Co-working Space（共享工作空間）近年在香港開得成行成市，實際上共享工作空間是由外國傳入的嶄新概念，起初是以商用為主，讓沒能力設立辦公室的人或公司，租用開放式的工作間，為創業者提供成本較低、自由度較高的工作環璄，的確好啱地少人多租金貴嘅香港。其實點止創業者無地方做嘢﹗香港人，無論讀緊書、做緊嘢、甚至搵緊工……大家都好需要－空﹗間﹗
漸漸地，市面上湧現多間環境舒適、設施齊備的Co-working Space，不是月租形式的商業共享空間，而是非會員制度的時租形式，更適合大眾。唔止愈開愈多，仲愈開愈就腳﹗好𢯊小編成日聽朋友講「喺共享空間做嘢舒服過喺屋企」，到底有無誇張？早前我哋走訪多間Co-working Space，發現大部分都真係幾好hea，安靜得嚟又有別於自修室的死寂氣氛，最重要係無屋企張床呢個終極誘惑！想搵地方hea又唔想hea搵，希望本文可以幫到你﹗
1
glue咕嚕館
灣仔星街中的避世空間
相信大部分有去過共享空間嘅香港人都聽過溫室 (Desk-one)之名，Desk-one 開業至今已經兩年，運作模式明顯比同業成熟。這間隱身於灣仔星街小社區之中，開業只有兩個多月的glue，是Desk-one 的第四間分店。
香港大多共享空間都是置身於高樓大廈之中，這間門面猶如café般精緻亮眼的glue卻座落於品味小店匯聚的星街小巷盡頭，港鐵金鐘站F出口步行數分數便到，算是很就腳﹗明明置身於鬧市之中，但繞過街角、走過樓梯後，感覺就像走進與世隔絕嘅次空間，真正旺中帶靜！
獨立空間 方便包場
唔止門面吸引，踏入glue的一刻已能感受到一陣好好hea的氛圍。閱讀空間擺放著舒適的沙發座位和靠窗吧枱，很多人喜歡揀吧枱，邊望著窗外街景邊做嘢確實係幾享受，但一般吧枱往往配以高腳櫈，坐無幾耐就會因為「吊腳」而坐得唔舒服甚至腳痺！但glue竟細心地在吧枱設置高腳櫈及正常水平櫈，供不同客人不同選擇，想點坐就點坐！
此外，店內亦有靜修室、三間不同裝潢風格的獨立房間、室外露台，以及該店主打的music & event lounge，務求打造一個可以將表演者與觀眾近距離接觸的空間，此空間專供租場使用，平日不對外開放。合夥人Kenneth指出以往其他分店曾因包場活動而導致店舖需暫停開放，的確會對某些客人帶來不便，但新嘅包場空間便可以為客人提供更多選擇。
要乜有乜 設備齊全
從收費價格以及選址地段，可看出glue針對附近寫字樓的白領上班族或追求生活質素的一群。雖然收費較一般共享空間略為昂貴，但入面可以話係要乜有乜，Wi-Fi、獨立插座、打印掃瞄服務、免費零食飲品等等，還有Staff幫忙提供的手沖咖啡和花茶，想頹食亦有提供杯麵可買，想嗌外賣又提供整理好的外賣簿，想自備外帶食物慢慢嘆又有微波爐可供翻熱，想出去食又有儲物櫃擺放個人物品，設備相當齊全。比較筆者之前去過的Desk-one 銅鑼灣分店，最抵讚係glue廁所設於店內，而Desk-one 銅鑼灣分店的廁所則設於上一層，咁去廁所就唔洗行上行落咁麻煩啦！
glue （by Desk-one）
地址：灣仔電氣街地下1A號舖 (港鐵金鐘站F出口)
電話：3496 5150 營業時間：09:30 – 22:30
收費：$50/一小時；$98/三小時；$128/全日
查詢︰http://www.glue.hk/
2
木・讀
日系禪修風格包圍的寧靜處
位於觀塘的木・讀就喺APM商場對面，地點算是相當方便。一進去就被以木為主的裝潢吸引，還有溫暖的燈光。全店分為自修室、梯座閱讀區、榻榻米會議室及咖啡吧四大區域。
自修室內位置不多，反而最為吸引的是靠窗的梯座，旁邊有整面牆的書櫃，書的種類由文學小說到科技、金融類都分門別類放好。問創辦人Michael點解以木為主題，佢話：「木材比石屎有溫度，想以日系禪修嘅氛圍讓客人嚟到可以放慢腳步，上嚟唔一定係讀書或工作，可以只係拎一本書靜靜哋睇，或者喺度休息都可以。」
Blind Date With A Book
筆者認為木・讀最特別的地方，是書櫃有一個Blind Date With A Book的小角落，店主Michael鼓勵客人損贈舊書，他參考了熱門書評後會精心挑選二手書籍，希望以blind date形式給書本第二次生命，用花紙包裹書籍，寫上幾個形容詞，讓客人就這樣與書本進行一場盲目的約會！
即磨即沖 自助咖啡
咖啡吧不止放置著各式各樣的零食，令我覺得喺呢度花$30/一個鐘最抵嘅係，這裡除了供應一般的咖啡機即沖咖啡，更可以無限添飲即磨手沖咖啡！不過製作手沖咖啡是以自助形式供應，一般人未必識玩v60 pour over或aeropress，但咖啡愛好者就可以過下手癮！創辦人甚至歡迎客人帶自己鍾意的咖啡豆嚟泡製咖啡。茶方面亦有創辦人推薦的茶葉品牌，共5款茶包，相信一定有一款啱你飲。
木・讀
地址：觀塘巧明街116-118號萬年工業大廈10樓D1室
電話：5543 6687 營業時間：10:00 – 22:00
收費：$30/一小時；$75/三小時；$105/全日
查詢︰https://www.wooderspace.com/
3
草坪 Chill – Place
充滿藝術氣息的休閒空間
去年年尾才開張的草坪 Chill – Place位於黃埔區，地點唔算非常就腳，但步出港鐵站後行4分鐘左右就到，都算方便。穿過吵鬧的舊區，上到去卻是另一片寧靜的景象。全場分有窗邊高枱、沙發休閒區、獨立的自修室，還有兩間會議室，設備齊全且貼心，自修室內每個位置設有獨立插座，甚至配有備可調節的護目枱燈，坐位不是膠板櫈，環境相當安靜舒適。
客人至上 人情味濃
筆者到訪當日，爸爸級店員黃先生在場招呼，採訪時面帶微笑說：「我哋嘅客人大部分嚟過都話好鍾意呢度到個氛圍，佢哋好鐘意周圍坐，諗唔到嘢又會周圍行下，完全唔會覺得拘緊。有啲客甚至出去食嘢都就咁放低啲嘢喺度，我哋又唔會話要收錢先，大家講個信字。」店員態度親切，自然令客人對此店的印象分大增。
書法畫具 任借任用
筆者認為Chill-Place最與眾不同的地方，是它除了提供基本設備外，更備有畫畫、書法等工具供客人使用，學生溫溫吓書可以畫畫減壓，上班或Free lancer一族望住窗外舊區景色突然有靈感時，都可以多一個方式記錄落嚟，無論是否熱愛藝術都Like啦﹗
草坪 Chill – Place
地址：紅磡蕪湖街 69 A南安商業大廈12樓（港鐵黃埔站 A出口）
電話：2556 0800 營業時間：09:00 – 22:30
收費：$36 /一小時；$80/三小時 ; $110/全日
查詢︰https://chill-place.com/
4
Co-read
可能係全港最便利嘅共享空間
位於旺角嘅Co-read論地點真係無得輸，港鐵旺角站一出右轉上樓便到達，實在太方便！由於窗戶較多，整體環境光猛開揚，樓底高且空間感闊落，全店沒有刻意劃分休閒區及自修區，也沒有會議室，特別方便1-2個人上嚟溫習自修，如果一班人想小組討論，就可能要搵其他地方啦﹗
枱櫈闊落 重視細節
旺角鋪租貴地方細就係人都知，雖然Co-read全場擺滿枱櫈，但負責人Alex話喺設計上都花咗好多心思：「我哋寧願花多啲錢喺細節上，都唔想犧牲客人嘅感受。例如選用落地玻璃分隔寧靜區同出面環境，希望可以引入窗外嘅自然光，仲有特製較大嘅枱櫈，每張枱嘅闊度都可以放得落兩部電腦，唔洗好似出面連鎖咖啡店咁張枱細細，要客人就住就住。」
地點優越 拍拖勝地
問負責人Alex開業至今有沒有遇過有趣的客人或事件，Alex笑言：「好多時夜晚呢度都會變成拍拖勝地，唔少情侶會上嚟兩三個鐘靜靜地睇吓片或者休息、飲杯茶。因為地點鄰近港鐵站，甚至試過有約交收嘅人會喺度長駐一整日，等唔同客上嚟交收。」係嘅，與其拍拖行街行嚟行去都係嗰啲地方，或者約人交收要企喺地鐵站竹等，不如花少少錢上嚟嘆杯Nespresso嘅膠囊咖啡，任飲任食飲品零食，相當划算。
Co-read
地址：旺角彌敦道703號金鑽璽9樓全層（港鐵旺角站A1出口）
電話：5639 6111 營業時間：11:00 – 22:00
收費︰$30/一小時；$80/三小時；$110/全日
查詢︰ https://coread.co/
5
F-zone
聚集新界區Freelancer的新式空間
大部分共享空間都聚集在九龍、港島區，叫新界人情何以堪？好彩﹗新界人仲有F-zone﹗開業約半年的F-zone位於沙田石門的商業住宅區，由於區內甚少共享工作空間，難怪極受新界區Freelancer歡迎。F-zone鄰近港鐵石門站，吸引馬鐵沿線及大埔等新界區居民幫襯。一上到F-zone就被其落地玻璃窗外的風景吸引，加上高樓底，景觀相當開揚，窗邊的單人座位chill到不得了，還有自修座位、靠牆吧枱、沙發，還有兩間會議室，適合不同客人使用。
「樓上」帶挈 熟客人流
共享空間對香港人來說算是新式概念，很多人不了解這個空間的用途。放Zone創辦人Janet指由於鄰近大型商店「樓上」，因此能帶動人流：「有啲媽媽嚟買參茸海味，附近寫字樓嘅OL又會中午或者放工嚟買嘢，佢哋去完樓上掃貨，一出嚟就見到對面係我哋，自然留意到呢度。」Janet更指大多熟客來過第一次發現這裡地方舒適，便會購買5-days pass或是10-days pass，每天來工作。筆者作為新界人，知道咗呢個可以對住靚景，專注做嘢或放鬆嘅好地方，都真係好驚喜，堅想成日上嚟幫襯呢！
舒適空間 吸引媽媽
除了一班固定的Freelancer學生客人之外，此處更成為媽媽的放鬆地！事關石門附近有許多補習或Playgroup機構，不少媽媽送仔女去補習後，便會來這裡享受數小時的「私人時間」，Janet表示：「有啲媽媽專揀梳化位舒服地煲劇，又有啲在職媽媽會把握呢幾個鐘處理公務。除此之外，媽媽們又會租用會議室請老師嚟幫仔女補習。」果然係一個多用途嘅共享空間。
放Zone (F-zone)
地址：沙田石門京瑞廣場一期11樓 E&F (港鐵石門站C出口)
電話：5119 6814 營業時間：10:00 – 22:00
收費︰$40/一小時；$88/三小時；$118/全日
查詢︰ https://fzonehk.com/
延伸閱讀︰搵地方hea最忌hea搵 繼續走訪好hea嘅「共享空間」Co-working Space 2