早陣子一位朋友說：「我唔食肉，我食素嘅！」，恕我無知，以往素食俾我嘅感覺等同淡而無味的食物，又或是無咩選擇可言，腦裡即刻想像到：打邊爐無得食牛肉、食日本嘢無得食魚生，諗起都慘……
但近年在IG 碌到愈來愈多好睇又好食嘅素食甜點店，你以為無蛋無奶甚至無麩質（Gluten-free）的純素蛋糕同傳統蛋糕無得比？事實係家陣嘅純素蛋糕或甜點賣相精緻不在話下，味道亦媲美傳統dessert﹗如果同傳統味道分別不大，但又健康好多，咁純素甜品咪不再邪惡囉﹗？做人都係直接啲好，既然估估吓，不如直接訪問三位「素」人女子，問下究竟咩風吹佢哋茹素、以及加入全職純素甜點師行列。雖然三位90後素食女子嘅作品風格及創業步伐迴異，但大家目標一致，都係想更多人愛上素食，好，即聽佢哋分享一下點樣用我行我「素」嘅方式創一番事業﹗
The vege lab
素食實驗 · 大學畢業生即掀素食革命
因為Visual好重要，所以當看到網店The vege lab的甜點靚相時，總會忍不住一直loop下去，愈睇愈餓。今年5月才剛畢業於香港大學社會科學學系的Yuki，自從兩年多前因健康因素開始素食習慣，去年到澳洲交流，發現當地的素食非常吸引。既然緣份到了，Yuki也不想再等，因此在去年9月創立veg.dining.lab (現已改名為The vege lab)。Yuki︰「實驗嘅意思係想挑戰一啲大家本身有嘅傳統觀念，例如好多人覺得蛋糕一定有蛋，但其實可以用其他材料模仿類似口感。我想提供更多素食選擇俾大家，即使唔係素食者，對蛋、奶敏感嘅人都可以食。」
基於對素食的滿腔熱誠，Yuki開始自學製作全素甜品，花盡心思不斷嘗試及改良食材，務求為客人帶來更多驚喜選擇。 問到曾否遇過困難令她萌生放棄的念頭，年輕輕輕的Yuki斬釘截鐵地say no︰「無﹗反而係要取捨味道定係賣相行先比例難，所以我有時會迫自己整啲健康得嚟賣相仍然吸引嘅甜品。」對我嚟講，Yuki最令人欣賞嘅地方係佢嘅細心、貼心，年紀輕輕的她明白凡事因人而異，Yuki︰「如果有客人問起，屋企人有糖尿病或者老人家食唔食得呢，我會坦白講明自己用咩成份、份量等佢再衡量。我唔可以話純素蛋糕係健康，但如果從脂肪量、膽固醇角度考慮，無蛋無奶無高脂嘅cream已經好唔同，另一方面，我唔用白糖，會用椰糖、龍舌蘭蜜等比較健康嘅糖。」畢業後Yuki去了一趟旅行，最近回港即加入BiteUnite共用廚房，方便製作甜品及辦工作坊、假日更會在BiteUnite寄賣甜品，希望令更多人可以嘗試到到素食之美味。
素食年資 : 2年半
FB/ thevegelab
IG/ veg.dining.lab
Website / thevegelab.com
BiteUnite, G/F, 15 Lung On Street, Wan Chai
The vege lab素の甜點推介
青檸芒果生機蛋糕
店主Yuki推介的生機蛋糕（raw cake），即是無經高溫烹煮的方式，可保留食物營養。賣相及味道一致呈現好fresh 嘅感覺，建議Keep住低溫冷藏令口感更佳！
三葉草抹茶朱古力果仁撻
濃濃的抹茶味碰著黑朱古力，食到香濃朱古力味但竟然完全不失茶香味，加上脆脆餅底同面層的果仁，口感豐富，正啊﹗
伯爵茶小蛋糕
口感較似pound cake的蛋糕，鬆軟程度剛剛好，特別欣賞茶味夠但唔會好甜，輕食不二之選！
Moono
和風甜點 · 視覺與味覺的享受
對於Moono，第一印象是和風與法式甜點的混合，簡約精緻的賣相令人一見難忘，相信這就是源於主理人Tina對美感的追求。畢業後一直從事Art Direction工作的Tina視甜品如藝術品，除了對味道及口感的要求，同樣重視賣相、包裝設計及上載到社交平台的宣傳照等關於美感的範疇。兩年前開始吃全素的Tina，由於體質問題在中醫的建議下開始重吃海鮮，現在是蛋、奶素食者，Tina︰「其實我唔想規定自己食咩唔食咩。」Tina認為每人都有選擇權，所以佢希望為素食者提供更多選擇。
自從去年開始為咖啡店Common Room & Co.製作素食蛋糕，令她開始有全職製作甜品的想法。去年九月開始加入法式甜品網店、近日到日式素食私房菜兼職，最近又報讀了Physalis Vegan的遠距離教學課程……大概因為夢想的推動，才會有動力不停做、不斷學。原本打算今年年尾才全職製作vegan pastry的Tina，在攝影師好友Miss Bean的鼓勵下，終於在3個前創立了Moono。Tina︰「我想做好fine的甜品，賣相似法式甜品但係係素食，仲要有啲和風感覺。所以我創作嘅甜點係比較簡約、留白，唔需要將所有嘢直接表現出嚟，會將啲涵收埋，從外面睇估唔到咩味。」對美感要求很高的Tina認為下一步是要fine tune所有甜點的精緻度，以及在設計、包裝上再下苦功。說到底，就是因為骨子裡有一份藝術家的執著。
素食年資 : 2年
FB/ moonohk
IG/ moono_hk
Moono素の甜點推介
豆乳雪球
取材自日式雪球，全愛豆之人絕對會秒速愛上，細細粒卻含豐富豆乳味，再配合少少杏仁味，令人食唔停口！
海鹽朱古力馬卡龍
用可可油製作的macaron，輕量海鹽帶出淡淡鹹味，驚喜嘅係又夾到濃郁黑朱古力味，唔似一般馬卡龍得個甜字。
朱古力唧花曲奇
Tina對食物的線條及賣相都有很高要求，線條優美的朱古力曲奇味道香濃，質感亦相當鬆脆。
The Unique Peace
創牌8年 · 感激來自網絡世界的溫暖
返學、放學、整餅、返工，放工、整餅……好容易因為一個忙字而令人難以持之以恆，最後妥協做返個踏實普通人。26歲女生曉芙自十年前因健康關係，在中醫的建議下開始茹素，兩年後連蛋、奶也不吃，展開純素飲食習慣。十多歲的少女放下蛋奶之後，發現原來可選擇的甜品少之又少，可以點？自己整囉﹗相比前面兩位受訪者，同樣係90後嘅曉芙已經堅持了8年製作vegan dessert之路，但原來佢都係今年先至開始全職做純素甜點師﹗自從8年前創立The Unique Peace，由學生時代到畢業後任職研究助理，曉芙一直為製造素食甜點而堅持，無論幾忙都好，寧願縮短休息時間，都要用來接order、整甜品、再交收。兼職經營一門生意確實唔容易，但每次收到客人的稱讚，嗰份滿足感令佢覺得點都值啊！
曉芙︰「最記得有個巴基斯坦藉客人，因為佢個女係素食者，所以佢幾年前已經同我訂蛋糕，訂完之後佢會喺好多個唔同嘅素食網站留言讚我整嘅蛋糕好食、店主又好nice啊、下次會再訂啊﹗有時聖誕新年會寄卡俾我，有少少朋友嘅感覺，都令我好感動。」為了令更多人認識純素，幾個月前曉芙終於決定將興趣發展成全職事業，投放更多時間製作甜品。曉芙︰「屋企地方太細，希望嚟緊可以開設屬於自己嘅workshop或者小型café，用較專業的器具更用心製作每一款甜品。」
素食年資︰10年
The Unique Peace素の甜點推介
紅絲絨蛋糕
熱買之選除了櫻花蛋糕，還有這款紅絲絨蛋糕，賣相和質感與傳統紅絲絨蛋糕無異，不過蛋糕較易散開，食嘅時候可能會有啲狼狽！
榛子朱古力冬甩蛋糕
話明純素自然沒有加牛奶，冬甩圈上純鋪滿厚厚黑朱古力，細細粒都唔會太heavy啫！
檸檬椰子、榛子咖啡杯子蛋糕
無論外形與味道均與傳統cup cake相約，據稱是散水餅熱門之選。