有無發現近年愈來愈多小店都喜歡用手寫字體來裝飾店面？
當中有不少更是感覺復古又有型的美式hand lettering風格，其實你都有機會學寫一手型格sign painting㗎！當係興趣之餘，仲隨時可以發展成一門手藝添﹗不過先旨聲明，寫sign painting唔似得用墨水筆寫西洋書法咁優雅，反而過程中要用到氣味刺鼻的油漆與松節水，亦好容易會整污糟雙手甚至衣物。如果你係姿整一族就免問喇，如果咁都唔介意就不妨跟sign painting達人Sinks上堂學寫字啦！
Sign painting達人Sinks有嘢講
來自澳門的Sinks最初是個graffiti writer，亦因為讀graphic design的關係，因而對字體學加深了認識。而後來轉寫sign painting，甚至到了日本學藝，就是由一個偶然的機會開始。Sinks說：「當時有位澳門朋友開咗一間時裝店，想搵我寫招牌名。最初我係咩都唔識嘅，就連好多專用嘅筆、油漆同其他物料都要上網search先知，原來係用呢啲去寫㗎喎，普通油畫筆水彩筆係做唔到嘅。之後一直睇就發現除咗歐美之外，亞洲最盛行sign painting嘅地方就係日本，發展非常蓬勃。於是就有個念頭想去學，見識多啲。除此之外，因為日本係文具大國，所有需要用嘅工具都好容易搵到，加上質量好，適合手工藝，同埋訊息流通，要獲得相關知識亦好易。」
後來Sinks隻身到了東京展開了學藝之旅︰「去到日本除咗要先學語言，中途亦去咗紋身舖做學徒，以維持生計。同時一邊學習同練字，又會去參加workshop，一得閒就會拎自己嘅作品去拜訪啲老師傅，等佢哋俾啲意見，我再返去改進。」留在日本幾年之後，Sinks現時已是全職寫sign painting。不過當日可以由業餘writer晉身成職業達人，原來係同一位網友有關。Sinks說：「當時我喺Instagram認識咗一位叫Koji日本一線sign painter，佢年資較長，認識嘅時候已經做左3-4年。有次我哋約埋一齊去睇一個挪威painter嘅展覽，第一次見面就覺得好啱傾，之後佢有啲大job都會搵我去幫手，當做helper咁，幫幫下就話不如一齊搞studio。」後來Sinks與Koji合組了公司GOOD FELLOWS SIGNS，主要為不同店舖與辦公室畫sign painting。
入行之後做過許多大大小小的企劃，Sinks似乎非常享受在日本工作時的發揮空間。「日本有一樣嘢我覺得香港澳門都冇，就係當地室內裝修方面比較強，即使係普通民居裝修嘅時候，裝修公司好多時都會推介佢哋不如喺玻璃、門同牆上面寫啲野。例如屋主係鍾意滑浪或單車，就會寫啲相應嘅字，而當地人又好鍾意。所以日本除咗商店之外，普通人嘅家居亦係較常出現sign painting嘅地方。不過，日本人始終唔屬於英語圈子，所以sign painting對佢哋嚟講只係裝飾用途為主，唔似歐美地區有較多資訊性。」
除咗接job寫字之外，Sinks以往亦曾於日本、香港同澳門等地教過sign painting workshop，每次開班都迅速爆滿，可見在亞洲各地似乎愈來愈多人對這門手藝產生興趣。Sinks說：「暫時喺日本教過四次workshop，比較有趣嘅係會有好多同行參加，甚至有啲比我水平更高，佢哋志在交流、分享。不過日本人比較內歛，有時候問佢哋好多問題都未必有feedback，而且亦比較乖，唔會隨便用你啲用具，要多次邀請先會用。香港同澳門就比較多唔同行業嘅朋友參加，例如graphic designer、fashion designer同illustrator等等，不過無論咩地方嘅學生都係一樣，就係佢哋都好認真，一旦投入練習之後，唔使休息都可以寫好多個鐘。我都希望大家喺度學到嘅技巧可以應用喺佢哋嘅本業。」
早前Sinks受本地設計單位Start From Zero邀請，再次到香港舉行workshop。喺長達六、七個鐘嘅workshop入面究竟學咗啲咩？小編立即同你分享！
寫一手靚字 由感受筆觸開始
所謂「工欲善其事，必先利其器」，打邊爐最緊要係個爐，寫字又點可以缺少枝筆？以往要在香港買到sign painting專用的毛筆，往往只能靠網購。不過Start From Zero近日就引入了一系列專業毛筆與油漆，以後想買嚟練字就方便得多。
Viponds Paints油漆 $150/罐 （左）
Viponds Sable Mix 8號毛筆 $100（右）
每次寫字之前必須準備的用具包括：毛筆、油漆、雪條棍、小紙杯兩個、松節水與調色紙數張。而這次選用的毛筆為Viponds sable mix，當中混合了貂毛，毛身不會過份柔軟，適合初學者使用。尤其學寫workshop中教授的casual字體，感覺會較實淨。
Step 1
開始寫字前首先要學揸筆的姿勢，先用食指、中指和姆指握筆，注意手指不要太貼近筆頭金屬位置，以預留空間，方便食指和姆指轉動筆桿。
之後就可以用毛筆逐點逐點沾油漆，千祈唔好心急，直到所有毛都平均地吸滿了油漆，就可以按需要沾一點松節水調整濃稠度，然後在調色紙上開筆。建議使用舊雜誌作調色紙，因為其吸水性較其他紙張弱，加上有光澤，更易辨認顏料濃度。然而，油漆濃稠度其實沒有特定標準，是要因應每次所寫的物料、天氣、濕度而定。
Step 2
完成調色後，要確保筆頭呈雕刻刀般尖且平的形狀，再於白紙上試試以不同力度按壓毛筆，練習筆觸，順便熟悉手感，而另一隻手可枕於拿筆的手下面作固定之用。練習時可以先由直線開始，最緊要慢慢寫，保持筆觸粗幼一致。完成後亦可試試其他弧度的線條，感受毛筆可以寫到的不同可能性。
Step 3
開始較有系統性的筆劃練習，加強訓練轉動筆桿，以得到不同的收筆效果。
Step 4
當熟習了筆劃後，就可以在牛油紙上跟著字帖繼續練習。看似簡單的A-Z，其實每個字母都有隱藏的難度，難怪身為導師的Sinks都話自己一有時間就會練習練習再練習！
Step 5
寫了半日，雖然只學到半桶水的程度，但Sinks就提議各位同學不如一人寫一句句子，睇吓大家學成點，結果似乎令人幾滿意喎！
Step 6
寫完字唔好唔記得洗乾淨毛筆，以混合松節水的清水洗走油漆後，可以在毛筆上塗上baby oil，然後攤平放好，以免毛的形狀改變，影響以後寫字。下次再使用毛筆時，用松節水混合清水徹底洗走baby oil，再用廚房紙吸乾水即可。如果保養得好，一枝筆可以用一世㗎！
跟大師學藝：網上篇
雖然未知Sinks下次幾時再來港開workshop，不過假如你都對sign painting有興趣，不如先從網上欣賞吓各位大師的作品吧！以下就是由Sinks推介的幾位國外達人，作品各有特色，非常值得大家參考。
DAPPER SIGNS (UK)
Instagram／dappersigns
Sinks：「喜歡佢哋個style時而莊重，時而活潑，有玩味的同時亦保留了sign最基本的傳達內容功能。」
PERRY SIGNS (UK)
Instagram／perrysignsiow
Sinks：「呢位英國老師傅無論態度、技法同構圖都非常傳統，你可以喺佢嘅作品入面睇到一切最傳統的東西。」
GOLDENWEST SIGNS (US)
Instagram／goldenwestsignarts
Sinks：「佢嘅風格偏向40-50戰後紀元，是少數成功的左手painter。作品成熟而觀賞性強，欣賞嘅同時簡直會感受到時間的流動。」
跟大師學藝：實戰篇
假如你真係好想親身跟大師們上堂學藝，其實都唔係無辦法嘅。因為一個來自美國，並且由一眾sign painter共同創立嘅組織Letterheads，喺巡迴過歐美各地後，今年四月將會首次登陸亞洲，於東京舉行首次聚會。在4日活動期間，將會有展覽、示範、拍賣會及workshop等等讓各位自由參與，簡直好似sign painting界嘅舞林大會咁，唔止可以見到高手過招，仲有機會同世界各地嘅sign painter交流互jam，機會難得啊！
Tokyo Letterheads
日期：2019年4月11-14日
時間：9am-7pm
地點：Ikejiri Institute of Design_東京都世田谷区池尻2丁目4-5
門票：全期票 USD$270 (約$2,160) / 週末票(4月13-14日) USD$160 (約$1,248)
詳情：https://www.facebook.com/events/171176463825776/
Start From Zero_牛頭角大業街13號日生大廈3樓C