曾幾何時，她是被喻為「英皇小花」的前歌手蔣雅文，十年前隻身遠赴台灣開展新生活，放下藝人光環、撇下Mandy之名、卸下被包裝的玉女形象，努力在台灣打拚。由發展設計事業到開設食店、選物店，繼而嫁作人妻、出書、攝影集，一步一步由港女步向台灣「文青」「女神」獎門人。悠悠十年，今時今日大家都叫她 Ya Wen (雅文的國語併音)，在社交平台追隨她的「粉絲」遠多於昔日藝人時代，為什麼這麼多人認為現在的Ya Wen比以前吸引？原因好簡單，蔣家大小姐早已甩掉偶像包袱 (即使偶然仍要靠樣搵食)，既不用披上玉女面具，更可穿回最愛的boyish style服飾，唔扮嘢做自己。今次訪問佢就大大聲話我知現實生活中嘅佢其實都幾不拘小節，唔單止細菌當補品，又分享生活上的麻甩moments，有理由相信，這十年來做過的事能令佢無悔驕傲啊﹗
女生的女神，做不成男生們的夢中情人
恕我直言，無論是3T或是Don ＆ Mandy年代，那些年以玉女形象示人的蔣雅文對我來說真的不太討好。直至某天，從網上得知此女已成功打入台灣時裝界，繼推出個人品牌到開設小店、出書及攝影集，花瓶形象蕩然無存，反而突然對她有好感。Yawen喜歡在社交平台分享生活上的點滴，現在的她總是化著似有還無的淡妝、穿得像個男孩般舒適自在，即使長出白頭髮也不介意暴露於人前。懂得為自己努力找出路的人最值得支持，不止我對她改觀，坊間稱她為「女神」、「文青」之聲也此起彼落。但原來事實上，她是女生的女神。
Yawen︰「以前每當聽到有人叫我做『文青』、『女神』，就會覺得晾唔起呢個名。首先，『女神』呢兩個字應該係從男仔角度出發，但係我好少男fans，通常男仔嘅夢中情人係需要受保護嗰種，不過我唔係嗰種柔弱女生，而且我大部分fans都係女仔，所以我諗我係女仔嘅女神，似係女仔們嘅傍樣、先軀，行喺前面，有啲人會視我為奮鬥目標，但其實無做過乜咁巴閉，只係因為大家年紀細，經歷不及我多，十年後大家可能同而家嘅我差不多。講真，以前對『女神』呢兩個字有啲抗拒，因為好似花瓶咁，而家睇化咗，若然以目標為本，如果成為女神可帶俾其他人目標，咁又無所謂。可能因為我鍾意寫作、攝影，大家就認為我係『文青』，每次返嚟香港辦活動，我都會好懷疑仲有咩人會想用一個下午聽我講嘢，例如早前回港參與攝影活動，明顯係分享生活態度多於技術上指導，但每次都係名額爆滿，實在令我喜出望外，好感動，每次離開都帶住滿滿嘅支持同埋鼓勵。」
細菌當補品，唔麻甩就好多嘅都做唔到
Yawen︰「正正因為有啲人可能視我為榜樣，所以都唔希望做咗啲令佢哋失望嘅事。不過我係正常人一個，唔會完美，可能好少人覺得我係比較麻甩或者粗魯，但係我自問自己都算係一個幾中性化嘅女仔，唔止服飾上，生活上好多細節我都唔太在意。例如我試過返花蓮時忘記帶卸妝用品， 於是兩三日無落過妝…… 有時懶用潔膚用品洗面就用毛巾捽吓就算，偶然仲會用卡片撩牙，哈哈，係唔係估我唔到？」訪問當日，Yawen問我想佢對camera做咩？我答「做返自己。」於是Yawen話怕自己做出不雅動作嚇親fans。結果呢？唔覺有不雅成份，只覺得眼前的Yawen就像是自己身邊的朋友做著正常不過的事，好親切。
Yawen︰「其實大家唔應該對行為較麻甩嘅女仔有眨義，我認為所有能幹嘅女仔都有麻甩嘅成份，甚至比男仔更有能力， 如果好姿整唔麻甩就好多野都做唔到，例如有時貨到，可能有啲女仔會覺得搬貨呢啲粗重嘢應該等男人做，俾我如果搬得到我都會自己搬，所以我都鼓勵女仔麻甩㗎﹗大家應該放低對女仔的標籤，例如而家好多人鍾意露營、行山，上得山代表唔怕污糟，如果有所謂公主病嘅女仔就好難忍耐野外活動喇﹗上年同員工去旅行，行程包括爬上富士山，因日本人怕污染所以沿路都係水源，即係去完廁所無得洗手，所以你要同自己講『我而家就係咁蠟塌』，但係無所謂﹗如果克服到就可以體驗到更多，上富士山嗰幾日係近年最麻甩嘅幾日，因為無機會落妝自然唔會化妝，如果仍顧及『唔化妝好醜』就好麻煩。嗰幾日同一班唔識嘅香港人一齊瞓，十幾個人一間房都唔會計較咁多，即使去完廁所無得洗手，認識新朋友時都會照握手，細菌當補品，有乜所謂？有人認為女仔唔應該係咁，我只知放低包袱會得到好多，爬上富士山睇日出係人生必做嘅事，所以我OK﹗」
老公執到寶，娶了未去過美容院的女人
好多人羨慕朱生娶了個靚老婆回家，Yawen坦言老公直情係執到寶，因為好少花錢扮靚嘅佢幫老公慳返唔少錢，又係噃﹗Yawen︰「啲男仔見我個樣咁女性化，成日以為我係一定會帶紙巾出街嗰種人，可惜我從來唔帶紙巾出街，再者，我咁大個女都無帶過梳出街，因為我都唔梳頭嘅，有時用手指梳㗎咋﹗好多女仔好緊張護膚，要搽好多唔同嘢嘅，我係嗰種一款cream摔成面就算嘅人，所以咁大個女都未去過美容院㗎﹗ 做女仔嚟講算好慳，一般女人生日都想買個手袋， 但我從來唔買名牌袋，亦唔戴鑽石、首飾，呢一生人，除咗衛生巾，支出基本上同男人差不多，所以我成日同老公講你執到寶，從環保角度來說，都慳好多包裝，我算係功得無量，哈哈﹗」講到呢度，此時此刻嘅蔣雅文似乎幾proud of 自己嘅「男子氣慨」，我都想叫佢一聲「蔣雅Man」。
#蔣雅文 #十大最愛
1）食物︰酪梨 (即牛油果)
2 ）飲品︰氣泡水
3 ）歌曲︰〈言不由衷〉徐佳瑩
4 ）電影/電視劇︰《CLOSER》
5） 書/雜誌︰《恰如其分的自尊》
6 ）地方/店舖︰挪威
7 ）網站︰https://tasty.co/
8 ）顏色︰橘紅、白色
9 ）講嘅一句說話 ︰「Fuck it」
10 ）其他人點叫你︰店長
好𢯊女子︰
Yawen Chiang 蔣雅文 (心地日常及FERMENT STORE店主)
Facebook / 蔣雅文
Instagram / yawen_j
Weibo/ 蔣雅文YaWen