不知從何時開始，在搜索引擎輸入「袁澧林 」或「Angela Yuen」，必然會彈出「文青女神」四字，每次睇見這四個字總會打一下冷震，不是說她不配，而是這個似褒又似貶的稱謂實在與她不相襯。問她喜歡這稱謂嗎？Angela︰「無特別感覺，我唔係女神，其實我係男神。」
五年前在昔日工作的雜誌攝影專欄上首次看到Angela的照片，即時反應係「呢個女仔得喎﹗五官標緻又有氣質。」事隔數年， 剛於去年大學畢業的她已升上「神」級，在女神各擁山頭的年代穩守「文青女神」寶座。老老實實，十個女神九個乞女人憎，但偏偏Angela做到第十個，成為男女皆冧的娛樂圈新寵。入行短短數年已由模特兒晉身電視電影女主角，就連超級名牌CHANEL亦向她招手，點解？咪就係因為佢從來無女神包袱，唔扮嘢做自己，be true從來最值得喜愛。
食譚仔･擤鼻涕
女人天生愛妒忌，對住靚女好難唔藐，仲要係頭頂「文青女神」光環嘅靚女喎﹗偏偏聽過好多女性友人道「保濟Yuen真係幾靚」「我覺得佢份人好真好搞笑」「入得呢行難得唔怕講自己有男友」…… 褒多於貶。對上一次和Angela做訪問已是三年前的事，當時的她仍是大學生，剛剪了一頭短髮，我們在浸大canteen談天說地，那時她已經是凍奶茶狂迷。今時今日的她既是廣告小天后，又是名牌御用女模，甚至是影壇新寵，但爽直個性依舊，生活依然貼地，對凍奶茶的愛亦始終如一。
Angela︰「叫咩都無所謂啦﹗文青只係一個標籤或者是一種lifestyle，每個人對文青嘅定義都唔同，有人覺得淡妝嘅女仔就係文青。女神？我唔係女神，我係男神 ﹗哈哈﹗我好似男仔咁隨意，我都希望自己靚㗎 ，但係又唔係好貪靚，我唔鍾意洗頭又唔鍾意刷牙， 但係為咗健康，我兩樣都會做， 哈哈﹗不過比起以前，而家出街會比較留意自己嘅儀容。以前我真係可以乜都唔理，有一次同朋友食譚仔，當我不停擤鼻涕嗰陣，有人認出我仲問『你係唔係Angela？』當時我嚟唔切反應，唯有『吓……係啊……』我都試過敷住mask落街，唔係paper mask而係gel mask啫，點解？因為懶囉﹗哈哈﹗其實我個人幾hea同埋懶，但另一方面我又好勤力﹗」懶得來勤力？我都係喎，咁啱嘅﹗訪問做到一半，Angela︰「Phoebe我哋影到幾點？好想快啲去大坑順興飲凍奶茶﹗」坦白，我鍾意。
關於愛･無壓力
Angela︰「唔洗工作嘅日子，我會瞓好耐，但瞓醒一定要出街。畢業後朋友間各有各忙，所以我有時會自己去電影中心睇戲，點都要安排自己睇場戲，即使前日工作咗17小時，都要安排活動俾自己，學跳舞、學武打，因為我係唔可以停落嚟嘅人。」繼涉足電視及電影圈後，早前Angela更參演舞台劇，原來相比起來，她最愛的還是拍電影，難怪她說幾忙都要睇戲。Angela︰「我最鍾意拍電影，因為電影好有力量，而且我被電影影響好多， 對我影響最深嘅電影可能係1997年嘅《Good Will Hunting》，呢齣電影define咗乜嘢係愛，講述一個天才因為犯事而要被心理學家進行心理輔導，心理學家訓示佢睇得多書唔代表知道乜嘢愛。因為愛係經歷、係感受、係當下，每次睇完電影返到屋企，都需要沈澱一下回味箇中意思。」
說到愛，作為公眾人物、大家心目中的女神，公開男伴談何容易。Angela︰「我一早公開自己有男朋友，拍拖無壓力﹗呢個年代拍拖好正常吧﹗西方社會對於藝人拍拖嘅想法較健康， 華人社會比較保守，甚至認為結婚後就唔可以做某啲角色。所以而家幾好，同大家講咗我有拍拖，唔洗收收埋埋。不過真係去到邊度都會有人問我關於拍拖嘅嘢，唔知係唔係因為大家標籤我係女神，例如會問情人節、聖誕節去邊等等問題。都係嗰句，其實我個人都幾hea同埋懶，但另一方面我又好勤力，對於節日，我唔係太重視形式，最緊要開心﹗」
Hea 而懶･但勤力
一個訪問，講了幾次「我個人都幾hea同埋懶，但另一方面我又好勤力」，是戴定頭盔嗎？看著眼前的Angela因勤力練武而弄得周身瘀傷、說著不想辜負支持自己的人那堅定的眼神，有理由相信，面對事業她是十萬個用心，但當有機會休息時，她也是識得hea的一群，work hard play harder，不被工作吞噬人生，咁先有排玩。Angela︰「我知道有一班人對我好有期望，可能因為覺得我算係演藝圈中一個幾有potential嘅女仔，但當大家對我期望過高，我就會承受一定壓力。感謝呢一班人相信我、欣賞我，知道我好俾心機，我唔想令佢哋失望，所以一定會俾心機工作…… 開始有啲口渴，一陣去到大坑一定要點凍奶茶，雖然我唔係咩奶茶專家，但係邊度嘅奶茶好飲我一定記得，我應該係最認識香港邊度有好飲奶茶嘅人，講笑咋﹗」收到，停機，即刻去整返杯凍奶茶。
#袁澧林 #十大最愛
1）食物︰米線
2 ）飲品︰珍珠奶茶
3 ）歌曲︰〈Remember me〉
4 ）電影/電視劇︰《Good Will Hunting》, 《Sing Street》, 《Manchester by the sea》
5） 書/雜誌︰《酒徒》
6 ）地方/店舖︰長洲
7 ）網站︰《端》
8 ）顏色︰白色
9 ）講嘅一句說話 ︰「世界要你努力去考取功名，但是真誠才是最大本領」
10 ）其他人點叫你︰家人叫林林， 好朋友都叫澧林，只有新朋友叫Angela
好𢯊女子︰
Angela Yuen袁澧林 (演員)
Facebook / Angela Yuen袁澧林
Instagram / angela.yuen
Weibo/ AngelaYuen