「漢」vs「娜」，一剛一柔的名字組合，儘管只是藝名，已確切地反映了此女子剛柔並濟的個性，她是Hanna (陳漢娜)。
Hanna未至於係嗰種第一眼就攞滿分嘅標緻美人，但係貌似日本妹的和風氣質確實令人一見難忘。從模特兒起步， 一個㗎味濃的東海堂蛋糕廣告叫人印象深刻，到後來赴日發展模特兒事業，在喜歡的國度等待發圍機會，即使發展未算順利，在日本工作的經驗也叫Hanna獲益良多。佢話無諗過初拍電影便有機會與古天樂、林家棟等前輩合作；無諗過可以憑《殺破狼．貪狼》入圍電影金像獎「最佳新演員」；更加無諗過今年有機會拍電影《G-殺》擔正做女主角、同樣無諗過獲超級名牌Christian Dior賞識，邀請她到巴黎欣賞時裝展，可以同最愛劇集《Stranger Things》主角Natalia Dyer 及Charlie Heaton、時尚名人Alexa Chung、名模Arizona Muse同場。
Hanna話好多人齋睇樣覺得佢好文靜、好少女，但真實嘅佢其實係 _ _一名，表裡不一，即係演技好？咁 _ _ 係咩呢？ 留俾讀者自行判斷啦﹗
做女主角無包袱
無諗過自己咁幸運，但唔代表無準備，Hanna知道機會往往留給有準備的人，自言「有一萬個鍾意演戲」嘅佢近年積極裝備自己，等待機會來臨。Hanna︰「剛剛拍完電影《G-殺》，今次係第一次做女主角，難得遇到好劇本，同埋一班好夾嘅crew(團隊)，我真係好好彩﹗《G-殺》用好多唔同但有關「G」字去串連一個故事，有啲位超現實但係又好寫實，題材又牽涉到敏感嘅社會議題，我覺得好夠薑，估唔到咁都夠膽講，所以我都好鍾意個劇本﹗今次嘅角色主要係講我同陸駿光會發展師生戀，有少少挑逗老師嘅戲，我自己又未試過師生戀，對呢樣嘢無感覺，所以演起上嚟都有啲難度。 另外，劇中有個朋友患有亞氏保加症（Asperger syndrome），所以拍之前都睇咗好多關於亞氏保加症嘅資料，試想像你最好嘅朋友患呢種病係幾慘，呢部分好難演。」
既然咁難演，你係點樣克服演技上嘅不足？「我有跟甄詠蓓老師學演戲，上佢堂好inspiring (啟發性)。愈來愈覺得電影好神奇，當你做一個演員，可能會將自己嘅感情好赤裸咁爆出嚟﹗我諗我有一萬個鍾意演戲﹗」話晒模特兒出身，化靚妝、著靚衫、影靚相，會唔會有些少偶像包袱先？Hanna︰「我完全無包袱，我係嗰啲從來唔會就鏡頭嘅人。當你真係做緊嗰場戲，你個入會好自然投入，係唔會諗我要點樣先靚。一個charm嘅演員唔係因為佢係靚女或靚仔，真心融入角色嗰種演員係最charm。因為我唔睇鬼片，所以都有諗過如果真係要扮鬼會點呢，哈哈﹗不過我覺得演笑片係最難嘅，要令人笑好難，演員本身要好有幽默感先得﹗」
我內心好唔少女
Hanna熱愛演戲，佢話︰「電影造型真係好勁，只要換個髮型、化個唔同嘅妝，同埋著返角色設定嘅衫，一個人可以完全變成另一個人﹗」事業上，外表散發著濃濃少女氣息嘅Hanna高呼「內心勁唔少女﹗」原來嬌柔軀殼下嘅Hanna硬淨過你我他，就算唔走入電影世界，佢都係表裡不一、判若兩人。
Hanna︰「好多人話我個樣好少女，但係真實嘅我勁唔少女囉﹗ 譬如我覺得自己係一個幾硬淨嘅人，即係我可以一個人獨立，我好驚嗰啲好女仔、好煩嘅女仔。我都知望住我個樣會覺得好矛盾，唔識我就會覺得我好靜、好女仔、唔恰得咁啦﹗識我就覺得我 xx 啦﹗呢個要cut咗佢﹗但係我用唔到其他形容詞比呢個更貼切﹗即係好似好白癡咁囉，我比我啲朋友粗魯多一百倍﹗好慘啊﹗個樣決定咗50%﹗我同人講我跑步，啲人竟然話估唔到，我唔似會跑步﹗我都唔明，跑步之嘛﹗做個運動都唔俾﹗哈哈﹗成日話『你唔似喎﹗』反而我話我鍾意睇書大家就覺得好正常﹗其實我都鍾意打泰拳，教練都feel到我幾有耐力，不過而家就無打喇﹗」
憎無方向感嘅人
問Hanna鍾意乜、討厭乜，佢即時話︰「諗鍾意乜嘢好易，憎啲咩好難。」有幾難啊？明明一講起最憎啲咩就滔滔不絕……Hanna︰「我唔止鍾意演戲、仲好鍾意睇戲。仲有去日本旅行﹗可能因為由細到大都有畫開畫，所以我都鍾意畫畫，大學嗰陣讀design，多數用電腦 ，反而少咗畫畫。我都鍾意睇書、跑步，好多興趣都係自己一個都可以做嘅嘢，跑步一定係跑街，因為我鍾意睇風景、慢慢諗嘢 。我都飲酒，但唔係狂飲嗰種，突然有一日唔想再食肉，可能因為覺得動物好慘，我都會煮少少嘢食，例如煮吓咖哩飯、味噌湯，鍾意煲劇，NETFLIX、日劇都睇，喺香港唔出街咁滯﹐因為香港無咩地方好去。」啲嗜好都幾健康，加上你又食素，睇你個樣應該唔食零食。Hanna︰「我似唔食咩？我好鍾意食零食㗎﹗食齋嘅人都可以好唔健康 ﹗都話無樣睇㗎啦﹗我都鍾意食零食、薯片、朱古力。」
係嘅，世上好多嘢無樣睇，正如單看外表點會估到Hanna都曾經係爆粗band友。Hanna︰「讀大學嗰陣有學打鼓﹗不過停咗一排無再學，我都好想pick up返，細個成日幻想自己夾band，但係而家做咗演員。最近想學車，啊﹗我諗到我最憎啲咩？我最憎無方向感嘅人﹗有時同啲朋友出街，唔係好明點解佢哋左右都會行錯，救命﹗點解可以香港都唔識路？我係好有方向感嘅人，就算嗰個地方只去一次，我都會好認得。不過我認識嘅好多女仔都無方向感囉，我係唔明㗎﹗所以通常我都會做帶路嗰個，佢哋唔想睇地圖唔想煩『有你真係好喇﹗可以帶路。』我都好憎青蛙，好驚啊﹗好核突﹗ 個樣好得人驚，怪獸咁﹗仲有，唔鍾意西芹、韭菜呢類好爽嘅菜，一咬就毛管戙﹗其實我都我好鬼矛盾㗎，有時鍾意自己一個人，有時又好鍾意一大班人，我係好極端、好矛盾、好煩。哈哈﹗」
很愛很愛你日本
隨著在影壇演出的機會愈來愈多，無論外貌及打扮亦具時尚感的Hanna在時裝界亦漸受曯目，月前更應Christian Dior之邀，到巴黎參與Dior Couture 2019 Cruise 春夏時裝展， Hanna亦表示非常興奮︰「由細到大都好想去歐洲睇fashion show，機會終於來了，所以好開心啊﹗雖然喺Paris每一日都好忙，但好滿足，參加完時裝展再完成拍攝工作之後，我留咗喺巴黎玩幾日再去倫敦，趁仲有時間玩，想飛就飛﹗」儘管去歐洲睇fashion show係兒時夢想，但天生一副日本妹模樣嘅Hanna最愛還是日本﹗Hanna︰「唔知點解釋，我真係好鍾意日本，無論係旅行或工作，總之一有時間我就會好想飛過去。之前喺香港讀咗年半日文班再自學一段時間，加上上年喺日本住咗三個月，日文進步好多，基本上而家可以同日本人簡單溝通，對於喺日本工作方面好多﹗
去日本唔一定淨係行街，我去旅行係鍾意感受一個地方，所以去東京都會揀去近郊或遠啲嘅地方周圍行。如果日本嗰邊有shooting，我就會飛過去。日本人同香港人做嘢真係有好大分別，因為呢一、兩年都同日本不同團隊合作好多次，我覺得喺日本做嘢會舒服好多，例如shooting前會有工作人員問定你唔食乜嘢，因為佢哋一定會完善地安排早餐、午餐，當佢知你係食素嘅，就會安排好豐盛嘅素食到會，而且每朝都有咖啡、茶水、可能係好微細嘅事，但會覺得佢哋係好想大家好開心。加上大家好有禮貌、入到studio大家都會自我介紹一次，但係喺香港做嘢，行入studio之後成日好似無乜人理，然後就化妝、影相，可能你同個攝影師一句嘢都無講過，大家無乜溝通就要不停影﹗仲有，日本人好有效率、影相好快﹗如果影十套衫，可能喺香港要影十個鐘，喺日本影兩個鐘就夠。攝影師覺得呢張相有就轉下一套，影過一次廣告係橫浪修負責影，真係超級快，有就轉﹗日本攝影師影夠就算，香港團隊好似點都要用盡你咁，有時間剩？繼續影﹗」
電影《殺破狼．貪狼》的韓國版宣傳海報。
早前獲Christian Dior邀請到巴黎欣賞時裝展，可以同最愛劇集《Stranger Things》主角Natalia Dyer 及Charlie Heaton合照。
Hanna不時到日本拍廣告或為日本雜誌擔任模特兒，早前便為潮網houyhnhnm.jp的T恤特集拍攝造型照。詳情請參閱 ︰https://girl.houyhnhnm.jp/fashion/all_you_need_is_funny_tshirt.php
好𢯊女子︰
Hanna Chan 陳漢娜 (Artist / Model )
Facebook / Hanna Chan 陳漢娜
Instagram / hannachanx
Weibo/ 陳漢娜HannaChan
#Hanna #十大最憎
1）食物︰西芹、韭菜
2 ）飲品︰ 汽水、啤酒
3 ）歌曲︰沒有
4 ）電影/電視劇︰鬼片
5） 書/雜誌︰沒有
6 ）地方/店舖︰ 沒有
7 ）網站︰沒有
8 ）顏色︰ 沒有
9 ）講嘅一句說話 ︰點行？ (因為最憎無方向感嘅人)
10 ）其他人點叫你︰無
#Hanna #十大最愛
1）食物︰ 生果
2 ）飲品︰ 咖啡
3 ）歌曲︰The fin.的歌
4 ）電影/電視劇︰樸贊郁/ 岩井俊二/ 是枝裕和/ Xavier Dolan/ 王家衛/ 楊德昌/ Wes Anderson 創作的電影，以及電視劇如坂元裕二編劇的日劇, 《 Westworld》,《 Stranger Things》及《 The end of the fucking world》 。
5） 書/雜誌︰日本文學/雜誌
6）地方/店舖︰ Coffee Shop/ 古著店
7 ）網站︰Pinterest
8 ）顏色︰ 黑白/ 紅色
9 ）講嘅一句說話 ︰沒有
10 ）其他人點叫你︰ 叫啱我個名﹗Hahaha!