，不如你話比我聽悶係點樣？哈哈﹗我諗人到一個位都會怕孤獨，但唔係我囉﹗即係so far未試過﹗」真係未聽過人話「唔知悶係點樣」，睇落好囂張，其實好幸福呢﹗
好𢯊女子︰
謝曬皮 (Jasmine Tse)
Facebook / 謝曬皮 TSE SAI PEI the incapable
Instagram / tsesaipei
Website / http://www.tsesaipei.com