前文提到，近年香港旅發局積極推廣深水埗，向全世界宣稱來到這裡可以深度感受港式情懷。一場世紀疫症，嚴重打亂全球人的生活。疫情持續，外國遊客無影，但疫下的深水埗卻出奇地熱鬧，只因近月多間特式咖啡店及小店爭相進駐，為平靜的小社區掀起巨浪。
今時今日嘅香港就係咩都有可能發生，明明口裡說著支持居家抗疫、保持社交距離，但開完一間又一間的咖啡店依然人頭湧湧。有求必有供，咖啡店開不停可算是無可厚非，咁點解仲有人會選擇喺呢個時候，租一個幾十至百多呎嘅地舖，為咩？平面設計師Vita話︰「因為有mood所以搬嚟﹗」、古物店店主Sting及Ellen坦言︰「因為無嘢撈同埋平租！」，今回輪到開舖經驗豐富嘅花店店主Polly話俾大家知︰「地方係細，因為我想佢細而細，唔係我被迫要揀細，所以ok！」幾時都話，做人最緊要有得揀又識得揀﹗
PAUSE REWIND & FASTFORWARD店主Polly︰「地方係細，因為我想佢細而細，而唔係我被迫要揀細，所以ok！」
兩年多前，基隆街上的舊式皮號搖身一變成新式咖啡店COFFEE matters，前陣子COFFEE matters鄰店也由老舖變成新式花店，從此整條基隆街的面貌又變了樣。只因喜歡花，Polly於2010年創立花藝品牌PAUSE REWIND & FASTFORWARD（下稱PRFF），從把鮮花製成乾花、以押花技術製作飾物擺設，到專注乾燥及新鮮植物花藝，她也曾開設咖啡店「小房子」，及創立以花入饌的日式食店「朝花夕拾」，更創立了服裝品牌「ELAPSE流逝日裳」。自從疫情開始，經歷了數月休息的Polly於5月尾開設PRFF首間鮮花花店，就是這間佇立在基隆街街角，看似格格不入，其實好靚亦唔突兀的小花店。
Polly︰「呢度應該大概一百呎左右啦﹗最初地產經紀話有百鬆啲，我落到嚟睇即刻講咗句『邊有啊？』哈哈﹗因為上年全年都唔太好，我好想take個break﹐所以情人節之後就close晒所有店，只保留工作室。二月尾去咗英國休息加周圍旅行，本來都想學習花藝，但係因為當地疫情開始所以擱置，直到四月中返香港，隔離期間收到agent電話話呢度附近有吉舖，隔離完即睇即ok咗﹗」即係一早鎖定咗想搵深水埗呢區嘅舖？「其實舊年開花墟店之前係有睇過深水埗區，只係當時選擇咗花墟。咁啱之前有啲朋友搬咗過嚟（深水埗）話幾好，加上呢間舖舖租未係話太貴，而且好似多年前我哋喺利時隔離開嗰間舖，都係咁細間﹗」
開舖做生意，好多時都係愈開愈大間，PRFF反而愈開愈細，何解？「我本身係打定輸數咁開，預咗完全無人無生意，只靠online訂單都交到租先至開。如果計埋pop-up store，呢間應該我開嘅係第12間舖，以前啲舖租貴得好緊要，講真呢度租金算比較平，即使完全無門市生意，我都可以養到呢間舖。我當呢間係小鮮花房同埋studio咁做，因為鮮花真係要咁凍先得，地方大少少我都驚manage唔到。地方係細，因為我想佢細而細，而唔係我被迫要揀細，所以ok！而且呢間舖內容好豐富，我可以喺度教人整花、可以拎花出街影相、又可以種植、派吓牛油果種子，幾貼近我心目中想要嘅嘢，同我嘅Dream shop 最貼近。」
炎夏在深水埗大街小巷中穿梭，即使步伐再緩慢、飲幾多杯凍咖啡，仍難避免汗流浹背。來到PRFF，就好似由火爐旁走咗入雪櫃咁極速cool down，正﹗原來Polly揀呢間舖，就係貪佢夠細又夠凍﹗Polly︰「PRFF一直以來都以乾花為主，呢間係第一間長期有鮮花嘅店。以前需要預訂先有鮮花，店內唔會有鮮花，而家我哋直接同荷蘭訂花，大概逢星期五返貨，通常放到星期日、一就賣晒，因為定期返鮮花，可以為同客人定期做花，例如每星期訂一盆。呢度真係幾好㗎﹗因為乾花鮮花唔可以一齊擺，放鮮花需要好涼嘅冷氣，呢度地方細好似一個小雪房，好方便整鮮花﹗而且間舖喺街角，從兩邊望過嚟都見到呢間街角小花店，夜晚著黃燈，從遠處望過嚟暗暗哋又有花，好似幾靚﹗哈哈﹗」
乾花鮮花唔可以一齊擺，呢間舖夠細似天然雪房好正。
出面個浴缸好搶眼，係店面設計嘅一部分？「浴缸係朋友拍嘢用完嘅道具，一直覺得浴缸呢個器皿好適合用嚟種花，又夠大又有去水位。擺左喺度之後啲街坊都幾鍾意，好多街坊都話好靚，行過又會摸吓、讚吓，扔垃圾入去就一定有，見到有垃圾咪執囉﹗ 其實裝修只係搞咗兩星期左右，5月頭裝修、5月尾已經開得﹗因為好多傢具都係現成有，好多都係以前花店用過或者朋友俾我。不過因為呢度地方細唔夠位，同埋有啲花倒吊比較好，所以要喺上面加條鐵鏈，隔離鄰舍個印度男仔好好人，佢幫手上晒上面啲鐵鏈。」Polly滿意地說。
註︰因食環工作人員表示收到投訴，截稿時浴缸已從PRFF搬走，幸而呢件植物浴缸art piece將於小房子3.0再次同大家見面。
呢度地方細但都夠小班教學，學生企兩鐘上堂都唔介意。
傾傾吓突然有人叩門進店，然後靜靜放下一杯美式咖啡，一副不想打擾我們的樣子。Polly向該男子說了一聲唔該，續說︰「佢係隔離COFFEE matters老闆，我頭先返到嚟就過去order咗杯咖啡，佢哋得閒就會拎俾我。呢度啲隔離鄰舍真係好好人，最初只期望呢個地方儲到冷氣擺到花，但落到嚟發覺鄰舍關係極好，好難得﹗我本身係識STOREROOMS同埋COFFEE OF THE DAY店主，完全唔識隔離咖啡店、附近啲越南人、印度人，特別係隔離士多真係好好囉，成日幫我淋花照顧植物。而家做耐咗，開始有街坊會將唔要嘅盆栽放喺我哋門口，咩都唔講，心照啦﹗」
環顧整個訪問，Polly多次重覆「估唔到深水埗咁好」，估佢唔到即係本身無諗過係好，話晒疫情持續，既然咁多不確定因素，點解仍然急於開舖唔等一等先？「首先，無人會知疫情幾時停，我無理由咩都唔做齋等。剛才講過呢度嘅租金唔算貴，花墟間舖嘅租金係呢度6、7倍，但營業額好似同呢度差不多，好多嘢未試過唔會知。計過㗎喇，即使完全無門市生意，只要keep住有網上生意都應該可以養到呢間舖。咁我都係當studio咁用，所以無諗咁多深水埗旺唔旺嘅問題。真係開咗先知原來幾多區內客，難得熟客又肯落嚟深水埗，可能因為附近多咗嘢睇啦。以前我唔會睇舖㗎，但我會長駐呢間舖，除非出咗去送貨，通常我都喺度，咁就可以同客人溝通、諮詢得好啲，對我嚟講好新鮮。咪睇呢度地方細，其實都夠一對一或一對二小班教學，好彩大家企兩鐘上堂都唔介意，so far反應好好，爆到年尾，所以我覺得今次呢間舖開得幾啱，好似一開已經上軌道﹗」講到咁好，真係無缺點咩？「咁又唔係，廁所囉﹗其實附近有個洗手間但就比較唔太乾淨，你知女仔麻煩啲嘛，所以通常行兩個街口去楓樹街個公廁。同埋呢度比較多曱甴，有一次仲見到老鼠﹗」
聽聞附近啲老舖幾歡迎外來新舖頭，話深水埗旺啲幾好﹗
正因為愈來愈多人發現深水埗的美好，當以往人來人往的旺區也因疫情嚴峻而變得蕭條，深水埗大南街、基隆街一帶卻愈見熱鬧，有傳媒提到將深水埗與Brooklyn類比，意味著這個地方很快便會出現仕紳化（Gentrification）。簡單來說，仕紳化是指社會發展的其中一個可能現象，一個原本聚集低收入人士的舊區，於重建後地價物價不斷上升，較高收入人士不斷遷入，便會取代原有的低收入者。對於這個話題，Polly有什麼想法？
「其實逢有新店開都一定有打卡妹豬，呢間舖由開店至今都有，一係坐喺出面浴缸一係坐出面舊木。無所謂嘅，擺得出嚟都預咗有人影，影吓又唔會少咁忽。都明白嘅，而家social media年代影相好重要，好多人都好鍾意影相。係啊﹗附近愈來愈多coffee shop，對我嚟講一定係好事，因為我鍾意飲咖啡，我要日日飲咖啡先至醒，同埋無咁腫，我差不多間間都飲過。我聽過有人會擔心深水埗會好似太平山街，因為新店啲嘢勁貴結果搞死咗成條街，我諗深水埗係另一個狀態。其實我聽聞附近啲老舖其實幾welcome外來入嚟嘅新舖頭，有時同佢哋傾偈，佢哋會話『深水埗旺啲幾好啊，你哋啲舖頭幾得意』有啲就話其實好多老店係自己舖（自己是業主），所以就算多新店令租金貴咗少少，對佢哋都無乜影響。咁事實上點都推高咗少少租金 ，雖然旺角已經唔旺，但租金仍然好癩，所以呢度都算好ok。」
從呢個角度睇，假如新舊店店主懂得互相欣賞、互相幫忙、互相幫襯，令小社區愈來愈繁榮熱鬧及富生命力，更能組成新舊交融的獨特街道風景，又好似唔係壞事。Polly補充︰「區內客係好appreciate我哋㗎，成日都有街坊喺門口講『 嘩！好靚！你賣花、仲有相機！（朋友放在店寄賣的舊式相機，並提供維修服務）』雖然未必會幫襯，但佢哋見到花會好開心﹗」咁你自己多數幫襯新店還是老店？「飲咖啡就幫襯新店，但其他嘢我通常都係幫襯舊式小店，例如有間前排搬遠咗少少嘅源記，裁縫手工好好，我未嚟呢度開舖之前已經成日幫襯，佢帶我去揀布就即刻造衫，有啲自己著，都有啲係賣嘅。對面有間家後餃子，佢哋個湯同埋芝士蛋糕好正！甜圓坊都正、蘇媽.蘇媽嘅肉骨茶又正﹗士多再隔離有間食中東嘢都好正……」有理由相信，如果唔叫停，Polly應該可以一直數落去。
小房子變大小房子，小房子3.0將於9月登場
因為需要一間小小的花店，Polly帶領著PRFF花房來到深水埗，也因為很快便融入這個小社區，她很快便決定把一手創立的咖啡店The Hut小房子也帶來大南街。經歷過兩次變遷，Polly口中的小房子3.0將會首次以地舖姿態同大家見面，佔兩層空間，由小房子變大小房子，期待﹗
Polly：「由呢度行去小房子3.0大約2、3分鐘，都係大南街，今次係小房子第一次搬落街， 兩層共約千4、5呎左右，預計9月左右搞掂﹗前排發現有咁嘅吉舖，即刻諗好似好啱小房子喎﹗因為係無耐之前租，所以比起花房都算貴租，同第一間旺角小房子差不多啦，第二間小房子嘅租金係第一間嘅3、4倍，而家仲要係地舖，所以租金算ok！。」話晒疫情持續，難料經濟何時復甦，租完一間又一間，會唔會比較冒險？「我都有諗過，萬一疫情再來，我哋只做外賣或online生意，應該都ok，總之計過係俾得到我哋先至租。」
是的，行勝於言，要成功必須付諸於行動，畢竟人生永遠沒有準備好的時候。「下一步想實踐係將小房子1.0嗰陣嘅氛圍帶回來，但menu要做得更好。小房子1.0係好舒服㗎﹗好光猛，一攤喺度就會想瞓著。不過嚟緊開地舖就無以前咁開揚，不過應該更有空間感！希望新呢間都可以放好多盆栽、鮮花，好似室內花園咁﹗同埋上層都係想舒適啲，或者會放貓仔上去，上面會有乾花，可能整個類似花卉製作所？ 例如俾某個錢就可以任砌。Menu方面，想係小房子加朝花夕拾混合，以家常料理、日式輕食為主，也保留signature如櫻花水信玄餅、水果紅茶、茶漬飯等等，仲有﹗想做返無最低消費、無限時，希望至少某個zone可以咁做……」呢個諗法好好，但坐位就得咁多，當成街都係等去café坐嘅人，如果不設最低消費、無限時，客人可能等到天昏地暗，生意流轉亦比較慢……「我都明，不過小房子concept係咁吖嘛﹗」呢句聽落好似好任性，但其實好有人性，喺香港做生意正是如此矛盾。
每個人都有自由選擇想過的生活（雖然香港人已開始對自由二字感到迷惘），Polly選擇以百多呎的街角小店作為鮮花花房，更霸氣回應︰「地方係細，因為我想佢細而細，而唔係我被迫要揀細，所以ok！」證明她不但了解自己需要什麼，也找到屬於自己的節奏與步伐。下一步就是將過去小房子與朝花夕拾的美好帶來新的小房子3.0，畢業能藉著花草植物的生命力療癒人心係好美好嘅事，加油﹗
PAUSE REWIND & FASTFORWARD_深水埗基隆街168號地舖
Instagram / pauserewindnfastforward
Facebook / Pause.Rewind.Fastforward
Whatsapp / +852 67736915
延伸閱讀︰
呢個時勢仲開舖？（一）選物店與咖啡店之間的Design studio
呢個時勢仲開舖？（二）只有70呎的古物店x週末菜檔