典型打工仔或學生，星期一至五幾乎都是返工／返學、放工／放學、返工又放工／返學又放學 …… 生活刻板，有幾可可以真正輕鬆吓？有時週末真係好想不顧一切即刻飛轉旅行，到處走走探索新事物，感受其他國家的文化，為平凡的生活找點驚喜﹗累了就隨便找間特色咖啡店坐下來，休息一會再岀發，甚至可以在咖啡店Hea足一整個下午，沒有誰催趕誰，不慌也不忙，過一個休閒的假日⋯⋯ 可惜以上全屬幻想！其實諗深一層，要過一個休閒又有體驗的假日也不一定要衝岀香港，找一間舒適又富特色的咖啡店，或許也能滿足上述願望﹗
「一日之間Between Haru」由兩位甜品教室導師主理，驟眼睇以為Between Haru走大熱台、日式咖啡店路線，望真啲，無論店內環境、傢俱擺設，抑或食物都隱藏著韓風細節。原來其中一位主理人Kenry是位韓國媳婦，自然了解韓國在地文化！環顧四周，桌與桌之間有著本地咖啡店少見的寬闊距離，樓底高窗戶多，玻璃窗引入著和煦的自然光。在這樣的環境下享受著自家烘焙甜品和手工飲料，一日之間，就好似坐喺韓國咖啡店咁寫意！
「一日之間Between Haru」位於打卡熱點荃灣南豐紗廠，老實講位置唔多就腳，不過假日有嘅就係時間嘛！
一日之間 · 韓國精華遊
「一日之間Between Haru」的兩位主理人Lora及Kenry都是甜點師出身，細看餐單，除了自家焗製的甜點，更會發現無論特色飲料或簡餐都加入韓式元素，而且會不定期轉換期間限定系列。每杯特飲都由主理人精心調製， Kenry自言她們絕不用坊間常用的現成糖漿，而是選用韓國黑糖，味道較一般白糖清新，也不加任何化學成分。只是偶然會因應個人喜好加入花或水果等食材，令食物感覺更清新。對兩位主理人來說，Food styling好重要，因為美好的餐桌風景可以令食嘢嘅過程唔止係味覺享受，更係視覺上嘅享受！
Strawberry Duo草莓飲品是主理人們研發的新菜單，韓國草莓迷迭香綠茶有別於想像中偏酸的茶飲，微甜中又帶點迷迭香的花香味道，相當有層次。另一杯鮮草莓牛奶同樣採用韓國新鮮士多啤梨調配而成。韓國草莓迷迭香綠茶 $55 (左) , 鮮草莓牛奶 $58 (右)
冰美式咖啡是將濃縮咖啡雪成冰塊，再端上熱水供客人隨自己口味倒入飲料，望著冰塊融化的過程，一邊品嚐咖啡。 $48
咪以為韓國人好似電視劇中只係鍾意飲啤酒，原來好多韓國人都愛在家浸泡松葉酒，來一碗傳統蜜糖松葉茶，從味覺深度體驗韓國文化。$45
傳統英式鬆餅配上clotted cream及士多啤梨果醬，保留英式傳統。$30/ 兩件 (左)
自創的焙茶泡芙賣相吸引，當咬破微脆的表面後，內裡濃稠的焙茶醬會即時湧哂出嚟 。$40 (右)
烤牛肉牛蒡bagel內的餡料是以蘿蔔絲快炒牛蒡，再配以清新的沙律。$75 左)
無論bagel或三文治也是自家焗製，菌類蛋沙律三文治好味又飽肚。$68 (右)
「店外現人龍？又如何。只想serve好店內客人﹗」
客滿即止的態度咖啡店
一間咖啡店受歡迎與否，除了取決於食物的水準，環境裝潢亦相當重要！以白色為主的寬闊空間，配以優質的木製傢俱，加上高樓底及大窗戶，塑造成舒適的空間。明明空間感十足，卻只放了五、六張枱，加埋唔多於二十個座位，會唔會太嘥位啊？當人人慨嘆香港地租金高昂，開店做生意好難唔用盡每吋空間賺盡每分每毫去交租時，Between Haru兩位主理人卻堅持「空間感」，為顧客提供優質的用餐體驗。Kenry直言想引入韓國咖啡店文化，就是每張枱都保留寬闊的距離，讓每位客人都擁有自己空間，傾密計都唔怕俾人偷聽到！但座位咁少又會唔會有限定用餐時間？另一主理人Lora明言不會犧牲食客感受，「如店內坐滿二十個客，就會貼出告示講明暫不招待，因為我哋只想專注serve好呢二十個客，就算有時出面排長龍都無辦法，希望客人唔介意等一陣啦﹗」相當有態度，或者咁樣先至係一間咖啡店與茶記應有的分別。
韓式美感哲學
Lora與Kenry除了講究食物造型，對於餐具、擺設等都花了不少心思。從前經營網上甜點店，每張食物照都經過精心佈置，透過不同的背景和擺設去襯托食物，令大家從視覺開始感受到食物的美。現在開了實體店，更希望與客人分享餐桌上的佈置美學。店內的一角放著一張木檯，這張期間限定餐桌將不定期「轉look」，檯上放了Lora 與Kenry精心挑選的擺設，目的是與食客分享餐桌上的美好風景，希望到訪咖啡店的每位客人不但能享用美食，更是一場深度的文化交流！
店主Kenry及Lora
Between Haru 一日之間＿荃灣白田壩街45號南豐紗廠103號舖 3956 2082