英國著名作家狄更斯於遲暮之年發表被視為其代表作之一的《雙城記》，小說揭露了法國大革命時期的社會矛盾，既抨擊上層社會的黑暗殘暴，同時揭示下層人民的苦難。更指出人民的忍耐有限度，在暴致之下必奮起反抗。這種無畏無懼的批判不止贏得時代和社會的尊重，更撼動著歌手方皓玟（Charmaine Fong ）的心。
「這是最好的時代，也是最壞的時代，係來自狄更斯嘅名句，我覺得同宜家嘅香港好似，所以就攞咗書中其中一句出嚟做演唱會主題－The Spring of Hope。」方皓玟說。去年年尾一首由Charmaine包辦曲詞唱的 〈人話〉，憑藉緊貼社會題材而贏盡掌聲，更為她帶來「叱咤我最喜愛的歌曲」及「女歌手」兩個大獎。得獎後Charmaine隨即在網上發文道謝，並指「 我希望2020年香港人平安快樂，我可以繼續無畏無懼咁唱自己寫自己鍾意嘅歌」…… 兩個多月過去，香港人似乎不平安也不快樂，Charmaine又如何？月前宣佈將於四月舉行首個紅館個唱，卻因疫情持續而未知能否如期舉行。今回請來永遠正能量附體嘅方皓玟講吓自己、講吓屋企，講吓點解佢覺得香港仲好有希望。
最好的時代 x 最壞的時代
前陣子洗腦歌〈野狼Disco〉當中有兩句同成首歌非常唔夾嘅歌詞「這是最好的時代 這是最壞的時代」。其實呢兩句係出自英國大文豪狄更斯經典作《雙城記》當中的名句，對於同狄更斯一樣咁敢言嘅方皓玟嚟講，更加係刻骨銘心的金句。
「演唱會主題叫The Spring of Hope，其實係嚟自英國作家狄更斯嘅名句『It was the best of times, It was the worst of times. 』即係最好嘅時代同最差嘅時代都係宜家，我覺得同今時今日嘅香港好似。呢個以法國大革命做背景嘅長篇小說，故事入面提到好多情景同埋感受，都同我睇到而家嘅香港好似，好多年輕人為咗爭取自己所愛嘅嘢而去作出一啲自我犧牲，令我想起書中幾句『It was the Spring of Hope , It was the winter of despair. 』希望大家喺黑暗裡面都常懷希望向前行。」
對很多歌手來說，能夠在紅館開個唱總是別具意義，而且是一種肯定。於Charmaine而言，她也認同在在紅館開個唱是工作上的里程碑，重點是由入紙申請到成功獲批也等待了一年多，所以她近月一直都在積極準備，她期待地說︰「紅館地方比較大，，希望所有曾經被我嘅歌感動過嘅朋友，一齊嚟見證呢個第一次。」我就最想全場合唱dirty version〈人話〉﹗Charmaine嘆道︰「哎呀﹗我喺紅館台上唔唱得dirty version㗎﹗你哋就得﹗」不過新冠肺炎疫情嚴峻難測，到底個唱能否如期舉行仍是未知數。「隨時都有心理準備會取消，始終大家安全係第一 ﹗」呢一刻，唯有全城集氣，希望疫情受控，個唱如期舉行﹗
創作自由非必然，憑咩去放棄？
除了積極準備演唱會， 最近Charmaine亦忙著寫歌。「我會喺演唱會前出一隻碟，碟名叫 A Tale of Charmaine Fong，因為之前推出嘅歌如〈願〉、〈望〉、〈人話〉等，其實都未出碟。而家都仲寫緊，〈人話〉之後我都仲消化緊自己嘅生活。」 講起創作，記得早前她曾公開表示︰「我希望2020年可以繼續無畏無懼咁唱自己寫自己鍾意嘅歌」，咁到底今時今日嘅 Charmaine是否仍能無畏無懼咁創作？
「心理上一路都係無畏無懼，只係現實上創作空間似乎比以前細咗，以前自己一個人未有家庭，好多時都可以隨時諗隨時寫，而家屋企多咗個小人仔，好多嘢都要跟佢節奏。我好慶幸自己生活喺一個能夠自由創作嘅年代，因為創作嘅自由唔係必然，我好 appreciate自己能夠有咁樣嘅空間。」呢個年代，網上 haters 何其多，愈敢言愈容易被人惡意攻擊。點知 Charmaine遇強愈強，愈戰愈勇。「我唔會嬲，但會睇 吓啲人寫咩﹐為咗理解佢哋諗咩，點解大家喺同一時代、同一地方度住， 會好似平行時空咁夾唔到，但佢哋唔會影響到我嘅諗法。創作心係唔會停止，忍唔到㗎﹗如果有啲事令我好有感受都就會照寫落去，因為我覺得呢個係創作嘅責任，如果做音樂無一份責任感喺度， 唔係好誠懇咁去表達自己，又點可能同其他人心靈貫通？呢個係創作自由最可貴嘅地方，我憑咩去放棄呢件事？去到宜家呢個社會關口，我嘅初心係一致，誠實對待自己同埋對自己嘅音樂負責。」
從工作夥伴變成「家」人，對的人會聚在一起
本季度好𢯊主題為「家」，筆者很自然地聯想到方皓玟，無論工作、個人或是社會層面，都有志同道合的「家」人與她齊上齊落。Charmaine曾公開表示「自己一個人嘅能力有限，好開心有二五同埋許創基無限量嘅支持，呢十年我哋嘅關係基本上已經好似一家人咁。」能夠從工作夥伴變成「家」人，談何容易？
「好慶幸自己可以同佢哋好似一家人咁相處，能夠由同事變成一家人，可能係因為時間，因為都合作咗十年以上，大家已經好了解對方，亦都一齊經歷好多高低。我覺得家人同一般朋友唔同嘅地方，就係永遠同你齊上齊落 ，無論喺咩狀況底下都無限量咁支持你。同埋我成日都鍾意寫埋啲古靈精怪嘢，佢哋都會無限量咁support我，所以我好感謝佢哋。」即係好感情到十年來都係和睦共處、無乜拗撬？「成日都拗㗎﹗因為我哋負責不同崗位，二五負責graphic 、Jeffery睇住音樂部，我哋嘅價值觀未必一樣，但咁樣就得出咗一個最好嘅方皓玟 balance。每當遇到意見分歧，我哋就會投票，小數服從多數去決定﹗屋企人就係咁 ，拗完之後就無嘢。」
一「家」三口新生活， 一個夠晒數﹗
在香港，媽媽們最愛上載BB照呃 like﹐向來低調嘅 Charmaine自前年誕下「小人仔」後，由獨身時代女性搖身一變為潮媽，似乎更少在社交平台露面。家逢巨變，Charmaine點睇一「家」三口新生活？
「人大咗會覺得家係一個好有愛嘅地方，好溫暖，即係放咗工之後對住屋企人 ，任何煩惱都會消失。我覺得自從家庭有咗小朋友之後，成個生活重心係改變咗﹐要跟住個小人仔嘅日常生活作息。」當初知道方皓玟陀B其實都幾意外，感覺上一個我行我素、無畏無懼嘅新時代女性未必想受束縛，唔講唔知，原來生小朋友不是佢預期 ……「呢個係意外嚟嘅，我真係估唔到﹗但係又覺得差唔多時間都可以嘅 why not 一試？但係試過呢次之後發現原來做媽咪係好唔簡單㗎喎，所以一個就夠喇﹗有咗小朋友之後學識咗好多嘢，佢哋嗰種純粹、好簡單嘅快樂，帶佢去公園執塊樹葉都好開心嘅，原來其實我哋做咗大人之後，好多嘢會遺忘咗﹗」
自從結婚生子，Charmaine似乎比以前更不活躍於社交平台，係咪唔想家人曝光？「真係無時間啊﹗ 同埋我成日諗小人仔大個咗會唔會唔鍾意呢？加上我湊住小朋友嗰陣真係好少影相，不過久唔久都會想同大家打招呼，所以都係隨心啦﹗」咁老公呢？好似都好少見你提起佢，Charmaine笑說︰「好多人問我同日本人結婚會唔會有文化差異﹐其實除咗文化 ，性格嘅不同更重要，人同人之間要相處有好多嘢要磨合，我哋兩公婆都要互相去磨合同適應。慶幸我哋屋企人全部都好簡單，同埋對於小朋友教法都幾一致，係一個幾簡單、開心嘅家庭。」
香港是我「家」，團結起嚟無咩好怕﹗
今時今日，香港社會無奇不有，人話比童話更罕見，難得香港仲有有一位本土歌手在極敏感時勢仍願意勇敢發聲，一首 〈人話〉引來全城熱播，「 what x you say」、「講 X 夠未」等句勝在夠晒地道，大眾狂讚歌詞到肉。訪問當日，Charmaine 直言自己係一個好「地」嘅香港人，因為夠貼地，才能創作出真切反映香港民情嘅作品。
「香港係我嘅家 ，無論去邊度旅行，個心都會掛住香港呢個家。過去大半年香港經歷咗好多事，客觀上有啲唔開心，但實質上係開心。因為就係咁動盪嘅時間，有啲黑暗 先會睇到人性嘅光輝。真係未見過香港人係咁，無論係投票狀況、或者係平時遊行人數、 甚至乎網上對事件嘅分析、大家嘅關心度，都係前所未有咁高。每個人如果可以企喺自己崗位、做好自己本份、團結起嚟，其實無乜嘢係值得可怕。香港有咁嘅力量，令我覺得好值得驕傲，所以我真係覺得香港仲有希望。」
過去大半年香港社會動盪，令好多香港人再熱烈討論移民這課題，Charmaine與日本人結婚，會唔會當日本係另一家，甚至萌生移居日本的念頭？「從來無呢個諗法﹗ 一來我老公唔係生於好傳統嘅家庭，佢屋企都好國際化，而且佢都好鍾意香港。我諗我真係好好彩，全家都清一色同一想法，對政治並無意見分歧、我嘅朋友都一樣，我諗可能係物以類聚﹗無論我嘅家人、朋友都好熱愛香港，所以當香港需要我哋大家一齊去支援嘅時候，我更需要留喺呢個地方，用我嘅音樂去帶俾大家一啲能量。」
訪問來到尾聲，Charmaine想同香港人講︰「假使世界原來不像你預期， 仍懷著一顆謙卑去面對不安的天氣，希望大家無論面對乜嘢逆境都好，努力做好自己﹐抱住希望去面對將來。」聽到我眼濕濕……香港，勝在有方皓玟。
好𢯊女子
方皓玟 Charmaine Fong （唱作歌手）
Facebook / charmainefongfanpage
Instagram / charmainefong
Weibo / 方皓玟