一位患有黑色素瘤皮膚癌，另一位則是白化症患者，William Chan 與 Yiu Chi Yung 天生一黑一白，在很多人眼中，他們是與生俱來的異類，以現代的道德標準來看，無論在心理或生理上，理應受盡憐憫或保護，但事實似乎並非如此。William 與 Yung 沒有在乎天生頑疾為他們帶來的種種規限，全情投入去完成自己心中的目標，由管理自己的人生到影響他人，循序漸進，從來沒有半點怨言。
「咁嘅皮膚令我好方便溝女囉，因為特別吖嘛﹗」
「就算膚色係點，我都覺得自己係香港人。」
生於黑白，一般人難免會對兩位的日常生活感到好奇，面對旁人的目光，兩位有著明顯不同的遭遇及處理方法。跟 Yung 的求學時期相比，William 似乎較為順心：「細個其實好少在意自己嘅外表，通常最難搞就係每個九月一號開學，因為你要認識一班新嘅同學仔，跟住又要講一大堆嘢，跟住佢頭一兩日又可能會笑你，但係一個禮拜過咗，佢好似又唔係好記得你有病，唔係好記得你外表係咁， 一路都同你玩，但係有樣嘢就永遠都好唔同嘅，就係自由度，即係你見到佢哋讀書讀得好唔開心，跟住我又唔使讀書我又好開心，咁慢慢就知道，原來我有呢種病又好膚色又好，就係為我帶嚟好多自由度。」獲得高度的自由，看來是不幸中的大幸：「呢一個膚色令阿爸阿媽俾咗個家規我，就係『你想做乜就做乜啦』，咁我每日就剩係只可以做啲我想做嘅嘢，令我好頭痕。」
至於 Yung，小小年紀已需要揣摩如何處世：「除咗避免曬太陽呢啲要注意之外，其實父母都冇特別同我講呢個病，後來接觸到一啲朋友先開始了解到，因為始終細個啲人好鍾意講笑㗎嘛，一開始啲人覺得你好奇怪，唔同你玩，咁你都要盡量去識多啲新朋友，因為始終一個都好孤獨㗎嘛，所以我細個都好遷就人哋，即係知道自己可能係好孤立㗎，全班都係咁樣得你一個唔同，所以我特別阿諛奉承，點都要黐到班朋友。」
談畢別人怎樣量度自己，那麼兩位又如何看待自己的膚色呢？Yung 一臉認真：「就算膚色係點，我都覺得自己係香港人，因為始終我都係喺呢個地方出世，由細到大嘅經歷都喺度過，就算屋企可能得我一個係咁，我都鍾意呢個身份。」William 則幽默的答道：「咁嘅皮膚令我好方便溝女囉，因為特別吖嘛，即係你好似一眼望到你就將啲大眾覺得好衰嘅嘢擺曬上身，跟住就會覺得你內在好似好好咁樣，咁就比較容易啲同人哋打開話題。」
「『死嘢』係一間被政府認可嘅慈善機構，淨係做有關死嘅嘢。」
作為「死嘢」的創辦人，William 經常背著慈善機構的名義去接受傳媒訪問，大談生死議題，好些讀者可能已對他的背景非常熟悉：「『死嘢』係一間被政府認可嘅慈善機構，剩係做有關死嘅嘢，咁即係做啲乜呢？咁分兩 part 嘅，第一 part 就係做啲個案服務啦，serve 啲瀕死嘅人，例如老人家、患末期病患嘅人，甚至有啲有自殺念頭嘅人，我都稱之為係瀕死嗰個類別。另一 part 就係做死亡文化嘅推廣，入學校講下 talk 呀，或者透過唔同嘅載體，例如係音樂、設計、文化、教育咁去嘗試改變香港嘅死亡文化。」
在香港，「死嘢」的服務概念似乎是嶄新的，William 繼續說明他的服務範疇：「如果有人係想委托『死嘢』幫佢安排定身後事，咁就即係要立遺囑啦、揀棺材啦、辦喪禮啦、處理遺物同分配遺產咁。咁又有啲人想做一個 living funeral，即係生前喪禮，希望大家仲在世嘅時間，同佢啲出席喪禮嘅來賓講啲真說話，同埋一齊去回顧佢嘅一生。另外，最初『死嘢』成立嘅時候，就係好想改變香港嘅死亡文化，其中一點就係寫遺書，即係希望好多香港人盡快寫一本遺書，因為其實每一個人嘅意外率都係均等嘅。」
「唔好覺得自己肉酸，其實白化症患者都可以好靚。」
誤打誤撞之下，Yung 一腳踏進了競爭激烈的模特兒行業：「第一次影相係幫一啲 IVE 嘅同學整個畢業 project，都係關於呢個病嘅，所以先第一次試下。 好奇怪囉，唔知係咪命中註定，跟住第二日我同朋友出去玩，就有一個關於 model 嘅 job 揾我。」在沒有拍攝工作的日子，他會跑到家人所開的餐廳幫忙：「有機會嘅話梗係做 model 啦，如果冇機會都可以跟屋企人學下嘢，即係未必喺 model 呢個範疇度出名，其實各行各業都 ok 㗎嘛。」
當模特兒不止是為了興趣，Yung 亦希望透過這項工作去為其他白化症患者做多一點點：「如果有機會出名少少，我都希望…… 可能世界各地都有呢個病嘅病人，希望俾佢哋知道就算有呢個病，都可以做到啲唔係平常人做到嘅嘢，唔好覺得自己肉酸，其實你哋都可以好靚，都可以踏入呢行去證明下自己，唔一定覺得只可以逃避，應該面對自己個病，揾到自己優點。」
「唔會有黑雪公主㗎嘛，點解好美好嗰啲就一定係白色？」
「黑白」在現今社會是比較熱門卻敏感的話題，對於兩位受訪者而言，「黑白」的意義又是甚麼？大家你一言我一語，開始探討這個甚為哲學性的問題。
Yung：「我諗起是非黑白囉，通常人哋啱同錯就用呢種顏色嚟對比囉，因為佢對比性好大吖嘛﹗」
William：「係呀！點解啲人成日覺得白色係啱啲嘅呢？明明黑色啱啲！」
Yung：「即係有其他顏色可以用，但呢個係最 basic。」
William：「近排有啲人揾我寫一篇嘢係講黑色，跟住之後我自己靜落嚟諗，我諗咗好多白色嘢有關，但係全部都係關於啲好好嘅嘢，你唔會有黑雪公主㗎嘛，即係好美好嗰啲就一定係白色，或者好似懶係潔淨啲呀、聖潔呀，即係呢啲咁嘅嘢。」
Yung：「好純淨，咩都冇，冇咩枷鎖、冇咩諗法。」
William：「係呀，當然我一諗就諗到恐怖啦……」
是的，白色就是恐怖，經 William 一說，全場立即靜了下來。
「未來永遠都未來，永遠都唔嚟嘅嘢唔使點理佢。」
在是次訪問以前，William 與 Yung 早於衛蘭的〈生涯規劃〉之 MV 中踫面，各自擔演需要積極面對未來的角色。返回現實，他們對未來又有何規劃？Yung 以家人為先：「如果可以接到屋企人間餐廳手，就唔使佢哋咁辛苦，Model 嗰啲係未知嘅，但屋企人間舖係實在嘅。」William 則給了一個很虛的答案：「我就好少諗未來，因為對我嚟講，未來永遠都未來，永遠都唔嚟嘅嘢唔使點理佢，但如果好似你哋咁會約我做訪問…… 咁我咪要 mark 底囉，關於未來嘅嘢就係我要 mark 低你哋約我嘅時間同地點囉。」
或者是因為醫生從小就告訴他活不過三歲的關係，所以William 對於未來的概念，早已跳出了我們的思維，但經過多番追問，證明 William 貫徹始終都是一個為社會著想的人：「我有一個目標到依家都未達成到嘅，就係我好想執咗『死嘢』，咩意思呢？慈善機構係解決社會問題，你冇曬問題咪可以執咗佢囉，但係比較難啲呀暫時。」