呢個時勢仲開舖?(一)
選物店與咖啡店之間的Design studio

 

近年香港旅發局積極推廣深水埗,向全世界宣稱來到這裡可以深度感受港式情懷。然而疫情持續,遊客無影,反而滿街「打卡妹豬」,只因近月多間特式咖啡店及小店爭相進駐,為這個平靜的小社區掀起巨浪。

疫下的深水埗出奇地熱鬧,熱愛打卡的一群拿著咖啡杯遊走不同景點,社區關注團體卻認為新店湧入是在摧毀舊區、抬高物價,大家不應忽略弱勢社群……上述議題我都關心,但呢篇文章唔係講呢啲。一場世紀疫症,嚴重打亂全球人的生活,點解仲有人選擇喺呢個時候,走進陌生的深水埗租一個幾十至百多呎的地舖,開工作室、古物店、花店,為咩?原來佢哋就係鍾意呢個地舖夠細﹗

MAS07897 logo

平面設計師Vita︰「因為有mood所以搬嚟﹗」

傳媒愛以「布行與文青店並列的特殊城市地景」來形容今時今日的深水埗,咩都係「文青」,兩年多前已落戶深水埗基隆街的選物店Midway Shop,又有咩咁「文青」?早前Midway Shop在隔鄰開設 PRESS THE BUTTON立飲咖啡店,當然又被形容為文青咖啡店,不過今日探討的不是「文青」,而是在兩店中間那小小的工作室。

在Midway Shop與PRESS THE BUTTON中間,那一扇神秘的門是通往Midway辦公室嗎?還是樓上小店foreforehead的貨倉?非也,這裡是本地設計單位Power-Nap Over (PNO)的工作室。

Vita於2013年創立本地設計單位Power-Nap Over (PNO),幾年間輾轉搬過5次工作室,每次都是與友人合租樓上單位,這是第一次租一間只為PNO而設的獨立工作室。Vita︰「以前每次都係同其他人夾租一個單位,不過上一間工作室都有800呎左右。呢度行過去5分鐘左右就到,所以以前好多時做嘢做到攰,就會落去OPENGROUND買杯咖啡,再過嚟搵Midway店主Rita、阿Pan傾偈。曾經有朋友講『既然你咁鍾意呢度不如搬埋落嚟啦﹗』本來無咗件事,但呢間舖突然放出嚟,因為原本店主退休唔做,又咁啱上一個工作室租約期滿,如果我一個人租又太貴,好彩阿Pan佢哋搵我合租,於是我就用呢個110呎左右嘅空間做工作室。」

MAS07828 logo

租金價值不在於店舖大小,節奏氣氛更為重要

又一個機緣巧合且一拍即合的故事,於Vita而言,吸引他搬來深水埗不是因為這區的租金特別便宜,而是這裡的鄰里關係與漫活氛圍,經過幾個月的相處後,他也誠言愈來愈喜歡這個地方。「我喺屋企做唔到嘢,哈哈﹗做design好講個mood同埋節奏,如果有其他嘢disturb好容易做得唔好,所以我一定要喺工作室先做到嘢﹗而呢間店舖又俾到mood我,因為呢度有mood所以想搬落嚟﹗」

好多外藉人士都喜歡在中上環一帶的地舖開設工作室,為的應該就是Vita所說的mood﹗但是疫情下全球經濟受挫、失業率高企,大家用錢時更為謹慎,話搬就搬,是否因為現在深水埗地舖的租金仍算相誼?Vita搖頭道︰「老實講疫情對我影響唔算太大,只係唔會源源不絕有job接。好難講租金值唔值,我覺得價值唔係只係睇間舖大唔大,而係成個community嘅氣氛,節奏氣氛好緊要,既然我喺附近工廈工作嗰陣會成日想落嚟,咁點解唔直情搬落,搵人吹水仲方便﹗哈哈﹗」

MAS07837 logo

遇上啱傾陌生人,匿喺工廈就唔會有呢啲機會

相信好多人同我一樣,曾經或仍然以為夾在Midway shop及PRESS THE BUTTON中間的是兩店的一部分,從門外玻璃往內看,一排排整齊的書架︰「哦﹗係書店﹗」再望望門外掛著的紙牌「Design Studio Area-Staff & Friends Only」原來閒人勿進﹗但下面又再補多句「If you really want to come in, let me know!」想入嚟話你知?即係點啊?

Vita︰「由4月中到而家,見證住深水埗愈來愈熱鬧,人流係比想像中多。但係對我工作無乜影響,只係頭一星期唔係太慣。開得地舖預咗有人會以為呢間係商店,好多人以為係書店,或者係隔離咖啡店(PRESS THE BUTTON)嘅office,所以我喺出面個牌寫明呢度係一個design studio,不過都仲係差唔多每日都有人衝入嚟,但係一入到嚟發現咁嘅格局就知錯咗﹗不過講真,如果有人真係好有興趣,想入嚟同我講嘢都無所謂,好welcome﹗門口出面有個鐵箱展示poster,有一次我喺出面整緊poster,有個拍片導演行過,佢對於呢個小小嘅工作室好好奇,於是我哋就開始傾偈。以前真係無諗過可以喺咁偶然嘅情況下遇上啱傾嘅人,話晒唔係現有嘅connection,難得可以接觸到其他人,以前匿喺工廈入面就唔會有呢啲機會﹗」

MAS07848 logo

踏進工作室是長方型的實用設計,容得下基本需要的工作檯及書架。唯一美中不足的地方是沒有廁所,但起碼有一個放置洗手盆的位置,方便在疫情期間經常洗手。

聽出面啲人講嘢好有趣,希望有日遇上佐藤可士和

老老實實,Vita都幾健談,可以想像假如佢無搬嚟呢度,都會花好多時間落嚟吹水。既然歡迎有心人到訪,咁有無話最想見到邊個嚟參觀你嘅工作室?「好多喎﹗如果一啲我好欣賞嘅設計師嚟呢度就好﹗如果真係要講一個,佐藤可士和﹗佢係一個影響得我幾深嘅日本設計師,有時會諗如果有一日佢嚟到,可以得到佢對自己作品、創作路向、理念等等俾到意見就好喇!貪心啲,如果可以合作就好喇﹗」

一百呎左右的空間,我與攝影師,Vita與intern妹妹,四人已差不多坐滿,地方夠用嗎?「勉強都夠用嘅﹗Intern妹妹唔係每日出現,平時如果有客戶嚟都係兩三個人,都夠坐,同埋佢哋都幾鍾意喺呢度傾嘢,話晒隔離有咖啡店好方便﹗」Vita滿意地說。工作室喺馬路旁邊又會唔會好嘈呢?「有時巴士經過係會比較嘈,不過大部分時間我都會播音樂,唔係太大影響。有時我會特登熄音樂聽吓出面啲人講咩,會聽到啲好搞笑嘅嘢﹗哈哈﹗」

MAS07879 logo

我最在意的是﹐工作室如何影響街道景觀

「Sham Shui Po is the new Brooklyn」成為近年熱話,當以往人來人往的旺區也因疫情嚴峻而變得蕭條,深水埗大南街、基隆街一帶卻愈見熱鬧,有傳媒提到將深水埗與Brooklyn類比,意味著這個地方很快便會出現仕紳化(Gentrification)。筆者大學時唸的是社會學系,所以對仕紳化這社會學名詞並不陌生 (但也不熟悉)。簡單來說,仕紳化是指社會發展的其中一個可能現象,一個原本聚集低收入人士的舊區,於重建後地價物價不斷上升,較高收入人士不斷遷入,便會取代原有的低收入者。對於這個話題,Vita有什麼想法?

「搬嚟呢幾個月見證著深水埗愈來愈多新店、人流亦愈來愈多。對我嚟講人流多與少係無影響嘅,因為通常週末先最多人,而我週末係放假嘅﹗深水埗話題變得好敏感,有人話多咗好多新店會推高物價、影響弱勢社群等等,其實我無刻意去諗咁呢類問題,我本身唔係住深水埗,租呢間舖係因為鍾意呢度嘅鄰居、氣氛、環境,宜家作為呢個社區嘅一份子,當然唔希望人多對呢個地方有咩唔好嘅影響,但好多嘢唔係我哋可以控制。加上我都慣咗久不久就搬吓office,雖然我好鍾意呢度,但係有時都會諗﹐可能過多兩年又搬啦﹗我最在意嘅係﹐工作室點樣影響街道landscape(景觀),好多嘢唔係我可以控制,但門外景觀就可以,呢度成個舖面連埋隔離兩間舖,正正影響著成條街嘅景觀,所以我會不定期轉吓出面張poster,又會執靚吓啲擺位。」

環顧整個訪問,Vita對工作室幾乎有讚無彈,是否意味著這裡與dream office非常接近?「咁又未﹗仲有一段距離,雖然呢度好多嘢都好好,但係欠規模,希望將來公司可以更有規模啦﹗嚟緊可能會賣晒書架上面啲書,將工作室一半變成商店,賣啲我設計嘅作品(如NINM Lab早前推出的 IT’S OK 卡式錄音機),一路諗緊但未成事。」

每個人都有自由選擇想過的生1活 (雖然香港人已開始對自由二字感到迷惘),Vita不但選擇了自己喜歡的職業,也擁有嚮往的工作環境。因為他了解自己需要什麼,也找到屬於自己的節奏與步伐。

MAS07942 logo

Power-nap Over (PNO) design studio
Facebook / PowerNapOver
Instagram/ p.n.o
Website /https://powernapover.com


TEXT / PHOEBE CHAN・PHOTOGPAPHY / MARIE ANSON

發表迴響