美國社會心理學家Luchins提出的首因效應 (Primacy effect)，指出人際交往中給人留下的第一印象至關重要，也有心理學家提及名字是影響第一印象的重要因素。數年前第一次看到「葉禕 (Ip Yi)」之名，給我的第一印象都幾強烈，當時先入為主地想「個名咁型，個人都應該幾型」，結果發現這位網絡紅人人如其名，一個字「靚」﹗個妝淡到好似無化咁都睇得出係靚女談何容易，標緻的五官中最突出的是一雙大到誇張的眼晴，一身日系型格打扮，人靚相又靚，即使不知道她是誰，也會忍不住狂loop她的照片，那幾萬名followers應該係咁嚟。
葉禕既不是模特兒，也不是娛樂圈中人，年前從英國學成歸來後，便加入本地創作單位START FROM ZERO及STOREROOMS擔任木工設計及兼職店員，說到底，她只是一位愛於社交平台分享生活點滴的女生，followers愈積愈多，不知不覺間變成網絡紅人。想了解她多一點？不如從她最拿手的捲煙開始。
香･煙
拍攝時，葉禕給我幾句溫馨提示︰「影我食煙好易變成『星期X檔案』嗰啲邊緣少女訪問，咁我嘅對白就會係『我曾經有好悽慘嘅經歷，但係都決定勇敢面對人生…… 』哈哈﹗」葉禕說很多人話佢似邊青。可能我見識少，真係無乜點見過人靚衫型、仲要捲煙捲得咁靚嘅邊青。
Ip Yi︰「以前喺英國讀書嗰陣成日見人食捲煙，當年諗法都幾矯情，有一晚一個人喺街行，行行吓就諗『如果有啲暖嘅嘢喺手會唔會好啲呢？』就係咁就開始食煙喇﹗英國比較多人食捲煙，可能因為味道好啲，到而家我都食唔慣普通包裝嗰啲煙，返香港後發現好多人都抗拒食煙，所以開始揀啲有香味嘅捲煙，希望人哋聞到都無咁厭惡，因為有香味嘅捲煙噴出嚟都係香味，好似係，可能我自己自作多情啦﹗一開始都有少少唔想俾屋企人知，最終都被發現，阿媽見我認咗有勸我戒，但戒唔到啦，於是佢開始叫我唔好食咁多。我唔覺得食煙係壞，身邊好多朋友都食煙，食煙係一種生活習慣，只係佢多咗一樣就係會影響到人。我最擅長同埋最叻嘅嘢就係捲煙，我可以捲得好快好靚好直，仲可以一路行一路捲。」
半･半
聽著葉禕偏向低沉的聲音，聽得好舒服。不知由何時開始，很多女生都愛提高聲線或是用「娃娃音」說話，真聲不見天日。或許有些男性會鍾情此種嬌嗲女聲，但女人聽到真係會標冷汗。Ip Yi︰「我個人都幾麻煩，的確喺好多方面都好隨意，但係喺某些小事情上則絕對不能讓步，例如衣服掛喺衣架上要同一個方向，然後衣架掛入衣櫃亦要同一個方向。我唔係整齊嘅人，但重點係要乾淨﹗可以亂但唔可以污糟。不過你咪睇我講嘢粗聲粗氣，但係我偶爾都會嗲身邊伴侶，有時都會扮可愛聲，但呢一刻就唔方便表演喇﹗哈哈﹗細個住喺廣州嗰啲平房，一間屋內有兩戶人，出面有大沙地，我同兩個阿哥及表哥一齊玩，日日跟住四條仔周圍跑。可能因為身邊朋友多數係男仔，所以我個性都比較直。我唔驚曱甴但驚蝸牛，因為佢軟淋淋咁好核突，細個踩過真係好核突﹗」
裝･妝
為葉禕錄vo時，要求她嘗試用幾十秒介紹自己或講任何想講的說話，她說︰「其實好似好多人都唔知我做緊啲咩，咁因為其實我係真係唔知做緊啲咩，其實就乜都做吓囉，有錢賺咪做吓、開心咪做吓，好似咁樣生活會開心啲、好玩啲﹗」唔係每個人都識得點樣令自己活得開心，葉禕好幸運。繼參與本地生活設計小店STOREROOMS 的自家服裝品牌roomswear及Birthmark的創作後，現在葉禕與其拍檔暫時放下上述兩牌的工作，應邀成為一新品牌的創作總監。
Ip Yi︰「我唔算特別鍾意時裝，雖然係做緊服裝設計工作，但係唔覺得自己做緊時裝設計，可能因為我同partner都唔係跟trend嘅人，我哋設計嘅衫係故事性concept，唔係好厲害、令人一見就覺好目不瑕給嗰種，而係比較著重實用性同耐用性。我自己平日最多係著黑白藍灰幾隻基本色，因為呢幾隻色最方便易襯，就算tone on tone都可以出得街，如果襯色就要諗過，再唔係就係紅色，因為我對紅色有情意結。無講時裝定係化妝，都係簡簡單單最好睇，所以我好少化妝，都會搽唇膏嘅，寧願瞓多陣都唔想花時間化妝，哈哈﹗」呢個年代人人講追夢，其實好似葉禕咁，知道自己想要咩，過著「乜都做吓」嘅尋開心生活，又係一種正能量﹗
#葉禕 #十大最愛
1）食物︰甜食
2 ）飲品︰珍珠奶綠
3 ）歌曲︰〈Reality〉
4 ）電影/電視劇︰綾瀨遙所演出的所有電視劇
5） 書/雜誌︰《拾香紀》
6 ）地方/店舖︰家
7 ）網站︰wikipedia
8 ）顏色︰紅色
9 ）講嘅一句說話 ︰「好值得擁有喎﹗」
10 ）其他人點叫你︰ee/老葉
好𢯊女子︰
Ip Yi 葉禕 (服裝設計師)
Facebook / Ip Yi
Instagram / ipyi
Weibo/ ipyi