男女有別，男生理性女生感性，縱然女攝影師在體力上未必及得上男生，但很多人認為女生對美學有著獨特的見解，而且往往能拍出更能詮釋情感的相片。事實上，在男性主導的攝影世界，女攝影師要突圍而出絕不容易，美國女攝影師Annie Leibovitz卻成功扭轉此局面。還記得赤裸的John Lennon與妻子小野洋子相擁登上《滾石雜誌》的封面照嗎？這幀曾被評選為史上最具影響力封面之一的照片就是出自Annie Leibovitz之手。
那麼，香港的女攝影師呢？每個年代都會有新生代攝影師湧現，Miss Bean（羅豆）可說是新生代女攝影師代表之一。自從在理工大學設計學院畢業後隨即成為全職攝影師，活躍於創作平面廣告、音樂錄影、唱片封面、雜誌封面、電影劇照等，鏡頭下知名藝人包括陳奕迅、陳綺貞、周慧敏、謝安琪等…… 2017年榮獲香港青年設計才俊獎後，去年前往日本東京追隨國寶級攝影師瀧本幹也研修。雖然人不在港，但她的心從沒離開過。早前日本雜誌《HYPER CHEESE》邀請Miss Bean為其創刊號以「黑白」為題進行創作。有請Miss Bean親自為其作品「香港の夏」解說，道出她對黑白的想法，同時宣告︰我回來了﹗
從香港到東京再到香港……
1970年，當時年僅21歲的Annie Leibovitz還是個大學生，她拍攝的第一個封面人物已是剛離開The Beatles的John Lennon。我認識Miss Bean的時候她也是個大學生，當時我工作的雜誌總編邀請她擔任客席攝影師，為那時已成為天后的謝安琪拍攝封面照。這些年來，看著她從豆蔻年華開始積極參與不同範疇的創作工作，是荊棘滿途還是路路暢通？行事低調的她甚少在社交平台暢談心路歷程，但有理由相信，去年獨自前往東京追隨瀧本幹也研修，是她人生中最大的轉捩點之一。
「剛完成為期一年嘅東京研修，而家開始pick up返香港嘅工作，將會香港、東京兩邊走，因為最終選擇加入瀧本幹也寫真事務所，成為旗下攝影師。」一年過去了，滿意嗎？你快樂嗎？「好問題啊……我可以話自己成長咗好多，但說不上十分愉快，其實去日本之前都有啲心理準備，因為知道去一個地方平時去旅行就開心，但去到一個地方住，就會睇到好多平時睇唔到嘅嘢，優點當然有，缺點都有好多。喺日本有過難過嘅時候， 但已經過去。從未試過一個人咁耐，反而會更加專心去聽、去睇、去聞、去sense每樣嘢每個地方。日本係寂寞爆分嘅地方，搞到我都好sensitive，有段時間都出現好多情緒問題。一年前係完全唔敢諗呢一年點過，某程度上可能對係自己無信心，當時只係關心離開一年會唔會太耐呢？香港人太善忘，好驚大家會唔記得我。
好彩，今次返嚟發現大家無忘記我，反而係唔知我為咩過咗去日本。喺度交待一下，2017年嗰陣，我好好彩攞咗Young Talent Design Award，禮物就係有一年機會去海外研修。而我都好好彩apply咗瀧本幹也老師事務所，雖然第一次收到佢回覆嘅時候係拒絕咗我，但我呢啲永不放棄精神就梗係send第二次email俾佢，同埋直接飛過去同佢傾，喺雞同鴨講嘅情況之下，好開心佢最後都俾機會我。因為我畢業後從來都無打過工就喺呢個行業打滾，透過唔同工作係有好多機會成長，但我完全無入過一間有規模嘅公司，所以好慶幸可以跟瀧本幹也老師學習﹐因為佢喺日本已經係國家級嘅創作人，亦好感謝佢邀請我加入佢嘅事務所，簽咗幾年，嘗試雙線發展，希望重拾香港嘅工作同時喺日本都有更多機會發展。」
黑白分明・香港の夏
今年夏天，香港出現了一場前所未見的社會運動。運動剛開始時，身在日本的Miss Bean無時無刻也想著香港。8 月時，日本出版社玄光社計劃於年尾推出全新雜誌《HYPER CHEESE》，邀請Miss Bean為創刊號拍攝以BLACK & WHITE （黑與白）為主題的作品，她想也沒想便答應，隨即拍了一輯香港人看到必有共鳴的「香港の夏」。
「當時真係無慮即決，純粹就係想將香港而家嘅狀態同買到呢本雜誌嘅人講，究竟用我香港人嘅身份可以喺日本講到啲咩？可以令大家關注到呢個地方，係我最想做嘅嘢。睇返我個標題『香港の夏』，呢個夏天帶俾香港人嘅啟示係乜嘢呢？係一種醒覺，大家對於身邊發生嘅事嘅敏感度高咗，會進一步諗我應該要支持啲咩唔支持啲咩，係一連串俾香港人嘅課堂。黑白係分明嘅，諗返當時狀態，好明顯見到社會上係分咗黑白兩批人，當大家以為仲有灰色位可以企，其實灰色唔存在，係二元嘅嘢。影嘅時候係8月出嘅時候係11月， 到而家件事仲未完， 大家可以見到當中變化係光速，所以如果你問我今日會唔會影一樣嘅嘢，我諗唔會。」
你話影呢輯相最主要原因係想話俾日本人知而家香港發生咩事，意思係佢哋無途徑去了解定係唔想去理解？「嘩﹗當你由香港返到東京，會發現係一個平衡空間嚟喎，本身日本人對政治冷感， 對自己國家都係咁，更何況係遠距離嘅香港。其實好多謝瀧本老師俾機會我有機會同大家講香港發生咩事，當時喺事務有兩三位前輩，佢哋都唔係好睇香港新聞，咁講起『721』啦， 有班白衣人出嚟打人，呢個畫面對佢哋嚟講係好震撼，有乜可能嚟自同一地方，點解可以自傷殘殺呢？當時有個前輩提出『咁佢專打黑衣人，你著返白色衫咪得囉﹗』其實佢就要俾呢種恐懼你囉，好似我咁，衣櫃裡面基本上全部都係黑色衫，點解要因為驚俾佢哋打而要改變我本身嘅習慣？去到呢個狀態，黑同白之間已經唔單純係顏色咁簡單，而係變咗一個意識形態，佢就係要你驚﹗」
Miss Bean以「香港の夏」為題，為《HYPER CHEESE》創作了6張照片， 揭示今年夏天的社會運動帶俾香港人嘅啟示，希望就算唔直接講但大家都會聯想到。其實6張相應該分3部分，「同隔離嗰張拼埋一齊睇就會見到黑白關係係對立，黑白係分明嘅。《好𢯊》經《HYPER CHEESE》出版商玄光社授權刊登當中4張照片，照片當中隱藏著香港區旗，從模特兒的化妝及服飾打扮，亦可看出香港已經傷痕累累。餘下兩張相係點？自己買本《HYPER CHEESE》睇睇。
黑白の意識形態＆生活日常
在Miss Bean眼中，黑與白，是二元對立，也是當下的社會現象。黑與白，同樣是她的最愛。「你識咗我咁耐，都知我以前係全身白色㗎啦﹗啱啱大學畢業嗰陣好想追求由頭到腳都係白色，因為當時真係好鍾意白色。但係漸漸地覺得白色好似太耀眼，我作為一個幕後嘅人，想將呢種顏色嘅耀眼留返俾我想表達嘅嘢或人物之上，所以慢慢衣櫃內全部變晒黑色衫。我唔係唔鍾意彩色衫，但好似放喺自己身上好唔妥，唔係最自在嘅狀態，會好想即刻返去換衫。而家打開衣櫃會發現自己好少白色衫，有白恤衫囉﹗」
咁鍾意黑白色，偏偏唔係好覺你影黑白相？「係啊﹗我好少影黑白相，不過愈來愈有興趣想試，因為當你喺黑白世界入面，撇開對於顏色嗰種judgement（判斷），令你會更concentrate（專注）呢張相或者環境氛圍及想表達嘅嘢，會令你更專注去觀察。 黑白喺意識形態上係完全分明，但係喺攝影上就有好多灰色狀態， 如果要再研究呢，其實黑又有啲灰嘅黑色、黑入面又有好多種狀態、黑色又有無咁黑……」
除咗黑白論﹐仲有無嘢想同香港人講？「有啊﹗香港人，呢段時間要記得好好咁生活，因為你要好好愛自己，然後先至有力量去將自己想傳達或想影響嘅嘢、想令呢個地方變得更加好嘅力量可以發揮到出嚟﹗」從香港到東京再到香港…… 從看得到的影像到聽得見的說話，Miss Bean只想香港人加油﹗
Miss Bean現為瀧本幹也寫真事務所旗下攝影師，日本知名攝影師瀧本幹也曾獲得多個獎項，包括東京 ADC 賞、紐約 ADC 金獎等等，更曾憑藉與是枝裕和合作的《海街日記》榮獲日本電影學院獎最佳攝影獎。（左）
剛於上月尾在全日本首發行的全新寫真雜誌《HYPER CHEESE》，一年推出四期，第一期以BLACK & WHITE （黑與白）為主題，請來不同界別的創作單位拍攝以黑白為題的照片，全誌只有相片沒有文字，在日本全國書店及Amazon有售。日圓1,000円＋税 （約港幣 $71） （右）
好𢯊女子︰
Miss Bean羅豆 （攝影師 / 導演）
facebook / Miss Bean
weibo / 羅豆MissBean
instagram / missbeann
website / http://missbeanbean.net/