扭蛋美術館最貼地嘅藝術展覽

gooddighk

7 年前

好快就要同三月講再見﹗
自從Art Basel及Art Central等大型藝術博覽會定於三月舉行，香港正式有了藝術月（Arts Month），今年都唔例外，好多被定義為藝術界盛事的大型展覽都在這個月發生，香港藝術節、亞洲當代藝術展、KAWS:HOLIDAY及Harbour Art Fair 2019等等。

與此同時，三月對一眾打工仔、學生哥嚟講，係一個無紅日假期嘅「難捱之月」，只能把握週末假期為沉悶生活添色彩。既然三月有咁多藝壇盛事發生，各大展覽自然成為港人假日好去處。我信，有部分人係出於真心去欣賞展覽，但嗰班當藝術展係攝影比賽或旅遊熱點咁瘋狂打卡嘅又點先？Art對佢哋嚟講只係呃like工具？

香港人有句口頭禪：「藝術嘅野，我識條鐵咩！」反映好多人認為藝術是高不可攀、遙不可及的。計我話藝術邊有識與唔識之分，重點係啱唔啱睇就真。介紹大家睇一個喺Arts Month壓軸登場嘅展覽 ─「扭蛋藝術展」。集合6個本地藝術單位，共9位藝術家合作，對「扭蛋」重新想像，創作出人人都睇得起又扭得起的藝術品。

睇藝術展必去中上環？
深水埗都有平民藝術展

藝術真的如此高不可攀？
熱衷策劃藝術活動的本地選物店x藝術空間foreforehead之創辦人Daisy高呼反對︰「主流藝術博覽或展覽以收藏家為對象，感覺好似只有中產人士或有錢人先至買得起，但其實我哋從小已經係收藏家，例如好多人細個都鍾意扭蛋，細個嗰陣唱好銀仔就圍喺扭蛋機前，渴望扭出自己想要嘅藏品，遇上喜歡嘅甚至想儲齊一套，同朋友交換分享。到長大咗，其中有啲收藏品可能已經唔見咗，但收藏過程中建立嘅品味喜好同埋美學標準，足以影響我哋一生。」
曾從事傳媒行業的Daisy接觸過來自世界各地，不同範疇、不同價格的藝術品，她直言喜歡藝術，但正正因為生於普通基層家庭，她明白藝術可以是很平民化，所以一直希望以平易近人的方式和價格，鼓勵大家欣賞和購買藝術家作品。

「扭蛋藝術展」集合6個本地藝術單位，共9位藝術家合力創作了9件較大型的art pieces，以及6部不同主題的扭蛋機。扭蛋內是細細粒但獨一無二的微型藝術品，符合香港呢塊彈丸之地的實際需要及香港人的收藏習慣，可以將小小藝術品放在床邊、枱頭、電視機頂、電腦旁又或是收埋等閒時拎出嚟欣賞把玩。從扭蛋機內扭出的既是獨立的藝術品，全部扭蛋加起來也可以是一件完整的藝術品。每部扭蛋機限定九十幾至一百個扭蛋，絕對限量，真係手快有手慢無。

1
文樂幾香 × Castor幻狐舍 × Lousy
三合一混合藝術

這部扭蛋機包含玩具設計師文樂幾香的「性愛高達」、Castor幻狐舍的「狐仙小靈精」和塗鴉藝術家Lousy的「五官雕塑」。將作品混合旨意在於配合扭蛋的隨機性，即使你係某位藝術家的fans也要靠「運氣」才可扭中，因此可體驗扭蛋好玩又充滿期待的購買和收藏經歷，扭唔中又唔洗失望，咪當支持吓其他藝術家。（$70 / 代幣）

「性愛高達」－文樂幾香
玩具設計師文樂幾香經常為知名角色加上性器官，樂而不淫。今回再次向經典角色機動戰士高達致敬，創作出勁吸引筆者眼球的情色作品「鳩達」，模仿舊日單色玩具的精髓，為高達加上性器官化成微型雕塑，得意在性器官老是出現在唔尋常嘅位置！5款作品包括「鳩達」、「顏射大炮」、「自慰號」、「閃貼」（3張鐳射貼紙）及「神秘款」，各有笑位，令人好想儲齊一套。

「五官雕塑」－Lousy
塗鴉藝術家Lousy的作品以「怪獸曲線」的獨特風格而為人熟悉，是次扭蛋則以不同Art form呈現，顏色鮮艷的五官雕塑後方是一頭鏍絲，可以將扭到的眼、鼻、口微型雕塑自由組合，放在身邊不同物件上，使之成為「活」的藝術品！(左）

「狐仙小靈精」－ Castor幻狐舍
Castor幻狐舍是一個以狐仙和貓妖為主題的和風紙品創作舍，其創作的扭蛋內不但有一個狐仙小靈精，更配上籤文運程貼紙！可以收藏造型可愛的微型藝術品之餘，籤文上更有是日「幸運物」提示，嗰種不確定性正正增加扭蛋的刺激感！若然抽到「吉」，一句講晒︰「開心！」（右）

2
Leeeeeetoy
「Leeeeeemoji」點止emoji咁簡單

兩位玩具藝術家創造了名為「大地之子Earthly」的作品，以探討人與地球的關係。因觀察到現時社會溝通的模式之轉變，將大家日常生活中常見的溝通方式－emoji化為玩具，就連whatsapp最update的牛油果emoji都有！扭蛋內不止有一件仿emoji微型雕塑，更附上一張印上Whatsapp對話的小畫布，鼓勵人於畫布上寫上字句表達心聲，再當作禮物送給朋友，話你知emoji都唔係冷冰冰的「hea覆」工具！（$100 / 代幣）

3
黃炳
「五代同堂之滅門自修室」分離從來不易

動畫藝術家黃炳將一件以男性為主角的「五代同堂」廣彩瓷器打碎，藉此表達對古代重男輕女觀念的反思，藝術品分為兩大部分，瓷器下半部是完整度較高的作品《滅門》，上半部則解構分拆一百幾十件碎片，黃炳將碎片重新拼湊再放進扭蛋當中，扭蛋內的既是一件獨立作品，又是一件作品的其中一部分。你可能會問︰「抽中一塊碎片有咩用？」帶來思想衝擊咪已經有用囉﹗（$90 / 代幣）

4
不云力牛勿元
令人心感安穩嘅「九十九地藏」

藝術家不云力牛勿元專門製作「不會動」的動物、植物、人物雕塑或印章。是次扭蛋以地藏為主題，設計出九十九款各具不同面貌及手印的地藏，放在家中有令人安穩之感。地藏黏土的創作靈感取自古人「畫石為佛」的傳統習俗，每個地藏各具不同面貌手印，放喺枱頭作擺設時，望見地藏上從容的臉容就有種莫明的安穩感！（$60 / 代幣）

5
BuzyJason
「WHAT THE FACE MANSION」個樣係點由你解讀

拼貼藝術家BuzyJason擅長以平易近人的亞加力作為媒體、以簡單的人臉拼貼激發觀者的幻想力。今回以倫敦National Portrait Gallery和古堡內的肖像畫作為靈感，拼貼出能閱讀自我意識的抽象人臉作品。作品入面的肖像係笑定喊，任由讀者自行解讀！隨扭蛋附送的「出世紙」上標明該件作品為100件當中的第幾件，絕對係世上獨一無二的藝術作品。（$70 / 代幣）

6
Furze Chan
「Hong Kong Birds」手繪雀鳥襟章

插畫家Furze Chan特別為這個扭蛋美術展創作出一系列以香港常見雀鳥為主題的作品，於特別挑選的優質紙張上以木顏色手繪出8款栩栩如生的雀鳥，再化成襟章。值得留意的是，隨扭蛋附送的小紙條的精緻程度好比縮小版的雀鳥圖鑑，即使唔係為咗個襟章，為張蛋紙都足以令人有衝動想扭！（$40 / 代幣）

唔想扭蛋都有藝術品睇﹗

Daisy話︰「好想普羅大眾可以從一件扭蛋，去了解背後藝術家的創作意念，了解過後鍾意唔鍾意，都係一個藝術學習的過程，如果唔做第一個行動—扭蛋，你唔會了解到自己喜好。到他日你有能力欣賞收藏藝術品時，就可以按自己Art sense（藝術品味）去做一個真正的Collector（收藏家）。」不能同意更多﹗
假如真係無興趣扭蛋咁點？同場展出參展藝術家們創作的9件art pieces，就放喺6部扭蛋機上面，有興趣者更可向Daisy查詢，全部公開有售，當然係先到先得啦﹗

《Great sex》, 文樂幾香, 2019