正所謂“Everything is connected to everything else.”
上回好𢯊女子主角係紀錄片《地厚天高》嘅導演林子穎，其新作《全部都係雞》起用
本土味濃厚嘅〈油尖旺金毛玲〉及〈大香港精神〉為插曲，當聽到耳熟能詳的歌聲「油尖旺金毛玲 看盡世間事……」即時想起獨立音樂人Serrini。
繼4月推出新碟《邪童謠》，最近又積極參與正在舉行的Women’s Festival 2019，似乎低調其實又幾活躍嘅Serrini到底忙咩？原來忙著交paper完成港大PhD 課程。話晒被譽為「獨立音樂圈的鬼怪烈女」，Serrini 的故事自然不是那種乜乜後女生勇於追夢的故事。 她追的不是夢，是最真實、最忠於自我的生存方式。我們愛聽她的歌、看其Instagram live，應該就是喜歡她夠real吧？今回找來Serrini談談Free bitch育成之路，講少啲音樂、多啲社會學，總之鍾意講乜就講乜﹗
「做一個無用嘅港女，可以扮豬食老虎。」
Serrini是誰？
係嘅，話晒喺獨立音樂圈打滾多年，聽慣主流音樂嘅人未必知佢係邊位絕對唔出奇。加上一堆游離的身份與角色 －「陀地歌姬」、「哭泣的聖母」、「紫薯媽媽」、「小清新歌手」……不如等Serrini自己介紹返︰「我自稱『陀地歌姫』啦、『無腦港女』啦，我最近試過喺一個TVB嘅訪問話自己係『大波文青』，跟住佢哋靜晒，我覺得呢個act（行為）好feminist （女性主義），哈哈﹗我係女性主義者啊﹗啲好建制嘅人會話『女仔使唔使咁啊，你覺得自己好強要蝦蝦霸霸，攞住高踭鞋踩住啲男人先開心咩？』咁樣，我係處於中間位，同我嘅音樂一樣，無話好主流定係好indie，兩邊都唔係好想埋堆囉﹗我會反思自己喺華人文化或者香港文化裡面自己嘅position，其實呢個反思已經好feminist㗎喇對一啲完全唔feminist嘅人嚟講，我成日好鍾意套用作家Roxane Gay嘅一個說話 “I am just a bad feminist.”」
好多人以為香港嘅Women’s Festival就係一個純粹鼓吹feminist嘅活動，其實點止咁簡單︰「嚟到第二屆Women’s Festival，個得意位係女性議題可以用比較有趣嘅方式去呈現。可以做學術討論、放映會、Party，又可以同sex toy shop傾吓啲健康問題，仲可以同小朋友玩。今年我會負責一場演講，題目係『自由的歌姬·克制的港女：獨立唱作人 Serrini 的聽話之道』，我好鍾意『克制』呢兩個字，我要點樣戴一個面具，話俾人知我表面上可以好聽話，但其實我內心唔係。就係講緊我自己作為一個Indie singer，有啲人會認為你一定要關心社會議題或者要特別曳，又或者做一啲好破格好岀位嘅行為，但係對於我嚟講，我嘅rebellion（反抗）就係可以好乖亦可以好曳，但係喺過程當中要respect（尊重）對方。 作為一個女仔，最搞笑嘅就係可以扮豬食老虎，即係一個無腦嘅港女，攞住個連卡佛袋行過，就未必會有人check佢身分證。我好鍾意呢種感覺，到底點樣用唔同嘅方法去抵擋嗰啲你唔鍾意嘅外力呢？我嘅自由就係口沒遮攔得嚟要inspire（啟發）啲人勇敢咁樣Just be yourself。」
「我唔貪靚，我係靚之嘛﹗」
「我會proud of 自己係自己囉﹗」呢句說話唔係人人講得出口。
但係出自Serrini之口，又唔會覺得太突兀，點解嘅？如果有朋友同我講︰「我唔貪靚，我係靚之嘛﹗」分分鐘friend都冇得做。但係當Serrini理直氣壯地講同一句說話，我又會真心佩服，點解嘅？係自信啊﹗因為講嗰個有自信而聽嗰個又信服，似是自大嘅說話都變自信宣言。
「其實無話因為做女人而自豪，我會proud of 自己係自己囉﹗我唔貪靚啊，我係靚之嘛﹗哈哈哈哈﹗呢樣嘢細細個肯定講唔出，人大咗會發現自己覺得自己靚係一個好liberating（解放）嘅狀態，依家我覺得自己靚就會好靚㗎喎，你要本身acknowledge（確認）自己靚啦，同埋要以開放嘅心去接受好多唔同嘅衣著或者style。不過覺得自己靚都有好多種，有時見到啲人以為自己好似好靚咁，我同朋友就會講『照胃鏡啦！』因為佢裡面真係好核突啊﹗要搵返自己啱傾嘅人，圍爐取暖之後呢就將個comfort zone慢慢spread開去，人類係鍾意靚嘅嘢，只係有啲人唔敢承認啫﹗
我好鍾意John Legend老婆Chrissy Teigen，當有啲Twitter嘅 followers喺度說三道四指責佢，佢係free bitch到一個位會直接開火鬧嘅，佢唔止係一個好直接嘅女人，佢亦proud of自己個body，如果有人彈佢身型，佢會鬧返啲網民『我生完仔之後梗係有妊娠紋關你x事咩！』香港比較少呢種格嘅人，仲有，以前細個好鍾意Lady Gaga、仲有Michelle Obama等等。我欣賞嘅女性都係一啲好鍾意打破框框嘅人，唔會甘於被性別定型。我媽咪好想我快啲結婚生仔，我respect嘅，咁但我Daddy絕對一個feminist，佢就會話：『做咩咁快結婚啊？40歲都未遲啦！咁我點樣打破媽咪對性別嘅既定形象呢？以前我就會同佢講，我有好多男朋友唔知點揀，到近期可能我會講，我唔知生個仔女岀嚟，佢會唔會享受到自由民主社會，唔知佢到時講嘢使唔使好驚，facebook都要只係only me咁樣睇，所以我唔知生唔生仔好啊？咁佢又會好明白，即係用多啲議題去講。」
「我想退休、想做闊太、最想做KOL……」
照道理，一個喺中文大學讀完英國文學，再去港大修讀文學與文化研究嘅女仔，應該好鍾意讀書，Serrini偏偏話自己「too much education」，咁唔讀書想做咩呢？佢話想退休、想做闊太，可以理解，然而佢狂話想做KOL 就真係匪夷所思。一街都係KOL你會想做其中之一？我唔信。Serrini︰「真㗎﹗ 死啦﹗依家去到一個位我阿媽都唔信我講嘢﹗」 老套都要講句，信不信由你。
「唔想再讀書， too much education﹗太多太多責任感，我想快啲畢業，我同我老竇講我可唔可以退休， 半年前退休嘅佢即刻話好啊﹗所以我估佢好期待我退休，我都好期待呢一日﹗其實依家大概都收支平衡嘅，係一種好自在嘅狀態，我又唔需要賺太多錢，甚至乎有時特登令自己唔好咁popular，即係如果你個人nice啲係會多啲人鍾意，但嗰啲唔係我鍾意嘅觀眾囉﹗搞到成日周圍樹敵，哈哈哈，因為我好鍾意challenge（挑戰）fans，同佢哋講 “You don’t deserve to follow my ig!” 簡單講即係我唔大愛﹗我想做到自己個community（社區）係有愛，但唔一定係一種濫愛嘅方法囉﹗
目標啊？除咗退休之外就係做闊太啦﹗邊有人可以講得出佢個life plan俾你聽，咁如果我要hea人嘅時候我咪同佢講我想做一個闊太囉﹗ 咁就得㗎喇﹗仲有啊，我好想做KOL﹗特別係beauty KOL﹗好想做嗰啲每日都試唔同面膜，跟住話俾人知保濕程度係點，或者試吓新嘅眼底精華液，但嗰啲冇人請我㗎喎﹗我覺得好正﹗ 即係無啦啦出嚟show啲product，我啲friend好鍾意見到我咁做，因為佢哋知道我份人唔係咁 ﹗哈哈﹗我好想做一啲疑似冇乜腦嘅嘢， 咁我就會好開心啦，最好有嘢食，同埋係做手工嗰啲，都唔知做乜﹗有啲KOL去個唔知咩event插個花，就話『哎呀好開心啊多謝你俾呢個機會……』好好笑啊 ﹗好正，我想識呢啲朋友﹗ 偏偏個個叫我都係去嗰啲有意義嘅活動 ，我好唔鍾意啊﹗即係文學節開幕啊跟住去睇啲咩展覽啊﹗ 」信唔信？
「就算咩都做唔到，可以做個攪屎棍。」
2014年某天， Serrini坐在政總前的草地，悠閒地唱著舊作〈同一種米養百樣人為甚麼養出你這個賤人〉，明嘅人自然會明。2019年，香港社會再次動盪，Serrini x 華達敬拜隊 x iii帶來新歌〈晚安，明天見〉，一個以長輩圖為創作靈感的MV令人印象深刻，到底Serrini想講咩？「依家嘅我唔鍾意太reactionary（反動），早幾年我寫咗首歌叫〈給睡了的人〉，好想說服啲人，唔好啦你睇吓啦、試吓聆聽啦﹗我依家聽返就覺得『who cares？』〈晚安，明天見〉呢首歌好好笑㗎，好似啲『耶L歌』或者更加似LGBT都用得嘅歌。其實只要你嘅創作有啲嘢同呢個社會有連繫嘅時候，已經係一種好好嘅同在，你唔需要再講同一句說話，亦都唔好話其他人唔可以咁做。」
照咁睇，Serrini都幾樂觀，佢又話唔係︰「我唔係好樂觀㗎咋﹗只係堅持住一種態度，就係衰嘅人唔可以sit with me，即係對佢哋最大嘅懲罰就係they can’t play with me﹗就算你咩都做唔到，都可以做個攪屎棍﹗幾年前作咗首歌叫做〈大很把人〉，嘗試用年輕人嘅角度同身分講，其實你都係想我最好乜都唔講，跟住聽話咁默默過咗我呢一世咁樣，係可以認命嘅，但認命都有好多種㗎嘛，你認完命之後可以不合作或者按章工作㗎嘛﹗It’s a fun! Like find your own subversion（顛覆）, find your own way to respond to the world! 一個咁大嘅machinery（機械）只要有幾粒螺絲鬆咗，就唔可以行得好舒服，咁你嘅人生係可以變成嗰個攪屎棍囉，咁係都幾得意㗎，或者唔一定要攪屎棍㗎，你可以好有理想去改變世界，that’s fine but如果人哋唔俾你咁open做呢樣嘢，你咪唔好講俾人聽囉，或者表面上超聽話囉﹗我最鍾意睇嘅童話故事書係《Harry Potter》，我睇到最後喊到黐線就係因為Snape，憎咗佢咁多集，最後先知佢係最忍辱負重嘅人，我希望香港有更加多Snape嘅存在，同時都要有人做Dumbledore連結唔同人嘅角色，亦需要Harry Potter呢啲懶英雄式咁衝出嚟x嘅角色﹗無論如何，只要不斷做我嘅Free bitch就ok啦 ﹗」第一次聽唔係好明，聽多次明晒，thank you Serrini，香港唔止需要更加多Snape，同樣需要更加多好似Serrini咁勇敢嘅好𢯊女子﹗
好𢯊女子︰
Serrini 梁嘉茵 （獨立音樂人）
Facebook / Serrini
Instagram / official.serrini