香港話大唔大話細唔細，但假如你家住「大西北」，要出市中心返工，車程隨時耐過飛轉台灣。我哋大家在獅子山下嘅居所通常話大唔大，話細就真係可以好細，所以好多時當一家幾口共處窩居，想要私人空間真係唔容易。加上家家有本難唸的經，有時即使係同你生活咗多年嘅家人，都一樣會令你覺得相見好同住難。
基於以上種種原因，都足以令人把心一橫決定離家自立，尋找最適合自己的居所與生活方式。奈何在物價高企的社會，莫說要置業，即使是租屋亦未必人人負擔得起。折衷的辦法，就是找個合得來又可靠的室友，分擔租金壓力。今回好𢯊找來兩組共居女子，說說她們在香港合租單位最真實的生活細節，無論是最麻甩、最懶惰，或是最有情有義的一面亦坦白公開。在此感謝受訪者們不計較個人形象的無私分享，祝你們的共居生活繼續幸福快樂。
Leanne（左）與Sam（右）。
「點解夾租？因為窮呀！」
同大部人一樣，任職活動統籌的Leanne與咖啡師Sam最初想搬離屋企的理由，離不開與父母經常拗撬，以及想擁有不受騷擾的個人空間。不過，多數人搵室友都會先從熟悉的朋友堆中開始物色，而Leanne與Sam在同居之前雖然互相認識，卻算不上稔熟，最終能夠成為室友，原來多得Leanne姐姐。Leanne說：「以前我同家姐同佢男朋友夾租一個單位，因為Sam係我家姐同事，我間中會去搵我家姐所以就識咗Sam。後來租約期滿，我就搬返原本青衣屋企同爹哋媽咪住，家姐同佢男朋友就變咗同Sam夾租，喺太子住。」後來大家因為不同原因各散東西，而Sam身邊熟悉的朋友大多都年紀較輕，未有經濟能力負擔租金，所以要重新找室友時，自然就想起同樣有共居經驗的Leanne。
二人合租的單位附設露台，但因為與旁邊單位距離較近，私隱度不足，所以二人平日除了洗晾衣服都好少踏足露台。
訪問之前，筆者只知道二人合租的單位在元朗區，當問及要如何前往時，得到的答案是先搭西鐵，再轉輕鐵，後轉小巴，由市中心出發大概需時個半至兩小時才會到達……地點頗為偏遠。對於通常在家工作，偶然才需外出開會或辦活動的Leanne來說，交通問題相對不大。但對於在旺角工作的Sam來說，雖然工時不算長，平時亦不至於需要披星戴月地工作，不過每日要花三至四小時來回公司與住處，真係諗吓都覺得攰。咁最初二人點解要長途拔涉搬入「深山」？她們異口同聲地說：「因為窮呀！」Ok，解釋晒。Sam續說：「最初因為大家都想住村屋，所以就諗住一齊夾租，不過我哋budget約$10,000，其實都唔係有太多選擇，最後用大約$11,000租咗呢度。」
理念相近，由零開始共組舒適家居
走入她們約700呎的居所，地方尚算寬敞，傢俱卻不多。原來二人對家居的佈置早有共識，「因為預咗間屋都係短租，所以買傢俬嘅時候都務求可以用最低成本達到最高效益。而且一開始搬嘅時候大家都好倉促，又唔係真係好有錢，所以我哋全屋傢俬有啲係以前同Leanne家姐住嘅時候留落嚟，有啲就淘寶，或者喺Carousell買嘅二手貨，總之以盡量以慳錢為大前提。」Sam說，「呢度個廳比出面啲屋大，應該放到啲大傢俬，但我哋驚之後搬返出市區就冇可能租到咁大間屋，所以都唔敢買太多傢俬，買都係揀細件啲嘅，方便之後搬屋仍啱用。」
二人的房間風格明顯好大分別，Leanne的房間相對較簡約而且帶點少女風，她說：「我最鍾意係呢隻家姐送嘅豬仔，係佢以前喺加拿大買嘅，佢話覺得好似我，所以我無論搬去邊都一路帶住佢。」
Sam：「我間房係將唔同風格嘅嘢mix埋一齊，有好多poster及post card，仲有朋友喺雲南帶返黎嘅編織品，同埋我鍾意嘅姆明同小王子，喺日本買嘅Monet音樂盒，我得閒就開嚟聽吓，感覺好平靜。」
安頓好家居基本設備，再來要共同面對的就是家務問題，唔知兩位平時點分工呢？Leanne說：「我哋完全冇分工，通常係邊個得閒就邊個清潔，都冇定話幾耐清一次。可能有時邊個有朋友上嚟邊個就會清潔。有時係我喺屋企好悶，或者終於頂唔順廁所好污糟，就會大洗一次。同埋會自覺屋企住多咗個人，有時用完啲碗碟之後，雖然真係好攰，但都迫自己要洗，盡量唔好麻煩到roommate。」就咁聽落，二人都好似相當自律亦好有默契，更從未因為任何個人習慣或家事問題而有爭拗，難怪Leanne對於她們完全不需要磨合期的共居生活表示好surprised。
Leanne最近成為了貓奴，領養了小貓「冧冧」，雖然平日亦非常自覺打理主子的起居飲食，但也試過因為大頭蝦性格而忘了餵食，需要Sam幫忙照顧。
大家都係carefree女仔，最鍾意喺廁所傾偈
她們至今已經共居了約大半年，雖然在作息、飲食與個人習慣方面都各有不同，不過二人依然相處愉快，非常享受這個比本身住家更有歸屬感的新居，以及與室友互動的時光。Sam說：「平時我返工都要早出門，而Leanne又未瞓醒，所以朝早比較少見到對方。當我放工返到屋企都十點幾十一點，佢通常又未會咁早瞓，會坐喺廳睇電視，大家就一齊傾吓偈，講吓今日發生啲咩事。」因為工作時間不同，她們每日碰面的時刻大概只有睡前的幾小時，所以平日的飲食大多是各顧各。Leanne說：「如果嗰日要外出，又冇約人食飯，我多數會買外賣返嚟食。」不過自稱「師奶」的Sam就比較喜歡自煮，她說：「返工嘅時候通常會喺工作嘅餐廳食埋飯先走，放假就鍾意喺屋企煮。我仲會拖架『戰車』（購物車）出街買餸㗎！但其實Leanne都識煮飯，所以有時想煮都會問對方返唔返嚟食，返就煮多啲，或者煲個湯大家一齊飲。甚至有試過大家都得閒嘅時候就一齊出去買餸，返嚟一齊煮。」
兩位滔滔不絕介紹生活點滴，甚至被對方踢爆平日最「烏wear」一面都毫不介意，偶爾粗口橫飛，感覺就好似認識多年的好友一樣咁自然。Sam解釋說：「我諗係因為大家都好隨和、好多嘢都冇乜所謂，唔係口是心非嘅人。」Leanne亦同意，並表示：「我哋都係口直心快嘅，有嗰句講嗰句，所以如果對方冇出聲，就知真係冇所謂，咁就唔會理佢。」聽兩位講大家有幾冇所謂就聽得多，咁有冇實質例子？Leanne說：「我哋最鍾意喺廁所傾偈，因為大家都習慣去廁所、沖涼都唔關門，（Sam :咁樣冇咁焗促，方便啲嘛﹗）有時Sam坐喺梳化睇電視，即使我準備沖涼，已經除晒衫，但突然諗到啲咩都會就咁衝出去同佢講。雖然一開始佢都有覺得呢條女做乜怪怪的，但後來佢都好習慣我唔著衫喺屋企周圍走，而且佢都會係咁 。可能大家都覺得呢度係自己嘅空間，所以就會比較carefree。」
平日Leanne（左）如果想搵Sam（右）傾偈，除咗會走入佢房之外，更會自動自覺坐埋上床，完全唔使客氣。
講到「無所謂」的另一例子，相信是她們都不介意對方使用自己的個人物品，完全體現無私精神。Sam說：「大家因為膚質、習慣唔同，所以清潔用品、護膚品都已經有各自一套，但有時新買嘅product例如面膜都會問吓對方試唔試吓，或者Leanne喺屋企整gel甲時又會預埋我。」相對較注重打扮的Leanne，亦樂於與室友分享她的扮靚工具，她說：「剛開始一齊住嘅時候我已經同佢講『呢支Dyson捲髮器正喎，你要用你自己入嚟我房用啦』。總之邊啲可以share用嘅就一早講明，咁以後就唔使次次都問，好似好見外。」可見兩位都是爽快的女子，不拘小節的性格果然易相處。
雙子座vs處女座，一動一靜出奇地合拍！
見兩位女生咁合拍，筆者好奇一問二人的星座。感覺較外向、自由奔放的Leanne無疑是雙子座，而Sam則是屬於出名挑剔麻煩的處女座，咁都夾到，Leanne都覺得好神奇。「因為我阿媽都係好typical嘅處女座，甚至係有潔癖，以前喺屋企啲嘢亂少少都驚俾佢鬧死，所以我都驚阿Sam會係咁。點知住落佢又冇乜點理我，又會忍受到我啲嘢亂，所以我覺得好舒服，完全係零壓力。」對此，Sam亦大方承認自己都唔算非常整潔，她說：「我對啲小事係有啲執著嘅，例如廳嘅枱盡量都唔可以亂，但我間房有時都會有啲亂，好似啲衫會就咁堆喺床，應該同普遍女仔一樣，要好得閒先會的起心肝執拾。又或者有時大家貪方便都會就咁放啲袋喺梳化，又未係太阻住對方就無所謂啦，搵到位坐咪算囉。」
女仔之家，個雪櫃都幾……豐富。據Sam所說，因為最近太忙冇時間煮食，所以食材都堆滿了雪櫃。（左） 除了二人的睡房，還有一共用的衣帽間，左邊的衣櫃屬於Leanne，右邊則屬於Sam，望落似乎都未算太混亂咋喎﹗（右）
作為一個破壞（或增進）室友感情的訪問，當然要請兩位坦白講吓真心話。先苦後甜，先請Leanne與Sam說說共居期間，最頂唔順室友的事？Leanne先說：「其實真係冇乜，唯獨是有樣嘢到宜家都未習慣到，就係有時佢放工返嚟真係好攰，個樣又好cool，我就會心諗：同唔同佢打招呼好呢？不過諗諗吓都係會同佢say個hi，如果佢真係心情唔好都冇所謂，到佢想講嗰時我咪聽下囉。」而Sam在意的，則較多是家務的問題，她說：「有時佢會比較冇記性，有啲家務好似掉垃圾佢講咗會做，但偶然會唔記得。咁我都唔會太計較，會幫佢做咗先，因為明白有時佢工作太忙，有時突然間需要出去。」
生活上的小問題，當然可以靠坦誠溝通、互相配合來解決，因此二人似乎都非常滿意有對方這位室友。Leanne表示：「我身體本身好差嘅，尤其是我啱啱搬入嚟嗰幾個月病得好緊要，直情要入埋醫院。每次無論小病，定嚴重到入醫院，阿Sam都有份照顧我。我喺屋企而佢得閒，佢就會煮粥俾我，又會提我食藥，入醫院嘅時候又會拎日用品去俾我。」而Sam則非常感謝室友的尊重，「我係一個好需要私人空間嘅人，Leanne都好明白我，例如佢有朋友上嚟，佢都知我性格有啲anti-social，佢會主動幫我關埋房門，好識做嘅。或者有啲聚會佢知我唔想去應酬，都會適當地幫我推，而唔會迫我去融入大家，呢樣係令我係覺得好舒服嘅。」一動一靜嘅室友組合，相處大半年後已經變成非常理想的perfect match。可能連Leanne同Sam本身都冇諗過，最初大家只為解決本身家居煩惱而選擇共居，點知就認識到可能係人生之中最親密嘅其中一位朋友，絕對係bonus！