香港搞成咁，仲有幾多人關心今年樂壇有咩新人？
日子還是要過，注意力集中於社會大事之際，偶爾都要放鬆留意吓樂壇新鮮事。
當大家以為樂壇女新人Jace（陳凱詠）繼派台歌〈想突然〉、〈想正常〉之後，會keep住用想乜想物做歌名，點知為配合ViuTV劇集而推出的〈困獸鬥〉後，本月主打歌就咁一個字〈講〉，高唱「拜託你 講講講」……
同Jace做訪問，唔需要拜託佢都會自動波講講講，令我驚訝嘅係，佢講咗好多次「夠喇」，例如「做自己就夠喇」、「開心就夠喇」、「鍾意就夠喇」……乜咁容易滿足㗎咩？話晒今年先至正式出道做歌手，無論天下太平定係世界大亂，相信大家未必對佢有深刻認識，不如等Jace介紹自己，咪知佢係知足常樂定係純粹習慣講「夠喇」﹗
咩都係假，你自己有幾多實力係最真嘅﹗
同新人做訪問，循例要問其入行經過。未正式成為歌手之前，Jace是環球音樂網誌的主播，經常同環球旗下歌手做訪問嘅佢，唔問都預咗自爆入行的故事︰「讀大學嗰陣參加環球音樂網誌的公開招募，點知俾我好好彩咁贏咗，所以一畢業就即刻入咗環球做主播，當時真係唔敢諗做歌手呢啲咁明星夢嘅嘢，驚自己handle唔到。直到有一日公司有人叫我去試音，我話『其實我自己寫咗啲demo，不如直接俾你哋聽啦﹗』咁聽咗之後佢哋覺得ok就轉咗我做歌手，成件事係好突然㗎對我嚟講，因為我從來無乜點諗過自己可以咁好彩，誤打誤撞可以做到自己最想做嘅嘢。」
相約Jace去K房做訪問，除咗因為諗訪問地點諗到悶，最重要係因為本人喺網上睇佢唱其他歌手歌曲嘅cover version，同佢演繹自己歌曲嘅聲線好似唔係幾同，一於捉佢唱live聽真啲。結果係幾意外，可能因為幾首派台歌亦屬非賣弄唱功式輕快舞曲，唔聽唔知原來Jace嘅唱功都ok喎，唱到高難度經典K歌如〈If I Ain’t Got You〉甚至〈Saving All My Love For You〉，佢都駕馭到。Jace︰「而家我嘅歌係以感覺為主，等大家大概get到我個image係點，有好多嘢係可以慢慢嚟嘅，唔使急﹗我唔需要刻意去賣弄，周圍話俾人知我好長氣、好高音， 其實而家好多歌係你聽完開心就夠啦，係咪咁需要focus落個vocal有幾勁啊？」你唔想俾人知你係實力派咩？定係想做住偶像派先？Jace︰「我會想自己係實力多啲，偶像呢個字好被動㗎，偶像係人哋覺得你係你先至係偶像，你冇得話自己係偶像嘅，而喺呢一個世代偶像更加難存在啦，我希望自己能夠主動地成為一個實力嘅人，咩都係假，你自己有幾多實力係最真嘅﹗」
做自己就夠，咩都試吓囉 ﹗
自古以來，做藝人最講求包裝，望望環球為Jace度身訂造呢張花紙，從形象到歌路，明顯同師姐Aga、Gin Lee等人截然不同。Jace︰「其實依家行緊嘅方向係好貼近我本人嘅，我同公司都覺得既然要介紹自己，不如俾最真嘅自己俾人認識啦，我個人本身就係坐唔定、跳跳紮，無話好刻意做斯文乖乖女嗰啲形象。呢個社會好多時對女性有種標籤定形，或者認為一個 artist 要 elegant 啲啊、靚靚女女啊，公司同我都有共識，
我做自己就夠喇 ﹗」 有理由相信，在環球音樂網誌做主播這兩年，Jace與公司已建立良好互信關係。
「公司會俾我做我想做嘅嘢，一般平時嘅打扮都係我自己揀，因為衣著打扮係展現緊我個人嘅性格，所以我都好跟隨自己個方向。不過以前我係嗰啲唔化妝又唔打扮嘅人，高踭鞋都未著過。而家接觸多咗唔同style，都會買定高踭鞋傍身，雖然好似好女仔唔襯我，但因為工作需要間唔時都要著吓咁囉﹗」聽落你對歌手之路嘅安排都幾滿意，是否無試過任何不滿？「嗯……我好唔鍾意所謂規限囉﹗好怕聽到人講『咁係咁㗎啦』、『大家都係咁』、『咁做呢行係要咁㗎啦』，『冇㗎啦咁你呢啲就係要咁㗎啦』，咩叫係要咁啫？我唔鍾意囉﹗我盡量唔想自己成為被stereotype嘅人，咁樣太無意思。不過呢啲事喺我哋社會係經常發生，如果有呢啲規限就好阻礙我哋有更多嘅創意同埋更多美好嘅事情發生囉，所以我好唔鍾意呢啲規限。我覺得我都make sense啫，哈哈哈﹗咁有啲咩咪大家一齊討論吓，咪都試吓囉﹗」
周星馳係永恆㗎喎﹗
前年一齣《瑪嘉烈與大衛系列：前度》為Jace打開知名度，她在劇中飾演一個比較憂傷的女生，與眼前活潑開朗的Jace完全係兩回事，即時感覺佢演技都唔錯。Jace︰「我接觸拍嘢係早過表演唱歌先嘅，因為大學時期我係讀傳理系，有啲朋友係電影系，誤打誤撞走咗去試吓拍嘢，咁就做咗演員喎﹗做演員好好玩，我鍾意﹗鍾意佢令我聆聽更多感受更多，我係一個思考型嘅人，但係演戲原來唔可以剩係思考，你必須要感受，我試驗多咗我嘅情緒，因為鍾意，所以我都想有多啲機會去接觸唔同角色。」
「周星馳係我最鍾意、最欣賞嘅演員﹗」周星馳係你個年代㗎咩？Jace︰「周星馳係永恆㗎喎，唔會年代久遠㗎，細細個嗰陣阿爸係咁睇周星馳，迫我都係咁重複睇，我覺得佢好犀利啊，又搞笑又有型好又有才華﹗好難先做到好不經意嘅搞笑。暫時我未有信心演笑片，笑片係好難㗎，你覺得自己好好笑但係人哋一啲都唔想笑嗰下好尷尬，我handle唔到呢個落差。」咁你暫時最想或最怕試咩角色？「我好想玩古裝囉﹗哈哈哈﹗因為細細個睇古裝片嗰啲武俠，覺得佢哋好型，咁其實我自己又有偷偷哋學功夫嘅，如果俾我試到武俠片，可以著古裝喺度打打殺殺就好正囉﹗不過我只係想吊威吔騎吓馬啊打吓人，如果係扮拎住條絲巾嗰啲古裝美人唔啱我﹗鬼片或醜女角色都可以試吓，本身就唔係靚啦，咁所以好樣衰嘅鬼都冇問題嘅，外表呢啲嘢真係冇乜所謂嘅﹗有機會試就夠喇﹗」
咬住啖啖肉嘅雞脾好有滿足感
Jace常強調公司俾佢做返自己，咁工作以外嘅生活係點嘅呢？係唔係同時下年輕人一樣手機不離手？「我覺得social media對我嚟講係比較似工作，即係因為工作需要所以我需要成日update social media，但我自己嚟講就唔係好鍾意成日睇social media，我嘅Ig (Instagram)都係入咗行先開，人哋中學嗰啲已經用緊Ig但我完全無用㗎﹗自己要搵個balance囉，幾多係工作幾多係自己當娛樂咁，搵返個中心點唔好太依賴，小朋友係唔應該成日碌Ig㗎﹗」
咁其實你有咩喜好想同大家分享吓？Jace︰「細個特別鍾意唱K，因為所有同學仔都係『咪霸』，次次都要爭咪唱K﹗我鍾意唱英文歌多啲，鍾意唱啲英文high歌，例如Britney Spears、Avril Lavigne、Black Eyed Peas之類，因為成班人一齊玩如果剩係唱慢歌好悶㗎嘛，好似喺度show唱功咁樣，咁緊係玩啲大家都可以一齊開心嘅嘢，對於細個嘅我嚟講係學英文嘅好時機。我好鍾意食嘢，哈哈哈哈，我鍾意食啲好飽嘅嘢㗎，我唔鍾意食零食嘅，我鍾意食飯啊麵啊，咬落去啖啖肉嘅嘢，例如雞脾，有雞脾食我就好有滿足感，咬落去嗰吓好開心﹗唔開工嘅時候都係做一般人做嘅嘢，好悶嘅，都係聽吓歌、睇吓戲、食吓嘢囉，冇乜特別。咁其實自從做咗呢一行之後，睇戲聽歌對我嚟講好自然地會成為咗分析同學習，所以我會想搵啲完全同職業毫無關係嘅嘢俾我去relax，咁我最近就發覺原來畫畫呢樣嘢都幾治癒，即係一路畫你完全唔會諗任何嘢，過程好開心，而家開始一得閒就會畫吓畫。」
曾經睇過一篇Jace嘅訪問，記者用「塵海中暢泳」來詮釋陳凱詠之名，係幾貼切嘅。同Jace傾談會感受到佢有種在「塵海中暢泳」的冒險精神，而且時刻好似游來游去咁有活力，既嚮往自由，亦不拘小節。Jace話︰「我係一個好重視朋友嘅人，成日都要見朋友㗎，好彩大家嘅工作時間都好flexible，幾忙都會盡就時間，見朋友係最開心嘅，忙唔緊要，有得見朋友就夠喇﹗」整個訪問過程中，佢真係講咗好多次「夠喇﹗」此時此刻，我相信佢係真心知足。好多人話「容易滿足的人，最容易幸福」，希望Jace一直幸福。
好𢯊女子︰
Jace 陳凱詠（歌手）
Facebook / 陳凱詠 Jace
Instagram / jacechw
TEXT / Phoebe Chan・PHOTO / Marie Anson・DESIGN / Chan She・ ASSISTANT / Bloom，Vicky・Make up artist / Echo・Hair stylist / Kenki @ Musé Hair・Wardrobe : MO&Co.