這是一次頗驚險的訪問經歷。
訪問當日，與今回好𢯊女子主角－創作歌手楊碧琪 (Becky) 完成上半部訪問後準備轉場到下一站取景，豈料落樓即遇上大批防暴警察迎面而來（據說現場有示威者堵路而我看不到），登時怯一怯，只想第一時間將受訪者送離現場確保她的安全。那一刻，望一望Becky，她依然故我的蹦蹦跳、哼著歌，還冷靜地問︰「驚咩啊？」碧琪律動又出現了。
點解會驚？我諗好多香港人都問過呢個問題。Anyway，訪問順利完成。如果你有看過台灣人氣歌唱節目《聲林之王2》，應該對楊碧琪三個字不感陌生。如果你唔知眼前呢位少女係邊位，誠邀你花些許時間細閱本文，因為她擁有一把值得你記住的聲音，也有一段因抑鬱症而變得堅強的經歷，她是來自香港的楊碧琪。
於《聲林之王2》第8集被導師林宥嘉選中合唱〈致姍姍來遲的你〉，令楊碧琪人氣急升。影片點擊率至今已破二百多萬，有興趣可望望︰https://www.youtube.com/watch?v=L-hwm0blFwE（左）
Becky說《聲林之王2》 的舞台讓她把小房間裡的創作被大家聽見，最想感謝導師林宥嘉和蕭敬騰，每次當她待定時都救回她、屢次給她機會。（圖片來源︰Becky Instagram）（右）
從香港到馬來西亞到台北的音樂之路
因為欣賞林宥嘉和蕭敬騰，筆者愛追看由二人擔當導師的台灣音樂節目《聲林之王2》，相信很多人和我一樣，第一次看到參賽者楊碧琪便感印象深刻，其後她與林宥嘉合唱那一集播出後，傳媒的標題是「來自香港的楊碧琪與林宥嘉合唱〈致姍姍來遲的你〉讓人驚艷」。其實在隻身跑到台灣發展之前，Becky早於2017年便到馬來西亞參加《The Voice 決戰好聲》真人選秀節目，更憑極具特色及辨識度高的音色成功晉身八強。沒有得獎又如何？兩次比賽為Becky累積了愈來愈多信心及支持者，令她更有勇氣在音樂之路上積極向前走。
「畢業之後就開始從事網媒嘅工作，嗰陣覺得返工好唔開心，每一日我都問自己『我究竟喺度做咩呢？』好似喺度浪費時間咁，跟住就quit咗份工，咁啱有個朋友想去馬來西亞參加歌唱比實，咁我就陪佢去參加啦，點知好似做戲咁偏偏選中我。」開始留意Becky之後，便有「翻舊帳」的念頭，回看她參加《The Voice》的片段，發現那時Becky主要是以其空靈的歌聲演繹其他歌手的歌曲，直至參加《聲林之王2》時才幾乎每集都以原創歌曲參賽。原來……一切都是迫出來的。
Becky︰「我細個嘅時候係唱聖詩，可能你哋所講嘅空靈唱腔就係咁練返嚟，其實大學嗰陣都參加過學校歌唱比賽，但從來無贏過，因為大家都覺得我唱歌怪怪地，哈哈﹗喺馬來西亞參加完《The Voice》之後，認識咗一堆志同道合嘅音樂朋友，佢哋搞咗個馬來西亞天空音樂節，仲邀請我去表演，因為我無自己嘅歌又無自己嘅團隊，所以嗰一年我就好努力咁寫歌、填詞。我覺得好多嘢都係迫出嚟，因為有deadline所以推咗好多歌出嚟。其實我嘅終極嘅目標係想療癒聽歌嘅人，因為我自己都有情緒病，所以希望啲人聽到我嘅音樂會得到一啲力量，所以就膽粗粗咁參加咗《聲林之王2》。反正遲早都會死㗎啦，聽日可能就死呢﹗ 不如趁未死之前快啲做咗自己想做嘅嘢先，呢個應該係我勇敢背後嘅後助力。」
諗到咩就寫咩，最重要係開心好玩
唔知有無人覺得Becky有啲似縮水加baby fat版陳慧琳？Becky話曾幾何時好多人講過，但謙虛嘅佢話「自愧不如」。咁其實又無得好比，雖然Kelly比佢高，但Becky嘅創作天份肯定比Kelly強，幾乎所有參賽歌曲都係自創談何容易？
「除咗同林宥嘉合唱嗰首，《聲林》全部參賽曲目都係自創㗎﹗對我嚟講，創作加唱歌好玩好多，而且唱自己嘅歌唱錯咗都無人知，哈哈﹗ 其實兩次比賽經歷咗性格嘅轉變，參加《The Voice》嗰陣會好在意人哋期待啲咩，驚有人失望、怕批評，但嚟到《聲林》就真係好完全咁做自己。」國語咁好，有無諗過返內地參加歌唱比賽？原來Becky曾試過報名參加，只是沒有回音，重點係佢認為音樂無界限，去邊參賽都一樣﹗
「開始創作嗰陣，我寫嘅歌係無歌詞㗎、無語言， 全部係啦啦啦咁﹗我覺得音樂唔需要有地域限制，相同頻率嘅人就會connect（連繫）到。我喺《聲林》最後一次比賽嘅時候，陶喆老師有少少和弦潔癖，佢唔鍾意我用嘅和弦，但係我自己就好滿意嗰首歌，我覺得做得音樂創作、做得藝術就唔會care（理會），我純綷想表達自己內心嘅感受，諗到咩就寫咩，最重要係開心好玩﹗」你有無偶像？你同佢connect到嗎？「我好鍾意張國榮，佢係我嘅forever（永恆）偶像，我覺得我同佢嘅頻率有對到，我細個好鍾意睇佢做嘅戲 ，佢都係一個比較真性情嘅人，同埋係一個對人好好嘅人，如果佢在世嘅話，我哋會係好啱頻率嘅人。」
與抑鬱症抗爭－友情、音樂革命
抑鬱症是全球關注的情緒病，早前有報道指全球患者已多達3.2億人，世界衛生組織更預測，到2030年抑鬱症將成為全球「頭號殺手」。香港人生活壓力大，你我他身邊總有一人有情緒病，但不是每個人也能勇敢面對，更遑論將被情緒病折磨的傷痛宣之於口。Becky從不忌諱談及她與抑鬱症抗爭的歲月，多得音樂、多得朋友，現在的她能勇敢做自己，與情緒病抗爭到底。
「我諗抑鬱症應該呢一世都會跟住我㗎喇，應該無一個康復嘅點，只不過係睇吓當時你嘅情緒會唔會真係跌到落谷底，或者你起唔起得返身。可能係遺傳，或者我一出世就有抑鬱嘅底子。喺香港，讀書壓力好大嘛，六七歲嘅時候我已經成日都話要自殺、要跳樓，其實我唔知咩叫死， 所以好細個開始就要去睇心理醫生。但係我覺得睇醫生都無補於事，完全解決唔到問題， 所以我細個就學識醫生想要啲咩答案我就會俾啲咩答案佢，好想快啲解脫。」
有無試過俾個病迫到透唔到氣、甚至有想過放棄？Becky︰「其實我係喺英國讀大學嘅，嗰陣嘅情緒病最犀利， 就嚟完成大學嘅時候開始對人生好無感，覺得生命好無意義，每一日都係為咗活著而活著， 搵唔到人生嘅意義，價值觀令到你對人生失去希望。 我成日諗究竟係咪真係為咗賺錢而要投入呢個現實社會呢 ？種種問題迫到我落谷底。不過好開心，因為遇到一班可以理解我嘅朋友，朋友嘅支持同埋聆聽好有療癒作用，因為當一個人有抑鬱症 ，會好唔信任身邊嘅所有人，覺得自己好卑微，講啲咩都唔會有人想聽，但係當一班無論你講咩都會照單全收嘅朋友喺身邊支持你，感覺就會好好多，所以朋友真係好重要。 呢個係我人生中一個好大嘅經歷，如果我講出嚟可以引起其他人嘅共嗚嘅話，佢哋會有一種被理解嘅感受，咁可能都會幫到佢哋。其實音樂真係可以療癒到自己，我都希望我嘅音樂可以療癒人心，依家算係開心，因為我完全可以做到自己，真㗎﹗過咗《聲林》之後我就好勇敢咁做自己、show自己性格出嚟，都無咩其他顧慮，所以情緒比較好。 」
地獄廚神創作的朱古力辣椒雞脾
Becky自言家有一弟︰「佢一定覺得我係一個黐線嘅家姐。」如果楊弟弟真的認為姐姐很黐線，我想不是因為她的情緒病，而是因為她是個愛惡搞的「地獄廚神」。「除咗音樂之外，我鍾意煮嘢食啊，但係都好暗黑㗎﹗嘻嘻﹗同埋鍾意畫畫啦、鍾意瞓覺啦， 都係鍾意喺屋企廢㗎咋﹗我會諗埋晒啲好奇怪嘅組合跟住試吓整， 例如朱古力辣椒雞脾啊、朱古力意粉啊之類，哈哈哈， 都比較創新，之後就會迫屋企人食，我自己都試下咁囉﹗其實係求其見到屋企雪櫃有啲咩就攞出黎crossover。我幾享受破壞廚房嘅過程，係清雪櫃先啱﹗所以我一煮飯呢我細佬就話『我今晚唔返嚟食﹗』 哈哈哈哈哈哈哈哈﹗」
原來唔止音樂，Becky對下廚嘅創作力量同幻想都會嚇你一跳。好彩，佢唔止鍾意煮，都好鍾意食︰「除咗煮嘢食，我都會同朋友周圍去探索吓呢個城市有咩得意嘅地方，同朋友飲吓嘢呀﹗喺香港就通常都會約去甜品舖食吓糖水咁囉，最鍾意食楊枝金露、芝麻糊，椰香芋奶啊嗰啲。」
嚟緊Becky將會台灣、香港兩邊走，積極地在台灣發展音樂事業，會唔會為自己定下目標呢？「終極目標都係入圍金曲獎……但係一定要整一張專輯先可以入圍，咁對於我嚟講，我咁懶，可能需要多啲時間。」又話好多嘢係迫出嚟？「慢慢實行緊㗎喇﹗一步一步行囉，唔想俾自己太大壓力。」Becky笑言。是的，不要把自己迫得太緊。臨別時Becky向我道謝並給我一個擁抱 （對不起哦﹗當時的我趕頭趕命汗流浹背～），不用客氣，其實我想多謝佢就真，感謝所有努力創作的人，有時歌曲就像一個擁抱，令人感到溫暖、療癒，甚至有警剔的作用。喜歡Becky與另一參賽者吳霏共同創作的〈偽裝〉，旋律平靜歌詞卻發人深省，謝謝你們提醒大家不要成為自己討厭的人，我會記住。
好𢯊女子
楊碧琪Becky （創作歌手）
Facebook / 楊碧琪 Becky Yeung
Instagram / beckykibecky
Weibo / 楊碧琪Becky Yeung