學生記者Sharon
做一個持平嘅記者好難，但我會盡力做
記者這個職業在數月的反修例運動中，得到了前所未有的關注。除了任職於各大傳媒的記者及自由身記者，學生記者在這次事件中亦佔了重要的一席位。社會上很多人認為學生媒體不是主流傳媒，所以不是每個學生記者也有機會進入政府記者會及所有傳媒活動。然而，香港有新聞自由，正如資深傳媒人呂秉權所言︰「新聞自由係容許記者、公民記者、Freelance記者去採訪，甚至拍紀錄片嘅人採訪。」所以學生記者絕對有採訪的自由。
的而且確，學生記者們在這場運動紀錄了不少重要時刻，如城市大學「城大編委會」清楚拍攝到10月1日荃灣槍擊案的一刻。學生記者沒有受薪（或只有微薄的津貼）、沒有大量資金及資源支持，但他們與各大傳媒記者一樣，為求報道真相，拼了命穿梭於警察與示威者之間。今回有請在香港浸會大學就讀新聞系的學生記者Sharon，分享在前線工作的點滴。
避緊都仲伸部機出去拍，我諗我真係唔識死！
現時在香港浸會大學就讀新聞系year 3的Sharon，去年曾在某大本地媒體擔任兼職攝影記者，今年加入學校廣播新聞網，10月起更加入某國際多媒體新聞機構成為實習記者。在反修例運動期間，Sharon主要是為校內電視台進行採訪，並以短片方式報道。相比起其餘兩位受訪者，Sharon到前線採訪的次數不算多，但論進取程度，最年輕的Sharon似乎更無畏無懼。
Sharon指自己到前線採訪的次數約八至十次左右，回想起每次都遇上不少驚險場面，想著想著她也忍不住話自己「唔識死」。Sharon︰「最初去前線採訪唔識企位，我就唔識死咁企咗喺前線示威者隔離，當日嘅裝備又比較不足，開始清場之後，我走入後巷避都忍唔住伸咗部機出去拍，老細見到都嚇死，即刻打嚟叫我走。當日真係有槍林彈雨嘅感覺，最驚係中眼。」「因為好多時喺現場都睇唔實啲消息，有次聽到前面有聲就想衝上去，當時都唔知放咗催淚彈，只係見到汽油彈，但原來𠴱陣已經放得好勁，但我咩都無戴，去到前面邊影邊戴，仲要戴錯！加上又同同伴走散咗，得返自己一個 ，諗落我都真係唔識死！好彩我跑得快，有咩事即跑﹗」Sharon笑說。
同伴因藏餐刀而被捕，當時只諗一定要影住
Sharon首次到前線採訪，是大家不能忘記的2019年6月12日，不過她當日逗留的時間並不算長。及後再以記者身份到前線採訪已是9月的事。9月15日，Sharon再次披上gear到前線採訪，這一天對她來說印象非常深刻，因為同為浸大學生記者的同伴因藏有餐刀而被捕，「當時警方已經搜咗幾個學生記者嘅袋，本來以為留難吓我哋就算，無諗過真係會拉佢。同學被拉當刻其實都未覺得驚，當時只係諗一定要影住，幫佢留證據。嗰日隔離有個示威者燒傷，所以氣氛好緊張，加上第一次食TG（催淚煙）同埋水炮，好彩藍色水無噴到我哋嗰邊，但係無色水其實都又痛又『乸』。當時水炮車係向住記者射，我望住佢埋嚟即刻拎轉面，我拎住相機好淆底，最驚係相機濕咗我賠唔到俾個friend，哈哈﹗」Sharon笑說。
近期有不少記者被捕的個案，而警方亦經常質疑學生記者的身份，認為他們不是「真記者」。Sharon對於自己都試過被質疑而感到無奈，又認為當日之所以被搜身皆因他們是學生記者：「當晚有兩批人都係學生記者，警察過嚟問我哋讀咩系，check記者證仲唔夠，又check埋身份證又拎埋一邊抄低資料，平時都唔會check得咁仔細。而且有行家會覺得學生報唔識行規。雖然感受到待遇因學生身份而有所不同，但Sharon想到這身份也有好處︰「不過示威者會比較信任學生報，即係有時如果訪問你想問仔細啲佢哋都會肯答，但係大媒體就未必。」
Sharon前線裝備檢閱
對比起各大新聞機構的記者，學生記者不但沒有薪金，很多時防護裝備也需要自備。Sharon︰「我哋無錢㗎，經費就係來自呂秉權。最初只係有白色地盤頭盔、普通眼罩同埋雙罐豬咀。Full face mask係最近先開始用，都係呂秉權送俾我，因為我成日行得比其他同學前，同埋驚我另一份工都需要用到，本來我都唔想要，不過佢係咁塞俾我，所以同我一齊出去嘅同學就慘啦！哈哈﹗」看上去Sharon的隨身背包尚算輕巧，原來沒有㩦帶任何藥物，果然係唔識死……Sharon︰「咁多嘢拎，我無帶藥啊，萬一有咩事都係等人嚟救啦﹗如果帶細嘅鹽水洗眼都唔夠，純綷用嚟傍身，覺得無咩意思所以無帶。不過我通常會帶energy bar，好多時無時間食嘢就用嚟頂住先。」
由於需要以主播身份出現於幕前，Sharon必會帶備私家咪。（左）最近改用俗稱「雙罐豬咀」的Full face mask，保護性更強。（右）
學生記者更加唔好著黑色，所以經常著間條
至於衣著方面，主要都是以輕便為主。Sharon：「其他人教落一定要著長褲，衫就無咩所謂，最重要唔好著黑色，特別係學生記者更加唔好著，好易被誤會，我自己就成日著間條！同埋會避免著緊身褲，因為如果著火或者中水炮車射出來嘅水，條褲貼住皮膚會好痛。鞋就一定著防水鞋，因為如果對鞋濕咗雙腳會好唔舒服，同埋都聽過有人浸水炮水後甩腳甲，可免則免啦。」今天Sharon沒有化妝，但一身健康膚色的她笑起上來感覺很甜美，也很有朝氣。對了，她常以主播身份出現於幕前，那麼到前線時有化妝嗎？「其實我好少化妝，好多時粉底都唔搽，不過習慣咗會拎細細個化妝袋，入面有潤唇膏同埋唇膏，不過都比較少搽，但係我會畫eyebrow等個樣望上去精神啲﹗」係公仔頭潤唇膏啊﹗大學生童心未泯都好正常。
做記者可行前一步，行得愈前無力感愈重
前線危機四伏，是甚麼驅使Sharon在裝備不算充足的情況下仍走上前線？「好多時唔企前啲其實影唔到，我想俾人知道事實，同埋希望自己影到嘅moment可以inspire到人。其實有時都驚，但明知道有機會只係你影到而其他人影唔到，既然都已經企咗喺度就無得驚啦。」Sharon堅定地說。曾經聽過好多人講，讀新聞系嘅人總會有一份使命感以及追求真相的心，睇嚟係真嘅。
對於新聞系學生而言，反修例運動可能是最好的教科書。Sharon對於記者這個職業亦有更多想法：「好多人話黑白是良知，我就無感覺，黑色我會諗起不公義，用權力去壓逼其他人，白色就
係一啲無辜嘅人。要做一個持平嘅記者好難，但我會盡力做，所以我咩都會影，例如『私了』都會影。以前未必感受到，但依家覺得持平係好難，唔關立場事，而係當你去到前面嘅時候，會同情啲人被人好粗暴咁打，好自然會同情佢，係好自然嘅反應。有人會覺得咁已經係唔專業，但我覺得OK嘅，咁我都有感受，只係做嘢時會盡量持平，情緒就留返公餘嘅時候。」在混亂的社運現場，雖然能夠走到最前，但其實走得愈前，無力感愈重：「呢件事發生之後好多人想做記者，我自己一直都想讀新聞，所以我好清楚自己想做咩，不過有時會諗，做記者雖然可以行前一步，但其實無力感好重，因為自己無嘢可以做。」即使如此，Sharon仍堅定地說想繼續做記者︰「我想繼續做，未來最想做一啲獨家，好特別或者好爆嘅故仔﹗」
學生記者其實就是記者，正如另一受訪前線女記者Amy所言︰「其實每個人都可以做記者，只要能夠客觀地探討呢件事、又或者帶出一啲面貌，就已經可以係記者。」所以照道理不應受到不平等對待。同Sharon傾談，會發現佢唔止擁有無畏無懼的求知精神，對於記錄事實更有著強烈堅持的心。或者學生記者同主流記者最大分別就係，學生記者今晚在「戰場」拼搏過後，第二天可以「走堂」休息一下，大報記者就未必有呢種機會。
延伸閱讀︰
【 黑白】
【站在黑白之間 – 前線女記者 (一) 獨立記者Amy Ip ︰「黑白是真與假，只有真相是良知。】
【站在黑白之間 – 前線女記者 (二) 新聞記者E ︰「是非黑白，視乎人內心把尺及標準。」】