誠品敦南店，是台灣第一間，也是誠品唯一一間24小時書店，有邊個第一次去台北無行過呢間24小時誠品？買書買文具買咩都好，誠品敦南店已經不只是一間書店，對於香港人嚟講，佢簡直係台北嘅代名詞，更加係大家嘅集體回憶。30年前，一間24小時誠品已經奠定多年後台灣喺香港人心中嘅文青地位。可惜，全日無休的敦南店將成歷史，日前誠品亦正式宣佈新店落戶信義店3樓，並定於5月29日試業。身在香港嘅我哋，今次好可能無緣親自同敦南店Say Goodbye，不如細閱本文，一齊懷緬吓你我他那些年喜愛夜蒲嘅「老地方」。
台北誠品敦南店因租約期滿，將於2020年5月31日熄燈。
從台北捷運忠孝敦化站6號出口，直行過馬路就係誠品。
捷運忠孝敦化6號出口的記憶
有理由相信，好多香港人第一次去台北嘅Check List一定有24小時誠品，當你第二、三、四次去台北，而假設仲未係好熟路，夜晚去邊？除咗夜市就係24小時誠品見。筆者每次去台北出差，一條友返到酒店無論幾點，仲之就唔想留喺酒店，食完飯唔通仲去夜市掃街咩？梗係飛的去24小時誠品啦﹗都係因為呢間24小時誠品，教識我台北晚上11點後到早上6點，的士收費自動加廿蚊台幣。好多人通常係搭捷運去的士走，就一定背得出誠品係忠孝敦化6號出口，講得誇張啲，「24小時誠品」可以話係「台北」另一個代名詞。
本來為了紀念第一間24小時書店熄燈，誠品為它準備了一連串活動，但是一場疫情……現在莫說香港人，台灣人也只能隔空跟它說再見。
24小時書店的意義
「邊有人仲睇書」、「出書唔賺錢」、「開書店一定執笠」……因為太多人咁講，就會開始有人信，但事實明明係好多人仍然熱愛「打書釘」，出書或不能為生，但24小時書店的存在意義，就是它不只是書店，尤其這間見證了書業變遷、經濟發展、走過金融風暴，那個大堂，那道旋轉門……地標之所以成為地標，是因為有了感情。開一間24小時營業的書店，有夠浪漫，但是這份浪漫，那份看書的「自由」，就夠香港人不捨。一個地方能夠生出一間24小時不停營運的書店，也代表城市的繁榮璀燦，璀燦是因為不夜天模糊了日與夜，凌晨時分，有權選擇不歸家，除了酒吧，還有一個無煙空間讓你免費把書本左翻右翻，扮演一下文藝青年，畢竟很多人在眷戀80、90、00年代，懷緬著大家的青春。
當你第一次見到男女老幼大伙兒坐在地下狂睇書，真係好震撼，這是台灣誠品獨有的風景，尤其是這間獨一無二的誠品。
晚上打書釘的「自由」
筆者第一次到訪敦南誠品，差不多20歲，那時還是常跟家人出遊的年代，但終於可以自己安排行程，因為到24小時營業的書店預計會買書，所以通常是排在晚飯後的活動，時間上的自由是令人鍾愛此地的理由之一，而第一次的經歷，眼見大家能席地而坐，人人安靜地打書釘，驚為天人。當時，香港哪一間書店可以讓大家安心坐在地上看書？這一種自由，是我們心底裡都極為渴望的，當然，其他誠品也同樣歡迎大家任坐任看，但唯獨這一間不打烊，睇到你攰，我好像第一次明白閱讀的自由，是如何甘甜。
獨有的分類，是日後大型書店的指標，雜誌類更是令人睇到唔捨得走之區域。
從誠品開始建立的價值觀
生活風格、雜誌分類、旅遊飲食新書、暢銷書籍……都是這敦南誠品第一次認識的，香港地方細，書店規模也較小，很多分類也很傳統，而且書店的設計也比較刻板，到底Lifestyle 生活風格是什麼？為什麼歐美、日本、韓國雜誌可以有那麼多？有時心中會非常感謝台灣對繁體中文出版的貢獻，加上像誠品般具規模的書店，而且又24小時開放，相互緊靠，不知不覺生活上的一些價值觀，都由這間誠品開始建立。
再見﹗即使信義店將接力成為24小時誠品，但是敦南這間第一間24小時誠品店熄燈後，也跟著我們的青春回憶慢慢地遠去。
雖然文具、音樂及選物樓層不是24小時營業，但都是獨一無二的空間設計，令人懷念。
一個地方要熄燈，不捨的除了建築物本身，更多的可能是回憶，跟誰來過、遇見了誰，就像我們的青春，一去不返，anyway ，下次信義24小時誠品店見。
誠品信義店
台北市信義區松高路11號 +886-2-8789-3388
3F書店、音樂館、知味市集－24小時營業（2020年5月29日試業）
2F書店－11:00-22:00
商場、兒童館、風格文具館、精品文具館－11:00-22:00
eslite Café－08:00-01:00