對Yukilovey (勞嘉怡)的第一印象，始於她成為本地獨立樂團 The Lee’s 主唱之時，2012年The Lee’s發表《白色太陽槍》專輯後便告解散，大學畢業後，Yukilovey隨即作個人發展。幾年過去，她坦言仍處於迷惘階段，為了摸索未來的路，今年年初正式跟舊經理人和平分手，真正獨立發展，佢話「想知自己一個做可以做到咩！有信心！好的！」
這次重新出發，Yukilovey希望是徹徹底底的改變，除了音樂風格上的轉變，佢仲話「我想好似水原希子咁，好正啊……」原來勞小姐心裡一直有個迷，想不通為何大家總認為她很斯文，「你覺得我係咁其實我唔係！」正如Yukilovey所講，情況或者就好似擁有天使面孔嘅水原希子咁，鏡頭後嘅生活似是平凡又麋爛，呢種矛盾令Yukilovey覺得好特別，你又點睇？
天使面孔麋爛生活
不能不用容光煥發來形容眼前的Yukilovey，常言道休息是為了走更長的路，剛結束長假準備重新出發的她，一臉自信及滿滿的正能量，我喜歡自信的人。現在的中長髮型比從前的長髮活潑，加上無約一身輕，此時此刻的Yukilovey語調輕鬆、步履輕盈！Yukilovey︰「唔知點解我一行出嚟 ， 俾人嘅感覺就係好文靜嘅女仔，大家好似以為我一定係去咖啡店、或者要喺窗邊被陽光射住咁攞創作靈感，其實唔洗表演或者同朋友hang out嘅時候，我係一個幾爽朗嘅女仔！我唔飲咖啡㗎，只會飲齋啡去水腫。我最鍾意去林村村口嘅士多仔飲杯啤酒，最鍾意飲青島，因為易入口，而且包裝都靚！飲酒係幾好嘅放鬆方法，紅酒、白酒、啤酒咩酒我都鍾意，只係好少會講出嚟，唔知點解到咗呢個年代仲有人會認為飲酒好壞，其實我只係想藉住飲酒放鬆吓啫！
嗯……我都唔識形容自己，可能係比較隨性啲嘅女仔，雙魚座本來就係鍾意遷就別人又覺得無咩大不了嘅星座！所以其實點樣我都無咩所謂，更何況我嘅太陽、月亮星座都係雙魚座，係個100% 雙魚女。今年係重新出發嘅一年，除咗工作上，我都好想大家更了解我，唔好再以為我係文靜小女生，我想好似水原希子咁，好正啊…… 外貌上，佢有天使面孔，但睇佢ig就感覺到佢嘅生活就好似好麋爛又好平凡，純粹幻想，如果我好似佢咁，擁有天使面孔麋爛生活，係好特別嘅化學作用，係我生活所沒有試過嘅，如果我生活係咁會幾有趣。」
有自己風格最重要
兩年多前，Yukilovey寫了一首〈尋找稜角〉，提醒自己不可磨滅銳氣，要堅持以歌曲來說故事。原來迷惘期持續良久，為了重新出發，她決定調節步伐，從頭再來過！Yukilovey︰「舊年壓力好大、皮膚好差，全年只做咗一隻歌，壓力大到迫晒啲嘢出嚟，我成塊面爛晒完全出唔到街，包你睇完即刻唔想影我，真係頂唔順要好好休息一段時間，與此同時，同經理人和平分手之後，2018年將會自己照顧自己，我會好專注做音樂！男友對我影響好深，雖然我同佢玩嘅音樂好唔同，佢地下到不得了，我就偏向主流，半年前佢隊band被邀請去德國表演，嗰次係非常inspired我，令我諗起玩音樂唔應該在乎主唔主流，如果真係好聽，無論係咩音樂、有無人唱，音樂都可以帶你去更遠地方。雞蛋蒸肉餅都係非主流，但係佢哋嘅音樂都可以去到冰島咁遠，令我反思『做乜仲喺度做埋啲×歌啫？』其實我可以諗遠啲，而唔係困獸鬥做埋啲無乜人聽嘅歌，所以好想從新開始，我決定要改變將來做音樂嘅路向，決定咗走就無咩可以輸。我知道自己唔係好靚聲、唱得好好嗰type，所以搵到自己風格最重要！」
有沒有發現，Yukilovey常將男友掛在嘴邊？不過這種老是常提起並非刻意曬命那種，看得出她是真心感激有這樣一個好男友。相信很多人都知道Yukilovery的男友是誰，但她仍再三叮囑我不要提起男友樂團之名，以免有抽水之嫌。Yukilovey︰「佢對我影響好深，但我唔想人哋覺得我抽水，所以都係唔好提樂隊名。而家成日一個人出show，如果錯咗一段就真係企喺度，一緊張無咗六成，所以100% ready都唔夠，要練夠200%！ 曾經有人問我，點解唔做啲主流歌儲多啲知名度賺吓錢先，但係我諗名利一定會沖昏頭腦，返唔到轉頭，一開始賺錢就停唔到，唔可能賺一堆錢再玩返另類。而家自付盈虧，整一首歌都好貴，要租錄音室、搵樂手……我都想知自己一個做可以做到咩，有信心，好的好的！」
肉玉子繪畫部start
Yukilovey︰「早前同男友到歐洲旅行，去過慕尼黑、柏林、荷蘭等地，無太周詳嘅計劃，通常去旅行只計劃住嘅地方。最滿足係逗留倫敦期間有機會成日睇show，倫敦好多酒吧地庫都係live house。(有無瘋狂購物？) 少少啦，男友話所有可以刺激創作靈感嘅嘢都鼓勵我買，所以我買咗一堆歐洲小朋友睇嘅雜誌啊！俾本歐洲小朋友睇嘅雜誌你睇吓，係咪好高質先？啲illustration好靚、quality好好，好羨慕嗰邊啲小朋友睇呢啲雜誌大，如果我都係睇呢啲雜誌大，我諗我會好開心好多。講起插畫，我最近開咗一個新 Facebook fanpage 叫 《肉玉子繪畫部 YYZ Drawing Dept.》，會定期上載唔同嘅畫作、小動畫或忽發奇想嘅歪理。而且我希望新歌嘅artwork都係全部自己搞，或者每一首歌都有一幅畫，咁最後出碟時就可以搞埋畫展，希望音樂和插畫可以同步發展」我問Yukilovey︰「既然有心搞fanpage，點解唔食住KOL喺市場個勢，好好做個歌手兼插畫家KOL? 佢好直接咁答︰「我唔多followers嘛，我又無買like，其實有啲KOL咁多followers又咁假，無人發現咩？」呢個問題我都唔識答，哈哈！
# Yukilovey #十大最愛
1）食物︰所有麻辣味嘅食物
2 ）飲品︰熱sake
3 ）歌曲︰我Spotify 有個playlist叫 “arrangement”，入面所有歌既嘅編曲全部都係我鍾意嘅處理手法，我想自己嘅歌都做到咁嘅編曲，所以邊聽邊學。
4 ）電影/電視劇︰《Black Mirror》, 《Atypical》, 《Stranger Things》
5） 書/雜誌︰松浦彌太郎嘅《100個基本》，荒井良二嘅所有繪本，《Casa Brutus》
6 ）地方/店舖︰談風:vs:再說
7 ）網站︰YouTube (我做音樂/動畫的技巧都在這裡學的)
8 ）顏色︰彩色
9 ）講嘅一句說話 ︰「我想瘦啊～～～」
10 ）其他人點叫你︰肉玉子
好𢯊女子︰
Yukilovey 勞嘉怡 (唱作人/ 插畫家)
Facebook / Yuki Lovey
Instagram / yukilovey
Weibo / Yukilovey勞嘉怡