「很想抱月光 很想鑽漩渦……」喜歡麥浚龍的〈彳亍〉，即使還未細嚼周耀輝詞中意，輕哼兩句已經好有畫面。不知從何時開始，或許就是從夏目漱石將「I love you」翻譯成「月がとっても青いから」（月亮真是很藍），到後來世人譯的「月亮真美」之時開始，月亮與浪漫彷彿劃上等號。
因為天生浪漫，台灣設計工作室 Acorn Studio（橡果藝術）創作的月球燈 Luna，一出即在港台兩地甚至世界各地掀起搶購熱潮，本地線上選物店unun亦因獨具慧眼率先引入Luna而備受注目。 暌違五年，Acorn Studio終於發佈第二個手造星球作品 — Moon Titan！話說土星最大的衛星泰坦星(Titan)又被稱為土星的月亮 (Saturni Luna)，科學家推測這個位於太陽系另一端的月亮可能存在跟地球完全不同的生命體，Acorn Studio 就以這個充滿幻想的星體為靈感，創作出另一個可以被我們帶回家的月亮系列。
同樣是人手製作獨一無二、同樣是Handmade in Taiwan、同樣是一年免費保養，但Moon Titan的製作工序比Luna更為複雜，因此需要更多時間完成。好消息係unun living現已開始接受預訂，壞消息係中秋節之前未必送到，如果想當中秋節禮物送俾摯愛未必啱timing。咁又點？Moon Titan的美好，在於能夠帶來平和寧靜的氛圍，當你看著它、抱著它，或許可以暫忘世界的紛亂，好好感受和平靜謐的時光。世界如此崩壞，我們的內心必需很強大，就讓月亮治癒心靈吧﹗
Moon Titan備有四種不同尺寸 （暫時比Luna少了40cm的選擇），跟月球燈 Luna 一樣，Moon Titan也是由藝術家團隊親手製作，每個都是獨一無二。經過繪製、雕刻、製作塗層、烘烤及打磨等繁複工序才能完成製作。由於無法量產，所以只能接受限量訂製。最小的 Mini 方便隨身攜帶，15cm 可搭載 USB 行動電源，放桌上或帶去露營。至於 30cm 及60cm 則可配合智能燈泡使用，能隨時透過電話調教亮度與冷暖色溫。
Moon Titan Mini $650
Moon Titan 15cm $1,480
Moon Titan 30cm $3,580
Moon Titan 60cm $8,880
(預購發貨日期:2020年10月初)
Moon Titan的概念照及短片，出自本地攝影師Miss Bean之手。看過這輯相片或短片，應該能感受什麼是透過影像說故事，如自問悟性不高，不如睇睇unun主理人Kaho親自解說。
與unun主理人對談
「月亮係共同嘅希望，無論係兩個人定係一百萬人，即使分開咗，抬頭望天，最易認就係個月亮。」
G︰GOODDIG
u︰unun主理人Kaho
G︰點解會搵Miss Bean合作Moon Titan概念照及短片？
u︰其實第一眼見到 Moon Titan 時已經覺得呢個藍色星球好有空靈同夢幻嘅感覺，亦都好直覺地覺得就係 Miss Bean 喇 ﹗(笑)
G︰可以分享一下概念照及短片嘅創作靈感或構思理念？
u︰故事係講一個女仔入咗一間會令人發夢嘅洋屋，佢見到一個好大個嘅 Moon Titan， 之後就進入咗一段好奇幻嘅旅程。我哋認為無論每日喺現實世界返工返學幾攰都好，返到去見到個 Moon Titan 就會令你好似去咗一個好夢幻嘅空間咁，暫時忘記現實中嘅煩惱。
G︰五年前嘅Luna掀起搶購潮，你認為大家對Titan嘅反應同樣熱烈嗎？
u︰應該唔會好似之前 Luna 咁誇張咁搶購嘅，因為每個人對月球都好有認識好有情感，但泰坦星太遙遠喇﹗就好似非主流音樂咁，只要有識欣賞嘅人我哋已經好滿足。我哋最希望 Moon Titan 可以好似 Luna 咁，過咗好耐大家依然會覺得好靚，間中望下依然覺得幾開心幾治癒，而唔係因為熱潮而搶購。
G︰你鍾意Luna定係Moon Titan多啲？點解？
u︰其實好難揀，因為真係兩種mood。月球算係大家最熟悉嘅星球之一，每個人點都有啲情感，所以Luna嘅感覺係好溫暖好浪漫嘅。而泰坦星一定比較陌生，知道咗佢都係月亮 （土星嘅月亮) ，而且可能有生命之後，咁好似又多咗好多想像。Moon Titan 都好 calm 到人嘅情緒，嗰種好似《2001 太空漫遊》咁飛到一個完全唔認識嘅奇幻宇宙，係另一種嘅平和感覺，都係好治癒心靈。
G︰你自己屋企有幾多個月亮燈？放喺邊？
u︰我有放一個30cm嘅Luna放喺屋企窗台，擺喺啲植物隔離，有時夜晚會熄晒燈，淨係開住個 Luna 睇 Netflix 係一件好舒服嘅事。
G︰傳統思想滿月象徵團圓，於你而言，月亮有任何象徵意義嗎？
u︰對我嚟講可能係共同嘅希望，無論係兩個人定係一百萬人，即使分開咗，抬頭望天，最易認就係個月亮，你望住個月亮嘅時候就會諗起其他人都仲喺度，remind住自己大家原本個共同願望係點，keep住個希望去到達成嗰日。
G︰你最想將Moon Titan送俾咩人？點解？
u︰送畀媽媽吧﹗佢日日睇新聞睇到瞓唔到覺，佢瞓之前望吓Moon Titan 應該可以放空一下。
