由細食到大嘅桃哈多粟米條，最經典當然係紅色包裝嘅焦糖味，而桃哈多算係我食過覺得最好味又最易接受嘅香口脆卜卜甜味零食！不過隨著時代轉變，零食都要追得上潮流，所以桃哈多亦因應食物或飲品潮流推出更多元化嘅味道同款式，例如朱古力、士多啤梨、抹茶、芝士蛋糕、紅豆煉奶、楓糖牛油和薄荷朱古力味等等，幾乎講得出嘅味都有，而且味道都好少出事。
呢個日本限定懷舊橫丁商店街系列桃哈多，淨係包裝已經夠出色，採用昭和時代復古設計，共有熱班戟和咖啡牛奶兩種味道。熱班戟就食正近日嘅班戟熱潮，雖然佢無震騰騰同軟綿綿嘅梳乎厘口感，亦唔知點解叫熱班戟味（因為唔熱），聞落同焦糖味好相似，食落牛油味感覺重啲，口感同樣鬆脆，不過不失，可以止住條班戟癮先。
日本人去錢湯（即澡堂）洗澡暖暖身子後，慣常也會喝杯牛奶才離開。而呢包錢湯の定番咖啡牛奶味桃哈多，咖啡香味撲鼻，香甜牛奶味中和咖啡的苦澀味，食落有陣淡淡咖啡味，唔算濃，讓大家可以輕輕體驗一下經典的澡堂味道。適合唔飲咖啡但又想試吓咖啡味零食嘅你，不過咖啡怪就可能會有啲失望啦！
Price︰各$9.5│ Shop：各大759阿信屋有售