香港反修例運動由開始至今將近九個月，社會撕裂從未停止，滿以為疫情下的氣氛會給稍稍紓緩，但標誌著抗爭者決心的傘陣於上個週末又再出現。室外打得頭崩額裂，室內亦不見得可以安安樂樂，無數家庭因為成員間的政見立場出現分歧，導致彼此不和，甚至敵對的情況出現，有人吵鬧終日，有人有家歸不得，總之家家有本難念的經。
年輕女作家陳煩，修畢浸大傳理學院中文新聞系之後，沒有理所當然的走去當記者，反而選擇閉門造車成為網絡作家，自此以文字創作為職業。陳煩從高登成名，由《我投胎前冇飲到孟婆湯》到《情敵勸退師》，其足跡踏遍網絡、紙本書籍及話劇舞臺，年多前開始於網絡小說平台發表輕鬆幽默的《全家覆》，然而在搞笑背後，陳煩一家似乎未能如故事中的角色那樣，面對代溝仍能談笑風生……。
唔想重覆爭吵，情願搬出去
陳煩曾於自己的 Facebook 專頁提及其家人，表達對「深藍」父親的失望之情，大家雖不至於反目，但就算是同檯吃飯也食不下嚥。事隔數月，這段關係又有否改變？「因為我覺得同父母有太多磨擦，而每次爭吵完又會內疚，亦開始代入佢哋嘅角度諗點解會咁擔憂，我都唔想不斷重覆爭吵，想繼續同佢哋維持一個良好嘅關係，所以情願自己搬出去，住遠啲關係可能會好返啲。」
為了減少磨擦，陳煩決定暫別這個教導她做人要正直善良的地方：「我都係揾到地方先同佢哋講，但我冇講過搬出去係特別為咗唔想再鬧交，只係用好多唔同嘅藉口，例如話我都咁大個、想有多啲空間創作呀咁，我唔知佢哋內心其實知唔知個主因係乜，但大家都再冇討論，咁我就搬出去。」要霎時間決定離開自小長大的地方，談何容易？「喺政治方面，大家嘅觀點與角度不能融合，於是而家我哋所採取嘅策略係，大家唔去觸碰嗰一部分嘅大家。」
衝突來自不理解、擔心、怯懦與盲從
據陳煩所述，就如很多家庭一樣，作為一家之主，陳爸爸的學歷不高，屬於勞動階層：「所以我覺得，佢後生嘅時候好辛苦咁捱到有層樓、有個家，叫做有個穩定嘅生活，嚟到呢個年紀，好驚有任何令佢哋控制唔到、唔了解嘅嘢會動搖咗佢哋咁辛苦得返嚟嘅嘢，會喺不求甚解嘅情況下反對任何改變。」
陳煩與家人發生衝突的原因，又是否只源於父母對社會狀況的不理解？「有一次媽咪同我傾咗好耐，佢話佢好驚，因為佢返工嗰度，對面嗰間舖就係美心，佢見住成班黑衣人拎住啲鐵通、鐵鎚打爆啲玻璃，佢話佢喺舖頭度驚到成個人震晒，咁我又明，一個女人，佢自己一個喺舖頭見到依個場面，佢又唔了解係咩事，咁佢就覺得嗰班人真係暴徒。」以為經過解釋，結果就會變得不一樣，但事實卻非如此：「我有再解釋返俾媽咪聽，係因為咁咁咁，所以導致有咁嘅結果，班示威者唔係盲目咁破壞…… 我問佢，咁點解班示威者冇去搞你哋間舖頭？嗰一刻佢沉默咗，但其實都動搖唔到佢，佢仍然覺得嗰班人係咁樣，所以我覺得佢哋嘅恐懼係嚟自對事情嘅唔了解，而佢哋亦都唔想去了解。」
不願意面對真相，他們同時亦擺脫不了傳統倫理關係的枷鎖：「好多時撕裂係嚟自大家對事情嘅排位唔一樣，譬如有日我同阿爸鬧完交走咗去，咁之後媽咪就會在意點解我會咁同阿爸講嘢，但我在意嘅反而係點解我哋有呢個爭執，佢哋永遠唔會去了解件事係乜，只會覺得做女嘅就唔應該頂撞父母。」
陳煩有位比她年輕十幾歲、感情要好的弟弟，今年就讀中六：「我冇同細佬特別講太多嘢，只係同佢講如果真係要出去就嗌埋我，但佢都唔係會去得好前，只係喺學校拉下人鏈，所以我都放心，但有時都會問佢對呢件事有咩睇法，佢話啲阿 sir 都會偷偷地喺課室講下，咁我大概知道佢行緊條方向正確嘅路，又冇去到太前去衝嘅話……」她停頓了一會，吸了口氣：「好彩我唔使面對呢樣嘢，喺某程度上我係明我媽咪點諗，即係如果只係自己就好冇所謂㗎嘛，我唔係話我可以去死，但如果真係拉咗我嘅話，咁 ok 囉認命囉，而我相信我唔會因為有案底而冇人再揾我做嘢，但去到身邊一個你好 care、比較弱小嘅角色嘅時候，你就會為佢諗好多好多嘢，好擔心佢嘅安危，所以我有時明白屋企人點諗，但同時佢哋又唔係純粹擔心，亦都有怯懦同盲目服從夾雜咗喺入面。」
再次珍惜相處時光
搬離老家的幾個月，陳煩又有甚麼新的感受？「好神奇地同佢哋嘅關係好咗，而家通常都係每星期逢禮拜六或日返去一次，大家都好似好珍惜嗰幾個鐘嘅見面時間，即係知你返嚟就會煮好多餸。以前我都算係最典型嗰啲衰女，一返到屋企就走入房，而家就變咗就算我幾唔樂意都好，我都會坐喺梳化陪佢哋睇一陣 TVB。」更意外的，是陳爸爸在細節上對女兒的尊重：「有時阿爸會喺我返嚟之前特登將個電視轉咗去 NowTV，平時一定唔會咁，佢做咗呢個好微細同窩心嘅讓步，令我覺得大家嘅關係好咗。」
關於搬屋，陳煩還有另一個小故事：「我隻貓叫麻瓜，開頭嗰陣阿爸係唔俾我養嘅，我就話我只係喺房養，唔會俾佢走出嚟，但養咗一陣之後，麻瓜就已經好快咁俘虜咗佢哋…… 」訪問期間，陳煩雖然戴著口罩，但說到這裡，通紅的雙眼像在告訴我們她有多難過：「阿爸每朝天未光就要返工，據媽咪所講，佢每日出門口之前都會抱下麻瓜，我聽到之後就覺得好難受。」原來在陳煩決定搬家的時候，陳爸爸曾經要求她把麻瓜留下：「佢已經同個女嘅關係唔係咁好，個女要搬走，跟住佢又咁錫隻貓，但個女又要帶埋隻貓走喎…… 個心會好唔舒服，但係你要我擺低麻瓜呢，又唔得喎，因為佢哋並唔真係識得照顧麻瓜，即係如果麻瓜有病唔舒服呀咁，佢哋未必會知，但可能呢個只係我嘅藉口，我要說服我自己帶麻瓜走。」
有家人支持的孩子最幸福 (任性)
回想當初，在反修例運動之前，他們一家又是怎樣相處？「我啱啱大學畢業嗰陣，唔想咁快出嚟做嘢，想花多啲時間集中寫故事…… 對於正常人嚟講，一畢業又唔揾嘢做，自己匿埋喺屋企寫嘢係好古怪㗎嘛，但我父母係完全冇催逼我，佢哋話你想休息咪休息下囉，我屋企並唔係富裕，只係好普通好普通嘅家庭，所以我覺得屋企人係好支持我去創作，而呢樣嘢並唔係人人都有。」父母會閱讀你的作品嗎？「佢哋知道我係『陳煩』，但有冇真係逐隻字逐隻字睇就唔知，我亦都唔好意思去問佢哋，但每次我出書嘅時候，阿媽都會去書店買幾本，只係擺喺度咋喎，都唔知買嚟做乜。」
對於每個創作人來說，得到家人的支持並非必然的事，在沒有家庭壓力之下，陳煩又是如何投身作家行列？「初時上網寫嘢，好好彩嗰陣反應唔錯，咁就有啲出版社 PM 我，咁其中一間就係『白卷』啦，傾完之後覺得各樣都 OK，咁就同老闆林日曦見面，過程當中佢哋知道我啱啱畢業未揾嘢做，咁林日曦就話『白卷』而家爭個編輯，問我有冇興趣，係非常之咁 casual 嘅，咁我就話好吖然後就加入咗佢哋，負責文字創作同編輯校對嘅工作。」
在「白卷」待了兩年，雖然非常開心，但陳煩畢竟年輕，還是想試試其他工作環境：「離開咗『白卷』之後，去咗某傳統出版社做，發覺真係好唔啱，因為『白卷』同傳統出版社係完全兩回事…… 真係覺得太悶嘞，佢哋係嗰種打卡制度啦，office 靜啦，係好傳統好專業嗰種，做咗好短時間就覺得唔適合，又適逢當時『tbc…』揾我，所以就去咗 『tbc…』。」
從高登到歌劇院
工作環境轉變了，相比於當日可以自主地在高登寫作，現在的創作空間可有給收窄了？「佢哋唔會話指定呢個題目要我寫，而係話我知佢哋想我寫個長嘅故事，係長期連載嘅，咁就寫咗《全家覆》，都維持咗年幾兩年，跟住佢哋話需要個愛情故事，十𡃁廿集當一個 package 咁推出，咁我就寫咗《情敵勸退師》。通常都係佢哋有一個好細嘅要求，但其實係好自由嘅，我可以有一個好大嘅創作空間，然後就自己去加工去變成一個咁樣嘅東西囉，佢哋唔會實質控制我寫啲咩。」
言談之間，知道陳煩並非身處一個非常熱情、勇於溝通的家庭，對於創作輕鬆搞笑的《全家覆》難度會很高嗎？「我以前唔識寫呢類搞笑嘢，成日都係寫啲認真嘢，而我本身係鍾意睇傳統嘅文學小說，所以由一種我睇開嘅書變到網絡上嘅小說，其實我都係學習咗其他人先寫到，然後由網上小說再到寫搞笑嘅嘢，都係一種新嘅嘗試，所以係咪好難呢？又唔係，畢竟我唔係寫咗啲咩傑作出嚟，但係都要諗過度過。」有從現實中取得靈感嗎？「冇㗎，咁《全家覆》係一個好溫罄好幽默嘅屋企嚟㗎嘛，而啱啱你聽到我屋企其實唔係咁，只係觀察到其他人，聽其他人嘅屋企係點樣，譬如第一集講有位朋友喺佢媽咪過咗身之後先發現佢有 Facebook，呢個係真嘅，但其餘九成都係創作出嚟。」
從網絡轉戰到劇場，《情敵勸退師》被搬上話劇舞臺，由蔡卓妍和卓韻芝主演：「因為『tbc…』本身除咗係一隻 app 之外，佢哋最想 achieve 到嘅一樣嘢就係賣劇本。我只係負責寫個故仔，咁個版權就係由佢哋幫我揾其他人合作，其實我都唔知點解最後會揀咗《情敵勸退師》，可能愛情嘅題材始終唔會過時，然後又可能故事中嘅職業又比較戲劇性啲啦，大家又唔係咁熟識，再加上少少運氣，最後就可以賣到出去。」
回看陳煩的創作路，除了本身有足夠的實力外，她亦往往能在適當的時刻作出正確的決定，並曾經兩度遇上伯樂 – 「白卷」的林日曦與「tbc…」的林若寧，這令本非池中物的她，走起路來都比別人順暢。即如陳煩所述，林日曦和林若寧就好比自己的兩位哥哥，適時教導適時幫忙，多年來對她照顧有加，給她信心繼續向前進發，而當然，如果沒有當初家人的支持，陳煩的際遇也許會很不一樣。
以為作家只愛看滿佈文字的書？訪問當天，陳煩隨身帶著的是《進擊的巨人》漫畫，所以話呢個世界好多嘢估佢唔到。