對你嚟講，軟雪糕係乜嘢？
2012年，音樂人莊冬昕憑一首〈食軟雪糕〉成網上熱話，重覆逾80次的洗腦歌詞令此曲被封為「年度膠歌」，但其實歌詞當中隱含著對社會不公現象的批判。軟雪糕，既是人見人愛的甜點、也可以是諷刺時弊之歌。對攝影師Helen來說，更是由日本到香港、從寂寞到快樂的見證，亦是其首個個人攝影展的主題。
兩年多前Helen在日本旅居， 某一個晚上在人來人往的街上看到軟雪糕燈的身影，突發感觸，於是開始了為軟雪糕燈拍照的習慣。疫情後回到香港，想念日本的她終於忍不住郵購了一盞軟雪糕燈，帶著它遊走香港大街小巷拍照。就是這樣，這一系列永不溶化的軟雪糕照片，成就了《我是一杯____的雪糕》寫真展。
攝影師Helen ヘレン（海倫視角）
這款由日本雪糕品牌NISSEI / ニッセイ（日世）推出的軟雪糕造型座地燈約高100cm，在日本隨處可見。但是在香港，只有日世公司正式授權販售軟雪糕的店舖才會擺放，全港數量不多，重點是香港的雪糕燈往往貯立在商場內，不似在日本有靚靚街景陪襯。
日本 •「成日覺得軟雪糕嘅身影好寂寞。」
實不相暪，當初留意到這個展覽，就是被海報上那盞軟雪糕燈吸引住。筆者從小到大，也對這款由日本雪糕品牌NISSEI / ニッセイ（日世）推出的軟雪糕造型座地燈有著難以言喻的情意結，若不是因為土地問題，應該很早以前便把它據為己有。到底係咩人咁鍾意影軟雪糕？
攝影師Helen （海倫視角）原是雜誌及廣告撰稿員，2018年到日本工作假期，起初純粹是為了體驗生活，邊讀日文邊做侍應，其後開始幫香港人在日本拍攝婚照，Helen自言非技術型攝影師，所以從來沒想過會當上全職攝影師。「我從來無受過專業培訓、無正式讀過攝影、亦無跟過任何老師，只因為鍾意影相而慢慢摸索，可能因為以前做media成日同攝影師合作，都有從中吸收到攝影方面嘅知識。2019 年櫻花季嗰陣，我成日周圍去賞櫻，有一次喺人來人往嘅商業區見到街上有個軟雪糕燈，嗰一刻好有感覺，覺得佢好似被忽視，於是影咗第一張軟雪糕相。記得有一個夜晚，我喺居酒居放工之後，喺池袋車站又見到佢（軟雪糕燈） ，當時感覺好溫暖，又影咗張相。
可能因為我喺日本成日都係一個人 ，好似盞軟雪糕燈咁，所以有共鳴，自此開咗個hashtag『#我是一杯寂寞的雪糕』，記錄低軟雪糕燈嘅身影。咁鍾意影軟雪糕，鍾唔鍾意食軟雪糕呢？Helen︰「對我嚟講視覺緊要啲，我鍾意影多過食（軟雪糕）。有時有啲地區或季節限定味道，例如北海道有哈蜜瓜味、櫻花季節有櫻花味，我就會買杯嚟食，同埋我鍾意食CREMIA﹗」咁啱啊﹗我都愛CREMIA﹗念念不忘必有迴響，有燈就有人。看似寂寞，其實有軟雪糕燈陪伴又點會寂寞。
香港 •「估唔到大家見到軟雪糕會咁開心！」
好多人話做嗰行厭嗰行，Helen卻愈做愈愛，在日本兼職為港人旅拍愈做愈開心，而且愈儲愈多熟客，為其攝影師之路打下強心針。去年疫情肆虐全球，Helen迫於無奈回港，並決定成為全職攝影師。疫情期間主力拍攝婚照的Helen，在友人鼓勵下萌生搞軟雪糕相展的念頭，為了在香港繼續拍攝那永不溶化的身影，Helen透過偉大的網購終於抱得軟雪糕歸﹗
「舊年年尾開始諗想搞一個關於軟雪糕嘅展望，好彩有一樹（策展人）幫手，特別係搵到呢個咁合適嘅地方（鳥山。商號），我唔想擺gallery，因為本身啲相比較輕鬆，喺日系café 展示好啱。」點解喺日本就影軟雪糕燈襯街景，喺香港唔係呢？「喺日本影軟雪糕燈好似一期一會咁，好生活化，因為日本周街都係唔需要特登搵，但係香港唔係，好難搵，所以我特別買一個返嚟，當佢係model幫佢影相，因為想延續日系感 覺，所以揀喺海邊、藍天為主，其實都想玩local feel，留返紅磡快閃活動嗰部分。」
同一樣嘢，喺日本同香港可以有好大分別，軟雪糕燈亦然。「我估唔到香港人見到軟雪糕會咁開心！其實我都有問過朋友點睇『#我是一杯寂寞的雪糕』，佢哋話完全無寂寞嘅感覺，反而覺得好得意、好搞笑。事實上，當我一個人拎住軟雪糕燈周圍影相，好多人見到會話︰『好搞笑 點解有個雪糕喺度 ？』估唔到原來會帶俾人快樂，不過搞呢個展覽就係想大家開心啫﹗」
訪問當日是復活節假期前一天，小店保持在長期滿座的狀態，滿店顧客在欣賞Helen的軟雪糕作品之際，邊打卡邊發出會心微笑，開心其實可以好簡單﹗
相片以外，還有似軟雪糕的蛋糕
是次展覽場地「鳥山。商號」，為配合軟雪糕主題，特別推出以軟雪糕造型為設計藍本的期間限定甜點 —— 蜂蜜柚子軟雪糕。頂部的「軟雪糕」是芝士奶油，內藏蜂蜜柚子乳酪蛋糕，配合威化脆筒，即係一杯似軟雪糕嘅cup cake，慢慢打卡都唔怕溶﹗
展期內除了可到「鳥山。商號」欣賞Helen的攝影作品及品嚐蜂蜜柚子軟雪糕，同時
舉行街頭快閃攝影及軟雪糕攝影比賽，前者為「野生出沒軟雪糕」攝影活動，Helen帶著軟雪糕燈於紅磡區內遊走拍攝，務求為街坊呈獻流動打卡位。後者是「#我是一杯＿＿的雪糕」寫真大募集，召集世界各地的雪糕靚相，收集隱藏在照片背後的旅遊回憶。
呢個時勢，搞咁多嘢為咩？Helen不下數次強調︰「搞呢個展覽就係想大家開心啫﹗」係㗎，香港人呢兩年都攰喇，如果有時間不妨去睇吓展覽打吓卡，俾軟雪糕氹吓自己開心，香港人加油﹗
《我是一杯____的雪糕》寫真展
日期：即日起至2021年4月28日
時間： 08:00 – 18:00（一至五）， 10:00 – 18:00（六及日）
地點：鳥山。商號 _紅磡蕪湖街111號蕪湖居地下C2號舖