自多年前一個鋪天蓋地式的相機廣告，笑起來露出兩顆虎牙的顏卓靈 (Cherry) 早已令人留下深刻印象。自此廣告一個接一個，更開始接拍電影，2012年憑電影《大追捕》獲香港電影導演會頒發「2012年度新演員獎」。其後首次擔正做女主角的《狂舞派》叫好又叫座，Cherry也從新晉演員一躍而起獲台灣金馬獎及香港電影金像獎的最佳女主角提名，從此穿梭中、港、台三地努力發展電影事業。去年大學畢業後更踏進樂壇，成功摘下多個樂壇新人獎。來到2018年，Cherry推出首張廣東專輯 –《Primary》，唱出成長的印記。
入行這些年似乎也順風順水，而且與負面新聞絕緣，唯一緋聞是前年被拍得與演員白只在平民麵店撐枱腳，其後Cherry也大方承認其男友身份。是的，Cherry直言很幸運︰「慶幸我的經理人從不會強迫我做不喜歡的工作。」入得娛樂圈，十個有九個高呼身不由己，有幾多個可以好似Cherry咁想低調就低調？凡事有得必有失，保得住privacy，但論曝光率及知名度，當然仲有好多進步空間。「我知道太過低調對藝人嚟講唔係好事，但係我因為咁而活得舒服，我仲想再舒服啲﹗」說得理直氣壯。試問有幾多個藝人夠膽講究work life balance，我最欣賞也最羨慕顏卓靈，就是這一點。
入行就係一種矛盾
訪問當日，相約Cherry到木工工作室邊整木製香薰座邊做訪問，佢話最鍾意遠離人群，靜靜做喜歡的事，好好放空。我話︰「睇唔出喎﹗識你幾年，每次訪問你都好樂意分享，不停講不停笑，仲要由頭笑到尾……」佢話佢的確好樂意分享，只係本身比較慢熱，而且係一個幾矛盾嘅人。Cherry︰「我係少少矛盾嘅一個人，其實我而家要做呢一行已經係好矛盾，因為我鍾意privacy (私隱) 、 鍾意生活 ，唔想太high profile (高調)，但做嘢又唔可以唔high profile，所以我選擇一條比較難行嘅路，就係用作品去high profile，不過要遇到好作品、演得好，再用作品去說話會耐好多。我會喺悲觀情況下樂觀，譬如明知道人會死 ，你點樣了解死亡咪點樣活著囉，無理由因為要死而每一日喊住過﹗
入行之後見識到呢個花花世界，有人脾氣可以好差，有人EQ可以好高，有人會好有階級觀念， 咩都有，令我學識『原來可以咁㗎？好多嘢都無乜所謂喇﹗』最近睇到一篇關於《大配樂師》嘅影評，好多謝作者有讚我，佢仲話顏卓靈好低調，低調到一個姿態係完全唔似曾經提名過金馬、金像獎，令我思考『咁我係唔係應該高調啲呢 ？』但係因為低調，我活得好舒服，我仲想再舒服啲﹗仲想再活著多啲﹗順其自然囉﹗」做人好多時就係咁矛盾，聽過好多演員講，拍戲一大矛盾位就係想對手係靚仔靚女但又怕佢唔識做戲，對於呢一方面，Cherry斬釘截鐵咁話︰「如果外表同演技唔可以並存，點都係同演技派合作好啲，完全係唔同感覺㗎﹗同非演技派合作就好似打個乒乓波過去無彈返過嚟，但係我仲要係咁打啲波過去，但係同演技派合作，好自然你打過去佢又打返返嚟，我哋互打，一粒波可以打好耐，而且可能會有火花﹗」
社交網絡令人好攰
是次訪問Cherry，連同對上兩次訪問Asha及Hanna，筆者將這三部曲視為「我最憎乜乜物」系列，除了問及大家的近況，最想知道好𢯊女子們討厭什麼。Cherry話︰「憎一樣嘢好攰，因為需要energy去憎，所以好多時唔鍾意就唔去接觸，令自己不至於討厭。」講吓講吓，佢不由自主咁講起唔鍾意社交網絡，仲要係幾討厭嗰種。
Cherry︰「唔鍾意社交網絡囉，本身我幾唔想同陌生人社交。雖然我而家仲有keep住有post嘢，但係我隔一排就會delete晒個app，因為我一有呢個app就會狂睇，好似唔係好知自己做緊咩 ，對眼又好攰 、思緒又好攰，delete咗啲社交app嗰一排好有活在當下，好知道自己做緊咩，想要咩，各方面sense都好清晰﹗可能因為我覺得嗰樣嘢係好似商品咁經過修飾，養份唔多，再加上愈來愈多人睇住你嘅social media ，大家都係將最靚最好最開心 最值得曬嘅嘢擺上去 ，好多人都咁樣做，多得滯﹗」
我問Cherry︰「但係作為粉絲，可能我會希望透過社交平台了解多啲你同埋你嘅生活。」Cherry恍然大悟︰「啊，你又講得啱。但係我對privacy係捉得比較緊，唔想喺社交平台分享太多，如果我想同大家講嘢可以出書，雖然我都唔知幾時再出書。如果好開心我唔會特登講出嚟，因為我已經enjoy咗嗰一刻。我會想我啲粉絲欣賞工作上嘅我，我亦唔介意俾佢哋知真實嘅我係可能有啲分別嘅，因為我唔習慣喺social media分享太多，所以今年成立咗fans club『車厘子軍團』，大家如果鍾意我可以入會，出嚟聚會面對面傾計仲好啦，可以3D見到我噃﹗」
容易開心順其自然
訪問過程中，Cherry提過好多次順其自然，係咪真係可以咁take it easy先？Cherry︰「我唔鍾意化妝，平時著得好hea，即係好似頭先喺屋企出嚟咁就係T恤加闊褲，夏天嗰陣著涼鞋。最唔鍾意著高踭鞋，因為好痛啊 ，有啲人叫我拎對高踭鞋返屋企行行下就會熟，但係試咗咁多年都仲係覺得好痛。」不用工作之時，Cherry打扮隨意，以舒適自然為主。面對生活上很多細節，Cherry都可以順其自然，但講到環境，佢話好驚噪音，噪音會令佢好唔自然，因為佢好需要空間去專注或者獨處。
Cherry︰「我好唔鍾意噪音，好怕啲人講嘢好高頻、好似機關鎗咁，之前有個助手就係咁，我好唔鍾意，但係因為佢性格好可愛所以我包容咗呢件事，哈哈﹗有時唔想俾反應真係會唔俾，望落去好似黑面其實我唔係。我會嬲﹗但係好快無嘢 ，可能嬲嗰吓好似好激動，會講晒所有理據點解嬲，但可以幾個鐘就無嘢，幾個鐘算長喇，有時可以幾分鐘或者下一分鐘就無嘢﹗」曾幾何時，有人話顏卓靈似薛凱琪、又有人話佢走玉女路線。Cherry︰「每個人出道嗰陣都好難令人記住佢個名，可能當時有啲人真係覺得我哋似樣啦，有時工作上見到我哋都有傾偈，好彩佢都唔介意咋﹗好多嘢日子耐咗就自自然然無人記得，而家都無人話我哋似啦﹗不過真係唔記得有人用玉女形容我，玉女﹗玉女﹗我似玉女？我諗唔到周慧敏好似我咁搞笑會點﹗對住朋友我就好似一個笑匠咁，即係白痴起上嚟大家會心諗『做乜嘢啫﹗』咁樣囉﹗總之成班女嘅時候呢佢哋就成日笑我﹗哈哈﹗」Cherry一直笑，笑咗好耐都唔停…… 我問佢「你覺得你算唔算好易開心？」Cherry︰「我超容易開心，嗰種開心係愈少嘢愈好，我唔需要party，總之靜靜哋、唔好有噪音就喇﹗」OK﹗收到，唔好嘈﹗
好𢯊女子︰
顏卓靈 Cherry Ngan (演員/歌手 )
Facebook / Cherry Ngan 顏卓靈
Instagram / Cherrysavor
Weibo/ 颜卓灵Cherry
#Cherry #十大最愛
1）食物︰ 煎薯仔粒
2 ）飲品︰ 熱檸蜜
3 ）歌曲︰〈I’d Rather Dance With You〉by Kings Of Convenience
4 ）電影/電視劇︰《黃金花》
5） 書/雜誌︰《挪威的森林》
6 ）地方/店舖︰Yoga studio
7 ）網站︰K-Fit, Carousell
8 ）顏色︰ 白色
9 ）講嘅一句說話 ︰「係啊﹗ 」(我鍾意讀成 “hea”啊﹗)
10 ）其他人點叫你︰ 靈靈、Ling Ling
#Cherry #十大最憎
1）食物︰ 凍嘢
2 ）飲品︰凍飲
3 ）歌曲︰〈小蘋果 〉(但都可以帶來歡樂)
4 ）電影/電視劇︰無
5） 書/雜誌︰無
6 ）地方/店舖︰ 鬧市、好多人好多篋嘅地方
7 ）網站︰無
8 ）顏色︰ 青加紫色撈埋
9 ）講嘅一句說話 ︰唔鍾意comment人哋、唔想hurt到人
10 ）其他人點叫你︰ 好陌生咁「阿Cherry啊﹗」