上回提到，近年香港旅發局積極推廣深水埗，向全世界宣稱來到這裡可以深度感受港式情懷。然而疫情持續，外國遊客無影，但疫下的深水埗卻出奇地熱鬧，只因近月多間特式咖啡店及小店爭相進駐，為平靜的小社區掀起巨浪。
一場世紀疫症，嚴重打亂全球人的生活。但今時今日嘅香港就係咩都有可能發生，明明口裡說著支持居家抗疫、保持社交距離，但開完一間又一間的咖啡店依然人頭湧湧。有求必有供，爭相開咖啡店絕對無可厚非，咁點解仲有人會選擇喺呢個時候，租一個幾十至百多呎的地舖，為咩？上回平面設計師Vita話︰「因為有mood所以搬嚟﹗」今回古物店STORE9YEA ( 多嚿嘢奇貨屋 ) 店主Sting及Ellen同樣坦白︰「因為無嘢撈同埋平租！」
STORE9YEA 店主 Sting ＆ Ellen︰「因為無嘢撈同埋平租！」
Sting與女友Ellen同樣從事廣告行業，疫前Sting從客戶服務的崗位轉型為廣告製作人，點知疫情來襲，廣告業頓成重災區。二人賦閒在家時驀然想起早前開設的網上古物店STORE9YEA ( 多嚿嘢奇貨屋 ) 生意還不錯，既然有支持者、顧客們在購物前往往想睇實物，加上疫情期間比較空閒，不如就開實體店吧﹗結果在6月萌生的碎碎念，7月已化身成真真實實的一間店﹗問題係，既然網上生意幾好，點解仲要喺呢個動盪嘅時刻花錢裝修、交租？
「舊年12月尾有朋友搞市集，本來只係搵我整poster，後來佢話『你哋收埋咁多舊嘢不如拎出嚟賣啦﹗』因為嗰次市集生意幾好，我哋覺得有得做喎，於是開咗ig shop，當時梗係無諗過開舖啦﹗賣舊嘢一定有瑕疵，特別係杯杯碟碟，要拎上手先知，好多客問我哋有無門市，加上有時耐無出post，客人會私下問我有無乜乜乜，咁我就要喺屋企拎出嚟影相，拎出嚟又收埋。疫情期間比較得閒我哋就傾起，好似需要搵個地方display啲貨出嚟﹗」Ellen娓娓道來。
Sting︰「疫情期間我哋得閒、人哋又得閒，無嘢做就上網、買嘢，又去唔到旅行，生意好似特別好。6月嗰陣無乜嘢做就開始搵平舖位，例如睇過觀塘有啲商廈，正正方方個view都幾好，百幾二百呎樓上舖，有廁所又乾淨，但唔係好啱我哋。跟住睇呢間，一開閘見到間舖三尖八角，正啊﹗啱我哋﹗ 人哋覺得唔好但我哋又好ok﹗三日後就決定租呢度，當時最主要係諗我哋需要嘅地方唔係好多，同埋賣嘅嘢都係細細件，最緊要係，我無嘢撈同埋平租﹗因為Ellen老竇做裝修，所以裝修唔係用好多錢，不過要等佢得閒先搞，所以都裝修咗差不多一個月。」
「個個經過都話︰『咁細間點搞啊？』但係我哋搞到囉﹗」
一場世紀疫症，打亂你我他的生活，待在家悶壞了，反而激發起平時沒空慢慢諗的想法與創意。近月愈來愈多新店進駐的深水埗成為疫下難得人流暢量之地，除了地方細租金平，選擇在此開店會唔會係基係於旺呢個因素呢？唔講唔知，原來Sting及Ellen決定租這個單位之時一直以為這裡是太子，不知道三尖八角的小小店與人氣高企的大南街、基隆街只是幾分鐘的路程。
「租呢間舖完全唔關呢度係深水埗事，我哋兩個一直都以為呢度係太子，唔知原來大南街就喺附近，亦唔知原來咁近STOREROOMS嗰堆人氣小店，哈哈﹗因為我哋好少行街，係開咗舖之後周圍行，先發現原來附近都有其他古物店。如果一早知道附近咁多勁店反而未必租呢度，好大壓力㗎嘛，人哋做得咁好，好多人入嚟行幾十秒就走，好驚客人期望大失望更大，而家二至五通常得我一個看舖，好驚㗎，所以我每日都好想執笠﹗」Sting笑說。「咪亂噏啦﹗其實生意ok嘅，不過好多時出完post件貨就賣咗，變咗好似成日唔夠嘢擺出嚟賣咁，所以我哋要努力啲入貨﹗」Ellen 補充。
「我哋本身想像中嘅舖面唔係咁㗎 ，唔係好似而家咁乾淨咁小清新，我哋想colorful啲奇怪啲，最想油橄欖綠色牆，但買咗返嚟有嚴重色差，無啦啦變咗純白小清新。不過因為地方細，用米色牆係無咁壓迫感嘅﹗」Ellen說。Sting突然信心返埋嚟︰「裝修嗰陣時個個經過都話︰『咁細間點搞啊？』但係我哋搞到囉﹗我哋搞到嘅原因係我哋本身好奇怪，你睇吓啲地磚係本身留落嚟嘅，而我哋係賣舊嘢咁就掂啦﹗仲有啊，之前無諗過間舖咁細，原來擺晒貨都仲有位剩，哈哈﹗所以話雖然呢度好細，但其實有好多位都未用，例如仲可以加多啲層架、牆上又可以掛嘢，而且因為地方細我哋裝修時都有刻意整多啲收納位，呢度嘅細同埋密質質就係特色﹗」
小店裝修前後對比，三尖八角真係幾奇怪，奇舖襯奇貨卻是 perfect match﹗
「好多街坊見呢度裝修都話驚我哋剷咗啲磚﹗」望望地下，綠色地磚同間舖又真係幾襯，既能做到文物保育又慳返鋪地磚嘅錢，正﹗
「希望客人真係鍾意舊嘢，咁我就放心交個『仔』俾佢。」
作為一個幾鍾意買嘢，特別係買無謂嘢嘅人，我係幾同意STORE9YEA嘅創牌理念──「消費的確幾舒壓，所以STORE9YEA主力賣舊物，為舊物重燃第二生命。擺多嚿嘢喺屋企，係可以令心情完全唔同，唔好睇少嗰一嚿嘢嘅影響力。平時買埋買埋咁多唔等使嘅嘢，其實真係好爽，但同時都會窮，所以最好我買下嘢，你又買下我啲嘢，互相尋快樂，造就環保生活圈。」真係字字珠璣句句鏗鏘，特別係嗰句「平時買埋買埋咁多唔等使嘅嘢，其實真係好爽﹗」潮流興斷捨離，個個都斷捨離唔通個個都想斷捨離咩……我想買多嚿嘢﹗
Ellen︰「佢買咗個格仔櫃放喺屋企用嚟擺佢啲收藏，你而家見到呢啲好多都係double佢先肯拎出嚟賣咋﹗」Sting反駁︰「咁係唔捨得嘛﹗你咪又係咁﹗你都唔捨得賣啲油燈㗎﹗」同呢對小情侶傾偈，發現唔止佢哋鍾意買嘢，佢哋嘅家人都係購物及儲物狂。「以前通常係去旅行嗰陣行吓市集、夜冷店入貨，而家就online訂貨，成本高好多。我哋兩個都會負責入貨，我負責餐具擺設，佢就主打玩具，同埋啲唔等使嘅嘢，例如呢隻出『煙』大笨象，真係好鬼無聊，哈哈﹗我好鍾意呢批昭和時期出產嘅油燈，人手上油，日本製，好精緻，我好唔捨得拎出嚟賣，但拎出嚟就發現原來唔係太受歡迎，可能因為價錢唔算平啦﹗」Ellen說。
Sting︰「好多我鍾意嘅嘢都賣晒，啊﹗呢個70年代生産嘅人體解剖模型囉﹗絕版嘢好難搵返嚟﹗好多嘢真係買一件少一件，講真，賣到最後一件會唔捨得，因為真係鍾意，希望買嘅人真係愛惜、鍾意舊嘢，咁我就放心交個『仔』俾佢。至於vintage名牌手袋，通常係我阿媽嘅，佢好鍾意去旅行，仲要係無目的咁周圍行，偏偏俾佢搵到正嘢﹗佢儲落成千隻sanrio杯，不過唔啱呢度所以無拎出嚟賣，但係佢成日買完啲名牌袋又唔用，所以就擺喺度賣囉。」
Sting最愛無聊玩意，例如呢隻象仔擺設嘅功能就係，當你放枝煙入盒，搞吓佢個象鼻就會喺屎忽出「煙」，哦…… （已售罄）
Ellen鍾情昭和時期出產的手吹玻璃古油燈（左），Sting推介好難搵返嚟、造工細緻嘅Tsukuda Hobby人體解剖模型（右）。
「出面啲人成日以為我哋聽唔到佢哋講咩，其實聽得好清楚﹗」
STORE9YEA 店外有條直達二樓的長梯，原來這條木梯也有段古。話說這個70呎的小舖上層原本住了一個街知巷聞的老婆婆，四十多年來老婆婆都是從地下爬梯上二樓起居作息，樓下側是與街坊們玩婆仔牌的基地。後來不知何故70呎小舖被惡漢霸佔成聚賭場所，其後婆婆更因與聚賭人仕爭執而跌倒，繼而回鄉養老。因此業主決定收回小店重新放租給有心人，結果成為STORE9YEA的實體店。
很多人用龍蛇混雜來形容深水埗，Sting及Ellen卻常說「呢度好搞笑」。「裝修嗰陣聽呢度啲街坊講，呢一帶成日有人爆格治安麻麻，有啲街坊又話呢度好多道友，叫我哋要小心啲。不過我哋開業到而家都好安全，無事發生。」其實你哋鍾意地舖多啲定樓上舖多啲？Sting搶答︰「如果好似Foreforehead咁喺閣樓就正﹗我本身好鍾意Foreforehead，佢哋賣嘅嘢好正，又係古古怪怪好得意﹗而且個舖位簡直一流，幾隱蔽，行條樓梯上去好有尋寶感覺，我可以用呢間舖同佢交換﹗」Ellen︰「我唔想交換喎﹗我鍾意地舖多啲，啲人行出行入好得意。最正係出面啲人成日以為我哋聽唔到佢哋講咩，其實我哋聽得好清楚﹗哈哈﹗」Sting︰「都係嘅，前幾日出面有個紋身漢同的士佬打交，好精采﹗同埋呢度好搞笑，成日無啦啦會有人入嚟吹水﹗我本身好anti-social，焗住要不停吹水。」
假日賣有機菜，回饋小社區友善街坊
上回提到，當以往人來人往的旺區也因疫情嚴峻而變得蕭條，深水埗卻愈見熱鬧，令人不禁想到深水埗或會出現仕紳化（Gentrification）的現象，即是一個原本聚集低收入人士的舊區，於重建後地價物價不斷上升，較高收入人士不斷遷入，便會取代原有的低收入者。咁Sting及 Ellen對愈來愈多新店湧入深水埗有咩睇法？
「之前講過，租呢間舖完全唔關呢度係深水埗事，我哋兩個一直都以為呢度係太子，而且無留意其他人氣小店就喺附近。我覺得愈來愈多人開店都係好事，算係對抗大財團嘅方法。而家真係有好多打卡妹豬，搞到成地都係頭髮，哈哈﹗好多人喺門口影完相就走，無所謂啦﹗至於其他社會問題，我哋無諗太多。不過最近開始逢週末喺出面擺賣有機菜，因為我哋知道街坊入到嚟唔會買到嘢，但我都想服務到佢哋。」Sting說。點解賣賣吓古物會賣有機菜咁得意呢？可唔可以介紹吓咩係「阿珍有機時蔬」？Ellen︰「因為我阿媽喺上水租咗塊地種菜，成日種種埋埋好多嘢都食唔晒，於是我哋就諗不如拎嚟賣啦﹗每逢週末拎啲有機蕃茄、薯仔等蔬菜放喺出面個木箱，街坊睇啱就入嚟俾錢。希望街坊都可以買到嘢，齊齊買多嚿嘢﹗」
廣告人出身係唔同啲，「阿珍有機時蔬」的宣傳帖文及相片既親切又吸引，抗疫時間，大家不妨食多嚿菜﹗
講到咁好，有無缺點？「有啊﹗出面好多曱甴行嚟行去，好驚﹗同埋洗手間比較遠，
要去公廁囉，不過無辦法啦﹗」最後一個問題︰「你哋最想咩人嚟STORE9YEA？」Sting搶答︰「林鄭囉﹗一嚟就鎖門唔俾佢走……」 （下刪千字粗口，內容大家應該估到。）Ellen補充︰「我諗如果林鄭嚟深水埗，未入到嚟已經……」 （再刪千字粗口，內容都係嗰啲。）
每個人都有自由選擇想過的生活，有人貪新有人戀舊，Sting與Ellen選擇將「買多嚿嘢」的快感化成創業動力。「個個經過都話︰『咁細間點搞啊？』但係我哋搞到囉﹗」霸氣回應全因信心與正能量兼備，店舖只有70呎又如何？佢哋就係可以化腐朽為神奇，賣古物滿足同路人之餘賣埋有機菜益街坊，化奇舖為奇貨屋。
STORE9YEA 多嚿嘢奇貨屋_深水埗界限街25號A5地舖
Instagram / store9yea
延伸閱讀︰
呢個時勢仲開舖？（一）選物店與咖啡店之間的Design studio
呢個時勢仲開舖？（三）佇立在基隆街街角的小花房