「呢個唔好寫出嚟﹗」「off-cam先講啦﹗」「但係你唔好拍出嚟﹗」……
訪問中出現了不下數次上述溫馨提示，真係有咁多嘢唔講得咩？
回想起一連兩天的採訪，由鮮浪潮國際短片節放映會，到一起往海邊走走在電車上閒談，其實剛滿24歲嘅Nora（林子穎）都幾健談，有嗰句講嗰句 、唔會扭扭擰擰，有理由相信，「戴頭盔」只因踏入社會工作日久，菱角漸被現實磨平，開始明白有些時候「嘢唔可以亂講」。
內心有好多嘢想講？Nora選擇透過電影發聲。
2018年，紀錄片《地厚天高》以本土派政治人物梁天琦為題材，紀錄了他從參加補選到被取消資格後的心路歷程，新晉導演林子穎憑此片漸為人認識。「記錄片本質好dramatic（戲劇性）甚至好悲慘先有紀錄價值，所以拍紀錄片就好似從別人痛苦中找好處咁」因拍紀錄片而成名的Nora決定停一停，今年首次執導劇情片《全部都係雞》，在早前的鮮浪潮國際短片展及ViuTV放映。電影講述援交少女被捕後，在感化官面前扮演改過自新的故事…… 除咗梁天琦，其實Nora仲有好多嘢想講。
多得梁天琦！
曾幾何時夢想成為作家、詩人的Nora，升上中六後愈來愈愛看電影，當發現電影可以感動人的力量很強大，便開始有想做導演的想法。直至讀大學時參加校園電視，2014年，遇上社會變得動蘯，當年只有19歲的Nora隨著一班莊員和老鬼報道新聞，經常到前線採訪，「雨傘運動嗰陣學生參與度好高，當時環境迫住你成長，要喺好短時間剪片播出街，好多嘢無學過已經要做，落決定要快執行能力要高，睇事物嘅眼界闊咗好多。」自此Nora開始對拍紀錄片產生興趣。
年紀輕輕的Nora執導過《旺角黑夜》、《未竟之路》及《地厚天高》等作品，香港電台也曾找Nora執導香港時事評論家李怡的紀錄片《坐看雲起時》，她的作品更曾先後在英國、台灣、柏林、韓國等地放映。雖然未至於聲名大噪，但《地厚天高》將她與梁天琦之名扯上關係，接連的放映會、電影節及媒體訪問等，令這位新晉導演知名度與日俱增。的而且確，Nora很感恩遇上梁天琦，拍過《地厚天高》。Nora︰「梁天琦個故事好打動我，佢由細到大成日講『我要做議員、要搞政治、為民請命』，可能佢想做嘅嘢理想好崇高，但背後原來有十萬樣嘢係狗屎嚟，咁呢啲嘢係佢未必鍾意，或者令佢更加realize （明白）原來細個嘅夢想係一舊咁嘅嘢﹗係一個disillusion （覺醒）嘅過程。《地厚天高》都算少少成功，我係拍完之後先明佢講嘅嘢，即係好多嘢係無expect過原來係咁嘅。除此之外，《地厚天高》嘅票房、DVD sales都會帶到啲收入俾我嘅，不過唔穩定囉，因為最穩定最搵到錢嘅工作，好多時都係拍event啊、訪問啊，幫人剪片啊，所以我無乜錢㗎咋﹗」
全部都係雞
「雖然《地厚天高》反應係好，但係好多嘢會令自己唔舒服，而我仲未係好摸索到如何講一個好故事，同時又唔好令自己咁難受之間嘅平衡點，同埋咁啱我又想做新嘅嘗試，所以我同自己講，暫時放一放低紀錄片做其他嘢先。」就係因為咁，Nora暫時放下最擅長的紀錄片，首次執導劇情片《全部都係雞》，繼早前在鮮浪潮國際短片展中放映，其後亦在ViuTV播出。《全部都係雞》講述援交少女被捕後，在感化官面前扮演改過自新的故事…… 看得出Nora想透過三十分鐘的故事道出社會上種種醜惡現實，點止援交問題咁簡單。
「《全部都係雞》係講一個援交女仔俾人拉咗之後，遇上一個個令佢失望嘅人，導致佢最後都唔能夠改過自新，過唔返原本嘅生活。」聽落成個故事好沉重，但係經網絡潮語「全部都係雞」包一包裝成件事又無咁heavy，咁個名點嚟嘅呢？「其實好遲先改名，想套戲個名貼地啲通俗少少，都係啲連登仔會講嘅嘢囉『全部女人都係公廁啊』、『全部女人都係臭啊嗰啲呢 』重點係個名要出到街，哈哈﹗」戲名夠搶耳，絕對係優勢，咁Nora最想邊個捧場呢？「我想梁天琦有份睇， 但無啦佢坐緊監，我想俾佢知道我拍完《地厚天高》之後做緊咩，或者因為呢套戲有啲嘢都係inspired by（靈感來自）佢，拍紀錄片係你要走進別人嘅人生，而嗰個人都會喺你身上留下痕跡，如果唔係認識到梁天琦或者拍到《地厚天高》，我都唔會走上呢條路。而且我諗無人睇完《地厚天高》之後會expect（期望）我下一套係《全部都係雞》，我想俾佢見到我呢個轉變 。」
誰大誰正確
「誰大誰惡誰正確」從電視劇對白變成很多人也認同的「道理」，因為不論在社會或是職場，似乎也很適用。是的，雖然這是有法律的時代，但卻沒有必然的公義。Nora認為創作往往是從生活中取材，面對社會制度上的不公，她選擇用電影說出部分年青人的不幸。
「 其實《全部都係雞》有啲似拍紀錄片，都係base on（基於）身邊嘅人嘅不幸經歷。上年我有幾位朋友，因為種種原因要面對法律嘅制裁，當時聽到好多唔公平嘅事，令人反思到底我嘅朋友做錯咗咩先會淪落到呢個地步？點解社會會俾感化官有呢個position（地位）去judge（判斷）我嘅朋友呢？或者我啲朋友真係需要受到幫忙，咁點解呢啲過住咁優哉悠哉生活嘅人，會有能力去幫到我朋友咁複雜嘅人生呢？所以我覺得成件事唔係好work（可行），當你要去幫或者嘗試所謂拯救一個年輕人，你係要嘗試理解佢、嘗試明白佢聆聽佢，而唔係咁樣將每個好獨立嘅個體放入一個好數字化嘅制度入面囉﹗制度係一樣好死嘅嘢，而人係好活嘅。我明白每一個制度或者規矩嘅存在都有佢嘅原因，而且都係出於善意，但係善意唔等於有效㗎嘛﹗好多時你唔需要帶住惡意去陷害人，都有份推佢一把落去一個更深嘅深淵，呢個就係社會嘅悲哀。其實我自己諗感化官呢個角色最重要係佢偽善，佢覺得自己幫到人但其實佢幫唔到，去到最後仲要自我感覺良好。 」
廢青怕文青
生於中產家庭的Nora，屋企有車又有樓，環境不俗。她是2017年港大文學院畢業生，修讀比較文學和法文學士學位課程，是大眾眼中的文青？有為青年？她只覺自己是個廢青。「我又冇穩定收入 、又冇返朝九晚五， 人生又唔諗住搵大錢，又唔諗住買樓，已經係廢青㗎喇﹗搵唔到錢就係廢青㗎啦﹗」
同Nora傾偈，發現佢三番四次自認廢青，偏偏多次強調自己唔係文青、甚至係最憎人話佢係文青。「好怕啲人覺得我係文青，因為我唔係﹗ 好怕啲好pretentious（自以為是）嘅人， 因為我真正識啲好有內涵嘅人，譬如對文學、歷史、文化、美術好有認識嘅人，通常都唔會拎出嚟講。咁我又自問唔係文質彬彬，又唔係最有文化內涵嗰啲人，唔想有人誤會，因為真係有好多好扮嘢嘅文青。仲有，我好唔鍾意文青打扮㗎﹗因為我都唔係嗰啲性格，即係帶住頂草帽著住條長裙咁樣呢，我一定唔係嗰啲人。我幾鍾意嗰啲好local（地道）嘅食物，譬如蛋撻、大牌檔嗰啲，文青點會鍾意﹗」
唔一定咁樣
呢個年代，咩都有可能。所以大家都好想打破社會對某啲人、事、物嘅既定想像，Nora亦唔例外。「我鍾意打破人哋對我或者我做嘅嘢嘅幻想或偏見，即係例如覺得導演一定要咁樣咁樣、 拍片嘅女仔係要咁樣咁樣。所以有時我會刻意做啲唔一定咁嘅嘢，譬如做導演呢一行無乜女仔著得好feminine（女性化），我就會特登著到好feminine。」
說到社會上的規範，香港女性導演不算少，但也稱不上是主流。作為一個女性、仲要咁年輕，曾否遇過不公平對待呢？「會有啲人因為我嘅年紀而唔信我，咁成日會俾人恰啦﹗但係性別方面我就唔係好感受到，甚至我覺得作為女性，譬如我拍紀錄片成日需要接觸人，反而係有好處，因為女仔容易俾人感覺唔aggressive（侵略性），或者容易令人放下戒心。如果你認定咗遇上困難係因為性別或者年紀，咁你只能夠怨天尤人，所以我傾向唔諗嗰邊囉﹗社會對男性同女性嘅expectation（期望）差天共地，如果我係男仔，我要賺錢養家就好大鑊啦，所以有時都幾慶幸自己係女人。」原來Nora最欣賞嘅導演係許鞍華。「許鞍華拍嘅電影有一種溫柔，雖然題材往往比較sad，但其實都會講到人性嗰種堅毅但溫柔嘅力量，加上佢對人生嘅睇法好inspiring（振奮人心），所以我好欣賞佢。」
睇得出，Nora對社會有好多不滿，慶幸的是佢懷著樂觀的心面對。「我見唔到香港未來有好好嘅出路，整體嚟講係悲觀，但係悲觀唔代表你要放棄囉，如果你明知會失敗都要失敗得好睇﹗」其實唔止許鞍華嘅睇法好inspiring，Nora都係，香港人加油﹗
好𢯊女子︰
Nora Lam 林子穎 (獨立電影導演)
Facebook / Nora Lam
Instagram / lamtzewingnora