當世界無常規
-從YouTuber到出寫真集

COVID-19疫情全球蔓延,從經濟到生活,徹底顛覆人類習以為常的運作模式,從此世上已沒有所謂常規。大疫當前,有人選擇以不變應萬變,也有人明白必須跳出舒適圈尋求改變,才能創造機會。

十多年前已開始拍片放上YouTube,透過發表獨到見解而紅爆網絡的Asha Cuthbert (徐㴓喬),比起現今一眾KOL、網紅行前好多。這位敢言的烈女於數年前曾移居英國,但基於心底裏當自己是百分百香港人,2018年回流香港,重新向模特兒、演員之路出發。結果經歷社會運動、世紀疫情後,她決定挑戰疫境下的新常規--做啲以前從未試過嘅嘢,自己擔任製作人、作者、編輯、攝影師,邀請另外11位在social media發光發熱的女生,透過照片與文字說故事,全女班班底製作出慈善寫真集《GIRLS》。點解有呢份攞苦嚟辛嘅勇氣?等Asha話你知。

MAS08787 logo

出到呢本書已經係神蹟,因為2020 is so shit……

從YouTuber到模特兒、演員等身份,十多年來,或許大家對Asha最深刻的印象仍是「識講流利廣東話嗰個鬼妹仔」。父親是英國人,母親是菲律賓人,沒半點華人血統但是在香港長大的Asha,早在訪問中明言「當自己是百分百的香港人」。無論Asha是什麼身份,於我而言,佢最值得被欣賞是她的敢愛敢恨又敢言。身處亂世之中,當全世界都在忙著抗疫,經濟唔好收入銳減又如何?Asha選擇踩過界,召集girls power合力出書,就算無錢賺,想做就做,而且要盡力做好。

Asha︰「本身諗住2020年可以做到好多嘢,但係2020 is so shit﹗呢一年係考驗成長嘅環節,出到呢本書(《GIRLS》慈善寫真集)已經係神蹟。對我嚟講,今年就好似蔬菜, I hate vegetables,我好憎食菜 ,我會寧願食supplement (補充品)都唔想食嗰陣味,但係你知道佢係人類需要有嘅一種營養,正如2020年係好難過,不過係人生必需經歷,到底我應該點樣handle呢一年?係考驗,會學到唔少嘢。」

向來勇於為女性發聲嘅Asha,坦言兩年前已有召集女生推出慈善寫真集的想法,但香港人總是公私兩忙,忙忙吓又無咗件事。當疫情來臨,繁忙的工作被迫停下來,反而令Asha想起這項未實踐的計劃。然而疫情重創經濟,她本人的工作量與收入均大減,呢個時勢出錢出力製作慈善寫真集,係唔係好時機呢?Asha︰「永遠無最好嘅時機,既然疫情持續,工作唔係取消就改期,不如趁呢個timing做自己一直想做嘅事。不過唔好以為疫情期間大家就好得閒,原來要籌備一本書、約齊一班女人係一件好困難嘅事,可能以前做model以為只要有一個女仔、一個stylist、一個攝影師就ok,好易之嘛﹗嘩!成件事乘12嘅時候就變得好難。當初仲諗住可唔可以集合12個女仔一齊影一張大合照,No!Mission Impossible!所以搞呢本書期間我都好stress,好多時返到屋企都係不停咁做,但我又會覺得生活過得好充實,成日好想做好呢件事,就算另一半叫我收電腦唔好再做,我都想繼續做。」

MAS08912 logo

MAS08916 logo

如果係拍一條片,可能大家15分鐘後就會忘記……

《GIRLS》慈善寫真集集合12名女生的靚相及文字分享,包括Asha本人、「電競女神」馬俊怡(Rose Ma)、新進女演員鄧月平、黃可盈(Flavia)、「火雞姐」丁可欣、混血YouTuber 林欣(J Lou)、人氣KOL張厚耀(Sue Chang)、Sarah Cheung、紋身師Clara Jade (及其母親)、造型師梁雅懿(Adele)、攝影師Kelly Cheuk以及跨性別人士Alice Ho。由形象設計、化妝以至攝影,完完全全全女班製作。寫真集所得之收益扣除成本後,將全數撥捐本地慈善團體HER Fund,為香港基層女性提供能力培訓及撥款,促進女性權益和改善她們的生活境況。

女……全部都係女,重點係每位都是在social media備受注目的女性,特別是Asha本人,明明是YouTuber起家,為什麼反而從最熟悉的線上走到線下,花費高成本印刷實體書?Asha︰「本身諗住係好簡單,可能只係拍YouTube片嘅一件事,後來慢慢變成一本可以揸上手嘅實物,我有份影人又有份被人影,由發起人到打雜乜都有份。拍一條片有種viral嘅感覺,即係好網紅嗰種,跟住大家可能15分鐘後就會忘記。所以我哋想出一本書,本書唔會突然出現廣告, 可以慢慢細心睇,一本可以揸起上手嘅書同一條片係好唔同。」

呢班女仔喺social media成功,唔代表冇故事值得分享……

老實講,第一次翻開這本寫真集,發現很多張陌生的臉,腦內即時彈出「邊位啊?」的疑問,但因為整本書靚樣、靚衫、靚body不缺,很自然地慢慢看下去。翻了一遍之後再往參與者名單細看,「哦﹗原來係佢﹗」12位女生都是大家口中所謂的「網絡紅人」,可能因為寫真集中的她與平日在社交平台看到的她不太一樣,所以一時認不出來。係囉,點解要搵呢班女仔?

Asha︰「有啲係本身認識,有啲係經過同同事討論之後特登邀請佢參與,例如Rose Ma,喺大家眼中係女王級,唔使介紹都識。決定咗搵咩女仔之後,有人會問點解搵呢啲女仔,好似judge呢班女仔除咗followers仲有乜嘢可以contribute?點解唔搵性工作者?唔搵戰勝癌症嘅女人?我想話俾佢哋知,係﹗你好有point, 但與此同時我都想challenge返你『點解你覺得呢個女仔喺social media好成功,就代表佢冇story值得share?』香港social media圈子唔夠女仔去support女仔,我就係想集合大家嘅followers ,Girl support girls,女仔唔應該去judge對方。人生一定有本…中文叫咩?難讀嘅經,We all have it﹗」

每個chapter都有一小段中英對照文字, 分別代表每位參與者嘅小故事?「係啊﹗由嗰個女仔自己寫自己故事,無修飾過。我可以講自己所有嘢,人生起跌咩都講得,但唔可以要求所有女仔將好私癮嘅嘢講出嚟,可能有女仔唔comfortable講得太深入。每一個女仔都經歷唔同人生階段 ,大家都經歷過自己嘅壓力,即使未必係咩驚天動地嘅故事,佢哋share 嘅story都係好真嘅故事。好似阿Vi(Flavia)咁,佢之前已經影過寫真,我睇完之後覺得爭咁啲喎,佢明明係一個性格好正、好靚、好索嘅女仔,點解我喺相睇唔到呢?所以我好想有一個平台去展現女人不同嘅美,透過相片及佢哋寫嘅文字,令大眾可以更深入了解佢哋。」

MAS08994 logo

唔需要執相,人有眼袋好正常,點解唔可以接受真實嘅美?

唔知由幾時開始,望見「寫真集」三個字,自然好想問「性唔性感?」作為女性讀者,我認為性感指數屬中等,絕不過火,但某些照片還是會令人嘩一聲,例如只穿上內褲及貼了膠紙、幾乎全裸的Asha。Asha︰「我想push自己去性感嘅極限,哈哈﹗搞到攝影師Stephanie好怕醜,其實我已經有貼嘢,一出嚟佢話︰『嘩﹗你做乜嘢啊?我係咪影緊PLAY BOY? 』哈哈﹗有啲女仔鍾意性感就俾佢show,有啲未係好鍾意就由佢,唔需要刻意性感。我show咁多skin因為咁影同我本身個人好相反,我肯喺舒服環境咁著,但係唔敢著成咁搭地鐵,唔係因為我無自信或覺得唔靚,而係我好驚俾人非禮﹗呢種思考好奇怪,我唔敢性感唔敢著得好睇,係因為我怕有啲咩行為會落在我身上。製作呢一本書,就係批准啲男仔咁睇我,加埋故事,希望大家用心去睇。」

身為producer,係唔係書入面所有相都係你揀?「唔係啊﹗我哋揀相要經過投票,公司男女同事都有份投。我而家先知原來男同女睇嘅性感同美差好遠,女人好睇個樣,當女攝影師掛住影女仔個樣,我會提佢要見多啲身,因為女仔個身都好靚啊﹗最估唔到係好多男仔對呢本寫真嘅comment係『露咗好多喎!』但我唔覺得囉﹗哈哈﹗」

MAS08999 logo

天生「鬼妹」樣、加上勇於在網上發表言論、以及YouTuber以外的模特兒及演員身份,由細到大難免遇上社會上形形色色的標籤。因為討厭所以要面對,Asha在寫真集中以貼上標籤的赤裸形象示人,細心睇,label寫上「唔夠瘦」、「過氣YouTuber」、「時攣時直」等形容詞,成堆label,Asha最憎邊個label呢?「每個女仔都會面對好多標籤,我最討厭對身體指標嘅label,一定要瘦先靚咩?我同攝影師講明︰『唔好執我﹗』因為我唔認同有咩瑕疵都係要遮。有人提出要執皺紋、執眼袋,但我唔想執,明明人有眼袋係好正常,點解唔可以接受真實嘅美?有張相都見到我有個肚腩仔,No﹗Fxck﹗Keep it﹗」Asha堅定地說。

今次出寫真集只限女生參與,但原來Asha都想試吓為男生發聲。Asha︰「好多人話我係咩女權啊,咁如果我幫男仔出聲又點先?可能又有其他label﹗其實之前都有人問我如果再出書會出咩?GIRLS之後出BOYS 啦不如?哈哈!如果可以出一本男仔書,我都恨出㗎﹗」是的,2020年就如Asha所言咁shit……2021年將至,相信全球人類都係諗希望疫情快啲過去,Asha︰「成本寫真集我只係負責影Flavia嗰部分,因為我老竇係攝影師,好想知佢對我影嘅相有咩意見,不過佢哋(父母)而家喺菲律賓,已經成年無見佢哋,希望疫情快啲過去,我好掛住佢哋﹗」好﹗一齊集氣,希望2021年一切都會好好的,好𢯊2021﹗

《GIRLS》慈善寫真集

https://www.uppity.hk/charityphotography*所得之收益扣除成本後,將全數撥捐本地慈善團體HER Fund,為香港基層女性提供能力培訓及撥款,促進女性權益和改善她們的生活境況。

Asha Cuthbert徐㴓喬
Facebook / itsashaetc
Instagram / ashaetc
YouTube / ashaetc


TEXT / PHOEBE CHAN · PHOTO / MARIE ANSON · WARDROBE / KSUBI · SPECIAL THANKS / 13A New Street, #HAPi

發表迴響