攝影師 / 平面設計師 / 旅遊專欄撰稿人 / 兼職模特兒 / 生活選物店店主/ KOL …… 是時下流行的「Slash族」嗎？身兼多職的 Rita Chan周身刀張張利，多才多藝不在話下，就連樣貌亦屬常被邀拍廣告級別，厲害！更厲害的是，Rita直言「唔好俾我外表呃咗」，你以為身型嬌小弱不禁風的她搬張櫈都無力？事實是，每日開舖收舖、拉閘搬貨全部一手包辦！看她外表溫文加一身知性打扮，想必是陰聲細氣一族，原來Ta姐偶爾都會爆粗，激動起嚟要搵人掩住先識收口。今日Rita揭開神秘面紗唔係為咗自揭瘡疤，「吓！我都係正常人，做正常人會做嘅事啫，正如靚女都會痾屎，係咪先？」，你啱！
靚女都會痾屎
Rita︰「好多人睇外表都以為我係一個好斯文、或者琴棋書畫樣樣精通嘅女仔，其實真實嘅我係一個 – 硬漢子！哈哈！我由細到大都唔係一個好女仔嘅女仔，我會鍾意玩啲比較男仔頭嘅嘢，直到我長大，而家嘅性格都唔會係嗰種要著喱士花花裙嘅女仔，細個曾經鍾意shocking pink，但到目前為止都係覺得著全黑最舒服。
唔好俾我外表呃咗！我嬲嘅時候都會講粗口，可能因為我個樣唔似 (講粗口)，所以當我講咗一次之後，啲人就以為我成日講，哈哈！可能impact太大。有時坐喺位(店內的工作間)爆緊粗，但一見有客入嚟要即刻「dup break」咁吞返句粗口，因為我好大聲所以好驚，諗諗吓都好奇怪，點解我以前所有男友都唔講粗口？不過呢，我係需要講先講，唔係為講而講，咁有啲人真係唔x唔鬆化嘛，你明唔明？
好多嘢唔可以睇外表，個個見我好似好弱咁以為我連張櫈都搬唔郁，邊係啫！平日開舖收舖都係我負責，任何粗重嘢只要做得嚟一定係自己做，無得話因為自己係女人所以做唔到喎！我記得以前唔知邊本雜誌曾經俾個朵我叫『潮攝女』，之後就到『城市女孩』、『 City girl』同埋『文青』，哈哈！我就係我，普通人一個！」Rita話十個人當中有十個人一見到佢就以為佢好斯文，我咪就係嗰十分一囉！
天生不拘小節
我唔迷信，不過總覺得好多嘢似乎都可以被星座解讀，歌仔都有得唱「束縛不來如人馬座」，我認識嘅大部分人馬座男女，都真係幾不拘小節，而且不愛受束縛，包括佢。Rita︰「我應該算係一個不拘小節嘅女人，因為我係人馬座囉，哈哈，天生無得解！其實最麻甩、最無包袱嘅時候就係喺屋企，如果唔係開咗呢間舖 (Midway shop)，基本上我係可以接受自己一個禮拜唔化妝品、唔梳頭、唔洗面，因為唔洗見人嘛﹗而家日日留喺shop，如果有人尋仇我死梗！哈哈！平日食嘢我都無乜要求，講真好又一餐唔好又一餐，喺深水埗叫外賣，通常三十幾蚊有一大盒飯，盒飯大到可以食三餐，比較多叫雙腸蛋飯、涼瓜牛肉飯。
自己就好耐無煮過嘢食，而家用得最多係微波爐，哈哈！其實我啲笑聲好衰，成日要人remind我小心啲！雖然我份人好多嘢都無乜所謂，不過有時對住啲客難免令人洩氣，其實大部分客人都好nice，但總會有啲大姐好大力咁推開度門然後大聲問『呢度賣咩？』我好怕人哋問我買咩，間舖咁細一眼睇晒啦！唔通會係前面剪髮後面按摩嗰種舖頭？不過算啦，唔理得咁多！」
#Rita #十大最愛
1）食物︰明太子
2 ）飲品︰手沖咖啡
3 ）歌曲︰〈The Ghost of You〉Caro Emerald
4 ）電影/電視劇︰《Black Mirror》
5） 書/雜誌︰《若草 Wakakusa》
6 ）地方/店舖︰北歐四國
7 ）網站︰www.dezeen.com
8 ）顏色︰黑色
9 ）講嘅一句說話 ︰“To move, to breathe, to fly, to float, To gain all while you give, To roam the roads of lands remote, To travel is to live.”- Hans Christian Andersen (安徒生)
10 ）其他人點叫你︰阿Ta
好𢯊女子︰
Rita Chan 陳凱慈 (Midway店主/旅遊專欄撰稿人)
Facebook / RiTa Chan
Instagram / blackta
Text / Phoebe Chan · Photo/ Marie Anson · Assistant / Jack · Special thanks / Midway shop, The Spring is Here, Form Society