一場世紀疫症徹底改變全人類生活，冇工開點算好？積極點當然是另覓出路。
張氏三姊妹合作經營的私人定制旅行社原本搞得有聲有色，疫情來襲旅遊業遭重創，與外籍丈夫居住在坪洲數年的大家姐Mandy，早有開設雜貨店造福居民的念頭，某天發現合適的舖位放租，心想不如將雜貨店與咖啡店合二為一，妹妹Cony及Apple秒速贊成，三姊妹夾手夾腳完成這項看似不可能的任務，島上首間較大型的咖啡店終於在8 月尾開業。
「最開心係見到好多老一輩島民同仔女一齊嚟食嘢，喺市區通常都係後生仔女一齊去靚café，好少會同家人去，Island table嘅出現令坪洲多咗個空間俾家庭成員connect。」一直渴望島上有咖啡店的Mandy滿意地說。店名叫Table，店內也設有大檯一張，就是希望同桌的人，無論認不認識都可以連繫在一起。筆者訪問當日所見，雖然打卡妹豬還是偶有出現，但坐在咖啡店內的人，不是一臉悠閒地工作，就是靜靜地邊嘆咖啡邊談心的中年人、也有正在談笑風生的公公婆婆們，這樣的情景，在市區咖啡店真係好少見。
“Nothing is better than doing what you love everyday.
It’s not just a passion for a job;
Rather, it is a passion for life, and for the city we love.”
以上quote來自私人定制旅行社Hong Kong Getaway的介紹文案，不但道出private tour公司的理念，也說明了Island Table Grocer Café出現的原因，就是因為對生命的熱情和對這個城市的熱愛。
純白外牆好易認，Mandy坦言揀白色因為簡單﹗陽光從偌大的玻璃窗透射進店內，天氣好陽光猛的時候，店內外散發出溫暖祥和的氣息。
住在坪洲自然知島上缺乏乜嘢，開店係為居民服務
曾任職空中服務員的張氏三姊妹Mandy、Cony及Apple，數年前合作經營private tour旅行社，Mandy自言在三人共同努力之下，成績可算是滿意，更連續數年獲國際旅遊網站Tripadvisor的五星評價。無奈一場疫情令全球旅遊業停頓，早已隨Mandy搬到坪洲居住的兩個妹也被迫停下來暫休。Mandy︰「其實最初係想開online grocery shop（雜貨店），因為喺坪洲買餸比較困難，要搭船去中環、愉景灣，如果賣grocery就可以方便民居。有日行過見到呢個舖位放租，就諗不如開一間店將grocery 同café夾埋，俾大家多一個選擇﹗」但係經濟環境咁差、坪洲居民亦不多，加上多變的抗疫措施，唔怕生意慘淡咩？「都驚㗎﹗不過冇諗咁多，嗰陣諗就算有疫情都應該有得做，因為多咗人留喺屋企整嘢食，就算唔出街食都要煮嘢食，所以grocery好重要，自己住呢度自然知缺乏乜嘢，開店真係主要想為居民服務﹗」Mandy眼神堅定地說。
自家製食物飲品，喺小島生活乜都要靠自己
由於三姊妹一直以來都是從事旅遊業，未讀過設計、對餐飲業亦一無所知，既然決定了創業，唯有豁出去邊做邊學。Mandy︰「Café內外都係三姊妹負責設計、裝修，可能因為我哋本身都唔係做呢行，喺屋企煮飯同做餐廳係兩回事，好多嘢都仲學習緊，而家menu上唔算好多嘢食，但係芝士蛋糕、豬肉卷、pizza等等都係我哋自己整，需要多時間準備，所以雖然星期一、二閉店，但係我哋都係繼續工作。我同Cony本身鍾意煮嘢食，負責煮食及烘焙，Apple就負責飲品，除咗一般咖啡及茶，特別推介自家製Lemonade，我哋自己手搾檸檬汁、刨青檸皮，調較完味道再手搖，好fresh好多人鍾意﹗」訪問當日，筆者在短短半小時內便目睹兩位伯伯先後點餐，然後慢慢訴說自己喜歡吃什麼， café 遲些能提供什麼。「係啊﹗好開心開咗幾個星期已經有回頭客，就算本身menu唔係太多嘢食大家都唔介意，反而提供好多意見，好欣慰。」Mandy說。
一人份薄餅即叫即製，備有至尊、鴨胸及素食三款口味，只限11：30至下午2：30供應。Island Table Supreme $55 同樣是自家製的雜菜豬肉酥﹐優質輕食之選。 Homemade Sausage Roll $35
Lemonade $38, Cappuccino $38, Chocolate $38
大家都係香港人，唔需要分咁清
雖然不是坪洲原居民，但Mandy坦言三姊妹都很愛這地方︰「最初係我先生同我講好鍾意坪洲，當時我都唔知坪洲係點，遊說咗近一年，我哋終於搬入坪洲，後來兩個妹妹都搬埋入嚟住。」自從疫情開始，熱愛旅遊的一群暫無機會周遊列國，好多香港人轉移目標到離島小旅行，假日的南丫島、長洲、甚至坪洲也遍佈遊客。遊客眾多難免對居民造成不便自此，自此大小離島也開始出現反對遊客過多的聲音。Island Table Grocer Café的出現，意味坪洲多了一個供遊人打卡的景點，怕不怕引起居民的異議呢？
「係嘅﹗其實都聽過人講，擔心開咗café會多咗人入嚟，破壞坪洲寧靜。不過我覺得兩睇啦，多遊客都係好事。老套講句香港是我家，唔使分得咁清，我唔會諗坪洲係我自己嘅地方，其他人唔好入嚟。況且我開店係為咗想島民有個舒服嘅環境，可以做吓嘢、飲吓嘢、hea吓，而且方便大家買吓嘢﹗最開心係見到好多老一輩島民同仔女一齊嚟食嘢，喺市區通常都係後生仔女一齊去靚café，好少會同家人去，Island table嘅出現令坪洲多咗個空間俾家庭成員connect。難得有一間喺屋企樓下咋喎，咩年紀嘅人都可以去café hea吓﹗講真，一開頭都有擔心傳統居民唔鍾意，但係由我哋三姊妹落手落腳裝修，班街坊睇住我哋由零開始到成間舖出現，好好彩街坊都好支持，所以我估大家都同我一樣，希望坪洲有一間café。畢竟坪洲已經有出名又好食嘅茶餐廳、泰國嘢，雖然都有一間週末開嘅café，咁我認為島民都會想有一間café，有個地方可以hea吓。店名叫Island Table，正是因為三姊妹希望坪洲有一間café，中間有一張大檯，令到大家可以坐埋一齊，即使唔認識都好，街坊們可以圍埋一齊傾偈、互相認識。可惜在疫情期間人與人之間需要保持社交距離，暫時未能做到大家圍埋一齊傾偈，希望遲啲可以﹗」又係嘅，大家都係香港人，不用分得那麼細，只要大家盡公民責任，不擾民，任何離島都歡迎你。
希望爸爸可以嚟，睇吓三姊妹搞咗一間咩café
張氏三姊妹的父母選擇繼續留在大埔，沒有隨她們搬到坪洲居住。「媽咪會每個星期或隔一星期入坪洲，但爸爸身體唔係咁好，未嚟過，所以我最希望爸爸可以嚟睇吓我哋三個人搞咗一間咩出嚟！仲有，好想外國嘅朋友或者喺澳洲嘅奶奶可以嚟坐吓，因為佢哋全部都好支持我。」因為疫情，令三姊妹暫時放下合力經營的private tour公司，專心搞好島上café。那麼，疫情完結後，是重操舊業還是繼續搞好café？「我好掛住以前帶遊客行街市、逛公共屋村嘅日子，好掛住。但係無人會知疫情幾時完，可能疫情完咗呢度已經上軌道，可以spare time兩邊都做呢﹗」對，希望在明天。
Island Table Grocer Café_坪洲永興街9號
Facebook / Island-Table-Grocer-Cafe
Instagram / islandtable.pengchau